KO SĒNESI 18
18
Ko e Tala‘ofa mai ha Foha ‘o ‘Ēpalahame
1PEA hā kiate ia ‘a Sihova ‘i he ‘ulu ‘oke ‘o Mamilī, lolotonga ‘ene ta‘utu ‘i he mata tēniti ‘i he pupuha ‘o e ‘aho. 2Pea tāngaki hake ia ‘o vakai, tā ‘oku tutu‘u mai kiate ia ha tu‘unga tangata ‘e toko tolu: pea ‘i he‘ene mamata ki ai, na‘a ne lele mei he mata tēniti ke fakafetaulaki kiate kinautolu, pea ne tū‘ulutui ‘o punou ki he kelekele,#Hep 13.2 3mo ne pehē, ‘Ēī, ka ‘oku ke ‘ofa kiate au, ‘oua leva te ke mahu‘i meiate au ko e me‘avale kiate koe: 4ke ‘omi mu‘a ha hu‘a vai ke tafitafi ‘aki si‘omou va‘e, 5pea mou fakafiemālie ‘i he lolo ‘akau ni, ka u ‘omi ha me‘i me‘akai mo‘omou tokoni, ka mou toki me‘a; he ka ne ta‘e‘oua ia kuo mou afe mei ai kia kita me‘avale. Pea nau me‘a mai, Lelei; fai pē ‘a e me‘a ‘oku ke lau.
6Pea tofutu‘u ‘a ‘Epalahame ki he tēniti kia Sela, ‘o ne pehē, Vave ‘aki mai ha tatanga mahoa‘a ‘e tolu, ‘a e ‘elito‘i mahoa‘a, natu ia ‘o ngaohi keke ‘aki. 7Lele foki ‘a ‘Epalahame ki he fanga manu, ‘o ne puke ha kafi toutou mo lelei, pea ne ‘ange ki he siana, pea ne hanga ‘o ngaohi fakato‘oto‘o. 8Pea ne ‘omi ha pota mo ha hu‘akau mo e kafi kuo ne ngaohi, ‘o ne tuku ki honau ‘ao; ka ka tu‘u atu pē ia kiate kinautolu ‘i he lolo ‘akau lolotonga e fai ‘enau taumafa.
9Pea nau me‘a kiate ia, Kofa‘ā ho uaifi, ‘a Sela? Pea ne pehē, Ko ‘ena pē ‘i he tēniti.
10Pea me‘a ‘e ia, Te u mātu‘aki foki mai kiate koe ‘oka hoko hono taimi;#18.10 ‘oka… taimi; pe he peheni he ta‘u kaha‘ú. pea ‘e ai leva ha tama ‘a Sela ko ho uaifi.#Lom 9.9 Pea fanongo ki ai ‘a Sela mei he mata tēniti, ‘a ia na‘e ‘i hono takafalu.
11Pea ko ‘Epalahame mo Sela na‘a na mātutu‘a, ko e ongo me‘a kuo a‘u; pea ‘oku ‘ikai fai ‘e Sela ‘a e anga ‘o e fefine. 12Pea kata ‘a Sela ‘i hono loto, he‘ene pehē, Ko e pehē koā ke u ma‘u fiemālie, ka kuo fai e vaivai, pea motu‘a mo e tangata‘eiki foki?#1 Pit 3.6
13Pea folofola ‘a Sihova kia ‘Epalahame, Ko e hā na‘e kata ai ‘a Sela, ‘o ne pehē, ‘O teitei mo‘oni ha‘aku fanau, ka kuo u motu‘a? 14He ‘oku faingata‘a ha me‘a kia Sihova? Te u foki mai kiate koe ‘i hono taimi kuo tu‘utu‘uni ‘i he ta‘u kaha‘u, pea ‘e ma‘u ‘e Sela ha tama.#Luk 1.37
15Pea fakafisi ‘a Sela, ‘o ne pehē, Na‘e ‘ikai te u kata; he kuo ne manavahē. Pea ne me‘a mai, ‘Ā, na‘a ke kata pē.
Ko e Kole ‘a ‘Epalahame ke Fakahaofi ‘a Sōtoma
16Pea hiki hake mei ai ‘a e tu‘unga me‘a, ‘o nau hanga ke ‘alu ki Sōtoma; pea hā‘ele ‘a ‘Epalahame mo kinautolu ke moimoi‘i kinautolu. 17Pea folofola ‘a Sihova, Koe‘uma‘ā ha‘aku fufū meia ‘Epalahame ‘a e me‘a ‘oku ou teu fai; 18ka kuo pau ‘e hoko ‘a ‘Epalahame ko e pule‘anga lahi mo kaukaua, pea ‘e monū‘ia ‘iate ia ‘a e ngaahi pule‘anga kotoa pē ‘o māmani.#18.18 ‘e monū‘ia… māmani; pe ‘e kole mai ‘a e ngaahi pule‘anga kotoa pē ke u tāpuaki‘i kinautolu, ‘o hangē ko ‘eku tāpuaki‘i iá. 19He kuo u fili ia koe‘uhi ā ke ne fekau ‘ene fānau mo hono ‘api ‘amui, ke nau tauhi ‘a e ‘alunga ‘o Sihova, mo nau faitotonu mo tauhi tu‘utu‘uni, koe‘uhi kae ‘omi ‘e Sihova kia ‘Epalahame ‘a e me‘a kuo ne tala‘ofa kiate ia.
20Ko ia na‘e folofola ‘e Sihova, Ko e tangi ‘a Sōtoma mo Komola, seuke! ko e me‘a lahi, pea ko ‘enau angahala ko e me‘a mamafa ‘aupito; 21ka u ‘alu hifo mu‘a, ‘o vakai ā, pe kuo pehē fau ‘enau fai, ‘o hangē ko e tangi kuo ongo mai; pea ka ‘ikai, pea u ‘ilo.
22Pea afe atu ‘a e ongo tangata, ‘o na laka atu ki Sōtoma: ka ka tu‘u ai pē ‘a ‘Epalahame ‘i he ‘ao ‘o Sihova. 23Pea ‘unu‘unu atu ‘a ‘Epalahame, ‘o ne pehē, ‘Oku pehē koā? te ke faka‘auha ‘a e mā‘oni‘oni fakataha mo e angahala? 24Na‘a ‘oku ‘i ai ha toko nimangofulu mā‘oni‘oni ‘i he kolo ko ia: pea te ke faka‘auha pē, ‘o ‘ikai te ke fakamolemole ‘a e feitu‘u koe‘uhi ko e toko nimangofulu‘i mā‘oni‘oni ‘oku ‘i ai? 25Molekemama‘o ‘a e fai ‘e he ‘Afiona ha me‘a pehē, ‘a e tāmate‘i ‘a e mā‘oni‘oni fakataha mo e angahala, ‘io, ke fakatatau ‘a e mā‘oni‘oni mo e angahala: molekemama‘o ha‘o fai pehē: ‘o ‘ikai faitotonu koā ‘a e Tu‘i fakamaau ‘o māmani kātoa?
26Pea folofola ‘a Sihova, Kapau te u ‘ilo ‘i Sōtoma ha toko nimangofulu mā‘oni‘oni ‘i he kolo kotoa, pea te u fakamolemole ‘a e feitu‘u kātoa koe‘uhi ko kinautolu.
27Pea toe lea ‘a ‘Epalahame, ‘o pehē, ‘Ā, ko eni kuo te ala‘aki ke fakatau folofola ki he ‘Afiona, ‘a kita efu mo efuefu: 28na‘a ‘oku toe toko nima mōno toko nimangofulu‘i mā‘oni‘oni: te ke faka‘auha koā hono kotoa ‘o e kolo koe‘uhi ko ha toko nima? Pea ne folofola mai, ‘E ‘ikai te u faka‘auha ia ‘o kapau te u ‘ilo ‘i ai ha toko fāngofulu mā nima.
29Pea fai atu pē ‘ene fakatau folofola, ‘o pehē, Na‘a ko e toko fāngofulu pē ‘e ma‘u ‘i ai. Pea ne me‘a mai, ‘E ‘ikai te u fai telia ‘a e toko fāngofulu ko ia.
30Pea pehē ‘e ia, ‘Ā, ke ‘oua ‘e tuputāmaki ‘a e ‘Afiona ka u toe lea. Na‘a ko e toko tolungofulu pē ‘e ma‘u ‘i ai. Pea ne me‘a mai, ‘E ‘ikai te u fai ‘o kapau te u ‘ilo ‘i ai ha toko tolungofulu.
31Pea pehē ‘e ia, Ko eni kuo te ala‘aki ke fakatau folofola ki he ‘Afiona: na‘a ‘ilo ‘i ai ha toko uofulu pē. Pea ne me‘a mai, ‘E ‘ikai te u faka‘auha ia telia ‘a e toko uofulu ko ia.
32Pea ne pehē, ‘Ā, ke ‘oua na‘a tuputāmaki ‘a e ‘Afiona, ka u lea tātu‘otaha pē eni. Na‘a ko e toko hongofulu pē ‘e ma‘u ai. Pea folofola mai ia, ‘E ‘ikai te u faka‘auha ia telia ‘a e toko hongofulu ko ia.
33Pea hā‘ele hake ‘a Sihova ‘i he ‘osi ‘ena fefolofolai mo ‘Epalahame; pea foki ‘a ‘Epalahame ki hono feitu‘u.
Obecnie wybrane:
KO SĒNESI 18: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
