LUKE 18
18
Meithainu leh Vaihawmte
1Chun, Isu’n a sinsakte chuh, lungthuoi lo in a paucham zing dinguh ahi tih hilhna dingin a kawm u ah tehkal thu a gen a: 2“Khawpi khawitak ahim a hin, Thutanpa khat hi a um a, zie pa chun Pathien a kihcha puoh a, mihingte le a zahchâk diek puoi. 3Zie khawpi achun meithai khat mah hi a um a, amah chun, ‘Ka kilanpih chungah phuba ei lak sak in,’ ti’n a kawmah a chieh zing sek a. 4Himahleh, hun bang ahim chan chuh Thutanpa chun a na hihsak zieng puoh a, himahleh hun chawmkhat hal chun a lungthim in, ‘Pathien kihcha lo in, mihing zahchâk diek kimahleng, 5Zie meithainu hin ei hung sukbuoi ziek hin a phu lak sak mai di’ng ka, khutilochun hiti hin hung zing intin, ei hung suchawl zaw diek kha’na,’” a ti a.
6 Lalpa mah in, “Thutanpa diktatlo thugen chuh zau in, a ti a. 7Pathien in, a mah mite ngêi, a sun a zan a panpihna ngên a kiko sekte phuba chuh lâksak lo ding ahim? Amau haw panpih dingin a ngak nalai dinga ahim? 8Ka hilh na hiu hi, kin takin a thuu tan sak intin, amau haw deih lam in hih sak ina. Himahlele, Mihiem Chapa a hung phat leh, lei chunga hin ginna a hun mu na dem?”
Pharisai leh Siehdawlpa
9Chun, amah chun, mi diktat tak hih kigingcha, mi dang cheng musit sek, kuote ahim kawmah zie tehkal thu hile a gen a: 10“Mi nih Pathien Ho-In ah paucham dingin a va chieh u a; khat chuh Pharisai ahi a, khat zaw chuh siehdawl ahi. 11Pharisai chuh a ding dawka, amah mai in hiti hin a paucham ta a: ‘Pathien, mi dangte guola lepgu, diktatlo ahim, zawlsai ahim ka na hih loh ziekin, na chungah ka kipâk hi. Zie taka siehdawlpa tawbang khuh ka hih loh ziekin le ka hun pakchai. 12Chawlhkal khatin an nih vei ka ngawl a, ka neih cheng apat sawma-khat ka pie sek hi,’ a ti a. 13Himahleh, siehdawlpa chuh gamla tak ah a ding a, van lam ale dâk ngam lo in, ‘Pathien, kei migilo hi ei lungsiet ah,’” ti’n a âwm a kichup a kichup zaw ta a. 14Ziephet chun Isu’n, “Ka hilh na hiu, Pharisai chuh hilo in, siehdawlpa zaw chuh in lam ah thiemchang in a kileh kit tai. Zieziekchun, kuole, kingailul ta tawm un tin, kingaitawm ta chu limbawl in um un au,” a ti a.
Isu’n Naupang neute a Vangsakna
(Mat 19.13-15; Mrk 10.13-16)
15Mipi khenkhat in, a chateu chu a chung u a a khut a na ngak dingin Isu kawmah a hun pui u a. Sinsakte’n zie chuh a na muh phet un a na gai u a. 16Himahlele, Isu’n naupang neu haw chuh a kawmah a sama, “Naupanghaw chuh ka kawmah hung sak un la, zadah kiu; Pathien gam chuh zie tawbang mite a ding hi ahii. 17Tihtakzet a ka hilh na hiu hi, kuole, Pathien gam chuh naupangin a lawp guola lawp lo ta chuh a sung ah lut hiel puo’n au,” a ti a.
Mineizo Chuh
(Mat 19.16-30; Mrk 10.17-31)
18Chun Judate lawiupa kuo ahim khatin Isu kawmah, “Sinsakpa pha, kumkhuo a hinna ka chan na dingin banga ka hih ding?” ti’n a dâwng a. 19Isu’n a kawmah, “Bang zieka pha nei tih a? Mi khat ngâllo chuh kuomah a pha a um puoi, zie chuh Pathien ahi 20Thupiek haw chuh na he a puo: ‘Zawlsai kih; tuolthat kih; gucha kih; diklo takin mi dangte heksie kih; na nu leh na pa limbawl ah,’ tih haw hi,” a ti a.#Pdn 20.14; Dann 5.18; Pdn 20.13; Dann 5.17; Pdn 20.15; Dann 5.19; Pdn 20.16; Dann 5.20; Pdn 20.12; Dann 5.16
21Amah chun a dâwng a, “Zie thu haw chengcheng chuh, chapang neucha ka hih apat ka zawp ei tai,” a ti a. 22Isu’n zie chuh a zak phetin, a kawmah, “Tuhin, thil khat na vat nalai hi; na neih chengcheng khawng inla, neilahte kawmah hawm ah, tichun, van ah go nei inla; chun, hung inla, ei zui ah,” a ti a. 23Himahleh, zie thu chuh a zak phetin, a lungkham mah mah ta a, mi neizo tak a hih ziekin.
24Chun, Isu’n amah chuh a lungkham hi tih a muh chun, “Sum haute chuh Pathien gama lut a haksa na ding e! 25Mineizo Pathien gama lut sangin, sangawngsau pin bil a lut pai a baihlam zawi,” a ti a. 26Mipi zie thu zate chun, “Khuti a hih leh, kuo a hukdam hi thei ding leh?” ti’n a dâwng u a. 27Isu’n a dâwng a, “Mihiem a dinga hih theih loh chuh Pathien a ding in hih theih ahii,” a ti a. 28Chun, Peter in, “Entie! kei un, ka inteu leh ka loteu taihsan in ka hun zui tau hi,” a ti a. 29Isu’n a kawm u ah, “Tihtakzet a ka hun hilh na hiu hi, kuole Pathien gam zieka In ahim, zi ahim, suohpihte ahim, nu leh pa ahim, chate ahim taihsan taphawt chuh, 30tu damsung zieng hin le, a sanga tamzaw mu lo ding kuomah a um puou hi, hun hungtung kit dinga kumkhuo a hinna tawh,” a ti a.
A Thih ding Thu a Gen Thumveina
(Mat 20.17-19; Mrk 10.32-34)
31Isu’n sawm le nih te chuh a chuom in a puidawk a, a kawm u ah, “Ngaitiem u! Jerusalem khuo a va chieh ding I hiu a, thiemgaute’n Mihiem Chapa chanchin a na zik chengcheng teu kha hung tung kim ding ahi. 32Jentel te kawmah pieu intin, engho un tin, zahhuoi takin bawl un tin uh; chil sietkhum un au. 33Chun, zêp untin, that un tin uh, ni thum ni leh tho kit ina,” a ti a. 34Himahlele, sinsakte chun zie thu haw himhim chuh a ngaihna a he puou a; thu umzie chuh a laku ah selguk in a um a, Isu thugen chuh bang gen a hih a he puou ui.
Mitdûk Khutdawh Sukdamna
(Mat 20.29-34; Mrk 10.46-52)
35Chun, tihi ahi a, Jerikoh khuo a tun ding kuon in, mitdûk khat lam pang ah khutdawh in a na chu a. 36Zie pa chun mipi chieh thawm a zak phetin, “Zie chuh bang ahi ta?” ti’n a dawng a. 37Amau haw chun, “Nazareth Isu chieh a hii,” ti’n a hilh u a. 38Ziephet chun, amah chun, “Isu, David chapa, ei lungsiet ah,” ti’n a kiko ta a. 39A masanga mipite chun thip dingin a gai u a. Himahleh, amah chuh, a kihah ko zaw diek a. 40Khutichun, Isu chuh a ding a, mitdûkpa chuh a kawma hun puih ding thu a pie a. A hung naih phet chun Isu’n, 41“Na chunga bangtia ka hih a na nawp?” a ti a. Amah chun, “Lalpa, khuo muh theih ka nuom hi,” a ti a. 42Isu’n a kawmah, “Na mu thei ta’n, na taksanna hi na dampih a hina,” a ti a. 43Tichun, thakhat in a hun mu thei pai zieng ta a, Pathien pakcha kawm zelin amah chuh a zui ta a, mi chengcheng chun zie chuh a muh phet un, Pathien a pakcha tau a.
Obecnie wybrane:
LUKE 18: GANGBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
