Marika 3
3
Na Tamata Liga Mate
(Maciu 12.9-14; Luke 6.6-11)
1E a qai curu tale o Jisu ki na valenilotu ka tiko kina e dua na tamata e sa paralasi tu e dua na ligana. 2Era sa qai vakaraici koya matua toka eso ka ra tiko e kea se na vakabula na tamata o ya ena Siga ni Vakacecegu se sega, ka me ra na qai beitaki koya kina. 3Sa qai kaya o Jisu vua na tamata liga mate, “Lako cake mai, ka mai duri tu e matadra na tamata!” 4Sa qai vuki tale o koya ka kaya vei ira na tamata, “E tara li me caka na ka vinaka ena Siga ni Vakacecegu, se me caka kina na ka ca?; me caka kina na veivakabulai se na veivakamatei?”
Ia era a mani sega ni kaya e dua na ka. 5Sa qai vakawadravi ira kece ena cudru o Jisu, ni sa rarawataka na kaukauwa ni lomadra. A sa qai kaya vua na tamata o ya, “Dodoka cake mai na ligamu!” Sa qai dodoka mai na ligana ka sa mani vakabulai sara kina. 6Era sa mani curu ki tautuba na Farisi ka la'ki bosea vata kei ira na i lawalawa i Eroti, se me ra na vakamatei koya vakacava.
E Dua na i Lala Levu e Bati ni Drano
7E ratou sa qai lako vakatikitiki vaka ki na bati ni drano o Jisu kei iratou na nona tisaipeli, ka ra sa muri iratou e dua na i lala levu mai Kalili, kei Jutia talega, 8kei Jerusalemi, kei Itumia, kei na tai kadua ni Joritani, kei ira na lewe vuqa sara mai na veiyasana vaka-Taia kei Saitoni. Era sa lako vua ni ra sa rogoca na veika kece sa cakava. 9#Mari 4.1; Luke 5.1-3Era sa rui lewe levu sara na tamata, sa mani kaya kina o Jisu vei iratou na nona tisaipeli me ratou vakarautaka toka e dua na waqa de ra qai drigilaki koya vakaca na tamata. 10A sa vakabulai ira oti e lewe vuqa o koya, ka ra sa veidrigidrigi yani ki vua o ira kece era tauvi mate tu me ra tarai koya. 11Ia ni ra sa raici koya talega na yalo velavela, era sa cuva e matana ka qoqolou ka kaya, “Oi kemuni na Luve ni Kalou!”
12Sa qai vakaroti ira matua na yalo velavela o koya me ra kakua sara ni vakatakilai koya.
Sa Digitaki Iratou na i Apositolo e Tinikarua o Jisu
(Maciu 10.1-4; Luke 6.12-16)
13Sa qai cabe cake ki na dua na delana o Jisu, ka kacivi ira yani vua eso na tamata sa vinakati ira o koya; ka ra sa lako yani vua. 14Sa qai digitaka e lewe tinikarua, ka vakatoka me ratou apositolo, ka kaya vei iratou, “Au na talai kemudou talega yani mo dou la'ki vunau, 15ka dou na rawata na kaukauwa mo dou vakasavi ira tani kina na tevoro.”
16Sa i iratou oqo na lewe tinikarua sa digitaka o koya: o Saimoni (sa vakatoka o Jisu me yacana o Pita); 17o Jemesa kei na tacina o Joni, oi rau na luve i Sepeti (sa vakatokai rau o Jisu me yacadrau o Ponijese, a kena i balebale, “Luve ni Kurukuru”); 18o Adriu, kei Filipe, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni na Gumatua, 19kei Jutasa Isikarioti, o koya ka a bukiveretaki Jisu.
O Jisu kei Pielisepupi
(Maciu 12.22-32; Luke 11.14-23; 12.10)
20Sa qai lako o Jisu ki na dua na vale; ka ra sa soqoni vata tale yani kina na lewe vuqa, ka sa sega ni dua na gauna me kana kina kei iratou na nona tisaipeli. 21Ia ni ratou sa rogoca na wekana, e ratou sa mani lako me ratou la'ki tarovi koya, baleta ni ra sa kaya tiko na tamata, “Sa lialia o koya oqo!”
22Era sa qai kaya eso na daunilawa ka ra lako sobu mai Jerusalemi, “Sa curumi koya tiko o Pielisepupi, ka vakasavi ira na tevoro ena kaukauwa ni nodra turaga na tevoro.”#Maciu 9.34; 10.25
23Sa qai kacivi ira vua o Jisu, ka kaya vei ira ena vosa vakatautauvata, “E rawa vakaevei vei Setani me vakasavi Setani tani? 24Kevaka sa veisei vakai koya e dua na matanitu, ena sega ni tudei rawa na matanitu o ya. 25Kevaka sa veisei vakai koya e dua na vuvale, ena sega ni tudei rawa na vuvale o ya. 26Ia kevaka sa veivorati ka veisei vakai koya na matanitu i Setani, ena sega ni tudei rawa, ia ena bale ga ka oti yani.
27“Ena sega ni rawa vua e dua na tamata me na curuma rawa na vale ni dua na qaqa ka kauta tani na veika e taukena, ka vakavo ga kevaka sa vesuki koya na qaqa taumada e liu; ka sa na qai rawa kina vua me taura emuri na veika sa taukena.
28“Au sa kaya vakaidina vei kemudou, ena rawa me bokoci na nodra i valavala ca kecega na tamata, kei na nodra vosavakacacataka na Kalou. 29Ia o koya sa vosa vakacacataka na Yalo Tabu, ena sega ni bokoci na nona i valavala ca, baleta ni sa kitaka na cala sa tawamudu.”#Luke 12.10 30Sa tukuna na ka oqo o Jisu baleta ni ra sa kaya, “E tiko vua e dua na yalo velavela.”
Na Tina i Jisu kei Iratou na Tacina
(Maciu 12.46-50; Luke 8.19-21)
31E ratou sa qai lako mai na tina i Jisu kei iratou na tacina, ka ratou mai tu e tautuba ka vakauta vua e dua na i tukutuku me lako yani vei iratou. 32Era a dabe wavoliti koya tiko na lewe vuqa, ka ra mani kaya vua, “Raica, e ratou sa tiko e tautuba na tinamu kei iratou na tacimu; e ratou sa mai vakasaqarai iko.”
33Sa qai sauma o Jisu ka kaya, “O cei na tinaqu? Se o cei soti na taciqu?” 34Sa qai vakaraici ira kece na tamata era sa dabe wavokiti koya, ka kaya, “Sa i ira oqo na tinaqu kei na taciqu! 35O koya ga e cakava na loma ni Kalou, sa taciqu, sa ganequ, ka sa tinaqu.”
Currently Selected:
Marika 3: FNVDC12
Highlight
Share
ਕਾਪੀ।
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.