Sione 13
13
Ko e Fufulu ‘e Si̇̄sū ‘a e Va‘e ‘o ‘Ene Kau Akó
1Pea ʻi he teu ke fai ʻa e Kātoanga Pāsová, na‘e ʻafioʻi ‘e Si̇̄sū kuo hokosia ʻa e taimi̇́, ke ne mavahe ai mei māmani, ‘o foki ki he Tamai̇́, ko ia naʻá ne ‘ofa ki he faʻahinga na‘e kau mo ia ‘i māmani̇́, ‘o ne fai pē ʻene ʻofa kiate kinautolú, ke a‘u ki he ngata‘angá.
2Pea ʻi he teu ke kamata ʻa e ma‘u me‘atokoni̇́, kuo ‘osi fakahū ‘e he tēvoló ki he loto ‘o Siutasi, ko e foha ʻo Saimone ʻIsikālioté, ke ne lavaki‘i ‘a Si̇̄sū.
3Pea kuo ʻafioʻi ‘e Si̇̄sū, kuo foaki ʻe he ʻOtuá ke ne pule ki he meʻa kotoa pē, pea ko e ‘Otuá pē kuó ne haʻu mei ai pea te ne toefoki ki ai̇́. 4Ko ia, naʻá ne tu‘u hake mei he kai̇́, ‘o ne to‘o hono pulupulú, pea naʻe ha‘i ha taueli ‘i hono kongalotó. 5Hili iá naʻá ne toki lingi ha vai ki he pēsoni̇́, ‘o ne kamata ke fufulu ʻa e va‘e ‘o ʻene kau akó mo holo mātu‘u ʻaki ʻa e taueli naʻe haʻi ʻi hono kongalotó. 6Pea naʻe a‘u atu kia Saimone Pitá, naʻe pehē ange ‘e ia: ‟‘Eiki, ko e ʻai koā ke ke fufulu hoku va‘é?”
7Pea tali ‘e Si̇̄sū kiate ia : ‟‘E ‘ikai mahino leva kiate koe he taimi̇́ ni, ʻa e me‘a ‘oku ou fai̇́, ka ʻe toki mahino atu ‘amui ange.”
8Pea lea ʻa Pita kiate ia: ‟He‘ikai ʻaupito te ke fufulu ‘e koe hoku va‘é ʻo taʻengata.”
Pea tali ‘e Si̇̄sū kiate ia: ‟Ka ʻikai te u fufulu ho va‘é, pea ‘oku ‘ikai te ke kau koe mo au.”
9Pea pehē ange ‘e Saimone Pita kiate ia: ‟‘Eiki, ‘oua ʻe ngata pē ʻi hoku va‘é, ka ke fulufulu mo hoku ongo nimá mo hoku ‘ulú foki.”
10Pea folofola ʻa Si̇̄sū kiate ia: ‟Ko ia kuo ‘osi kaukaú, ko hono va‘é pē ‘oku fiema‘u ke fufulú. Pea kuo mou ‘osi ma‘a kimoutolu, neongo ʻoku ʻikai te mou maʻa kotoa pē.” 11He na‘e ʻafioʻi pē ‘e Si̇̄sū ʻa e toko taha ‘okú naʻe teu lavaki‘i iá, pea ko e ʻuhinga ia ‘ene pehē: ‟ʻOku ʻikai te mou maʻa kotoa pē.”
12Pea hili hono fufulu ‘e Si̇̄sū honau va‘é, naʻá ne tui hono pulupulú, pea naʻe toe nofo hifo ki he maʻu meʻatokoni̇́, ʻo ne pehē ange kiate kinautolu: ‟ʻOku mahino atu ʻa e meʻa kuo u fai kiate kimoutolú?”
13‟‘Oku mou ui au ko e faiako mo e ‘Eiki, pea ‘oku taau pē ke pehē: he ko hono mo‘oni̇́ ia. 14Ko ia kapau kuo u fufulu ‘e au homou va‘é, ka ko e faiakó au mo e ‘Eiki̇́, pea mou fai pehē mo kimoutolu ‘iate kimoutolu pē, ʻo mou fefufuluʻaki homou vaʻé. 15Kuo u tuku atu ha si̇̄pinga ma‘amoutolu, ke mou fai foki ʻa e meʻa kuo u fai kiate kimoutolú. 16He ko hono mo‘oni̇́ ʻeni ‘oku ou tala kiate kimoutolú, ʻoku ʻikai ke mā‘olunga ange ha tamaio‘eiki ‘i hono ‘eiki̇́, pea ʻoku ʻikai ke mā‘olunga ange ha faifekau ‘iate ia naʻá ne fekau atu iá. 17Ko ʻeni kuo mahino kiate kimoutolu ʻa e ngaahi meʻá ni, ko e toki kakai monūʻia moʻoni kimoutolu ʻoka mou ka fai ki ai.
18‘Oku ‘ikai ko ‘eku lau ʻeni kiate kimoutolu kotoa pē. He ‘oku ou ‘ilo ‘e au ʻa e faʻahinga kuo u filí. Ka kuo pau ke fakakakato ʻa e me‘a ʻa e Tohitapú, ‛Ko e tangata naʻá ma ma‘u me‘atokoni fakatahá, kuó ne angatuʻu kiate au.’ 19Ko ʻeni ʻoku ou fakahā atu kiate kimoutolu kimuʻa ke hokó ʻa e meʻa ni, koe‘uhi̇̄ ka toki hoko ia, pea mou tui leva ko au ia. 20Ko hono mo‘oni̇́ ʻeni ‘oku ou tala kiate kimoutolú, ko ia te ne talitali lelei ha taha pē te u fekau atú, ʻokú ne talitali lelei au, pea ko ia te ne talitali lelei aú, kuó ne talitali lelei ai foki ‘a e Toko Taha naʻá ne fekau mai aú.”
Ko e Tala ki Mu‘a ‘e Si̇̄sū Hono Lavaki‘i̇́
(Mātiu 26:20-25; Ma‘ake 14:17-21; Luke 22:21-23)
21Pea hili hono lea‘aki ‘e Si̇̄sū ʻa e ngaahi me‘a ko iā, naʻe mafasia lahi hono lotó, pea naʻe folofola ki he‘ene kau akó: ‟Ko hono mo‘oni̇́ ʻeni ‘oku ou tala atú, ko e toko taha ‘iate kimoutolu, te ne lavaki‘i au.”
22Pea fesiofaki ai ʻa e kau akó ‘o nau mo‘ulongoa heʻenau fifili pē kohai ʻoku ʻuhinga ki ai ʻene leá. 23Pea ko honau toko taha, ko e akonga naʻá ne ‘ofa taha ai̇́, naʻá ne tokoto ofi atu ki he nofoʻanga ʻo Si̇̄sū. 24Ko ia, naʻe kamo ange ‘a Saimone Pita ki he toko taha ko iā, ke ne ‘eke ange kia Si̇̄sū, pē ko ‘ene laú kia hai. 25Pea ʻunuʻunu atu ʻa e toko taha ko iā, ʻo ofi atu ki he fatafata ʻo Si̇̄sū, ‘o ne pehē ange kiate ia: ‟Ko hai ia, ‘Eiki?”
26Pea tali ‘e Si̇̄sū: ‟Ko e toko taha ia te u ʻange ki ai ‘a e konga mā ko eni̇́, hili ʻeku unu ia ki he tisi̇́.” Pea toki hanga ‘e Si̇̄sū ‘o unu ‘ene konga maá, pea naʻe ‘oange kia Siutasi, ‘a e foha ‘o Saimone ‘Isikālioté. 27Pea hili hono toʻo ʻe Siutasi ʻa e konga maá, naʻe hū leva ‘a Sētane kiate ia.
Ko ia, naʻe folofola ange ‘a Si̇̄sū kiate ia: ‟Ko e me‘a ‘okú ke teu fai̇́, fei mo ke fai ia pea ʻoua naʻa toe tatali.” 28Ka na‘e ‘ikai ke mahino ki ha taha ʻokinautolu naʻe ʻi he maʻumeʻatokoni̇́, pē ko e hā ʻa e ʻuhinga ʻo ʻene lau ki ai̇́. 29He na‘e pehē ‘e he ni‘ihi, koeʻuhi̇̄ ko Siutasi naʻá ne tauhi ‘enau pa‘angá, ko ʻene fekaú, ke ne ʻalu ʻo fakatau mai ʻa e ngaahi meʻa ki he Kātoangá, pē ke ne ‘alu atu ‘o tufa ha sēniti maʻae kau masivá.
30Ko ia, ʻi he to‘o pē ‘e Siutasi ʻa e konga maá, naʻá ne hū atu leva ki tu‘a. Pea kuo poʻuli̇.
Ko e Fekau Fo‘ou
31Pea hili ʻa e ‘alu atu ‘a Siutasi̇́, naʻe folofola ʻa Si̇̄sū kiate kinautolu,
‟Kuo taimi, ke fakalāngilangi‘i ʻa e Foha ʻo e Tangatá, peá ke fakalāngilangi‘i ‘a e ‘Otuá ʻiate ia. 32Kapau ʻe fakalāngilangi‘i ʻa e ‘Otuá ‘iate ia, pea ‘e fakalāngilangi‘i ʻe he ʻOtuá ʻa e Foha ʻo e Tangatá ʻiate ia pē, ʻio, te ne fakalāngilangi‘i leva ia. 33Siʻi fānau, ʻoku toesiʻi pē ʻeku nofo mo kimoutolú, pea hangē ko e meʻa naʻá ku tala ki he kau Siú, pea ʻoku ou tala ʻeni foki kiate kimoutolu, Ko e feitu‘u ‘oku ou teu ‘alu ki ai̇́, ʻe ʻikai te mou lava ke ʻalu ki ai. 34Ko e fekau fo‘ou ʻeni ‘oku ou ʻoatu kiate kimoutolu, ke mou fe‘ofo‘ofani. Hangē ko ‘eku ‘ofa‘i kimoutolú, ‛ko ia ke mou feʻofaʻaki foki.’
35Ko e meʻa ʻeni ʻe toki mahino ai ki he kakai kotoa pē ko ‘eku kau ako kimoutolu, ʻokapau ʻe ʻi ai haʻamou feʻofaʻaki.”
Ko e Tala Ki Muʻa ‘e Si̇̄sū ‘e Fakafisingaʻi ia ‘e Pita
(Mātiu 26:31-35; Ma‘ake 14:27-31; Luke 22:31-34)
36Pea pehē ange ‘e Saimone Pita: ‟‘Eiki, ko e ʻai ke ke meʻa ki fē?”
Pea folofola ʻa Si̇̄sū kiate ia: ‟Ko e feitu‘u ‘oku ou teu ‘alu ki ai̇́, he‘ikai lava ke ke muimui mai ki ai he taimi̇́ ni ka te ke toki muimui mai ki ai, ‘amui ange.”
37Pea pehē ange ʻe Pita kiate ia: ‟ʻEiki, ko e hā ʻa e ‘uhinga ‘oku ‘ikai lava ai ke u muimui kiate koe he taimi ni̇́? Te u tuku ‘eku mo‘ui̇́ ke mole koeʻuhi̇̄ ko koe.”
38Pea tali ‘e Si̇̄sū: ‟Te ke fie tuku koā ho‘o mo‘ui̇́ ma‘aku? Ko hono mo‘oni̇́ ʻeni ‘oku ou tala kiate koé, ‘e ʻikai ke ‘u‘ua ʻa e moá, kaeʻoua kuo tuʻo tolu hoʻo fakafisingaʻi au.”
Obecnie wybrane:
Sione 13: TCNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Contemporary New Testament © Bible Society of the South Pacific, 2011.
