Luké 22
22
Ko e Fa‘ufa‘u ke Tāmate‘i ‘a Sīsū
(Māt 26.1-5,14,16; Ma‘ake 14.1,2,10,11; Sioné 11.45-53)
1PEA na‘e fakaofiofi mai ‘a e kātoanga tapu lēvani, ‘a ia ko hono hingoa ko e Pāsova.#‘Eki 12.1-27 2Pea ko e hou‘eiki taula‘eiki, mo e kau sikalaipe, na‘a nau fiu‘a feinga pe ‘e fēfē ha‘anau fakapoongi ia; he na‘a nau manavahē ki he kakai.
Ko e Loto ‘a Siutasi ke Lavaki‘i ‘a Sīsū
(Māt 26.14-16; Ma‘ake 14.10,11)
3Pea hū ‘a Sētane kia Siutasi na‘e ui ko ‘Isikāliote, ‘a ia na‘a ne ‘i he kau Hongofulumāua. 4Pea ne ‘alu mei ai ‘o alea mo e hou‘eiki taula‘eiki, mo e ngaahi ‘eikitau, ki ha anga ‘o ‘ene lavaki‘i ia kiate kinautolu. 5Pea nau fiefia, mo nau fakapapau ke ‘ange ha‘ane pa‘anga. 6Pea na‘a ne tala‘ofa ke fai, pea ne kumi ha faingamālie ke lavaki‘i ia kiate kinautolu ‘i ha taimi ‘oku mama‘o ai ‘a e kakai.
Ko e Taumafa ‘a Sīsū mo e Kau Akó
(Māt 26.17-25; Ma‘ake 14.12-21; Sioné 13.21-30)
7Pea na‘e hoko ‘a e ‘aho ‘o e tapu lēvani, ‘a ia na‘e totonu ke tāmate‘i ai ‘a e Pāsova. 8Pea ne fekau ‘a Pita mo Sione, ‘o ne pehē, ‘alu ‘o teuteu ma‘atautolu ‘a e Pāsova, ke tau kai ia.
9Pea na pehē ki ai, Ko e potu fē ‘oku ke loto ke ma teuteu ai?
10Pea ne pehē kiate kinaua, Ko eni, ‘i ho‘omo hū ki he kolo, te mo fetaulaki mo ha tangata ‘oku fua ha hina vai; mo muimui ki ai ‘o a‘u ki he fale ‘oku ne ‘alu ki ai. 11Pea te mo lea ki he matāpule ‘o e fale, ‘Oku pehē mai ‘e he Tangata‘eiki, pe ko e fē ‘a e loki ke u kai ai ‘a e Pāsova mo ‘eku kau ako? 12Pea ko e tangata ko ia, te ne fakahā kiate kimoua ha fu‘u falekai ‘i ‘olunga, kuo ‘osi faliki: mo hanga ‘o teuteu ‘i he potu ko ia.
13Pea ‘i he‘ena ‘alu atu, na‘a na ‘ilo pē ‘o hangē ko ‘ene tala kiate kinaua, ‘o na teu ‘a e Pāsova.
Ko e ‘Ohomohe ‘a e ‘Eikí
(Māt 26.26-30; Ma‘ake 14.22-26; 1 Kol 11.23-25)
14Pea ‘i he hokosia hono houa, na‘a ne tokoto hifo, ‘a ia mo e kau ‘Aposetolo. 15Pea ne pehē kiate kinautolu, Kuo u mātu‘aki holi ke kai ‘a e Pāsova ko eni fakataha mo kimoutolu, ‘i he te‘eki ke hoko ‘eku mamahi: 16he ‘oku ou tala atu, ‘e ‘ikai ‘aupito te u toe kai ia, ‘o a‘u ki he taimi ‘e fakakakato ai ia ‘i he Pule‘anga ‘o e ‘Otua.
17Pea ‘i he‘ene ma‘u ha ipu, na‘a ne fai ha fakafeta‘i, ‘o ne pehē, To‘o ‘eni ‘o vahevahe kiate kimoutolu: 18he ‘oku ou tala atu, Hili ‘eni, ‘e ‘ikai ‘aupito te u inu mei he fua ‘o e vaine, kae‘oua ke hoko mai ‘a e Pule‘anga ‘o e ‘Otua.
19Na‘a ne to‘o foki ha fo‘i mā, ‘o ne fakafeta‘i, mo ne pakipaki ‘o ‘ange kiate kinautolu, ‘o ne pehē, Ko hoku sino ‘eni, ‘a ia ‘oku foaki koe‘uhi ko kimoutolu: mou fai ‘eni mōku fakamanatu. 20Na‘a ne to‘o pehē foki ‘a e ipu, hili ‘a e ‘ohomohe, ‘o ne pehē, Ko e ipu ni ko e fuakava fo‘ou ia ‘oku fai‘aki hoku toto, ‘a ia ‘oku lilingi koe‘uhi ko kimoutolu.#22.20 Ko e ngaahi hiki fuoloa ‘e ni‘ihi, ‘oku ‘ikai ke ‘asi ai ‘a e ngaahi lea ‘i he hili ‘a e Ko hoku sinó eni ‘o a‘u ki he ngata‘anga ‘o e veesi 20. #Sel 31.31-34
21Ka neongo ia, vakai, ko e nima ‘o hoku lavaki ‘oku ala mo au ki he tēpile ni.#Saame 41.9 22‘ē, ko e ‘alu ‘a e Fanautama ‘a Tangata ‘oku hangē ko ia ne tu‘utu‘uni: ka neongo ia, ‘oiauē ‘a e tangata ko ia te ne lavaki‘i ia!
23Pea nau kamata fefehu‘i‘aki, pe ko hai tū ia ‘iate kinautolu ‘oku teu fai pehē.
Ko e Fekīhiaki pe ko Hai ‘Oku Mā‘olungá
24Pea na‘e ai foki ha fakakikihi ‘iate kinautolu, pe ko hai ‘iate kinautolu ‘oku matamata ko e mā‘olunga.#Māt 18.1; Ma‘ake 9.34; Luk 9.46 25Ka ka pehē ‘e ia kiate kinautolu, Ko e ngaahi tu‘i ‘o e Senitaile ‘oku nau pule‘i kinautolu; pea ko kinautolu ‘oku fa‘iteliha kiate kinautolu ‘oku lau ko e kau Ngāuemālō.#Māt 20.25-27; Ma‘ake 10.42-44 26Ka ‘e ‘ikai te mou pehē kimoutolu: ka ko ia ‘oku mā‘olunga ‘iate kimoutolu ke ne hoko ‘o hangē ko e kimui; pea ko e takimu‘a ke hangē ko e sevāniti.#Māt 23.11; Ma‘ake 9.35 27He ko hai ‘oku mā‘olunga, ko ia ‘oku nofo ‘i he kai, pe ko ia ‘oku sevāniti? ‘ikai ko ia ‘oku nofo ‘i he kai? ka ko au ‘oku ou ‘i homou lotolotonga ‘o hangē ko e sevāniti.#Sioné 13.12-15
28Ka ko kimoutolu ia kuo nofo‘i ma‘u mo au ‘i hoku ngaahi ‘ahi‘ahi. 29Pea ko au ‘oku ou tu‘utu‘uni ha pule‘anga mo‘omoutolu, ‘o hangē ko e tu‘utu‘uni ha pule‘anga mo‘oku ‘e he‘eku ‘Eiki. 30Ke mou kai mo inu ‘i he‘eku tēpile ‘i hoku pule‘anga, pea nofo ki ha ngaahi taloni, ‘o fakamāu‘i ‘a e matakali ‘e hongofulu mā ua ‘o ‘Isileli.#Māt 19.28
‘E Sivi‘i e Kau Ako ‘a Sīsuú
(Māt 26.31-35; Ma‘ake 14.27-31; Sioné 13.36-38)
31‘E Saimone, ‘e Saimone, tā kuo tala kimoutolu ‘e Sētane, ke ne sivi kimoutolu ‘o hangē ko e uite: 32ka kuo u hūfia koe, ke ‘oua na‘a mate ‘aupito ho‘o tui ‘a‘au: pea ‘oka ke ka toki foki mai, ke ke poupou ‘e koe ho ngaahi tokoua.
33Ka ka pehē ‘e ia ki ai, ‘Eiki, kuo ‘osi teu hoku loto ke ‘alu, ‘io, ki he pilīsone mo e mate, ‘o kapau ko e fakataha mo koe.
34Pea ne pehē, Pita, ‘oku ou tala atu, ‘e ‘ikai ‘u‘ua ‘a e moa ‘anai, kae‘oua ke ke faka‘ikai ‘o tu‘o tolu mālō ‘oku ke ‘ilo au.
Ko e ‘ū Me‘a ‘Oku Fai ‘Aki e Fonongá
35Pea ne pehē kiate kinautolu, ‘i he‘eku fekau atu kimoutolu ta‘eha kato pa‘anga, pe ha kato ‘oho, pe ha ngaahi sū, na‘a mou masiva ‘i ha me‘a?#Māt 10.9-10; Ma‘ake 6.8-9; Luk 9.3; 10.4
Pea nau pehē, ‘Ikai.
36Pea ne toki lea kiate kinautolu, Ka ‘i he taimi ni, ‘ilonga ha taha ‘oku ne ma‘u ha kato pa‘anga, ke ne to‘o ia, pehē foki mo ha kato ‘oho; pea ko ia ‘oku ‘ikai ke ma‘u ha me‘a pehē, ke ne fakatau atu hono kofu ke ma‘u ‘aki ha heletā. 37He ‘oku ou pehē atu kiate kimoutolu, kuo pau ke fakamo‘oni ‘iate au ‘a e me‘a ko eni ne tohi, pea na‘e fakakau ia mo e kau maumau lao: he ko eni ‘oku faka‘a‘au ke iku ‘a e me‘a na‘e tohi kiate au.#‘Ais 53.12
38Pea nau pehē, ‘Eiki, vakai ko e heletā ‘eni ‘e ua. Pea ne pehē kiate kinautolu, ‘Oku lahi pē ia.#22.38 ‘Oku lahi pē ia; pe Tuku ia.
Ko e Lotu ‘a Sīsū
(Māt 26.36-46; Ma‘ake 14.32-42)
39Pea ‘i he‘ene ‘alu atu, na‘a ne fononga ki he mo‘unga ko ‘ōlive, ‘o hangē ko ‘ene fa‘a fai; pea muimui foki kiate ia ‘a e kau ako. 40Pea ‘i he‘ene hoko ki he potu, na‘a ne pehē kiate kinautolu, Mou lotu ke ‘oua na‘a mou hū ki ha ‘ahi‘ahi.
41Pea mahu‘i atu ‘e ia meiate kinautolu, fe‘unga nai mo e lisi‘anga maka, ‘o ne tū‘ulutui ‘o lotu, 42‘o ne pehē, ‘E Tamai, kapau ko ho finangalo, ke ke fakalaka ‘a e ipu ni meiate au: kaekehe ke ‘oua na‘a fai hoku loto, ka ko ho‘ou pē. 43Pea na‘e hā kiate ia ha ‘āngelo mei he langi, ‘o ‘omi ha‘ane mālohi. 44Pea hoko ia ‘o feinga lahi, pea fakautuutu ‘ene lotu fakamātoato: pea hoko ‘ene tauta‘a ‘o hangē ko e ngaahi tulutā ta‘ata‘a, ‘o vāngana ki kelekele.#22.44 ‘Oku ‘ikai ke ‘asi ‘a e veesi 43 mo e 44 ‘i he ngaahi hiki fuoloa ‘e ni‘ihi.
45Pea ‘i he‘ene tu‘u hake mei he‘ene lotu, ‘o ‘alu ki he kau ako, na‘a ne ‘ilo kinautolu kuo fakamohe ‘e he‘enau mamahi. 46Pea ne pehē kiate kinautolu, Ko e hā ‘oku mou mohe ai? mou tu‘u hake, ‘o lotu ke ‘oua na‘a mou hū ki ha ‘ahi‘ahi.
Ko e Puke Pōpula ‘o Sīsū
(Māt 26.47-56; Ma‘ake 14.43-50; Sioné 18.3-11)
47Lolotonga ‘ene kei lea, tā ko ha fu‘u kakai ‘oku ha‘u; pea ko e tangata na‘e hingoa ko Siutasi, ko e toko taha ‘o e kau Hongofulumāua, na‘a ne ‘alu mu‘omu‘a ‘iate kinautolu, ‘o ne fakaofi kia Sīsū ke ‘uma kiate ia. 48Pea pehē ‘e Sīsū ki ai, ‘E Siutasi, koe‘uma‘ā koā ‘oku ke lavaki‘i ‘aki ‘a e Fanautama ‘a Tangata?
49Pea ko kinautolu na‘e ‘ia Sīsū, ‘i he‘enau vakai ‘a e me‘a ‘e hoko, na‘a nau pehē, ‘Eiki, te mau taa‘i ‘aki ‘a e heletā? 50Pea ko e toko taha ‘iate kinautolu tokua, na‘a ne taa‘i ‘a e tamaio‘eiki ‘a e Taula‘eiki Lahi, ‘o ne tu‘usi hono telinga to‘omata‘u.
51Pea tali ‘e Sīsū, ‘o ne pehē kiate kinautolu, Tuku si‘i ange kae‘oua ke lava ‘eni. Pea ne ala ki he lau‘i telinga, ‘o ne fakamo‘ui ia.
52Pea lea ‘a Sīsū kiate kinautolu kuo hoko kiate ia, (ko e ni‘ihi ‘o e hou‘eiki taula‘eiki, mo e hou‘eiki tau ‘o e Temipale, mo e kau mātu‘a), ‘o ne pehē, Ko ho‘omou omi fakaheletā mo faka‘akau, ‘o hangē ko ha kaiha‘akau au! 53Ko e ‘aho kotoa pē mo ‘eku ‘iate kimoutolu ‘i he Temipale, pea na‘e ‘ikai te mou ala mai kiate au: ka ko hono ‘uhinga, ko homou ava ‘eni, pea mo e tu‘u ‘a fakapo‘uli.#Luk 19.47; 21.37
Koe Faka‘ikai‘i ‘e Pita ‘a Sīsū
(Māt 26.57,58,69-75; Ma‘ake 14.53,54,66-72; Sioné 18.12-18,25-27)
54Pea nau puke ia, ‘o taki ‘o a‘u ki he fale ‘o e Taula‘eiki Lahi.
Ka ka muimui atu ‘a Pita mei he mama‘o. 55Pea kuo nau tafu ha afi ‘i he loto loto‘ā, mo nau nonofo, pea nofo ‘a Pita ‘o lotolotoi ‘iate kinautolu. 56Pea ko e kaunanga ‘e taha na‘a ne vakai kiate ia ‘i he‘ene nofo ki he maama; pea ne sio fakamama‘u kiate ia, ‘o ne pehē, Ko e siana ni foki na‘e ‘iate ia.
57Ka ka faka‘ikai ‘e ia, he‘ene pehē, Fefine, ‘oku ‘ikai te u ‘ilo ‘a e toko taha ko ia.
58Pea fuoloa si‘i atu na‘e mamata ki ai ‘e ha toko taha kehe, ko e tangata, ‘o ne pehē, Ko koe foki ‘oku ke kau ki he fa‘ahinga ko ia.
Pea pehē ‘e Pita, Tangata, ‘oku ‘ikai.
59Pea kuo mahili nai ha houa ‘e taha, pea fakapapau mai ha tangata ‘e taha, ‘o pehē, ‘ā, ‘oku mo‘oni, na‘e kau mo ia ‘a e siana ni foki: kae‘uma‘ā ko e Kāleli ia.
60Ka ka pehē, ‘e Pita, Tangata, ‘oku ‘ikai te u ‘ilo ‘a e me‘a ‘oku ke lau ki ai. Pea fakafokifā, lolotonga ‘ene kei lea, na‘e ‘u‘ua ‘a e moa.
61Pea tafoki ‘a e ‘Eiki ‘o sio fakamama‘u kia Pita. Pea manatu hifo ‘a Pita ki he folofola ‘a e ‘Eiki, ‘a ‘ene pehē mai, ‘I he te‘eki ke ‘u‘ua ‘a e moa ‘anai, te ke fakafisinga au ‘o tu‘o tolu mālō. 62Pea ne ‘alu atu kitua‘ā, ‘o ne tangi mamahi.
63Pea ko e kau tangata na‘a nau kuku ‘a Sīsū na‘a nau pā‘usi‘i ia, he‘enau haha ia. 64Pea nau fakapūlou ia, ‘o nau fakafehu‘i ki ai, ‘o pehē, Mate mai pe ko hai ia na‘e taa‘i koe? 65Pea lahi ‘a e ngaahi lea kehekehe na‘a nau ‘ai kiate ia, ko e tālalakulaku.
Ko Hono Faka‘eke‘eke ‘o Sīsū ‘e he Fakataha‘anga Lahi ‘o e Kakai Siú
(Māt 26.59-66; Ma‘ake 14.55-64; Sioné 18.19-24)
66Pea ‘i he‘ene ‘aho hake, na‘e tefua mai ‘a kinautolu na‘e kau ki he Fakataha Fakamātu‘a ‘o ‘Isileli, ‘o ‘ikai ko e hou‘eiki taula‘eiki pē, ka ko e kau sikalaipe foki; ‘o nau taki ange ia ki he‘enau fakataha mo nau pehē, Kapau ko e Mīsaia koe, tala mai. 67Pea ne pehē kiate kinautolu, Kapau te u tala kiate kimoutolu, tala‘ehai te mou tui.
68Pea kapau te u fai atu ha fehu‘i, tala‘ehai te mou tali. 69Ka hili ‘eni ‘e nofo ‘a e Fanautama ‘a Tangata ki he nima to‘omata‘u ‘o e māfimafi ‘o e ‘Otua.
70Pea nau pehē kotoa pē, ‘Io! pea ko e ‘Alo ‘o e ‘Otua koe?
Pea ne pehē kiate kinautolu, Ka na‘e fai; ko au.
71Pea nau pehē, Koe‘uma‘ā ‘etau toe kumi fakamo‘oni: he kuo tau fanongo kitautolu ki he‘ene lea ‘a‘ana.
Obecnie wybrane:
Luké 22: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
