KO SĒNESI 17
17
Ko e Kamú, ‘a e Faka‘ilonga ‘o e Kovinānité
1PEA ‘i he faifai pea a‘u ‘a ‘Epalame ki hono hivangofulu mā hiva ta‘u, pea hā ‘a Sihova kia ‘Epalame, ‘o ne folofola kiate ia, ‘o pehē, Ko e ‘Otua au ko SĀTAI: ke ke taka ofi mai mo ke haohaoa. 2Pea te u fakaai ‘eta fuakava, pea te u ngaohi koe ke lahi, ko e lahi ‘i he lahi ange fau. 3Pea tō fo‘ohifo ‘a ‘Epalame: pea folofola ‘a e ‘Otua kiate ia, ‘o pehē, 4Ko e me‘a kiate au, ‘oku ‘i ai ‘eta fuakava mo koe, pea te ke hoko ko e tupu‘anga ‘o ha fuifui pule‘anga. 5Pea ‘e ‘ikai kei ui ho hingoa ko ‘Epalame [ko Tupu-‘anga-‘oku-‘eiki], ka ko ho hingoa ko ‘Epalahame [ko Tupu‘anga-‘o-ha tokolahi];#17.5 ‘Ēpalahame; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e tupu‘anga ‘o ha ngaahi kakai lahi. he kuo u tu‘utu‘uni koe ko e tupu‘anga ‘o ha fuifui pule‘anga.#Lom 4.17 6‘Io, te u ngaohi koe ke fai fanau ‘aupito ‘aupito, pea ke ke hoko ko e ngaahi pule‘anga; pea ‘e tupu meiate koe ha ngaahi tu‘i.
7Pea te u fakapapau ‘eku fuakava mo koe, pea mo ho hako ‘amui, ‘o laui to‘utangata, ko e fuakava ta‘engata, Ke u nofo ko e ‘Otua kiate koe, pea ki ho hako ‘amui.#Luk 1.55 8Pea te u ‘atu kiate koe, pea ki ho hako ‘amui, ‘a e fonua ‘oku ke nofo muli ai, ‘io, ‘a Kēnani kātoa, ko ho tofi‘a tukufakaholo: pea te u nofo ko honau ‘Otua.#Ngā 7.5
9Pea folofola ‘a e ‘Otua kia ‘Epalahame, Pea ko e me‘a kiate koe, te ke tauhi ‘eta fuakava, ‘e koe mo ho hako ‘amui, ‘o laui to‘utangata. 10Ko eni ‘eku me‘a te mau tauhi, ko e fuakava ‘a‘aku mo kimoutolu mo ho hako ‘amui, ‘ilonga ha‘amou fānau tangata ‘e kamu.#Ngā 7.8; Lom 4.11 11Te mou kamu ‘a e kili ‘o homou ‘ao; pea ko e faka‘ilonga ia ‘o e fuakava ‘a‘aku mo kimoutolu. 12Ka a‘u ki hono ‘aho valu, ka ko ha‘amou fānau tangata, pea ‘e kamu, ‘o laui to‘utangata; pe ko ha tupu ‘i ho ‘api, pe ko ha taha ‘oku ‘ikai ko ho hako, ka ko e fakatau ‘aki ha pa‘anga mei ha muli. 13Kuo pau pē ke kamu ‘a ia ‘oku tupu ‘i ho ‘api, pea mo ia ‘oku fakatau ‘aki ho‘o pa‘anga; koe‘uhi ke tu‘u ‘eta fuakava ‘i homou kakano, ko e fuakava ta‘engata. 14Pea ko e tama tangata, ‘a ia ne ‘ikai kamu ‘a e kili ‘o hono ‘ao, ‘io, ‘e motuhi ‘a e toko taha ko ia mei hono kakai; kuo ne maumau ‘a e fuakava mo au.
15Pea folofola ‘a e ‘Otua kia ‘Epalahame, Ko e me‘a ki ho uaifi ko Sēlai, ‘e ‘ikai toe ui‘aki ‘a e hingoa ko Sēlai, ka ko Sela hono hingoa [ko Fefine-pilinisesi]. 16Pea te u tāpuaki‘i ia, pea te u tuku foki ke ke ma‘u ha foha ‘iate ia, ‘io, te u tāpuaki‘i ia, pea te ne hoko ko e ngaahi pule‘anga; ‘e tupu meiate ia ha ngaahi tu‘i ‘o ha ngaahi kakai.
17Pea tō fo‘ohifo ‘a ‘Epalahame, ‘o ne kata; ‘o ne pehē ‘i hono loto, ‘E ma‘u fānau koā ‘e ha fu‘u teau ta‘u? Pe fā‘ele koā ‘a Sela ko ha fu‘u hivangofulu ta‘u? 18Pea lea ‘a ‘Epalahame ki he ‘Otua, Taumaiā ke ‘oua na‘a ngalo ‘a ‘Isime‘eli mei he ‘Afiona.
19Pea folofola ‘a e ‘Otua, ‘Ā, ‘e fā‘ele‘i mo‘oni ‘e ho uaifi ko Sela hao foha, pea te ke fakahingoa ia ko ‘Aisake;#17.19 ‘Aisake; Ko e ‘uhinga faka-Hepelū ‘o e hingoá ni ko e “‘okú ne kata”. pea te u fakapapau mo ia ‘eku fuakava, ko e fuakava ke tukufakaholo foki ki hono hako ‘amui. 20Pea ko e me‘a kia ‘Isime‘eli, kuo ongo mai ho‘o hū: ko eni, kuo u tāpuaki‘i ia, pea kuo u tu‘utu‘uni ke ne fanafanau, ‘o hoko ‘o lahi ‘aupito ‘aupito, pea ‘e tupu meiate ia ha hou‘eiki ‘e toko hongofulu mā ua; ‘io, te u ngaohi ia ko e pule‘anga lahi. 21Ka ko e fuakava mo au te u fakapapau ia mo ‘Aisake, ‘a ia ‘e fā‘ele‘i kiate koe ‘e Sela ‘i he taimi ko eni ‘i he ta‘u kaha‘u. 22Pea ‘osi ai ‘ena fefolofolai mo ia, pea hā‘ele hake ‘a e ‘Otua meia ‘Epalahame.
23Pea hanga ‘a ‘Epalahame ‘o ne kamu ‘a hono foha ko ‘Isime‘eli; pea ‘ilonga ha kakai tangata ‘i hono ‘api, pe ko e tupu ai, pe ko e ma‘u fakatau ‘aki ‘ene pa‘anga, na‘a ne kamu‘i kinautolu ‘i he ‘aho pē ko ia, ‘a e kili ‘o honau ‘ao, ‘o hangē ko ‘ena fefolofolai mo e ‘Otua. 24Pea na‘e fe‘unga ‘a ‘Epalahame mo hono hivangofulu mā hiva ta‘u, ‘i he fai ‘a e kamu ‘o e kili ‘o hono ‘ao. 25Pea na‘e hongofulu mā tolu ta‘u ‘a hono foha ko ‘Isime‘eli ‘i he fai ‘o hono kamu ‘i he kili ‘o hono ‘ao. 26Ko e ‘aho pē ko ia na‘e kamu ai ‘a ‘Epalahame mo hono foha ko ‘Isime‘eli; 27kae‘uma‘ā ko e kakai tangata kotoa pē ‘o hono ‘api; pe ko e tupu ai, pe ko e ma‘u fakatau ‘aki ‘a ‘ene pa‘anga mei he muli, na‘a nau kamu fakataha mo ia.
Obecnie wybrane:
KO SĒNESI 17: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
