Marika 9
9
1Sa qai kaya talega vei ira o koya, “Au sa kaya vakaidina vei kemuni, era sa tu eke eso na tamata era na sega ni mate me yacova ni ra sa raica na yaco mai ni Matanitu ni Kalou ena kaukauwa mana.”
Na Tavuki ni Rairai kei Jisu
(Maciu 17.1-13; Luke 9.28-36)
2Ni sa oti e ono na siga, sa qai kauti iratou o Pita kei Jemesa kei Joni o Jisu, ka kauti iratou vakatikitiki ki na dua na ulunivanua. Ia ni ratou sa rai tu ga sa matalia mai ka tavuki na kena i rairai.#2Pita 1.17,18 3Sa lumilumisa ka sekavula sara mai na nona i sulu me vaka na se ni ua ena cakau; a sa sega ni dua na dausavasava e vuravura me vakavulavulataka rawa e dua na i sulu me vaka o ya. 4E rau sa qai rairai vei iratou o Ilaijia kei Mosese, ka rau sa veivosaki tiko kei Jisu. 5Sa qai kaya vei Jisu o Pita, “Vakavuvuli, sa vinaka dina na nodatou tiko eke; me keitou sa tara mada e tolu na vakatunuloa, e dua me nomuni, ka dua me nei Mosese, ka dua me nei Ilaijia.” 6A sega ni kila na cava me kaya o Pita, ni ratou sa rui rere vakalevu.
7Sa qai vakarurugi iratou e dua na o, ka sa rogo mai kina e dua na vosa, ka vaka, “Oqo na noqu Gone ni Toko; dou vakarorogo vua.”#Maciu 3.17; Mari 1.11; Luke 3.22 8E ratou sa qai veiraiyaki vakasauri, ka ratou sa sega ni raica e dua tale me tiko vata kei iratou, o Jisu duadua ga.
9Ia ni ratou sa siro sobu tiko mai na ulunivanua, sa qai vakaroti iratou o Jisu, ka kaya, “Dou kakua ni tukuna vua e dua na veika dou sa raica, me yacova ni sa tucake tale mai na mate na Luve ni Tamata.”
10E ratou sa mani katona lo voli ga na nona vosa, ka veitarotarogitaka vakai iratou se cava na i balebale ni tucake tale mai na mate. 11E ratou sa qai tarogi koya, ka kaya, “Na cava era kaya tiko kina na daunilawa ni dodonu me liu taumada mai o Ilaijia?”#Mala 4.5; Maciu 11.14
12Sa qai kaya o koya vei iratou, “Sa liu taumada dina mai o Ilaijia me vakavinakataka tale na veika kecega; ia, e qai volai ga vaka cava ena vukuna na Luve ni Tamata, ni dodonu me sota kaya na veika rarawa e vuqa ka me na vakalialiai talega?#Sr 48.10 13Ia au sa tukuna vei kemudou, sa lako oti mai o Ilaijia, ka ra sa cakava vua na tamata na ka ga era vinakata, me vaka ga na ka sa volai tu ena vukuna.”
Sa Vakabula e Dua na Gonetagane Curumi Yalo Velavela o Jisu
(Maciu 17.14-21; Luke 9.37-43)
14Ia ni ratou sa yaco yani vei iratou na tisaipeli tale eso, e ratou sa qai raici ira na lewe vuqa ka ra tu wavoliti iratou, kei ira na daunilawa era veileti tiko kei iratou. 15Era a kurabui sara na lewe vuqa ni ra sa raici Jisu, ka cici yani vua ka veitavaki kaya. 16Sa qai tarogi ira o koya, ka kaya, “A cava o ni veiletitaka tiko kei iratou oqo?”
17Sa qai sauma mai vua e dua mai vei ira na lewe vuqa, ka kaya, “Na i Vakavuvuli, au a kauta mai na luvequ tagane vei kemuni ni curumi koya tiko e dua na yalo velavela, ka galu tu. 18Ena gauna kece e curumi koya kina, e dau kureitaki koya ka viritaki koya ki ra; ka vuso na gusuna ka vakasequruquru bati, ka mai wadokau tu yani. Au sa kerei iratou oti na nomuni tisaipeli me ratou vakasava tani, ka ratou sega ni rawata.”
19Sa qai vosa kina vei iratou o koya, ka kaya, “A i tabatamata tawa vakabauta! Me vakacava soti na dede ni noqu tiko voli kei kemudou? Me cava soti na dede ni noqu vosoti kemudou tiko? Kauti koya mai vei au!” 20Era sa mani kauta mai na gonetagane ki vua.
Ni sa raici Jisu na yalo, sa qai kureitaka vakaukauwa na gonetagane o ya me vaka na manumanusoni, ni sa bale sobu ki na qele, ka mai vakatoqiqi yani, ka vuso na gusuna. 21Sa qai tarogi tamana o Jisu, ka kaya, “A cava na dede ni gauna sa yacovi koya tiko kina na ka oqo?”
Sa qai kaya o koya, “Me tekivu sara ga mai ni se gone lailai. 22Sa dau vakawasoma na nona saga me vakamatei koya na yalo velavela ni dau viritaki koya ki na bukawaqa ka vakakina ki wai. Ia mo ni yalololoma vei keirau, ka vukei keirau, kevaka sa rawa mo ni vakayacora vakakina!”
23Sa kaya vua o Jisu, “Io, kevaka sa rawa vei iko! Ni sa rawa ni yaco na ka kecega vua na tamata sa vakabauta.”
24Sa qai tabalaka cake vakasauri na domona na tama ni gone, ka kaya, “Au sa vakabauta, ia sa lailai walega. Ni vukei au me tarai cake vakalevu na noqu vakabauta!”
25Ni sa raica o Jisu ni ra sa toso vakatotolo yani vua na lewe vuqa, sa qai vakarota na yalo velavela ka kaya vua, “O iko na yalo ni galu kei na didivara, au sa vakaroti iko mo lako tani mai vua na gonetagane oqo, ka kakua vakadua ni o curumi koya tale!”
26A sa qoqolou na yalo velavela, a sa bitabitalaki koya na gonetagane, ka sa qai lako tani mai vua. Sa vaka koto yani na i rairai ni dua na tamata mate na gonetagane, ka ra kaya na tamata kecega, “Sa mate o koya!” 27Ia sa qai taura na ligana o Jisu, a sa tuberi koya cake, ka sa tucake sara.
28Ia ni sa curu ki na vale o Jisu, e ratou sa qai tarogi koya vuni ga na nona tisaipeli, ka kaya, “A cava na vuna keitou a sega ni vakasava tani rawa kina na yalo velavela?”
29Sa qai kaya vei iratou o Jisu, “Na masu duadua ga ena rawa ni vakasava tani rawa na kena mataqali oqo, ka sega tale ni dua na ka ena rawata.”
Sa Tukuna Tale o Jisu na Nona Mate
(Maciu 17.22-23; Luke 9.43-45)
30E ratou sa qai biuta na vanua o ya ka lakova na loma ni vanua o Kalili. E vinakata o Jisu me kakua ni dua e kila; 31ka ni a vakatavulici iratou tiko na nona tisaipeli, ka kaya, “Ena soli yani na Luve ni Tamata ki na ligadra na tamata, ka ra na vakamatea; ia ni sa mate, ena qai tucake tale ni sa oti e tolu na siga.”
32Ia e ratou a sega ga ni kila na i balebale ni vosa o ya, ka ratou rere ni tarogi koya kina.
O Cei e Liu Duadua?
(Maciu 18.1-5; Luke 9.46-48)
33E ratou sa mani yaco sara ki Kapenaumi. Ia ni ratou sa curu ki vale sa qai tarogi iratou o Jisu, ka kaya, “A cava dou a veivosakitaka tiko mai gaunisala?”
34Ia e ratou a galu ga, ni ratou a veivosakitaka tiko mai gaunisala se o cei e levu duadua vei iratou.#Luke 22.24 35Sa qai dabe o Jisu ka kacivi iratou na lewe tinikarua, ka kaya vei iratou, “Kevaka e dua e via liu, me kauti koya sobu sara ki ra, ka me nodra dauveiqaravi na tamata kecega.”#Maciu 20.26,27; 23.11; Mari 10.43,44; Luke 22.26 36Sa qai kauta mai e dua na gone lailai, ka vakaturi koya e matadratou; ia ni sa keveta, sa qai kaya vei iratou, 37“O koya sa taleitaka e dua na gone lailai vakaoqo ena yacaqu sa taleitaki au, kei koya sa taleitaki au, sa sega ni taleitaki au ga, sa taleitaki koya talega sa talai au mai.”#Maciu 10.40; Luke 10.16; Joni 13.20
O Koya sa Sega ni Veisaqasaqa kei Keda sa To Vata kei Keda
(Luke 9.49-50)
38Sa qai kaya vei Jisu o Joni, “Na i Vakavuvuli, keitou a raica e dua na tamata ni vakasavi tevoro tiko ena yacamuni, ka keitou mani tarovi koya, ka ni sega ni dua vei kedatou o koya.”
39Ia sa qai kaya o Jisu, “Dou kakua ni tarovi koya; ni sega ni dua e cakava rawa e dua na cakacaka mana ena yacaqu me na qai vosacataki au tale. 40Ni sa noda i to o koya e sega ni noda meca.#Maciu 12.30; Luke 11.23 41Ni'u sa kaya vakaidina vei kemudou, o ira yadua ena solia vei kemudou e dua na bilo wai mo dou gunuva, ni dou sai tokani i Karisito, ena sega ni yali vei ira na kedra i sau.#Maciu 10.42
Na Veiveretaki ki na i Valavala Ca
(Maciu 18.6-9; Luke 17.1-2)
42“Kevaka e dua sa vakavuna me ra tarabe ena i valavala ca o ira na lalai oqo era sa vakabauti au, ena vinaka cake vua na tamata oqori me vesuki ki domona e dua na vatu i qaqi levu, ka qai viritaki yani ki wasawasa. 43Kevaka sa vakacalai iko tiko na ligamu, mo muduka laivi! E vinaka cake mo curu ki na bula ka liga dua ga, ka ca me tiko ruarua na ligamu ka mo qai lako ki eli, ki na bukawaqa e sega ni bokoci rawa. #Maciu 5.30 [44Oqori na vanua era sega ni mate rawa kina na ulo era sa kani ira, kei na bukawaqa e vakamai ira sa sega ni bokoci rawa.] 45Se kevaka e vakacalai iko tiko na yavamu, muduka laivi; e vinaka cake mo curu ki na bula ka yava dua ga, ka ca me tiko ruarua na yavamu o qai biu ki eli, [46na vanua e sega ni mate kina na kedra ulo, ka sega ni bokoci kina na buka.] 47Se kevaka e vakacalai iko tiko na matamu, leuta tani; e vinaka cake mo curu mata dua ki na matanitu ni Kalou, ka ca me tiko ruarua na matamu o qai biu ki eli,#Maciu 5.29 48na vanua ena sega ni mate kina na kedra ulo, ka sega ni bokoci kina na buka.#Aisea 66.24
49“Ni na vakasavasavataki na tamata yadua ena buka me vaka sa vakasavasavataki na i soro ena masima.
50“E ka vinaka na masima; ia kevaka sa seyavu na kena tuituina, dou na vakatuituinataka tale vakacava?
“Me tuituina vinaka tikoga na nomudou veitokani, ka mo dou veilomani talega vakai kemudou.”#Maciu 5.13; Luke 14.34,35
Currently Selected:
Marika 9: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.