Marika 2
2
Sa Vakabula E Dua na Tamata Paralasi o Jisu
(Maciu 9.1-8; Luke 5.17-26)
1Ni sa oti e vica na siga sa qai lesu tale ki Kapenaumi o Jisu ka sa rogovaki sara ni sa tiko e vale o koya. 2Era a soqoni vata yani kina e lewe vuqa; ka sa sega ni dua na tiki ni vale e galala. A osodrigi talega vakakina na mata ni katuba. Ia ni sa vunau tiko vei ira o koya, 3era sa qai lako yani vua eso na tamata ka kauta tiko yani e dua na tauvi paralasi. E ratou a colati koya tiko yani e lewe va. 4Ia, ni ratou sa sega ni toro voleka rawa vua ena vukudra na lewe vuqa, e ratou sa qai cakava e dua na qara ena dela ni vale ka donui koya ka vakalutulututaka sobu kina vakamalua na i davodavo sa koto kina na tamata tauvi paralasi. 5Ia ni sa raica na nodratou vakabauta o Jisu, sa qai kaya vua na tauvi paralasi, “Na luvequ, sa bokoci na nomu i valavala ca.”
6Eso na daunilawa era dabe toka e kea era sa qai vakataroga voli e lomadra, 7“E doudou rawa vakacava na tamata oqo me vosa vakaviavialevu kina vakaoqo? Sa vosavakacacataka na Kalou o koya! E sega tale ni dua e rawa ni bokoca na i valavala ca, ia na Kalou duadua ga!”
8E a kila rawa sara e yalona o Jisu na veika era vakananuma tiko, ka mani kaya sara vei ira, “A cava o ni vakasamataka tiko kina na veika oqo e lomamuni? 9E vei e rawarawa cake, me tukuni vua na tauvi paralasi, ‘Sa bokoci na nomu i valavala ca,’ se me tukuni vua, ‘Tu cake, taura na nomu i davodavo ka lako’? 10Ia me rawa ni o ni kila ni sa tu vua na Luve ni Tamata na kaukauwa e vuravura me bokoca kina na i valavala ca.” Sa qai kaya vua na tauvi paralasi, 11“Au sa kaya vei iko, tucake, taura na nomu i davodavo ka lako ki nomudou.”
12Ia ni ra sa rai kece tikoga, a sa tucake o koya, ka taura na nona i davodavo ka lako. Era sa kurabui kecega ka vakalagilagia na Kalou, ka kaya, “Eda se sega mada ni bau raica e dua na ka vakaoqo e liu!”
Sa Kacivi Livai o Jisu
(Maciu 9.9-13; Luke 5.27-32)
13Sa qai lako tale o Jisu ki matasawa; ka ra sa soqoni vata yani vua o ira kece na lewe vuqa ka sa vakatavulici ira o koya. 14Ia ni sa lako tiko sa raici Livai na luve i Alifio ni dabe tiko ena vale ni soli i vakacavacava. A sa kaya vua, “Muri au mai.” Sa tucake o Livai ka muri koya.
15Ni oti o ya, sa qai lako o Jisu ka la'ki kana ena vale i Livai. Era a kana vata kei koya kei iratou na nona tisaipeli e lewe vuqa na daukumuni i vakacavacava kei ira na tamata i valavala ca; ni ra a muri koya voli yani e lewe vuqa. 16Eso na qasenivuli ni Lawa, o ira era sa Farisi, era sa raica ni sa kana vata tiko o Jisu kei ira na tamata i valavala ca kei ira na daukumuni i vakacavacava, ka ra mani tarogi iratou kina nona tisaipeli, “Na cava na vuna e kana vata tiko kina kei ira na daukumuni i vakacavacava kei ira na tamata i valavala ca?”
17A sa rogoca o Jisu ka sa sauma vei ira, “E sega ni yaga na vuniwai vei ira na bula vinaka, vei ira ga na tauvimate; au sa sega ni lako mai me'u kacivi ira na tamata dodonu, o ira ga na i valavala ca.”
Na Taro me Baleta na Lolo
(Maciu 9.14-17; Luke 5.33-39)
18Ena dua na gauna, era a lolo tiko kina na tisaipeli i Joni kei na nodra tisaipeli na Farisi. Era a qai lako yani eso na tamata ka kaya vei Jisu, “Na cava na vuna era lolo ga kina na tisaipeli i Joni kei na nodra tisaipeli na Farisi, ka ra sega ni lolo na nomuni tisaipeli?”
19Sa qai kaya vei ira o koya, “E rawa li ni ra lolo na weka ni tagane vou ni sa tiko voli ga kei ira na tagane vou? Ni sa tiko vata voli ga kei ira o koya na tagane vou era na sega ni rawa ni lolo. 20Ia ena yaco mai na gauna ena kau tani kina vei ira na tagane vou, era sa na qai lolo ena gauna o ya.
21“E sega ni dua e dau cula vata na tiki ni sulu vou kei na i sulu madra; kevaka e cakava koya ena dresuka na i sulu madra na i botani vou, sa na qai kadresu vakalevu cake kina. 22E sega talega ni dua e dau vakatawana na waini vou ki na bolaniwaini makawa; kevaka e cakava o ya, ena vakacabotetaka na bola kuli-ni-manumanu na waini, ka rau sa na qai maumau walega kina na waini kei na tavaya; ia me vakatawani ga na waini vou ki na bolaniwaini vou.”
Na Taro me Baleta na Siga ni Vakacecegu
(Maciu 12.1-8; Luke 6.1-5)
23Ena dua na Siga ni Vakacecegu sa lako kosova kina o Jisu eso na loga ni sila. Ia ni sa lako tiko kei iratou na nona tisaipeli, e ratou sa qai doloka eso na sola ni sila na nona tisaipeli.#Vrua 23.25 24Era sa qai kaya vua na Farisi, “A cava e ratou cakava kina na nomu tisaipeli na ka e sega ni tara ena Siga ni Vakacecegu?”
25Sa qai kaya vei ira o koya, “O ni sa sega beka ni wilika na ka sa cakava o Tevita kei ira na nona tamata ena gauna era sa viakana kina, ka qai sega na ka me ra kania? 26E a curu o koya ki na vale ni Kalou ena gauna sa Bete Levu tiko kina o Epaiaca, ka kania na madrai tabu, na ka e sega ni vakatarai vua e dua ka sega ni bete me kania, ka vakani ira talega kina na nona tamata.”#Vsoro 24.9 #1Samu 21.1-6
27Sa qai kaya vei ira o Jisu, “Sa buli na Siga ni Vakacecegu me baleta na tamata, ka sega ni buli na tamata me baleta na Siga ni Vakacecegu. 28O koya oqo, sa Turaga talega kina ni Siga ni Vakacecegu na Luve ni Tamata.”
Currently Selected:
Marika 2: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.