Marika 6
6
Sa Sega ni Vinakati mai Nasareci o Jisu
(Maciu 13.53-58; Luke 4.16-30)
1Sa qai biuta na vanua o ya o Jisu ka lako ki na nona koro, ka ratou sa muri koya na nona tisaipeli. 2Ia ena Siga ni Vakacecegu, sa qai tekivu veivakatavulici ena valenilotu o koya, ka ra sa kurabui kina na lewe vuqa era rogoci koya, ka kaya, “E kauta mai vei o koya na ka kece oqo? Na mataqali vuku vakacava mada sa soli oqo vua, me cakava rawa kina e ligana na veicakacaka mana vakaoqo? 3E sega li ni o koya oqo na matai, na luve i Maria, ka tuakadratou o Jemesa kei Josese, kei Juta, kei Saimoni; ka sega li ni ratou ganena na goneyalewa ka ratou tiko vata oqo kei keda?” Era sa levaci koya vakalevu ka sega ni via vakabauti koya.
4Sa qai kaya vei ira o Jisu, “Sa dokai na parofita ena veivanua kecega vakavo ga ena nona vanua, se vei ira na nona lewe ni mataqali, se ena nona vale.”#Joni 4.44
5Sa mani sega ni cakava rawa kina e dua na cakacaka mana e kea o koya; sa tarai ira ga e lewe vica na tamata tauvimate, ka vakabulai ira. 6Sa kurabui sara o koya ena nodra sega ni vakabauta.
Sa Talai Iratou na Tisaipeli e Tinikarua o Jisu
(Maciu 10.5-15; Luke 9.1-6)
A sa veilakoyaki voli ena veikoro e kea o Jisu ka veivakatavulici tiko. 7Sa qai kacivi iratou vata na lewe tinikarua ki vua, ka tekivu talai iratou yayarua yani, ka solia vei iratou na kaukauwa me ratou vakasavi ira kina na yalovelavela. 8E a vakaroti iratou me ratou kakua ni kauta e dua na ka me baleta na nodratou i lakolako, ia na nodratou i titoko ga; me kua na kakana, me kua na kato ni kerekere, me kua na i lavo ena loma ni taga; 9ia, me ratou vakaivava ga, ka kakua ni kauta e dua tale na sote. 10Sa qai kaya tale vei iratou o koya, “Ena vanua dou sa vakacurumi kina ki na dua na vale, dou tiko ga ena vale o ya me yacova ni dou sa biuta na vanua oqori. 11Ia kevaka e dua na vanua era sega ni vakacegui kemudou, ka ra bese ni rogoci kemudou, ni dou sa lako tani mai kina, dou taviraka laivi na kuvu ni qele mai na yavamudou me na i vakadinadina baleti ira.”#Caka 13.51 #Luke 10.4-11
12E ratou sa mani lako ka vunautaka me ra veivutuni na tamata. 13E ratou a vakasava talega e vuqa na tevoro, ka ratou wali ira ena waiwai e lewe vuqa na tauvimate ka vakabulai ira.#Jeme 5.14
Na Mate i Joni na Dauveipapitaisotaki
(Maciu 14.1-12; Luke 9.7-9)
14A sa la'ki rogoca na veika oqo o Eroti na tui, ni sa tete vakalevu sara na i rogorogo kei Jisu. Era sa kaya eso, “Sa vakaturi cake tale mai na mate o Joni na Dauveipapitaisotaki; sai koya ga ka sa cakava kina na veika mana oqo o koya.”#Maciu 16.14; Mari 8.28; Luke 9.19
15Ia, era kaya eso, “Oqo o Ilaijia.”
Era sa qai kaya eso tale, “O koya e dua na parofita, me vakataki ira na parofita e liu.”
16Ia ni sa rogoca o Eroti sa qai kaya, “Oqo ga o Joni, o koya au a tamusuka na uluna, ka sa vakaturi cake tale.” 17Sa i Eroti ga oqo ka talatala yani me vesu o Joni, ka biu ki na valeniveivesu ena vuku i Erotiasa, na wati i Filipe na tacina; ni sa tauri koya tiko me watina.#Luke 3.19,20 18E a kaya o Joni vei Eroti, “Sa sega sara ni dodonu vei iko mo taura na wati tacimu me watimu.”
19Ia sa cati Joni sara kina o Erotiasa ka vinakata me vakamatei koya. Ia sa sega ga ni rawata, 20ena vuku i Eroti. E a rerevaki Joni o Eroti ni kila tiko ni tamata dodonu ka yalosavasava o koya, ka sa mani taqomaki koya voli ga kina. Sa dau taleitaka na vakarorogo vei Joni o Eroti, e dina ga ni sa dau vakaleqai sara vakalevu na lomana ena gauna e dau rogoci koya kina.
21Ia, sa yaco mai e dua na siga me vakayacora rawa kina o Erotiasa na nona i naki. E a vakarautaka o Eroti e dua na magiti ena nona siga ni sucu, ka mani sureti ira kina na nona turaga veiliutaki, kei ira na turaganivalu, kei ira na turaga dokai mai Kalili. 22Sa qai curu mai na luve i Erotiasa yalewa ka meke, ka vakamarautaki Eroti vakalevu kei ira na nona vulagi.
Sa qai kaya sara na tui vua na goneyalewa, “Kerea vei au na ka ga o gadreva, au na solia vei iko.” 23A bubului kina vua o koya, ka kaya, “Na ka ga o kerea vei au, au na solia vei iko, ke mani veimama sara mada ga ni noqu matanitu.”
24A curu sara ki tautuba ka kaya vei tinana, “Na cava beka me'u na kerea?”
Sa qai kaya o koya, “Na ulu i Joni na Dauniveipapitaisotaki.”
25Sa qai lako sara vakatotolo ki vua na tui me kerekere, ka kaya, “Au vinakata mo ni solia sara ga mai vei au oqo na ulu i Joni na Dauveipapitaisotaki ena dua na veleti.”
26A sa rarawa dina sara na tui; ia sa sega ni rawa vua me vakasuka na nona kerekere baleta ni sa vosa bubului oti tu ena matadra na nona vulagi. 27Sa mani tala yani kina o koya e dua na nona sotia yadra ka vakarota me kauta mai na ulu i Joni. A sa lako na yadra ki na valeniveivesu, a sa musuka laivi na ulu i Joni, 28ka kauta mai ena dua na veleti, ka solia vua na goneyalewa, ka sa solia sara na goneyalewa vei tinana. 29Ia ni ratou sa rogoca na tisaipeli i Joni na ka oqo e ratou sa qai lako ka kauta na yagona ka la'ki vakotora ena dua na i bulubulu.
Sa Vakani Ira na Lima na Udolu o Jisu
(Maciu 14.13-21; Luke 9.10-17; Joni 6.1-14)
30E ratou sa qai lesu tale vei Jisu na i apositolo, ka tukuna vua na veika e ratou a cakava ka vakatavuvulitaka. 31Ia ni ra sa rui lewe levu era lako tiko mai ka lako tani tale, ka sa sega na gauna e galala rawa me ratou bau kana kina, sa qai kaya vei iratou o koya, “Dou lako mai vakatikitiki ki na dua na vanua lala, ka vakacegu mada vakalailai.” 32E ratou sa mani vodo ki waqa ka lako vakatikitiki tani ki na dua na vanua lala.
33Ia e vuqa vei ira era raica na nodratou sa lako yani oqo era sa kilai iratou, a ra sa cici yani e vanua mai na veikorokoro kece sara ka yaco tale yani e liu ki na vanua o ya ni bera yani o Jisu kei ratou na nona tisaipeli. 34Ni sa sobu yani ki vanua o Jisu, a sa raici ira na lewe vuqa oqo ka sa tuburi koya e dua na loloma levu ena vukudra, baleta ni ra sa vaka na sipi sa sega na nodra i vakatawa. Sa qai vakatekivu o koya me vakatavulici ira ena vuqa na ka.#Tiko 27.17; 1Tui 22.17; 2Vei 18.16; Aisea 34.5; Maciu 9.36
35Ia ni sa yakavi mai na vanua, e ratou sa qai lako yani vua na nona tisaipeli, ka kaya, “Sa yakavi vakatotolo sara tiko mai na vanua. Oqo talega na vanua lala. 36Mo ni sa vakatalai ira yani na tamata me ra lako ki na veitikotiko kei na veikoro voleka ka volia kina eso na ka me ra kania.”
37A sauma o Jisu ka kaya vei iratou, “Dou solia ga oi kemudou eso na ka me ra kania.”
E ratou sa qai taroga vua, “O ni vinakata me keitou la'ki vakayagataka e 200 na tiki ni siliva me voli mai kina na madrai me ra kana kina?”
38Sa qai kaya vei iratou o koya, “E vica na i buli madrai e tiko oqori vei kemudou? Dou raica mada mai.”
Ia ni ratou sa kila rawa, e ratou sa qai kaya, “E lima na i buli madrai, kei na rua na ika.”
39Sa qai vakaroti ira kece o koya me ra dabe vakaiwasewase ena veico drokadroka. 40Era sa mani tiko sobu vakaiyatu ena wasewase yayadrau kei na i wasewase yayalimasagavulu. 41Sa qai taura o koya na i buli madrai e lima kei na ika e rua, ka tacake ki lomalagi, ka vakavinavinakataka, ka dovia na madrai, ka solia vei iratou na tisaipeli me ratou tauca e matadra na tamata; a sa vota talega na ika e rua vei ira kecega. 42Era sa kana kece sara ka mamau. 43E ratou sa qai vakatomika na i vovo ni madrai kei na ika ka sa sinai kina e tinikarua na basikete. 44Era sa lewe 5000 taucoko na tagane era a kana kina.
Sa Lako e Dela ni Wai o Jisu
(Maciu 14.22-23; Joni 6.15-21)
45Sa qai vakaroti iratou sara na nona tisaipeli o Jisu me ratou vodo ki waqa, ka liu ki tai kadua, ki Pecisaita, ka me sa tei vakasukai ira mada na lewe vuqa o koya. 46Ia ni ra sa veitalatala oti, sa qai lako cake ki na dua na delana me la'ki masu. 47Ia ni sa yakavi mai na vanua, sa tiko na waqa ena lomadonu ni drano, ka tiko duadua ga o koya e vanua. 48Ni rauta na maliwa ni tolu kei na ono ena mataka lailai, ni sa raica o Jisu ni ratou sa mate ena voce na nona tisaipeli, me vaka ni saqati iratou tiko na cagi, sa qai lako vei iratou. A lako ena dela ni wai, ka lako sara me vaka e via lako siviti iratou. 49Ia ni ratou sa raici koya ni lako tiko e dela ni wai, e ratou nanuma ga ni sa dua na yalo o koya, ka ratou sa qoqolou. 50E ratou a kidroa vakalevu ka ni ratou a raici koya kece.
Sa qai vosa vei iratou o Jisu, ka kaya, “Dou vakacegu! Oi au ga oqo; dou kakua ni rere!” 51A sa qai vodo o koya ki waqa vata kei iratou, ka sa ruru sobu sara na cagi. E ratou sa kurabui vakalevu sara kina na tisaipeli, 52baleta ni ratou a sega ni se kila na i balebale dina ni nodra vakani na lewe 5,000, ka ni sa rui kaukauwa na lomadratou.
Sa Vakabulai Ira na Tauvimate mai Kenisereti o Jisu
(Maciu 14.34-36)
53Ia ni ratou sa yaco ki tai kadua, e ratou sa lako sara ki na vanua o Kenisereti, ka kele kina. 54Ni ratou sa sobu yani ki vanua, era sa kilai koya sara na tamata. 55Era sa veiciciyaki sara ki na nodra veitikotiko, ka kauti ira mai na tauvimate ena nodra i davodavo ki na vanua cava ga era rogoca ni sa tiko kina o koya. 56Ena veivanua kecega e lako kina o koya, na veikoro lalai, na veikoro lelevu, se na veivanua ni teitei, era vakotori ira kina na tauvimate ena kedra veivanua ni veivoli o ira na tamata, ka ra kerei koya me ra bau tara mada ga na tutu ni nona i sulu o ira na tauvimate; ia o ira kecega era tara, era sa vakabulai.
Currently Selected:
Marika 6: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.