Marika 12
12
Na Vosa Vakatautauvata ni Tamata ena Loganivaini
(Maciu 21.33-46; Luke 20.9-19)
1Sa qai vakatekivu me vosa vei ira o koya ena vosa vakatautauvata: “E a tea e dua na loganivaini e dua na tamata ka viribai wavokita, ka kelia e dua na i keli ni loba waini, ka tara na vale ni kena i vakatawa, ka lisitaka vei ira eso tale na dauteitei, a sa qai lako yani ki na dua na vanua tani.#Aisea 5.1,2 2Ni sa yaco mai na gauna me tamusuki kina na qerepi, a sa tala sara o koya e dua na nona dauveiqaravi vei ira na lisitaka na i teitei, me la'ki kauta mai na nona i votavota ni veika sa tamusuki. 3Era sa qai tauri koya ka mokuta, ka vakatalai koya lesu wale tale. 4Sa qai tala tale o koya e dua na dauveiqaravi, ia era sa qai vakamavoataka na uluna, ka vakayacora vua na i tovo veivakamaduataki. 5Sa qai tala tale e dua o koya, ia era a vakamatea talega; era sa kitaka vakakina ki na lewe vuqa tale; eso era mokuta ka so era vakamatea. 6Sa qai vo ga vua e dua, o ya, na luvena lomani. Sa qai talai koya duadua sara e muri vei ira, ka kaya, ‘Era na doka na luvequ.’ 7Ia era sa qai veikayaka vakai ira na lisitaka na i teitei, ‘Sa i koya oqo ena i sosomi kei tamana e muri. Me da vakamatea, me na qai noda na veika ena taukena.’ 8Era sa qai tauri koya ka vakamatea, ka viritaka na yagona ki na taudaku ni veivaini.
9“Na cava beka ena cakava na i taukei ni loganivaini? Ena lako mai ka vakamatei ira na lisitaka na i teitei ka solia na loganivaini vei ira tale eso. 10O ni sa sega li ni wilika na tiki ni Vola Tabu oqo?#Same 118.22,23
‘Na vatu sara ga era a cata na dautara vale
Sa qai yaco me i vakadei ena tutu ni vale.
11Oqo na cakacaka ni Turaga,
Ka sa veivakurabuitaki e matada!’ ”
12Era sa qai via vesuki Jisu, ni ra sa kila rawa ni a tukuna o koya na vosa vakatautauvata o ya me baleti ira; ia era sa rerevaki ira ga na lewe vuqa, ka ra sa mani biuti koya tu ga e kea ka lako.
Na Vakatarotaro me Baleta na Saumi ni Vakacavacava
(Maciu 22.15-22; Luke 20.20-26)
13Era sa qai tala vei Jisu eso na Farisi kei na so na i tokani i Eroti me ra coriti koya ena nona vosa. 14Era sa lako ka kaya vua, “Vakavuvuli, keimami sa kila ni o ni sa dau tukuna na ka dina. O ni sa sega ni rerevaka na ka era nanuma na tamata, se mo ni kauwaitaka sara na i tutu vakatamata. Ia o ni sa dau vakatavuvulitaka ga na veika dina vakalou. Ni tukuna mada mai, e cala li ena noda Lawa me da sauma na i vakacavacava vei Sisa? E dodonu li me da saumi vakacavacava vei Sisa, se segai?
15Me da sauma se me da kakua ni sauma?”
Ia ni sa kila o koya na nodra veivakaisini, sa qai kaya vei ira, “A cava o ni via veretaki au kina? Kauta mai vei au e dua na i lavo siliva, me'u mai raica mada.”
16Era sa qai solia vua e dua na i lavo. Sa qai kaya vei ira o koya, “Na ulu i cei kei na yaca i cei e tabaki toka oqo?”
Era sa kaya vua, “A nei Sisa.”
17Sa qai kaya vei ira o Jisu, “Ni solia vua na Sisa na veika sa nona na Sisa, vua talega na Kalou na veika sa nona na Kalou.”
Era sa kurabuitaki koya vakalevu.
Na Taro me Baleta na Tu Cake Tale mai na Mate
(Maciu 22.23-33; Luke 20.27-40)
18Era sa qai lako vei Jisu na Setoki, o ira era kaya ni sega na tucake tale mai na mate, ka tarogi koya vakaoqo,#Caka 23.8 19“Na i Vakavuvuli, sa vola tu vei keda o Mosese ni kevaka sa mate na tuakana se tacina e dua na tagane, ka laiva tu mai na watina, ka sega na luvena, me qai taura na nona yada, me vakaluveni kina, me qai wili na gone ki vua sa mate.#Vrua 25.5 20E dua na mataveitacini tagane e ratou lewe vitu; sa vakawati o koya e qase duadua, ia sa mani mate ka sega na luvena. 21Sa mani taura na nona yada o koya ka tarava, ka sa mani mate talega, ka sega na luvena; sa vaka talega kina vua na kena i katolu, kei iratou na kena vo. 22E a sega ni dua vei iratou na lewe vitu me vakaluveni. Sa qai mate duadua sara e muri o koya na yalewa. 23Ni sa yaco na tucake tale mai na mate, ena qai wati cei vei iratou o koya? Ni ratou a sa vakawatitaki koya kece na lewe vitu.”
24Sa qai kaya vei ira o Jisu, “E sega li ni ka oqo o ni cala kina; o ni sa lecava na i Vola Tabu, ka sega talega ni kila na kaukauwa ni Kalou? 25Ni ra sa na tucake tale mai na mate era na sega tale ni vakawati, se veimusumusuki me ra vakawati, era sa na vaka ga na agilosi mai lomalagi. 26Ia ena vuku ni nodra vakaturi cake tale na mate, o ni sega li ni wilika ena vosa i Mosese, ena i talanoa me baleta na kau ka a kama tiko, na nona a kaya na Kalou vua, ‘Oi au na Kalou i Epara-ama, na Kalou i Aisake, kei na Kalou i Jekope.’#Lako 3.6 27O koya, e sega ni nodra Kalou na mate, e nodra Kalou ga na bula. O ni sa cala sara ga vakalevu!”
Na i Vakaro Bibi Duadua
(Maciu 22.34-40; Luke 10.25-28)
28Sa qai lako mai e dua vei ira na qasenivuli ni lawa ka rogoca ni ra veileti tiko vakai ira; ia ni sa rogoca na vinaka ni saumi taro nei Jisu, sa qai tarogi koya, “Na i vakaro cava e bibi duadua vei ira kece na i vakaro?”
29A sauma o Jisu ka kaya, “Sa i koya oqo na i vakaro bibi duadua, ‘Mo ni rogoca na Isireli, na Turaga na noda Kalou, na Turaga sa dua bauga.#Vrua 6.4,5 30Mo ni lomana na Turaga na nomuni Kalou ena lomamuni taucoko, kei na yalomuni taucoko, kei na nomuni nanuma kecega, kei na nomuni kaukauwa taucoko.’ 31Na kena i karua oqo, ‘Mo lomana na kai nomu me vaka o sa lomani iko.’ Sa sega tale ni dua na i vakaro e bibi cake mai vei rau oqo.”#Vsoro 19.18
32Sa qai kaya vei Jisu na qasenivuli ni lawa, “Vakavuvuli, sa donu vinaka oqori. Sa dina sara na nomu vosa ni sa dua bauga na Kalou, ka sa sega tale ni dua me rau lewe rua kaya, sai koya duadua ga;#Vrua 4.35 33ka me da lomani koya ena lomada taucoko, kei na noda vakasama taucoko kei na noda kaukauwa taucoko, ka lomana na kai noda me vakataki keda. Sa bibi cake oqo mai na i soro kama taucoko kei na i soro kecega.”#Osea 6.6
34Ni sa raica o Jisu na nona sauma vakavuku, sa qai kaya vua, “O sa sega ni yawa mai na matanitu ni Kalou.” Ni sa oti o ya, sa sega tale ni dua e doudou me taroga vua e dua na taro.#Luke 10.25-28
Na Taro me Baleta na Mesaia
(Maciu 22.41-46; Luke 20.41-44)
35Ni sa veivakatavulici tiko o Jisu ena Valenisoro, sa kaya, “Era kainaka rawa ga vakacava na qasenivuli ni lawa ni luve i Tevita na Mesaia? 36O Tevita mada ga vakaikoya sa kaya ena kaukauwa ni Yalo Tabu,#Same 110.1
‘Sa kaya na Turaga ki vua na noqu Turaga,
Mai dabe ena yasaqu i matau,
Me yacova ni'u sa vakatikori ira na nomu meca me ra i tutu ni yavamu.’
37Me vaka ni sa vakatokai koya vakaikoya o Tevita me ‘Turaga’; ia me na qai wili me kawa i Tevita vakacava na Mesaia?”
Sa Veivakasalataki o Jisu Baleti Ira na Qasenivuli ni Lawa
(Maciu 23.1-36; Luke 20.45-47)
Era sa lewe vuqa sara na tamata era sa marautaka na nodra vakarogoci Jisu voli. 38Ena nona veivakatavulici tiko, sa kaya kina vei ira, “Ni qarauni kemuni mai vei ira na qasenivuli ni lawa, era dau vinakata me ra lako voli ena nodra kote balavu, ka me ra kidavaki vakaturaga ena veivanua ni veivoli, 39era dau vinakata na i dabedabe digitaki e cake ni valenilotu, kei na veitikotiko vakaturaga ena gauna ni kana magiti. 40Era dau vakalolomataki ira na yada ka kovea na nodra vale, ka ra qai dau vakaraitaki ira ena veivakaisini mai na nodra masu balabalavu. Ena bibi vakalevu sara na nodra cudruvi!”
Na Nona i Solisoli na Yada Dravudravua
(Luke 21.1-4)
41Ni dabe volekata tiko na kato ni lavo ni valenisoro o Jisu, a sa vakaraici ira na lewe vuqa ni ra la'ki biuta kina na nodra i solisoli. Sa ka levu sara na i lavo era solia o ira na tamata vutuniyau. 42Ia sa qai lako yani e dua na yada dravudravua, ka solia kina e rua na i lavo lalai sara, ka rauta ni dua na pene na kena levu. 43Sa qai kacivi iratou mai na nona tisaipeli o Jisu, ka kaya vei iratou, “Au sa kaya vakaidina vei kemudou, e levu cake na ka e solia na yada dravudravua o ya mai na ka era solia na kena vo. 44O ira kece o ya era a soli ka mai na nodra vutuniyau, ia na marama o ya, ena dela ni nona dravudravua, a solia na ka kece sara ga e tu vua, me bula kina.”
Currently Selected:
Marika 12: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.