Marika 8
8
Sa Vakani Ira na Va na Udolu o Jisu
(Maciu 15.32-39)
1Ena dua na gauna vakalailai ki muri era a soqoni vata tale e lewe vuqa na tamata, ia sa sega na ka me ra kania. Sa qai kacivi iratou na nona tisaipeli o Jisu, ka kaya vei iratou, 2“Au sa lomani ira dina na tamata oqo, ni sa siga tolu mai oqo na neimami tiko vata, ka sa sega na ka me ra kania. 3Kevaka au sa vakasukai ira lesu ki na nodra veivale ni ra viakana tu, era na malumalumu ka matabuto e gaunisala, baleta ni ra sa lako vakayawa sara mai eso vei ira.”
4Eratou sa qai kaya vua na nona tisaipeli, “Evei na vanua ena loma ni vanua lala oqo me kunei kina na kakana me ra vakani kina?”
5Sa qai tarogi iratou o Jisu, “E vica na i buli madrai e tiko vei kemudou?”
E ratou sa kaya, “E vitu.”
6Sa qai vakaroti ira na lewe vuqa o koya me ra dabe sobu. Sa qai taura na i buli madrai e vitu, ka vakavinavinakataka vua na Kalou. Sa qai dovidovia ka solia vei iratou na nona tisaipeli me ratou veivotayaka vei ira na tamata, e ratou sa qai kitaka vakakina. 7E a tiko talega vei iratou e vica na ika lalai. Sa qai vakavinavinakataka o Jisu ka tukuna vei iratou me ratou veivotayaka talega. 8Era sa kana, ka mamau; ka ra tomika na i vovo ni ka sa dovi, ka sa sinai kina e vitu na basikete. 9E rauta ni 4,000 na lewe levu ni tamata taucoko. 10Sa qai vakasukai ira o Jisu; ka vodo sara ki waqa kei iratou na nona tisaipeli, ka lako ki na yasayasa vaka-Talimanuca.
Era Vinakata na Farisi me Dua na Caka Mana
(Maciu 16.1-4)
11Era a lako mai eso na Farisi ka vakatekivu me veileti kaya, ka vinakata me cakava o koya e dua na i vakatakilakila mai lomalagi, me ra vakatovolei koya kina.#Maciu 12.38; Luke 11.16 12E a vutugu vakalevu o koya ena vu ni yalona, ka kaya, “Na cava e vakasaqara kina na i tabatamata oqo e dua na i vakatakilakila? Au sa kaya vakaidina vei kemudou, ena sega ni soli e dua na i vakatakilakila ki na i tabatamata oqo.”#Maciu 12.39; Luke 11.29
13Sa qai biuti ira, ka vodo ki waqa, ka lako yani ki tai kadua.
Na Nodra i Vakatubu na Farisi kei Eroti
(Maciu 16.5-12)
14Ia e ratou a guilecava na tisaipeli me ratou kauta tiko eso tale na madrai; e dua walega na i buli e tiko vei iratou e waqa. 15Sa qai vakadreti iratou o Jisu, ka kaya, “Raica, dou qarauni kemudou mai na nodra i vakatubu na Farisi, kei na i vakatubu i Eroti.”#Luke 12.1
16E ratou sa qai veivosakitaka vakai iratou, ka kaya, “Oqo e baleta ni sega vei kedatou na madrai.”
17Ni sa kila o Jisu na ka e ratou veivosakitaka tiko sa qai kaya vei iratou, “A cava dou veivosakitaka tiko kina ni sega vei kemudou na madrai? Dou se sega tikoga oqo ni raica rawa se kila? E se tasogo tikoga li na lomamudou? 18#Jere 5.21; Isi 12.2; Mari 4.12Sa tu na matamudou — ia dou se sega beka ga ni se raica? Sa tu na daligamudou — ia dou se sega tikoga ni rogoca? Dou sa sega tale ni nanuma rawa 19ni'u a dovidovia na i buli madrai e lima vei ira na lewe 5,000? E vica na basikete dou a vakasinaita ena vo ni kakana sa dovi?”
E ratou sa qai kaya vua, “E tinikarua.”
20A sa taroga talega o Jisu, “Ena gauna ka'u a dovia kina na vitu na i buli madrai vei ira na lewe 4,000, sa vica na basikete dou a vakasinaita ena vo ni veitiki ni madrai?”
E ratou sa qai kaya vua, “E vitu.”
21Sa qai tarogi iratou o koya, “Dou se sega tikoga ni kila rawa na i balebale ni veika oqo?”
Sa Vakabula e Dua na Mataboko mai Pecisaita o Jisu
22E ratou sa qai yaco ki Pecisaita; ka ra sa kauta vei Jisu eso na tamata e dua na tamata mataboko, ka ra kerei koya me tara. 23A sa taura na liga ni tamata mataboko o Jisu, ka tuberi koya tani ki na i bili ni koro, ka kasivita na matana ruarua ka tabaka ena ligana. Sa qai tarogi koya, ka kaya, “O sa bau raica e dua na ka, se sega?”
24Sa qai tacake ka kaya, “Au sa raici ira na tamata, ia era vaka na veivunikau era sa lako voli.”
25Sa qai tara tale na matana o Jisu. A sa rai matua o koya, ka sa vinaka sara mai na matana, ka sa raica vakavinaka na ka kecega. 26Sa qai vakatalai koya o Jisu ki na nona vale ka kaya, “Kakua ni lako tale ki na koro.”
Na Ka e Tusanaka o Pita me Baleti Jisu
(Maciu 16.13-20; Luke 9.18-21)
27E ratou sa qai cavutu o Jisu kei iratou na nona tisaipeli ka lako ki na veikoro mai Sisaria-Filipai. Ia ni ratou sa lako tiko e gaunisala sa qai tarogi iratou na nona tisaipeli, ka kaya, “A cava era kaya na tamata se o cei oi au?”
28E ratou sa qai kaya vua, “Eso era kaya ni o Joni na Dauveipapitaisotaki; ka so tale era kaya, o Ilaijia; ka so tale, e dua vei ira na parofita.”#Mari 6.14,15; Luke 9.7,8
29Sa qai tarogi iratou, ka kaya, “Ia o cei ga dou kaya oi kemudou ni oi au?”#Joni 6.68,69
Sa qai sauma vua o Pita, “Sa i kemuni na Mesaia.”
30Sa qai vakaroti iratou matua me ratou kakua ni tukuni koya vua e dua.
Sa Tukuna Tale o Jisu na Nona Vakararawataki kei na Nona Mate
(Maciu 16.21-28; Luke 9.22-27)
31Sa qai vakatekivu me vakatavulici iratou na nona tisaipeli o Jisu, ni sa kena dodonu ga me sota kaya na Luve ni Tamata na ka rarawa e vuqa, ka me ra cati koya na qase kei ira na bete levu kei ira na daunilawa, ka na vakamatei, ka na qai tucake tale ni sa oti e tolu na siga. 32E a tukuna vakamatata sara na ka oqo o koya, ia sa qai kauti koya vakatikitiki o Pita, ka tekivu me vunauca. 33Ia sa qai vuki o Jisu ka vakaraici iratou na nona tisaipeli ka vunauci Pita, ka kaya, “Lako tani ki dakuqu, Setani! Ni sa vakatamata ga na nomu vakasama, ka sega ni vakalou.”
34Sa qai kacivi ira vata na lewe vuqa kei iratou na nona tisaipeli o Jisu, ka kaya vei ira, “Kevaka e dua sa via muri au, me kakua ni muria na lomana, ia me colata ga na nona kauveilatai ka muri au.#Maciu 10.38; Luke 14.27 35O koya yadua sa via maroroya na nona bula ena vakayalia; ia o koya yadua sa vakayalia na nona bula ena vukuqu kei na vuku ni tukutuku vinaka, ena maroroya.#Maciu 10.39; Luke 17.33; Joni 12.25 36A cava na kena yaga vua na tamata, me rawati vuravura taucoko, ka vakayalia wale kina na yalona? 37Se cava li ena solia na tamata me i sau ni yalona? 38Kevaka e dua na tamata sa madualaki au vata kei na noqu vosa ena i tabatamata dauveibutakoci ka i valavala ca oqo, ena madualaki koya talega na Luve ni Tamata ni sa lako mai ena i serau nei Tamana vata kei ira na agilosi yalosavasava.”
Currently Selected:
Marika 8: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.