Marika 7
7
Na Nodra i Vakavuvuli na Qase
(Maciu 15.1-9)
1Ia ni ra sa soqoni vata yani vei Jisu na Farisi kei ira eso na daunilawa ka ra lako mai Jerusalemi, 2era qai raica ni ratou sa kana tiko eso vei iratou na nona tisaipeli ka sega tu ni savasava na ligadratou, o ya ni ratou a se sega ni vuluvulu mada e liu.
3(O ira na Farisi, ka vakakina o ira na vo ni Jiu, era sa dau muria na i nodra i vakavuvuli na nodra qase me vakaoqo: era na sega mada ni kana kevaka era se bera ni savata na ligadra ena i valavala ni vuluvulu e vakavulici vei ira; 4ka ra na sega talega ni kania e dua na i voli mai na makete kevaka era sega mada ni vakasavasavataka e liu; ka vuqa tale na i valavala ni bula era sa muria me vaka na i valavala ni kena sava na bilo, kei na kuro, kei na beseni parasa, kei na i davodavo.)
5Era sa qai tarogi koya na Farisi kei na daunilawa, ka kaya, “Na cava e ratou sega kina ni muria na nomu tisaipeli na nodra i vakavuvuli na neimami qase, ni ratou sa kana ka sega mada ni vuluvulu?”
6 #
Aisea 29.13 (LXX) Sa qai kaya vei ira o Jisu, “Sa dina sara o Aisea ena nona vosa ni parofisai me baleti kemuni! O ni sa tamata dauveivakaisini vakaidina, me vaka sa vola vakaoqo o koya:
‘Era sa vakarokorokotaki au na tamata oqo ena tebenigusudra,
Ia na yalodra sa yawa sara mai vei au.
7Sa sega ni yaga na nodra qaravi au,
Ni ra sa vakatavuvulitaka na i vakavuvuli ni tamata
Me vaka era sa lawa ni Kalou!’
8“O ni sa biuta na i vakaro ni Kalou, ka taura matua na i vakavuvuli ni tamata.”
9Sa qai kaya vei ira o Jisu, “O ni sa rui maqosataka na nomuni biuta vakatikitiki na i vakaro ni Kalou me rawa kina na nomuni taurivaka tikoga na nomuni i vakavuvuli makawa! 10Ni a vakarota vakaoqo o Mosese, ‘Vakarokoroko vei rau na tamamu kei na tinamu,’ ka a kaya talega, ‘O koya e vosa vakacacataka na tamana se na tinana, me vakamatei.’#Lako 20.12; Vrua 5.16; Lako 21.17; Vsoro 20.9 11Ia o ni sa kaya, ‘Kevaka e kaya e dua na tamata vua na tamana se tinana, Na veika e noqu ka a nanumi mo taura me yaga vei iko e sa Koripani’ (a kena i balebale, a sa soli tu vua na Kalou), 12o ni sa qai tarovi koya kina me kakua ni cakava tale e dua na ka me yaga vua na tamana se tinana. 13Ena ka oqo, sa vakatawayagataka kina na vosa ni Kalou na nomuni i vakavuvuli sa vakadewataki sobu mai. Sa levu sara na veika vakaoqo o ni sa vakayacora.”
Na Ka e Vakadukadukalitaka na Tamata
(Maciu 15.10-20)
14Sa qai kacivi ira tale yani na tamata ki vua o Jisu, ka kaya vei ira, “Ni rogoci au kece mada, ka mo ni kila: 15sa sega ni dua na ka ena taudaku ni tamata ka sa curu ki na loma ni tamata me vakavuna na nona vakadukadukalitaki. Ia na veika ga e lako mai lomana sa vakavuna na nona tawasavasava. 16Kevaka o ni sa vakadaligana, ia mo ni rogoca sara.”
17Ena gauna sa biuti ira kina na lewe vuqa ka curu yani ki vale, e ratou sa qai tarogi koya na nona tisaipeli me baleta na vosa vakatautauvata o ya. 18Sa qai kaya vei iratou o koya, “Dou sa sega beka ni kila oi kemudou? Sa sega ni dua na ka mai taudaku sa curu ki na tamata me na vakavuna na nona tawasavasava, 19baleta ni sa sega ni curu ki yalona, ia ki ketena ga, ka na la'ki lako tani sara ki tuba.” (Sa vakaraitaka kina vakaoqo o Jisu ni sa savasava na kakana kecega.)
20Sa qai kaya o koya, “Na ka e lako mai na loma ni tamata sai koya na ka e vakadukadukalitaki koya. 21Ni sa dau lako mai loma, mai na yalo ni tamata, na veivakanananu ca, na dauyalewa, na daubutako, na daulaba, na veibutakoci, 22na kocokoco, na i valavala velavela, na veivakaisini, na gagano ca, na vuvu na vosa vakacaca, na viavialevu, na i valavala lialia. 23Era lako mai loma na veika ca kecega oqo, ka ra vakadukadukalitaka na tamata.”
Na Nona Vakabauta e Dua na Yalewa
(Maciu 15.21-28)
24Sa qai biuta na vanua o ya o Jisu ka sa lako yani ki na yasayasa vaka-Taia kei Saitoni. A sa curu ki na dua na vale ka sega ni vinakata me dua e kila, ia sa sega ga ni rawa ni tiko vuni e kea. 25A sa rogoca na kena i tukutuku e dua na yalewa ka curumi yalo velavela tiko na luvena goneyalewa. Sa qai lako na yalewa o ya ka la'ki cuva e yavana. 26E kai matanitu tani na yalewa oqo, ka sa sucu ena yasayasa vaka-Finisia mai Siria. A sa qai vakamasuti Jisu me vakasava tani na tevoro mai vua na luvena yalewa. 27Ia sa qai kaya vua o Jisu, “Me liu taumada na nodra vakani na gone. Sa sega sara ni dodonu me tauri na kedra na gone ka viritaki yani vei ira na koli.”
28A sa sauma na yalewa, ka kaya, “Sa dina saka oqori, ia o ira na koli ena ruku ni teveli era sa kania na i vovo ni kedra na gone!”
29Sa qai kaya vua o Jisu, “Ena vuku ni vosa oqori, mo lesu tale ki vale, o na la'ki kunea ni sa biuta na luvemu na tevoro!”
30Sa qai lako na yalewa ki na nona vale, ka raica na luvena ni davo koto ena i davodavo; ka sa biuti koya vakaidina na tevoro.
Sa Vakabula o Jisu e Dua na Tamata Didivara ka Galu
31Sa qai biuta na yasayasa vaka-Taia o Jisu me lako ki Kalili ena sala vaka ki Saitoni kei na Veikoro e Tini. 32Era a qai kauta mai vua e dua na tamata didivara ka dredre tu ni vosa, ka ra kerei koya me tabaki koya e ligana. 33Ia ni sa kauti koya tani vakatikitiki mai vei ira na lewe vuqa o Jisu, sa qai tara na daligana ruarua ena nona i qaqalo, ka kasivi, ka tara na yamena. 34Sa qai tacake ki lomalagi, ka sa vutugu na yalona ka kaya vua, “Efaca!” (a kena i balebale, “Mo tadola mai!”).
35Sa qai rogo rawa sara na daligana ka tasere na yamena, ka sa macala na nona vosa. 36Sa qai vakaroti ira o Jisu me ra kakua ni tukuna vua e dua na tamata; ia na kena levu ga ni nona vakatabuya, na kena levu talega ni nodra veitukuniyaka. 37Era sa kurabui vakalevu sara o ira kecega era sa rogoca, ka ra kaya, “Na ka kece sara e cakava e caka vakavinaka! Era sa bau mai rogo rawa na didivara ka ra vosa na galu ena nona cakacaka!”
Currently Selected:
Marika 7: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.