Marika 11
11
Na Curu Vakatui ki Jerusalemi
(Maciu 21.1-11; Luke 19.28-40; Joni 12.12-19)
1Ia ni ratou sa toro voleka tiko yani ki Jerusalemi, volekati Pecifaki kei Pecani, ena Ulunivanua ni Veiolive, sa qai tala e rua vei iratou na nona tisaipeli o Jisu, 2ka kaya vei rau, “Drau lako ki na koro o ya; ni drau sa curu kina, drau na kunea sara e dua na luve ni asa e sa sega ni bau vodoki vakadua, ni vesu tu. Drau sereka ka kauta mai. 3Kevaka e dua sa tarogi kemudrau kina, mo drau qai kaya, ‘Sa gadreva oqo na Turaga, ka na qai vakasuka tale mai ki ke.’ ”
4E rau sa mani lako sara ka kunea na luve ni asa ni tu ena gaunisala ka noka tu ena katuba ni dua na vale; ka rau sa sereka sara. 5E ratou a qai kaya mai o iratou ka tu voli e kea, “Na cava o drau sereka kina na luve ni asa?”
6E rau sa qai kaya vei iratou na ka sa kaya o Jisu, ka ratou sa mani laivi rau me rau kauta na asa. 7E rau sa qai kauta na asa vei Jisu, ka tevuka e delana na nodrau i sulu, ka sa vodo sara kina o Jisu. 8Era sa tevuka na nodra i sulu ena gaunisala e lewe vuqa, ka ra sa taya eso na taba ni kau eso tale ka veibiuyaka ena gaunisala. 9Ia o ira era liu tiko kei ira era muri, era sa kailavaka mai,#Same 118.25,26
“Osana!
Sa kalougata o koya sa lako mai ena yaca ni Turaga!
10Me vakalougataka na Kalou na matanitu nei Tevita na tui ka sa yaco mai oqo!
Osana ki cake sara!”
11Sa qai curu ki Jerusalemi o Jisu, ka lako sara ki na Valenisoro. Ia ni sa oti na nona vakaraica voli na veika kecega, sa yakavi mai na vanua. E ratou sa qai lako sara ki Pecani kei iratou na lewe tinikarua.
Sa Cudruva na Vunilolo o Jisu
(Maciu 21.18-19)
12Ia ni ratou sa lesu tiko mai Pecani ena siga ka tarava, sa qai viakana o Jisu. 13Sa raica vakayawa yani e dua na vunilolo bulabula vinaka, ka mani lako sara yani me raica de vua tu. Ni sa yaco kina, sa sega ni kunea e dua na ka, na drauna walega, ka ni sega ni vula i lolo o ya. 14Sa qai kaya ki na vunilolo o Jisu, “Me kakua tale ni dua me kana lolo vei iko ka tawamudu.” E ratou a rogoca kece na ka oqo na nona tisaipeli.
Sa Lako ki na Valenisoro o Jisu
(Maciu 21.12-17; Luke 19.45-48; Joni 2.13-22)
15Ia ni ratou sa yaco ki Jerusalemi, sa la'ki curu sara ki na Valenisoro o Jisu. Sa qai tekivu vakasavi ira tani na veivoli tiko kina, ka vukica na nodra teveli na dauveisau i lavo kei na nodra i dabedabe na volitaki ruve; 16ka a sega ni vakatara e dua me colata e loma ni Valenisoro e dua na ka. 17Sa qai vakavulici ira, ka kaya, “E sega li ni volai tu ena i Vola Tabu, ‘A noqu vale ena vakatokai me nodra vale ni masu na veimatanitu kecega’? Ia o ni sa cakava ga me nodra qara na daubutako.”#Aisea 56.7; Jere 7.11
18Ia ni ra sa rogoca na ka oqo o ira na bete levu kei ira na qasenivuli ni lawa era sa qai saga e dua na sala me ra vakamatei koya kina ni ra sa rerevaki koya, ena vuku ni nodra kurabuitaka na lewe vuqa na nona i vakavuvuli.
19Ia ni sa yakavi mai e ratou sa qai biuta tale na koro o Jisu kei iratou na nona tisaipeli.
Na i Vakavuvuli mai na Vunilolo
(Maciu 21.20-22)
20Ena mataka lailai ka tarava ni ratou sa lako tiko ena gaunisala, e ratou sa raica na vunilolo ni sa mate vakadua, me yaco sara ki wakana. 21Sa qai nanuma o Pita na nona vosa, ka kaya, “Vakavuvuli, ni raica, sa mate na vunilolo o ni a cudruva!”
22Sa qai kaya vei iratou o Jisu, “Dou vakabauta na Kalou. 23Au sa kaya vakaidina vei kemudou, ke dua e kaya ki na ulunivanua oqo, ‘Mo toki tani ka biu ki wasawasa,’ ka vakabauta ni na yaco na ka e tukuna, ka sega tale ni vakatitiqa na lomana, ena vakayacori dina na ka e kaya.#Maciu 17.20; 1Kori 13.2 24Sa i koya oqo au kaya kina vei kemudou ni ka kecega dou kerea ena masu, ka vakabauta ni dou na rawata, dou na rawata dina ga. 25Ni dou sa tu mo dou masu, dou vosota ka guilecava taumada na nodra ca era sa caka ca vei kemudou, ena qai bokoca talega kina na nomudou i valavala ca na Tamamudou mai lomalagi.#Maciu 6.14,15 [26Ia kevaka dou sa sega ni vosota ka guilecava, ena sega talega ni bokoca na nomudou i valavala ca na Tamamudou mai lomalagi.]”
Vaqaqai na Kaukauwa i Jisu
(Maciu 21.23-27; Luke 20.1-8)
27E ratou sa qai lesu tale ki Jerusalemi. Ia ni sa veilakoyaki voli e loma ni Valenisoro o Jisu, era sa qai lako vua o ira na bete levu, o ira na qasenivuli ni lawa, kei ira na qase, 28ka ra tarogi koya ka kaya, “O vakayacora tiko na veika oqo ena lewa mai vei? O cei sa solia vei iko na kaukauwa mo cakava kina na veika oqo?”
29Sa qai kaya vei ira o koya, “Au na tarogi kemuni ena dua na taro; mo ni sauma mai vei au, ka'u na qai tukuna vei kemuni se na lewa mai vei au vakayacora tiko kina na veika oqo. 30E vu mai vei na veipapitaisotaki i Joni, e vu mai lomalagi se vu mai vua na tamata? Ni sauma mada mai.”
31Era sa qai veileti vakai ira, ka kaya, “Kevaka eda kaya, ‘Mai lomalagi,’ ena qai kaya o koya, ‘Na cava ga o ni sega ni vakabauti koya kina.’ 32Ia me da kaya li, ‘Mai vua na tamata’?” — (Era a rerevaki ira na tamata, ka ni ra sa vakadinata ni a parofita dina o Joni.) 33Era sa qai kaya vei Jisu, “Keimami sega ni kila.”
Sa qai kaya vei ira o Jisu, “Au na sega talega ni tukuna vei kemuni se lako mai vei na lewa au vakayacora tiko kina na veika oqo.”
Currently Selected:
Marika 11: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.