Luké 23

Ko e Fakamāu‘i ‘e Pailato ‘a Sīsū

(Māt 27.1,2,11-14; Ma‘ake 15.1-5; Sioné 18.28-38)

1PEA tu‘u hake ‘a e fakataha kotoa, ‘o nau taki ia kia Pailato. 2Pea nau hanga ‘o talatalaaki‘i ia, ‘o pehē, Na‘a mau ‘ilo ‘a e siana ni ‘oku ne veuveuki homau kakai, mo ne ta‘ofi ‘a e fai tukuhau kia Sisa, mo ne pehē ko Kingi Kalaisi ia.

3Pea fehu‘i ‘e Pailato kiate ia, ‘o ne pehē, Ko koe ko e Tu‘i ‘o e kakai Siu, ‘ō?

Pea ne tali ki ai ‘o ne pehē, Ko ia pē ‘oku ke me‘a.

4Pea lea ‘a Pailato ki he hou‘eiki taula‘eiki mo e kakai, ‘oku ‘ikai te u ‘ilo ha hala ‘i he tangata ni.

5Ka ka faka‘utufī pē kinautolu he‘enau pehē, ‘ā, ‘oku ne o‘i ‘a e kakai, he‘ene faiako ‘i Siutea kātoa, ‘o ne fai mei Kāleli ki heni.

Ko e Taki ‘o Sīsū kia Hēlota

6Pea ‘i he fanongo ki ai ‘a Pailato, na‘a ne fehu‘i pe ko e tangata Kāleli ia. 7Pea ‘i he‘ene mea‘i ‘oku mei he pule‘anga ‘o Hēlota ia, na‘a ne fekau ke ‘ave ia kia Hēlota, he na‘e ‘i Selusalema mo ia ‘i he taimi ko ia. 8Pea ‘i he vakai ‘e Hēlota kia Sīsū, na‘a ne fakamālie lahi: he kuo fuoloa mo ‘ene faka‘amu ke mamata kiate ia, koe‘uhi ko hono fa‘a tala ongo mai; pea kuo ne ‘unaloto ke sio ki ha me‘a fakaofo te ne fai. 9Pea na‘e lahi ‘a e ngaahi fehu‘i na‘a ne fai kiate ia; ka ka ‘ikai momo‘i tali ‘e ia ha me‘a. 10Pea tutu‘u ai ‘a e hou‘eiki taula‘eiki, mo e kau sikalaipe, ‘o nau tōtōivi hono talatalaaki‘i. 11Pea fakasīkaka‘i ia ‘e Hēlota mo va‘inga‘aki, he ‘ai kiate ia ha kofu ngingila, pea kau ai mo ‘ene kau tau; pea ne toki fekau ke toe ‘ave kia Pailato. 12Pea na‘e kamata fe‘ofo‘ofani ‘a Pailato mo Hēlota ‘i he ‘aho ko ia: he ne na vākovi mu‘a.

Ko e Tautea Mate

(Māt 27.15-26; Ma‘ake 15.6-15; Sioné 18.39–19.16)

13Pea fakataha ‘e Pailato ‘a e hou‘eiki taula‘eiki, mo e kau pule, mo e kakai, 14pea ne pehē kiate kinautolu, Na‘a mou ‘omi kiate au ‘a e tangata ko eni, ko e toko taha tokua, ‘oku ne taki kehe ‘a e kakai: pea ko eni, ne u ‘eke ‘a e tangata ni ‘i homou ‘ao ‘e au, pea na‘e ‘ikai te u ‘ilo ha‘ane momo‘i hala ‘e taha ‘i he ngaahi me‘a na‘a mou talatalaaki‘i ai ia. 15Kae‘uma‘ā ‘oku pehē mo Hēlota; he kuo ne fekau ke toe ‘omi ia kiate kitautolu; pea tā ‘oku ‘ikai ha me‘a kuo ne fai ‘oku taau mo e mate. 16Ko ia, te u ‘ai hano kini pea vete ange. 17(Pea ka hoko leva te ne vete ange ha pōpula ‘e taha ‘i he kātoanga.)#23.17 ‘Oku ‘ikai ke ‘asi ‘a e vēsíni ‘i he ngaahi hiki fuoloa ‘e ni‘ihi. (vakai kia Ma‘ake 15.6).

18Pea kalanga hake ‘a e fu‘u kakai kātokatoa, ‘o pehē, Tafi‘i ‘a e siana ni, pea vete mai ‘a Palāpasa: 19(‘a ia ko e toko taha na‘e mo‘ua ‘i he pilīsone, koe‘uhi ko ‘ene kau ‘i ha angatu‘u ne hoko ‘i he olo, mo ‘ene fakapō).

20Pea na‘e toe lea ‘a Pailato kiate kinautolu, ko ‘ene loto ke vete ange ‘a Sīsū. 21Ka ka lea ange ‘a kinautolu, ‘o pehē, Kalusefai, kalusefai ia.

22Pea me‘a ia kiate kinautolu ko hono tu‘o tolu, He ko e hā ha kovi kuo fai ‘e he tangata ni? Kuo ‘ikai te u momo‘i ‘ilo ha‘ane hiamatea: ko ia te u ‘ai hano kini, pea vete ange.

23Ka ka ta‘omaki atu pē kinautolu, ‘o nau longoa‘a, he‘enau kole ke kalusefai ia. 24Pea na‘e lava‘i ‘e he‘enau longoa‘a. Pea ko e fakamaau ‘a Pailato na‘e fai ki honau loto. 25Pea ne vete ange ‘a e siana na‘a nau kole ki ai, ‘a e siana na‘e lī ki he pilīsone ko ‘ene angatu‘u mo fakapō: ka ko Sīsū na‘a ne tuku atu ke fai honau loto ki ai.

Ko e Tukifa‘o ‘o Sīsū ki he Kolosí

(Māt 27.31-44; Ma‘ake 15.21-32; Sioné 19.17-27)

26Pea ‘i he‘enau taki ange ia, na‘a nau puke ‘a Saimone, ko e motu‘a Sailine, ‘i he‘ene ha‘u mei ‘uta, ‘o nau hilifaki kiate ia ‘a e kolosi, ke ne fua atu ia ‘o muimui kia Sīsū.

27Pea na‘e muimui atu ki ai ha fu‘u tokolahi ‘o e kakai, kae‘uma‘ā ha kau fefine, ‘a ia na‘a nau sī fatafata mo ‘oiauē ‘iate ia. 28Ka ka tafoki ‘a Sīsū kiate kinautolu ‘o ne pehē, Si‘i kau fefine Selusalema, ‘oua te mou tangi koe‘uhi ko au, ka mou tangi pē koe‘uhi ko kimoutolu, pea koe‘uhi ko ho‘omou fānau: 29he tala atu, ‘oku tu‘unuku mai ha taimi ‘a ia te nau pehē ai, Monū‘ia ā ka ko e pa‘a, pea mo e manava na‘e ‘ikai fanau, mo e huhu na‘e ‘ikai fai ai ha huhu. 30Ko e taimi ko ia te nau hanga ‘o lea ki he ngaahi mo‘unga, Hinga mai ā kiate kimautolu, pea ki he ngaahi mā‘olunga, Fufū kimautolu.#Hōs 10.8; Fkhā 6.16 31He kapau ‘oku nau fai pehē ki he ‘akau mata, ko e hā ‘e fai ki he mōmoa!

32Pea na‘e taki ange mo ia ke tāmate‘i ha ongo angahala kehe ‘e toko ua.

33Pea ‘i he‘enau a‘u ki he potu ‘oku ui ko Kalevale,#23.33 Ko e lea faka-Latina eni ki he ‘ulupoko. na‘a nau kalusefai ‘i ai ia mo e ongo angahala, ko e taha mei to‘omata‘u, mo e taha mei to‘ohema. 34Pea me‘a ‘e Sīsū, ‘Alā Tamai, fakamolemole ‘a kinautolu; he ‘oku ‘ikai te nau ‘ilo ‘a e me‘a ‘oku nau fai.#23.34 ‘Alā… fai: ‘Oku ‘ikai ke ‘asi ‘a e kupu ko ení‘i he ngaahi hiki fuoloa ‘e ni‘ihi. #Saame 22.18 Pea ‘i he tufa hono ngaahi kofu, na‘a nau talotalo ki ai.

35Pea na‘e tu‘u ‘a e kakai ‘o mamata. Pea fingofingo foki ‘a e kau pule, he‘enau pehē, Na‘a ne fakahaofi ‘a e kakai kehe; ‘ē, tuku ke ne fakahaofi ia, ‘o kapau ko e Mīsaia ia ‘a e ‘Otua, ko e toko taha kuo ne fili.#Saame 22.7

36Pea na‘e luma‘i ia ‘e he kau tau foki, he‘enau ‘unu‘unu atu ‘o ‘ange ha vinika.#Saame 69.21 37Mo nau pehē, Kapau ko e Tu‘i Siu koe, fakahaofi koe.

38Pea na‘e ai mo ha tohi na‘e ‘ai he ‘ulu‘i kolosi, ‘o pehē,

KO E TU‘I SIU ‘ENI.

39Pea ko e toko taha‘i he ongo angahala na‘e tautau na‘a ne tālalakulaku kiate ia, ‘o pehē, ‘Ikai ko e Mīsaia koe? Pe‘i fakahaofi koe mo kimaua.

40Ka ka tali ‘a e taha ‘o ne valoki‘i ia, ‘o pehē, Hilinga mo koe ke ke ‘apasia ki he ‘Otua, he ‘oku mo kaungā tautea mo ia. 41Pea tonuhekina ho‘otaua; he ‘oku ta kai ‘a e nunu‘a ‘o e ngāue na‘a ta fai: ka ko e toko taha ni, kuo ‘ikai ha‘ane momo‘i me‘a ta‘etaau ‘e fai. 42Pea ne pehē, ‘E Sīsū, manatu‘i au, ‘oka ke ka hoko mai kuo ke pule‘anga.

43Pea folofola ‘e ia ki ai, Ko au ē, ‘oku ou tala atu, Ko e ‘aho ni te ke ‘i Palataisi mo au.

Ko e Pekia ‘a Sīsuú

(Māt 27.45-56; Ma‘ake 15.33-41; Sioné 19.28-30)

44Pea ‘i he‘ene fe‘unga nai mo hono ono ‘o e houa, na‘e hoko ha po‘uli ki he fonua kotoa, ‘o a‘u ki hono hiva ‘o e houa. 45Pea na‘e fakapo‘uli ‘a e la‘ā, pea na‘e mahae ‘a e loto tatau ‘o e Fale Tapu.#‘Eki 26.31-33 46Pea kalanga le‘o lahi ‘a Sīsū, ‘o ne pehē, ‘e Tamai, ‘oku ou tuku hoku laumālie ki ho nima: pea ‘i he‘ene lea pehē na‘a ne hokotaki.#Saame 31.5

47Pea ‘i he vakai ‘e he senituliō ki he me‘a na‘e hoko, na‘a ne fakaongoongolelei‘i ‘a e ‘Otua, he‘ene pehē, Tā ko e mo‘oni pē, ko e tangata ta‘ehalaia ‘eni.

48Pea ko e kakai kātoa kuo fakataha ange ke mamata ki he me‘a ko ia, ‘i he‘enau vakai ki he ngaahi me‘a na‘e hoko, na‘a nau sī fatafata, mo nau foki. 49Ka na‘e tu‘u mei he mama‘o hono kau fe‘iloaki kotoa pē, mo e kau fefine foki na‘e muimui mai kiate ia mei Kāleli, ‘o nau mamata ki he ngaahi me‘a ko ia.#Luk 8.2-3

Ko Hono Telio ‘o Sīsuú

(Māt 27.57-61; Ma‘ake 15.42-47; Sioné 19.38-42)

50Pea tā na‘e ai ha matāpule na‘e hingoa ko Siosifa ‘a ia na‘e kau ‘i he falealea; ko e tangata lelei ia mo faitotonu: 51(ko e taha ‘eni na‘e ‘ikai loto ki he‘enau tu‘utu‘uni mo ‘enau ngāue) ko e matāpule ia mei ‘Alematea, ko e kolo Siu; pea ko e toko taha na‘e nofo ‘amanaki ki he Pule‘anga ‘o e ‘Otua. 52Ko e tangata ni na‘a ne ‘alu kia Pailato, ‘o kole ‘a e sino ‘o Sīsū. 53Pea ne ‘ohifo ia, ‘o teu ‘aki ha tupenu mahu‘inga; ‘o ne telio ‘a Sīsū ‘i ha fonualoto na‘e to‘oliu ‘i he maka, ‘a ia ‘oku te‘eki ‘aupito toka ai ha taha. 54Pea ko e ‘aho Tokonaki ia, pea na‘e ofi mai ‘a e tapu.

55Pea toupili ‘i mui ha tu‘unga fafine, ko e fa‘ahinga na‘e fononga mo ia mei Kāleli; pea nau vakai ‘a e fonualoto, mo e anga ‘o e fakatoka ‘o hono ‘anga‘anga. 56Pea nau foki, ‘o nau tokonaki ‘a e ngaahi fa‘ahinga ahi mo e lolo tākai.#‘Eki 20.10; Teu 5.14

Obecnie wybrane:

Luké 23: TMB

Podkreślenie

Udostępnij

Kopiuj