Marika 10
10
Na i Vakavuvuli i Jisu me Baleta na Veisere
(Maciu 19.1-12; Luke 16.18)
1A sa lako tani mai kea o Jisu ka lako yani ki na yasana o Jutia, ka sa takosova yani na Uciwai na Joritani. Era a soqoni vata tale yani vua na lewe vuqa, ka sa vakavulici ira o koya me vaka ga na nona i valavala.
2Era sa qai lako vua eso na Farisi ka via vakatovolei koya, ka kaya, “Sa vakatara li na noda Lawa vua e dua na tagane me veisere kei na watina?”
3Sa qai sauma vei ira o koya, ka kaya, “A cava sa vakarota vei kemuni o Mosese?”
4Era sa qai kaya, “E a vakadonuya o Mosese vua na tagane me vola e dua na i vola ni veisere, ka qai vakatala tani yani na watina.”#Vrua 24.1-4; Maciu 5.31
5Sa qai kaya vei ira o Jisu, “E a vola na i vakaro o ya o Mosese baleta ni sa rui kaukauwa na yalomuni. 6Ia mai na i vakatekivu, ‘Sa buli rau na Kalou me dua na tagane ka dua na yalewa.’#Vteki 1.27; 5.2 7‘Ena vuku ni ka oqo, ena biuti tamana kina kei tinana na tagane ka la'ki semati vua na watina,#Vteki 2.24 8ka rau sa na yaco me dua bauga.’ E rau sa sega kina ni lewe rua tiko, e rau sa dua bauga. 9Na ka sa vauca vata na Kalou me kakua sara ni tawasea na tamata.”
10Ia ni ratou sa tiko tale e vale, e ratou sa qai tarogi koya tale na nona tisaipeli ena ka oqo. 11Sa qai kaya vei iratou o koya, “O koya sa sereka na watina ka la'ki vakawati tale kei na dua na yalewa, sa dauyalewa o koya ka sa cala kina vua na watina.#Maciu 5.32; 1Kori 7.10,11 12Ena sala vata o ya, na yalewa ka sa sereka na watina ka sa la'ki veiwatini kei na dua tale na tagane, sa dautagane o koya.”
Sa Vakalougatataki Ira na Gone Lalai o Jisu
(Maciu 19.13-15; Luke 18.15-17)
13Era sa qai kauti ira yani eso na gone lalai vei Jisu eso na tamata me bau tarai ira o koya, ia e ratou a qai karalaki ira o iratou na tisaipeli. 14Ia ni sa raica o Jisu sa cudru sara, ka kaya vei iratou, “Dou laivi ira na gone lalai me ra lako mai vei au! Kakua ni tarovi ira; ni sa nodra na matanitu ni Kalou o ira era sa vakaoqo. 15Au sa kaya vakaidina vei kemudou, o koya yadua e sega ni ciqoma na matanitu ni Kalou me vaka e dua na gone lailai ena sega ni curu kina.”#Maciu 18.3 16Sa qai keveti ira na gone o koya, ka tabaki ira e ligana, ka vosa vakalougatataki ira.
Na Tamata Vutuniyau
(Maciu 19.16-30; Luke 18.18-30)
17Ia ni sa lako tiko o koya e gaunisala, sa qai cici mai e dua na tamata ka mai tekiduru vua, ka tarogi koya, “Na i Vakavuvuli vinaka, na cava e dodonu me'u cakava me'u taukena kina na bula tawamudu?”
18Sa qai kaya vua o Jisu, “Na cava o vakatokai au kina me'u vinaka? E sega tale e dua e vinaka, na Kalou duadua ga. 19O sa kila na i vakaro: ‘Kakua ni laba, kakua ni ia na veibutakoci, kakua ni butako, kakua ni veibeitaki vakailasu, kakua ni kocokoco, dokai rau na tamamu kei na tinamu.”#Lako 20.13; Vrua 5.17; Lako 20.14; Vrua 5.18; Lako 20.15; Vrua 5.19; Lako 20.16; Vrua 5.20; Lako 20.12; Vrua 5.16
20Ia sa qai kaya vua o koya, “Na i Vakavuvuli, na veika kece oqo au sa dau muria tiko mai na gauna ni noqu gone me yacova mai oqo.”
21Ni sa vakaraici koya o Jisu, sa lomana sara, ka sa kaya vua, “Sa vo tiko vei iko e dua na ka; mo la'ki volitaka na ka kecega e tu vei iko, ka solia na kena i lavo vei ira na dravudravua, o na qai vakaiyautaki mai lomalagi. Ia mo lako mai, ka muri au.” 22Ia ni sa rogoca na vosa o ya o koya sa rarawa na matana ka sa lako ena lomabibi; ni sa ka levu sara na nona i yau.
23Sa qai rai wavoki vei iratou na nona tisaipeli o Jisu, ka kaya, “Sa dredre vei ira na vutuniyau me ra na curu ki na matanitu ni Kalou!”
24E ratou sa kurabui na tisaipeli ena vuku ni nona vosa. Ia sa qai kaya tale vei iratou o Jisu, “Ragone, sa ka dredre dina me ra curu ki na matanitu ni Kalou o ira era sa dau vakararavi ki na i yau. 25Sa rawarawa cake vua na kameli me curuma na mata ni cula ka dredre vua na tamata vutuniyau me curu ki na matanitu ni Kalou.”
26E ratou sa kurabui vakalevu sara, ka veikayaka vakai iratou, “Ia o cei ga ena qai vakabulai rawa?”
27Sa qai rai vei iratou o Jisu, ka kaya, “Na ka oqo sa sega sara ga ni rawata na tamata, sa rawata na Kalou; ni sa rawata na Kalou na ka kecega.” 28Sa qai vosa o Pita, ka kaya vua, “Ni raica mada, oi keitou oqo keitou sa biuta na ka kecega ka muri kemuni.”
29Sa qai kaya o Jisu, “Au sa kaya vakaidina vei kemudou, e sega ni dua e sa biuta na nona vale kei iratou na tacina se na tuakana se na ganena, se tinana se tamana, se o iratou na luvena, se tiki ni qele, ena vukuqu kei na vuku ni tukutuku vinaka, 30me na sega ni saumi vua ena bula oqo. Ena vakadrautaki vua na veivale, na tacina, na ganena, na tinana, na luvena, kei na tiki ni qele eso, kei na veivakacacani talega, ia ena gauna mai muri ena qai taukena na bula tawamudu. 31Ia e lewe vuqa vei ira na liu era na muri, kei ira na muri era na liu.#Maciu 20.16; Luke 13.30”
Na i Katolu ni Gauna e Tukuna Kina o Jisu na Nona Mate
(Maciu 20.17-19; Luke 18.31-34)
32E ratou sa mani ia yani e gaunisala ena nodratou i lakolako ki Jerusalemi, ka sa liu tiko vei iratou o Jisu. E ratou a kidroa ka rere ni ratou sa muri voli. Sa qai kauti iratou vakatikitiki na lewe tinikarua o koya, ka tukuna vei iratou na ka sa vakarau yaco vua. 33A sa kaya, “Raica, e datou sa lako cake tiko ki Jerusalemi; ka na la'ki soli na Luve ni Tamata vei ira na bete levu, kei ira na qasenivuli ni lawa, ka ra na beitaki koya me vakamatei, ka soli koya vei ira na kai tani. 34Era na vakalialiai koya ka kasiviti koya, ka vakanakuitataki koya ka vakamatea sara. Ia ena qai tucake tale ni sa oti e tolu na siga.”
Na Nodrau Kerekere o Jemesa kei Joni
(Maciu 20.20-28)
35E rau sa qai lako vei Jisu o Jemesa kei Joni, oi rau na luve i Sepeti, ka kaya vua, “Na i Vakavuvuli, keirau gadreva mo ni vakayacora vei keirau na ka ga keirau kerea vei kemuni.”
36Sa qai kaya vei rau o koya, “Na cava o drau vinakata me'u cakava vei kemudrau?”
37E rau sa qai kaya, “Ni solia vei keirau me keirau tiko ena nomuni serau, e dua ena ligamuni i matau, ka dua ena ligamuni i mawi.”
38Sa qai kaya vei rau o Jisu, “Drau sa sega ni kila na ka drau sa kerea. Drau sa rawata li mo drau gunu ena bilo au na gunu kina, ka papitaisotaki ena papitaiso au na papitaisotaki kina?”#Luke 12.50
39E rau sa qai kaya vua, “Keirau rawata.”
Sa qai kaya vei rau o Jisu, “Drau na gunu ena bilo au na gunu kina, ka papitaisotaki ena papitaiso au na papitaisotaki kina. 40Ia me dua e tiko ena ligaqu i matau se ligaqu i mawi, e sega ni noqu me'u solia. Ni sai koya na Kalou ka na solia na i tutu oqo vei ira sa vakarautaka o koya me nodra.”
41Ni ratou sa rogoca na lewe tini, e ratou sa cudruvi rau sara o Jemesa kei Joni. 42Sa qai kacivi iratou o Jisu ka kaya vei iratou, “Dou kila ni o ira era veiliutaki vei ira na veimatanitu tani era lewai ira sara tu ga na nodra tamata, ia o ira na nodra turaga lelevu era dau vakacolasau vei ira.#Luke 22.25,26 43Ia me kakua ni vakakina vei kemudou. O koya e vinakata me veiliutaki vei kemudou me nomudou dauveiqaravi,#Maciu 23.11; Mari 9.35; Luke 22.26 44kei koya vei kemudou e via turaga, me nomudou bobula. 45Ni a sega ni lako mai na Luve ni Tamata me qaravi, ia me dau veiqaravi ga, ka me solia na nona bula me kedra i voli na lewe vuqa.”
Sa Vakabulai Patemo na Mataboko o Jisu
(Maciu 20.29-34; Luke 18.35-43)
46E ratou sa qai yaco ki Jeriko. Ia ni ratou sa biuti Jeriko tale, o Jisu kei iratou na nona tisaipeli, kei ira talega na lewe vuqa, a dabe toka e yasa ni sala e dua na daukerekere mataboko; a yacana o Patemo, na luve i Timeo. 47Ni sa rogoca o koya ni sai Jisu na kai Nasareci, sa kaci ka kaya, “Jisu, na Luve i Tevita, ni lomani au mai!”
48Era sa qai karalaki koya na lewe vuqa ka kaya vua me tiko lo, ia sa qai kaci vakadomoilevu cake ga o koya, ka vaka “Na luve i Tevita, ni lomani au mai!”
49Sa tu vakadua o Jisu, ka kaya, “Dou kacivi koya mai.”
Era sa mani kaciva na mataboko, ka kaya vua, “Kua ni yalolailai! Tucake, sa kacivi iko tiko mai o koya.”
50Sa qai viritaka tani na nona i ubi balavu, ka lade cake, ka lako sara vei Jisu.
51Sa qai kaya vua o Jisu, “Na cava o vinakata me'u cakava vei iko?”
A mani kaya na tamata mataboko vua, “Vakavuvuli, au vinakata me'u rai tale.”
52Sa qai kaya vua o Jisu, “Mo lako ga; sa vakabulai iko na nomu vakabauta.”
A sa rai rawa vakasauri na matana, ka mai muri Jisu sara yani e gaunisala.
Currently Selected:
Marika 10: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.