Mat 16
16
Afalisi na Asaduki osenga ciziŵikilo
(Mk 8:11-13; Lk 12:54-56)
1Afalisi na Asaduki ewela kuzomuyezya, emukonsha kuti aŵawoneshe ciziŵikilo cofumila Kululu. 2Yesu eŵayasuka kuti, “Payuloŵa zuŵa mukuti, ‘Kukace luweme pakuti kululu ni kusweta.’ 3Nipo mmawa mukuti, ‘Kuŵe mvula lelo, pakuti kululu ni kusweta nipo kuyofya.’ Mutwesha kuziŵa kawonekelo ka kululu, koma mutweshalini kutanthauzila ciziŵikilo ca nsita ino. 4Luko iyipa na ya ucende yupangwa ciziŵikilo cokanganisha, koma cipewelini kwa yeve koma tyala ciziŵikilo ca Yona.” Tetyo, efumapo noluta.
Visambizyo va wenye va Afalisi na Asaduki
(Mk 8:14-21; Lk 12:1)
5Asambili pecifwika ku silya, enze eluŵa kutakula mkate. 6Yesu eŵawuzya kuti, “Nkhalani celu na cofufumishila mkate ca Afalisi na Asaduki.”
7Nipo etatika kulaŵizyana ŵeka–ŵeka kuti, “Tiliyolete mkate.”
8Yesu peciziŵa va ivi, elaŵila kuti, “Mwewo ŵa cicetekelo citontho, cikomo ni cinji mulaŵila kuti muliye mkate? 9Kansi mumvwishishalini? Mukumbukalini mikate isanu kuti ŵanthu myanda isanu (5,000) ecilya, mwetola vitundu vingananji va vakulya vosala? 10Nga soti mikate isanu na iŵili yecilya ŵanthu myanda inayi (4,000), mwetola vitundu vingananji va vakulya vosala? 11Mukangiwa tyani kumvwishisha kuti niliyolaŵile va mkate? Ŵani menso na cofufumishila mkate ca Afalisi na Asaduki.” 12Lomba emvwishishila kuti aliyolaŵile va cofufumishisha mkate, koma visambizyo va Afalisi na Asaduki.
Petulo osimikizya va Yesu
(Mk 8:27-30; Lk 9:18-21)
13Yesu pecifwika ku citwa ca Kayisaliya–Filipi, ekonsha asambili ŵake kuti, “Ŵanthu olaŵila kuti Mwana wa Munthu ni ŵani?”
14Ŵeve eyasuka kuti, “Ayakine olaŵila kuti Yohane Mbatizi, ayakine olaŵila kuti Eliya, na ayakine olaŵila kuti Yelemiya keno yumo wa aneneli.”
15Lomba eŵakonsha kuti, “Nga mwewo, mukuti nine ŵani?”
16Simoni Petulo eyasuka kuti, “Nimwe Mesiya Mpulumushi Wolayizyiwa wala, Mwana wa Mulungu wa moyo.”
17Yesu elaŵila kuti, “Niwe woshukishiwa, Simoni mwana wa Yona! Pakuti munthu aliyokuwululile ici, koma Atata ali Kululu. 18Lomba nukuwuzya kuti, niwe Petulo (kutanthauza kuti ‘mwala’), nipo pa mwala uyu nikamangepo Mpingo wangu, nipo mphamvu ya Gehena ikapitepolini. 19Nikakupe tanthauzo ya Ufumu wa Kululu, nipo ciliconse cawamanga pano pansi cikomangiwa Kululu, nipo ciliconse cawamangulula pano pansi cikomangululiwa Kululu.” 20Tetyo, ewuzya asambili ŵake kuti asawuzye aliyense kuti yeve ni Mesiya Mpulumushi Wolayizyiwa wala.
Yesu olaŵililatu va kufwa na kuwuka kwake
(Mk 8:31-33; Lk 9:22)
21Kutatika nsita iyo, Yesu etatika kuziŵisha asambili ŵake kuti opangwika kuya ku Yelusalemu kuyotamana na vinthu vinyinji kufumila kwa Akulu ŵa Ayuda na Akulu ŵa Ansembe na Asambizyi ŵa Matetulo, nopayiwa, nipo kuti pa nsiku ya citatu akawukishiwe.
22Petulo emutola noluta naye pa mbali notatika kumucimula kuti, “Asikulu, ivi vicitikelini kwa mwewo.”
23Koma Yesu ecewuka nowuzya Petulo kuti, “Fumapo apa, wewo Satana! Upangwa kuniyifyisha, pakuti malingililo ŵako ni ŵa Mulungulini, ni ŵa ŵanthu tyala.”
Kutakula mtanda nokonkha Yesu
(Mk 8:34—9:1; Lk 9:23-27; Yh 12:25)
24Pamene apo Yesu ewuzya asambili ŵake kuti, “Aliyense opangwa kukonkha newo, azikane yeka na kuti atakule mtanda wake, nokonkha newo. 25Cikomo wopangwa kupulumusha moyo wake azeawutaye, koma wotaya moyo wake cikomo ca newo azeawufwane. 26Nga munthu ophindula vinji pakuŵa navo vonse va pa calo ca pansi, koma notaya moyo wake? Munthu angalipilenji cakuti anunulile moyo wake? 27Pakuti Mwana wa Munthu akawele na angelo mu ulemelelo wa Awusu wake, nipo akawezyele aliyense kulingana na vawacita. 28Nukuwuzyani vyendi kuti alipo pano ŵatiakafwelini mpaka akawone Mwana wa Munthu akuza mu Ufumu wake.”
Obecnie wybrane:
Mat 16: GMN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Nsenga New Testament © The Bible Society of Zambia, 2015.
