LUKE 19
19
Isu leh Zakai
1Chun, Isu Jerikoh khuo ah a lut a, sun pal ding a hi a. 2Zie tak achun mi khat a min Zakai kiti, siehdawlte lawipa, mi neizo tak a um a. 3Isu chuh mi bang tawbang ahim tih muh a guo ta a, himahleh, mipi ziekin a mu thei puoh a, amah la mi niemcha ahi ngâla. 4Khutichun, a taihkhelh a, a en dingin theipi lêk ah a kal a, zie lampi chuh hun hawh ding ahi ngâla. 5Isu chuh zie mun chu a tun phetin, a vak dâk to a, a kawm achun, “Zakai, hung kum vak ah, tuni’n na In a tung ding ka hi,” a ti a. 6Tichun, Zakai chuh kinlebuong in a kum a, lawp takin amah chuh a tun sak ta a. 7Chun, zie chuh a muh phet un a bawn un “Migilo pa In a tung dingin a chieh ta khu!” ti’n a phun sausau tau a.
8Chun, Zakai chuh a ding a, Lalpa kawmah, “Lalpa, ngaiin, ka neih kimkhat neilahte kawmah pie’ng ka ting, chun, kuo kawm hitaleh diklo taka ka na lepguk chuh, a zah li’n din ing ka,” a ti a. 9Chun, Isu’n a kawmah, “Tuni hin zie In ahin hukdamna a tung tai, amah hile Abraham chapa ahi ngâl a. 10Mangthaite hawla hukdam dingin, Mihiem Chapa hi hung ahi him hi,” a ti a.
Dangka apat a Tehkal thu
(Mat 25.14-30)
11Chun, zie thu haw chuh a ngaihthak lai un, Jerusalem khuo a naih tâk ziek leh Pathien gam hunglang zieng dinga a ginchak ziekun tehkal thu a gen tel a. 12Khutichun, zie thu haw hi a gen a: “Khatvei hi mi khat, dinmun sangtak luoh, gam gamla taka chieh a, lenga va um a, chuleh hungkit ding ti a ngaihtuoh khat hi a um a. 13A chieh masang in, a suokte sawm chuh a sama, dangka sawm a pie chiet a, a kawm u ah, ‘Ka hung tun kit masang sieh, zie hin a na sumkawlvei un,’ a ti a. 14Himahleh, a gam mite chun a mah chu a mudah u a, ‘Zie pa hi ka chung u a leng dingin ka deih puou hi,’ ti’n a nung ah palai a delh zui sak u a.
15“Zie pa chuh, leng a va chan nung in, In lam ah a hungkit ta a, a suokte, dangka a piek haw chuh a veikan dân uh hetna dingin kin takin a sam khawm ta a. 16Tichun, a masapen chuh a hung a, a kawmah, ‘Hepu, na dangka kha sawm in ka veikan hi,’ a ti a. 17‘Na hih pha ie, suok pha leh ginum! Tawmcha chungah na taksanum ziekin, khawpi sawm chungah lawiupa’n hun um sak ing ka,’ a ti a. 18Chun, a nihna pa chuh a hung a, ‘Hepu, na dangka kha nga mah in ka veikan hi,’ a ti a. 19Zie pa kawm achun le, ‘Khawpi nga chungah lawiupa’n pang ah,’ a ti a. 20Suok dang khat pa chuh a hung a, ‘Hepu, entie! ziehi na dangka kha ahi; khawsa-ul thiekna puon-In ka chûn a, ka kawih pha zing ahi. 21Mi khel tak na hih ziekin ka lau a, nanga lo pile na la sek a, na tuh loh poh le na ât sek ziekin,’ a ti a. 22Chun, amah chun a kawmah, ‘Suok gilo! nangmah kamsuok ngêi apat in mawh hun chan sak ding ka hi! migilo tak ka hi tih na he a, keia lo pi le ka la sek a, ka tuh loh pile ka ât sek hi. 23Khutichu a hih leh, bang zieka ka sum chuh sumkawlveina In a na kawih loh a? Tichun, ka hungkit tieng leh, a pung tawh ka muh ding hi a,’ a ti a. 24Tichun, zie tak a dingte kawm achun, ‘dangka kha lâksak unla, sawm neipa kawma khan pieu in,’ a ti a. 25Himahleh, amau haw chun a kawmah, ‘Ama’n sana dangka sawm a neihsa hi,’ a tiu a. 26‘Ka hun hilh na hiu, a neita piek behlap untin, a nei lo chuh, a neih sun le lak sak un au. 27Tuhin, zie ka melmate, a chung u a, vaihawm dinga ei deih lote hi hun pui unla, ka masang ngeia hin that un,’” a ti a.
Guolzo a Jerusalem a Lutna
(Mat 21.1-11; Mrk 11.1-11; Joh 12.12-19)
28Chun, khutibang thu haw chuh a gen zawhin, a masang lam u a Jerusalem lam chuh a zuon to tau a. 29Chun, olive tânga Bethphage leh Bethani khuo kieng a hun naih phet chun, sinsakte laka mi nih a sawl a, 30“Na ma zawn u a khuo a khun va chieh unla, na lut tieng u leh, sabiltung no kihên, kuomah chut khâk lohna va muu in na tin uh; zie chuh sut unla, taka hin hun kai un. 31Kuo’n le, ‘Bang dinga phel na hiu hi?’ ti a a hun dawt u chun, ‘Lalpa’n a deih ahi,’ tiu in,” a ti a. 32Khutichun, a chieh tau a, Isu’n a kawm u a a gen guol tak chun a va mu tau a. 33Chun, sabiltung no a sut lai u chun, a neite’n a kawm u ah, “Sabiltung no kha bang dinga sut na hiu hi,?” a tiu a. 34Amau chun, “Lalpa’n a deih ahii,” a tiu a, 35tichun, Isu kawmah a hun kai tau a. Khutichun, sabiltung no chung achun a puonhawu a phah u a, a chungah Isu a chut sak u a. 36Tichun, a chiehna ding lampi achun, mipite chun a puonhawu a phah zel u a. 37Chun, Jerusalem a tun ding naih a, olive tâng lêpthâk ding kuo’n chun, a nungzui mipi nasatakte chun, a thilmak hih chengcheng a muh ziek u chun, aw ngeih tak in Pathien a pakchau a, 38“Lalpa min a Leng hung chuh a navak hi, van ah chamna thu leng hen la, chungnung pên a Pathien kawm achun lopina um hen,” a tiu a.#Sam 118.26 39Ziephet chun, mipi laka Pharisai khenkhatte chun Isu kawmah, “Sinsakpa, na sinsakte hi thip dingin thu pie’n,” a tiu a. 40Isu’n a dâwng a, “Ka hilh na hiu hi, ziete haw hi a thip u chun, suong chang bêk kiko dawk un au,” a ti a.
Isu’n Jerusalem a Kahchamna
41Chun, a tun ding kuon un khuo chuh a mu a, a kahcham a, 42“Aw, nang tak hin, tuhun sung hin lungmuonna ding thu hi he ta ve leh chin! Himahleh tu’n vang na hetlohna dingin a ki-îm ahi ta ngâla! 43Na gâlteu in na kim vel u a kulhte siem a, ning tina hun um kim vela, pawt thei lo a a hun chenkhum hun uh hung tung ding ahi. 44Chun, nang leh na cha-na naute chuh tuol khetna’n hun nei un tin uh, na sunga suong kitieng himhim hi hâwi puo’n au, ahun vilthak viel lai uh na hetloh ziekun, khutibang ni haw chuh na chung u ah hungtung ina.” a ti a.
Isu Pathien Ho-In Sukthienna
(Mat 21.12-17; Mrk 11.15-19; Joh 2.13-22)
45Chun, Pathien Ho-In achun a va lut a, sumkawlveite chuh a nawhdawk a, 46a kawm u ah, “Lehkhabu thiengtho ah Pathien in, ‘Ka In chuh pauchamna In ti’n au, a tii,’ tih zik ahi. Himahleh, nang haw’n guchate kisêlna In in na siem zaw tau hi,” a ti a.#Isa 56.7; Jer 7.11 47Chun, amah chun ni chengin, Pathien Ho-In achun a sinsak sek a. Thiempuliente leh Danthuzikte leh, vantâng lawiupate chun amah thah a nuom u a; 48Himahleh, mipite chun phachuomngai taka a thu a ngaihthak zing ziekun, a lampi ding a mu thei puou hi.
Obecnie wybrane:
LUKE 19: GANGBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
