Sione 12
12
Ko e Takailolo ‘o Si̇̄sū ‘e Mele ‘i Pētani
(Mātiu 26:6-13; Ma‘ake 14:3-9)
1Ko ia, ʻi he toe ʻa e ʻaho ‘e ono ki he Kātoanga Pāsová, naʻá ne ʻalu atu ki Pētani, ʻa e feituʻu naʻe nofo ai ʻa Lāsalosi̇́, ‘a ia na‘e fokotu‘u ‘e Si̇̄sū mei he pekiá. 2Pea naʻa nau teuteu ai ha meʻatokoni efiafi ma‘ana. Pea ko Māʻata, naʻá ne tokangaʻi ʻa e tēpilé, ka ko Lāsalosi, ko e taha ia he faʻahinga na‘e tokoto mo Si̇̄sū ʻi he kai̇́. 3Ko ia, naʻe to‘o mai ‘e Mele ha hina lolo, ko e na‘ati mahuʻinga, ‘o ne tākai ʻaki ʻa e va‘e ‘o Sīsuú, pea ne toki holoholo ʻaki ia hono lou‘ulú. Pea naʻe ‘alaha ʻa e loló ʻi he kotoa ʻo e falé. 4Pea lea ki ai ʻa Siutasi ‘Isikāliote, ko e taha ʻo ʻene kau akó, ʻa e tangata na‘e ‘amanaki ke ne lavaki‘i iá, 5‟Ko e hā naʻe ʻikai ke fakatau atu ai ʻa e loló, ke ma‘u ai ha pa‘anga ‘e tolungeau ke foaki maʻae masivá.” 6Ka naʻe ʻikai ko ʻene lea peheé, ko haʻane ‘ofa mo‘oni ki he masivá, ka koeʻuhi̇̄ ko e kaiha‘a ia, he ko ia ia naʻá ne tauhi ‘enau kato pa‘angá, pea naʻá ne faʻa kaihaʻa pē mei he paʻanga naʻe tuku ai̇́. 7Ko ia, naʻe folofola ʻa Si̇̄sū: ‟Tuku pē ʻa e fefiné, he kuó ne tauhi mai ia, ke fai ʻaki hoku teuteú, ki he ʻaho ‘e tanu ai aú. 8He ko e kau masivá, te mou nofo ma‘u pē mo kinautolu, ka he‘ikai te mou nofo ma‘u ai pē mo au.”
Ko e Alēlea ke Tāmate‘i mo Lāsalosi
9Ko ia, naʻe fanongo ʻa e tokolahi ʻo e kau Siú, ‘oku ‘i he feituʻu ko iā ‘a Si̇̄sū, pea nau ō hake ki ai, ʻo ʻikai koeʻuhi̇̄ ko Si̇̄sū pē, ka na‘a nau fie sio foki kia Lāsalosi, ʻa ia kuó ne fokotu‘u mei he maté. 10Pea alēlea leva ʻa e kau taulaʻeiki lahi̇́ ke tāmate‘i foki mo Lāsalosi. 11He ko e meʻa ʻiate iá, kuo tafoki mai ai ha kau Siu tokolahi ‘o tui kia Si̇̄sū.
Ko e A‘u Hake ‘a Si̇̄sū ki Selusalema
(Mātiu 21:1-11; Ma‘ake 11:1-11; Luke 19:28-40)
12ʻI he ʻaho hono hokó, ko e fuʻu kakai tokolahi naʻe omi ki he Pāsová, naʻa nau fanongo kuo ha‘u ‘a Si̇̄sū ki Selusalemá, 13ʻO nau tā mai ha ngaahi va‘a paame pea nau ō atu mo ia ke fakafeʻiloaki kiate ia, pea nau kalakalanga,
‟Tauange ke fakamoʻui muʻa!
Tauange ke tāpuaki‘i ʻa e toko taha ‘oku hā‘ele mai he huafa ‘o e ‘Eiki̇́!
He ko e Tuʻi ‘Isileli̇́ ia!”
14Pea maʻu ‘e Si̇̄sū ha kiʻi ‘asi, ʻo ne heka ki ai, ‘o hangē pē ko e lau ‘a e Tohitapú,
15‟‘Oua ‘e manavahē, taʻahine Saione!
He ko ʻeni ia homou Tu‘i̇́, ‘okú ne hā‘ele mai kiate koe,
Kuó ne heka ki ha ʻuhiki ʻo ha ‘asi.”
16Ko e ngaahi me‘a ko eni̇́, na‘e ‘ikai ke mahino leva ki heʻene kau akó, ʻi he taimi ko iā, ka ʻi he hili hono fakalāngilangi‘i ‘o Sīsuú, pea nau toki manatu‘i tā ko e ngaahi me‘a ʻeni na‘e hikitohi ʻo kau kiate iá, pea kuo nau fai pē kiate ia, ʻa e ngaahi meʻa ko iā. 17Ko ia, ko e kakai tokolahi, ʻa ē naʻa nau ʻi ai tonu ʻi heʻene ui ‘a Lāsalosi ke hūmai mei he fonualotó, ʻa ʻene fokotuʻu ia mei he pekiá, naʻa nau kei talanoaʻi ia. 18Pea koeʻuhi̇̄ ko e meʻa ko iā, naʻe fie feʻiloaki mo ia ʻa e fuʻu kakai̇́, he kuo nau fanongo, ko e tangata ia naʻá ne fai ʻa e maná. 19Ko ia, ko e kau Fālesi̇́ naʻa nau fepehēʻaki: ‟Mou vakai ange ā, kuo ʻikai ʻaupito haʻatau meʻa ʻe lava. Ko eni, ʻe ‘osi ‘a māmani he muimui kiate ia.”
Ko ha Kau Kalisi na‘e Fie Fe‘iloaki mo Si̇̄sū
20Pea na‘e ‘i ai ha kau Kalisi ʻe niʻihi, mei he faʻahinga na‘e ō hake ke kau ki he ouau lotu ʻo e Kātoangá, ʻi Selusalemá. 21Pea naʻe omi ʻa e faʻahinga ko iā kia Filipe, ko e tangata mei Petesaita ‘i Kāleli̇́, ‘o kole kiate ia ʻo pehē: ‟Matāpule, ‘oku mau fie fe‘iloaki mo Si̇̄sū.”
22Pea ‘alu ‘a Filipe ‘o fakahoko kia ‘Anitelū. Pea toki ō ʻa ʻAnitelū mo Filipe ‘o fakahoko ange kia Si̇̄sū.
Ko e Lāngilangi ‘o e Foha e Tangatá
23Pea tali ‘e Si̇̄sū kiate kinautolu, ʻo pehē: ‟Kuo hokosia ʻa e taimi̇́, ke fakalāngilangiʻi ai ʻa e Foha ʻo e Tangatá. 24Ko e mo‘oni̇́ ʻeni ‘oku ou tala kiate kimoutolú, ka ‘ikai tō ha fo‘i uite ki he kelekelé ‘o mate, pea ‘e kei nofo ai pē ia ko e fo‘i uite ‘e taha. Ka ‘oka mate, pea ‘e toki fua lahi. 25Ko ia ʻoku ‘ofa ki heʻene moʻui ʻaʻana pē, ʻe mole ia. Pea ko ia ʻokú ne fehiʻa ki heʻene mo‘ui̇́, ʻi he maama ko eni̇́, te ne tauhi ia ʻo aʻu ki he mo‘ui ta‘engatá. 26Ka ai ha taha te ne fie nofo ʻo tauhi kiate au, kuo pau ke ne muimui mai, pea ko e feituʻu te u ʻi ai̇́, ʻe ʻi ai foki ʻeku sevāniti̇́. Ka ʻi ai ha taha ʻokú ne fie tauhi kiate au, ʻe fakalāngilangi‘i ia ‘e he Tamai̇́. 27Ka ko eni, ‘oku mafasia hoku lotó, pea ko e hā ai ha‘aku toe lea ‘e fai? ʻE Tamai ke ke haofaki‘i au mei he houa ko ʻeni̇́? ʻIkai, he naʻe ʻuhinga ‘eku ha‘u ki māmani̇́, ke u aʻusia ʻa e houa ko eni̇́. 28ʻE Tamai, ke ke fakalāngilangi‘i muʻa ho huafá.”
Ko ia, naʻe ongo mai ha le‘o mei he langi̇́: ‟Kuó u ‘osi fakalāngilangi‘i, pea te u toe fakalāngilangi‘i pē.”
29Pea ko e tokolahi naʻe tutuʻu ai ʻo fanongo ki he le‘ó, naʻa nau pehē: ko e ‘u‘ulu pē ‘o ha mana, kae pehē ‘e he ni‘ihi, ko ha ‘āngelo naʻe lea mai kiate ia.
30Kae tali ‘e Si̇̄sū ʻo ne folofola: ‟Na‘e ‘ikai ko e ongo mai ʻa e le‘ó koe‘uhi̇̄ ko au, ka koe‘uhi̇̄ ko kimoutolu. 31Ko eni, kuo hokosia ʻa e fakamāau‘i ‘o e maama ko eni̇́, pea ko e ʻeiki ‘o maama ko eni̇́, kuo kapusi kituʻa. 32Ka ko au, ʻoka hiki hake au ki ‘olunga mei māmani, pea te u toki tohoaki mai ʻa e kakai kotoa pē kiate au.” 33Ka ko ʻene lau pehē: ko ʻene fakahā atu ia, ʻa e anga ‘o e mate‘anga te ne mate ai̇́.
34Pea pehē ange ʻe he kakai̇́ kiate ia: ‟ʻOku mau ʻilo mei he Folofolá, ko e Mi̇̄saiá ‘e mo‘ui ai pē ‘o ta‘engata, pea ʻe anga fēfē ai hoʻo pehē: Kuo pau ke hiki ki ʻolunga ʻa e Foha ʻo e Tangatá? Kohai koā ia, ʻa e Foha ʻo e Tangatá?”
35Ko ia naʻe tali ‘e Si̇̄sū kiate kinautolu: ‟‘E kiʻi fuoloa siʻi atu pē ‘a e nofo ʻa e maamá mo kimoutolú. Mou fononga, lolotonga hoʻomou kei maʻu ʻa e maamá, teʻeki ke tō mai ʻa e poʻuli ʻo ne kāpui kimoutolu, he ko ia ʻoku fononga ʻi he poʻuli̇́, ʻoku ʻikai te ne ʻilo pē ko ʻene ʻalu ki fē. 36ʻI hoʻomou kei maʻu ʻa e maamá, mou tui falala ki he maamá, ka mou hoko ai ko e fānau ‘o e maamá.”
Ko e Ta‘e Tui kia Si̇̄sū
37Neongo naʻe lahi ʻa e ngaahi mana ‘a Si̇̄sū na‘e fai ʻi honau lotolotongá, ka na‘e ‘ikai pē ke nau tui kiate ia; 38Koeʻuhi̇̄ ke fakamo‘oni ai ʻa e lau ʻa e palōfita ko ‘Aiseá, ʻo pehē:
‟‘Eiki, ko hai kuo tui
ki he me‘a na‘a mau fanongonongó?
Ko hai kuó ne mamata
ki he nima māfimafi̇ ʻo e ʻEiki̇́?”
39Ko e ʻuhinga ia ʻa e taʻemalava ke nau tui̇́, ke toe fakamo‘oni mo e lau ko ʻeni ‘e taha ‘a ‘Aisea, ʻo pehē:
40‟Kuo fakakuihi ‘e he ‘Eikí
ʻa honau matá.
Pea kuó ne ‘ai ke ongongata‘a
ʻa honau lotó,
koeʻuhi̇̄ ke ʻoua te nau sioʻaki honau matá,
pea mahino ki honau lotó,
pea nau tafoki mai,
kae fakamoʻui kinautolu.”
41Naʻe lea pehē ‘a ‘Aiseá, he naʻá ne mamata ki he lāngilangi ‘o Sīsuú, pea naʻe lea ʻo kau kiate ia. 42ʻI he taimi tatau, naʻe tokolahi ha niʻihi he kau taki̇́ naʻe nau tui kiate ia. Ka koeʻuhi̇̄ ko e kau Fālesi̇́, na‘e ‘ikai ke nau lava ‘o fakahā ki ha taha, he naʻa nau manavahē naʻa tuli kinautolu kituʻa mei he falelotú. 43He naʻe kei mahu‘inga ange ki he kau taki ko iā, ʻa e mālieʻia mai ʻa e kakai̇́, ‘i he finangalo ʻofa mai ʻa e ‘Otuá.
Ko e Ha‘u ‘a Si̇̄suú ke Fakahaofi ‘a Māmani
44Pea toki kalanga le‘olahi ‘a Si̇̄sū, ‘o naʻe pehē: ‟Ko ia ʻe tui kiate aú, ʻoku ʻikai ko au pē ʻoku tui ki ai̇́, ka ʻokú ne tui ai foki ki he Toko Taha naʻá ne fekau mai aú. 45Pea ko ia ʻoku mamata kiate aú, ʻokú ne mamata ai foki ki he Toko Taha naʻá ne fekau mai aú. 46Ko au, kuo u ha‘u ko e maama ʻo māmani koeʻuhi̇̄ ko ia kotoa pē ʻe tui kiate aú, ke ʻoua te ne kei nofo he poʻuli̇́.
47He ʻoka ai ha taha ʻe fanongo ki heʻeku ngaahi leá pea ʻikai te ne tauhi ki ai, ʻe ‘ikai te u fakamāau‘i ia ʻe au, he na‘e ‘ikai te u ha‘u ke fakamāau‘i ‘a māmani, ka ke fakamoʻui ‘a māmani. 48Ko ia te ne fakasi̇̄tuʻaʻi au pea ʻikai te ne tali ʻeku ngaahi leá, ʻoku ʻi ai ha fakamaau kiate ia. Ko e ngaahi lea pē ko ē naʻá ku leaʻaki̇́, ʻe fakahalaiaʻiʻaki ia ʻi he ʻaho fakamui̇́. 49He ʻoku ‘ikai ko ʻeku lea pē meiate au, ka ko e Tamai̇́ naʻá ne fekauʻi au ke u lea ʻaki ʻa e ngaahi me‘a kuo u lea‘aki̇́. 50Pea ʻoku ou ‘ilo‘i ko ʻene ngaahi fekaú, ‘oku ma‘u ai ʻa e mo‘ui ta‘engatá. Ko ia, ko e meʻa kotoa pē ʻoku ou lea ʻaki, ko e meʻa pē ʻoku leaʻaki mai ʻe he Tamai̇́, pea ko ia pē ʻoku ou leaʻaki̇́.”
Obecnie wybrane:
Sione 12: TCNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Contemporary New Testament © Bible Society of the South Pacific, 2011.
