ᐅᐸᓓᑭᔅ ᒫᕐᒃ 8
8
ᒋᓴᔅ ᐊᔕᒣᐤ ᓀᐤ ᑭᒋᒥᑖᑐᒥᑕᓇ (4000) ᐃᓕᓕᐗ
(ᒫᑎᐤ 15:32–39)
1ᒣᒀᒡ ᐊᓂᐃ ᑭᔑᑳᐗ ᐊᓂᑭ ᑳ ᒫᒪᐎᔭᑎᒋᒃ ᐃᓕᓕᐗᒃ ᓈᔅᐱᒡ ᐁ ᒥᒉᑎᒋᒃ, ᐁᑳ ᓀᔥᑕ ᑫᒀᓕᐤ ᐁ ᐋᔮᒋᒃ ᑭᒋ ᒥᒋᒋᒃ, ᒋᓴᔅ ᑮ ᓇᑐᒣᐤ ᐅ ᑭᔅᑭᓄᐊᒪᐙᑲᓇ, ᓀᔥᑕ ᐃᑌᐤ, 2ᓂ ᑭᑎᒪᑫᓕᒪᐗᒃ ᒥᔭᒫᐎᒥᒉᑎᒋᒃ ᐃᓕᓕᐗᒃ, ᐌᓴ ᐋᔕᔾ ᓂᔅᑐ ᑭᔑᑳᐗ ᓂ ᑮ ᐎᒉᐎᑾᒃ, ᓇᒪ ᓀᔥᑕ ᑫᒀᓕᐤ ᐋᔭᐗᒃ ᑭᒋ ᒥᒋᒋᒃ: 3ᑮᔥᐱᓐ ᒫᑲ ᑭᒋᑎᔕᐗᑾᐌ ᑎᐱᓚᐌ ᐎᑭᐙᒃ ᐁᑳ ᐁ ᒥᒋᓱᒋᒃ, ᑲᑕ ᐊᑎ ᓄᑌᔑᓋᒃ ᐁ ᐃᑐᑌᒋᒃ; ᐌᓴ ᒥᒉᑦ ᐁ ᐃᑕᓯᒋᒃ ᐙᓚᐤ ᑮ ᐯᒋ ᐅᑐᑌᐗᒃ᙮
4ᑮ ᓇᔥᑴᐗᔑᐃᑯ ᒫᑲ ᐅ ᑭᔅᑭᓄᐊᒪᐙᑲᓇ, ᑖᓐᑌ ᐊᐌᓇ ᑫ ᑮ ᐅᒋ ᑮᔥᐳᐋᑦ ᐅᐅ ᐃᓕᓕᐗ ᐅᑕ ᐸᑾᑕᔅᑲᒥᑳᒃ?
5ᑮ ᑲᑴᒋᒣᐤ ᒫᑲ, ᑖᓐᑕᑐ ᐊᓚᑯᓇᐗᒃ ᐁᔮᐌᑾᒃ?
ᑮ ᐃᑗᐗᓐ ᒫᑲ, ᓂᔂᔅ᙮
6ᑮ ᐃᑕᔓᐙᑌᐤ ᒫᑲ ᐃᓕᓕᐗ ᑭᒋ ᓇᐊᐱᓕᒋ ᒧᒌᒃ; ᑮ ᐅᑎᓀᐤ ᒫᑲ ᐊᓂᐃ ᓂᔂᔅ ᐊᓚᑯᓈᐗ, ᑮ ᓇᓈᔅᑯᒧ ᒫᑲ, ᓀᔥᑕ ᑮ ᐱᑯᓀᐤ, ᐁᑯ ᒫᑲ ᒫᓛᑦ ᐅ ᑭᔅᑭᓄᐊᒪᐙᑲᓇ ᑭᒋ ᐅᓚᔅᑐᐗᓕᒋ; ᑮ ᐅᓚᔅᑐᐌᓕᐗ ᒫᑲ ᐃᓕᓕᐗ᙮ 7ᑮ ᐋᔭᐌᐗᒃ ᓀᔥᑕ ᐋᑎᑦ ᓇᒣᓯᔕ: ᑮ ᒥᓦᑭᒣᐤ ᒫᑲ, ᐁᑯ ᐁᑕᔓᐌᑦ ᐊᓂᐃ ᐊᓯᒋ ᑭᒋ ᐅᓚᔅᑐᐙᓕᒋ᙮ 8ᑮ ᒥᒋᓱᐗᒃ ᒫᑲ, ᓀᔥᑕ ᑮ ᑮᔥᐳᐗᒃ: ᑮ ᐅᑎᓇᒶᒃ ᒫᑲ ᐱᐗᒋᑲᓇ ᑳ ᐃᔅᑾᔅᒋᑳᑌᓕᒋ ᓂᔂᔅ ᐗᑕᐱᐗᑕ ᓵᑲᔅᑭᓐ᙮ 9ᐊᓂᑭ ᒫᑲ ᑳ ᑮ ᒥᒋᓯᒋᒃ ᓈᓐᑕᐤ ᓀᐗᐤ ᑭᒋᒥᑖᑐᒥᑕᓇᐤ ᑮ ᐃᑕᔑᐗᒃ: ᑮ ᑭᒋᑎᔕᐌᐤ ᒫᑲ᙮ 10ᑣᔦᒃ ᒫᑲ ᑮ ᐳᓯᐤ ᓈᐱᒀᓂᒃ ᐊᓯᒋ ᐅ ᑭᔅᑭᓄᐊᒪᐙᑲᓇ, ᑮ ᐯᒋ ᐃᑐᑌᐤ ᒫᑲ ᐊᓐᑕ ᑖᓪᒪᓄᑕ ᐃᑌᑫ᙮
ᐸᕋᓯᔭᒃ ᓇᑐᑕᒫᐌᐗᒃ ᒋᓴᓴ ᒋ ᑐᑕᒥᓕᒋ ᒫᒪᔅᑳᒋ ᐃᔑᒋᑫᐎᓂᓕᐤ
(ᒫᑎᐤ 16:1–4)
11ᐸᕋᓯᔭᒃ ᒫᑲ ᑮ ᐯᒋ ᐃᑐᑌᐗᒃ, ᑮ ᒫᒋ ᑲᑴᒋᒣᐗᒃ ᒫᑲ, ᐁ ᓇᑕᐌᓕᑕᒪᐙᒋᒃ ᑭᔅᑭᓄᐙᒋ ᐙᐸᑎᓕᐌᐄᓂᓕᐤ ᑭᒋᑭᔑᑯᒃ ᐅᒋ, ᐁ ᑲᑴᒋᐋᒋᒃ᙮ 12ᑮ ᒥᔅᑕᐃ ᓇᐊᑖᒧ ᒫᑲ ᐅᑦ ᐊᒑᑯᒃ, ᐃᑗᐤ ᒫᑲ, ᑖᓀᑭ ᐌᒋ ᐅᑯ ᐊᓄᒡ ᑳ ᐱᒫᑎᓯᒋᒃ ᓈᓇᑕᐌᓕᑕᑭᒃ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ? ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᑲᑕ ᒥᓛᐗᒃ ᐅᑯ ᐊᓄᒡ ᑳ ᐱᒫᑎᓯᒋᒃ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ᙮
13ᑮ ᓇᑲᑌᐗᒃ ᒫᑲ, ᓀᔥᑕ ᒥᓇ ᐁ ᐳᓯᑦ ᓈᐱᒀᓂᒃ ᑴᔅᑲᑳᒻ ᑮ ᐃᔑᒋᒣᐤ᙮
ᐅᑐᐱᓯᑲᓂᐙᐤ ᐸᕋᓯᔭᒃ ᓀᔥᑕ ᐦᐁᕋᑦ
(ᒫᑎᐤ 16:5–12)
14ᑭᔅᑭᓄᐊᒪᐙᑲᓇᒃ ᒫᑲ ᑮ ᐗᓂᑭᔅᑭᓯᐗᒃ ᑭᒋ ᐯᔑᐙᒋᒃ ᐊᓚᑯᓈᐗ, ᓇᒪ ᓀᔥᑕ ᑮ ᐋᔮᐌᐗᒃ ᓈᐱᒀᓂᒃ ᐊᐙᓯᑌ ᐃᔥᐱᔥ ᐯᔭᒃ ᐊᓚᑯᓇᐗ᙮ 15ᑮ ᐋᔨᒋᒣᐤ ᒫᑲ ᐁ ᐃᑗᑦ, ᔮᒀᒥᓰᒃ, ᔮᒀᒥᔅᑕᒸᒃ ᐅᐱᓯᑲᓂᐗᐤ ᐸᕋᓯᔭᒃ, ᓀᔥᑕ ᐅᐱᓯᑲᓐ ᐦᐁᕋᑦ᙮
16ᑮ ᐋᔭᔭᒥᐃᑐᐗᒃ ᒫᑲ, ᐁ ᐃᑗᒋᒃ, ᐅᒪ ᐃᑗᐤ, ᐁᑳ ᐁ ᐋᔭᐗᒃ ᐊᓚᑯᓇᐤ᙮
17ᐃᔅᐱ ᒫᑲ ᒋᓴᔅ ᑫᔅᑫᓕᑕᒃ᙮ ᐃᑌᐤ, ᑖᓀᑭ ᐌᒋ ᐋᔭᔭᒥᐃᑐᔦᒃ ᐁᑳ ᐁ ᐋᔭᐌᒃ ᐊᓚᑯᓇᐤ? ᓇᒪ ᓈ ᐁᔥᒀ ᑭ ᑭᔅᑫᓕᑌᓇᐗᐤ, ᓇᒪ ᓈ ᓀᔥᑕ ᑭ ᓂᓯᑐᑌᓇᐗᐤ? ᑫᔮᐸᒡ ᓈ ᑭ ᒪᔥᑲᐎᑌᐁᓇᐗᐤ? 18ᐁ ᐅᔅᑭᔑᑯᔦᒃ, ᓇᒪ ᓈ ᑭ ᐙᐱᓇᐗᐤ? ᓀᔥᑕ ᐁ ᐅᑕᐗᑳᔦᒃ, ᓇᒪ ᓈ ᑭ ᐯᑌᓇᐗᐤ? ᓇᒪ ᓈ ᓀᔥᑕ ᑭ ᑭᔅᑭᓯᓇᐗᐤ? 19ᐃᔅᐱ ᑳ ᐱᑯᓇᒪᐗᑭᒃ ᓂᔮᓚᓐ ᐊᓚᑯᓇᐗ ᐊᓂᑭ ᓂᔭᓚᓦᐤ ᑭᒋᒥᑖᑐᒥᑕᓇᐤ, ᑖᓐᑕᑐ ᐗᑕᐱᐗᑕ ᓵᑲᔅᑭᓐ ᐱᐗᒋᑲᓇ ᑳ ᒧᔕᑭᓇᒣᒃ?
ᐃᑌᐗᒃ ᒫᑲ, ᓂᔓᔖᑉ᙮
20ᐃᔅᐱ ᓀᔥᑕ ᓂᔂᔅ ᑳ ᒫᑎᓇᒪᐗᑭᒃ ᓀᐗᐤ ᑭᒋᒥᑖᑐᒥᑕᓇᐤ, ᑖᓐᑕᑐ ᐗᑕᐱᐗᑕ ᓵᑲᔅᑭᓐ ᐱᐗᒋᑲᓇ ᑳ ᒧᔕᑭᓇᒣᒃ?
ᑮ ᐃᑗᐗᒃ ᒫᑲ, ᓂᔂᔅ᙮
21ᑮ ᐃᑌᐤ ᒫᑲ, ᑖᓀᑭ ᐌᒋ ᐁᑳ ᓂᓯᑐᑕᒣᒃ?
ᒋᓴᔅ ᒥᓇᐙᒋᐁᐤ ᐁᑳ ᐙᐱᒋ ᓈᐯᐗ ᐊᓐᑕ ᐯᑦᓭᑕᐃᒃ
22ᐯᒋ ᐃᑐᑌᐤ ᒫᑲ ᐯᑦᓭᑕᐃᒃ; ᑮ ᐯᑐᐌᐗᒃ ᒫᑲ ᐃᓕᓕᐗ ᐁᑳ ᐁ ᐙᐱᓕᒋ, ᓀᔥᑕ ᑮ ᓇᑐᑕᒪᐌᐗᒃ ᑭᒋ ᓵᒥᓈᓕᒋ᙮ 23ᑮ ᓴᑭᒋᒉᓀᐤ ᒫᑲ ᐃᓕᓕᐗ ᐁᑳ ᑳ ᐙᐱᓕᒋ, ᓀᔥᑕ ᐃᑖᐎᓂᒃ ᑮ ᐅᒋ ᑭᑐᑕᐁᐤ; ᐃᔅᐱ ᒫᑲ ᑳ ᑮ ᓯᒀᑕᒸᑦ ᐅᔅᑭᔑᑯᓕᐗ, ᓀᔥᑕ ᑳ ᑮ ᓵᒥᓈᑦ, ᑮ ᑲᑴᒋᒣᐤ ᑮᔥᐱᓐ ᑫᒀᓕᐤ ᐎᐋᐸᑕᒥᓕᑴ᙮
24ᑮ ᑕᔅᑕᓵᐱᐤ ᒫᑲ, ᓀᔥᑕ ᑮ ᐃᑗᐤ, ᓂ ᐙᐸᒪᐗᒃ ᐃᓕᓕᐗᒃ ᑖᐱᔅᑯᒡ ᒥᔅᑎᑾᒃ, ᐁ ᐱᒧᑌᒋᒃ᙮
25ᐹᑎᒫ ᐅᒪ, ᒥᓇ ᑮ ᓵᒥᓇᒬᐤ ᐅᔅᑭᔑᑯᓕᐗ, ᓀᔥᑕ ᑮ ᑕᔅᑕᓵᐱᐁᐤ: ᑮ ᒥᓇᐙᒋᐊᐤ ᒫᑲ, ᓀᔥᑕ ᑮ ᐹᔭᑌᔮᐸᒣᐤ ᒥᓯᐌ ᐊᐌᓕᐗ᙮ 26ᑮ ᐃᔑᑎᔕᐌᐤ ᒫᑲ ᐎᑭᓕᒃ, ᐁ ᐃᑗᑦ, ᐁᑳᐎᓚ ᐃᑐᑌ ᐃᑖᐎᓂᒃ, ᐁᑳᐎᓚ ᓀᔥᑕ ᐊᐌᓇ ᐎᑕᒪᐤ ᐃᑖᐎᓂᒃ᙮
ᐲᑕᕐ ᐐᑕᒫᑫᐤ ᐊᐌᓇ ᐁ ᐊᐎᓕᒋ ᒋᓴᓴ
(ᒫᑎᐤ 16:13–20; ᓘᒃ 9:18–21)
27ᒋᓴᔅ ᒫᑲ ᑮ ᐗᓚᐎᐤ, ᐊᓯᒋ ᐅ ᑭᔅᑭᓄᐊᒪᐙᑲᓇ, ᑭᒋ ᐃᑐᑌᒋᒃ ᐃᑖᐎᓂᒃ ᓭᓴᕆᐊ ᐱᓕᐹᐃᐃᒃ: ᐁ ᐊᑎ ᐃᑐᑌᒋᑳ ᒫᑲ, ᑮ ᑲᑴᒋᒣᐤ ᐅ ᑭᔅᑭᓄᐊᒪᐙᑲᓇ, ᐁ ᐃᑖᑦ, ᐊᐌᓇ ᐁ ᐃᑗᒋᒃ ᐃᓕᓕᐗᒃ ᐁ ᐋᐎᔮᓐ?
28ᑮ ᓇᔥᑴᐗᔑᐁᐗᒃ ᒫᑲ, ᒑᓐ ᐅᓯᑲᐋᑖᑫᐤ: ᒫᑲ ᐋᑎᑦ ᐃᑗᐗᒃ, ᐃᓛᐃᒐ; ᑯᑕᑭᔭᒃ ᒫᑲ, ᐯᔭᒃ ᐁ ᐃᑕᓯᒋᒃ ᐅᑭᔅᑭᐙᐃᑫᐗᒃ᙮
29ᐃᑌᐤ ᒫᑲ, ᒫᑲ ᐊᐌᓇ ᑭᓚᐗᐤ ᐁᑗᔦᒃ ᐁ ᐋᐎᔮᓐ?
ᐱᑕᕐ ᒫᑲ ᐁ ᓇᔥᑴᐗᔑᐋᑦ, ᐃᑌᐤ, ᑭᓚ ᐁᐗᒀᓇ ᙭᙮
30ᑮ ᐋᔨᒋᒣᐤ ᒫᑲ ᐁᑳ ᐊᐌᓕᐗ ᑭᒋ ᐎᑕᒪᐙᓕᒋ ᐊᐌᓇ ᐁ ᐋᐎᑦ᙮
ᒋᓴᔅ ᓃᑳᓂᐐᑕᒻ ᑖᓂ ᑫ ᐃᔑ ᐐᓴᑫᓕᑕᒃ ᓀᔥᑕ ᓂᐱᑦ
(ᒫᑎᐤ 16:21–28; ᓘᒃ 9:22–27)
31ᑮ ᒫᒋ ᑭᔅᑭᓄᐊᒪᐌᐤ ᒫᑲ, ᐃᓕᓕᐎᑯᓯᓵᓐ ᑭᒋ ᐙᐎᓴᑫᓕᑕᒃ ᒥᒉᑦ ᑫᒀᓇ ᓀᔥᑕ ᑭᒋ ᐋᑕᐌᓕᒥᑯᑦ ᐊᓂᐃ ᑳ ᓂᑳᓀᓕᑖᑯᓯᓕᒋ, ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗ, ᓀᔥᑕ ᐅᒪᓯᓇᐃᑫᐗ, ᓀᔥᑕ ᑭᒋ ᓂᐸᐋᑲᓂᐎᑦ; ᒥᓇ ᒫᑲ ᑭᒋ ᐗᓂᔥᑳᑦ ᑮ ᓂᔅᑐ ᑭᔑᑳᓕᑫ᙮ 32ᐊᓂᐁᓕᐤ ᐃᑗᐎᓂᓕᐤ ᒫᑲ ᒧᔑᔐ ᑮ ᐃᑗᐤ᙮ ᐱᑕᕐ ᒫᑲ ᑮ ᐅᑎᓀᐤ, ᑮ ᒫᒋ ᑭᑕᐊᒪᐌᐤ ᒫᑲ᙮ 33ᒫᑲ ᐃᔅᐱ ᑳ ᑴᔅᑭᑳᐸᐎᑦ, ᑳ ᑲᓇᐙᐸᒫᑦ ᒫᑲ ᐅ ᑭᔅᑭᓄᐊᒪᐙᑲᓇ, ᑮ ᑭᑕᐊᒪᐌᐤ ᐱᑕᕋ, ᐁ ᐃᑗᑦ, ᓂᔅᐱᔅᑾᓂᒃ ᐃᔑ ᐃᑐᑌ, ᓭᑖᓐ: ᐌᓴ ᓇᒪᐎᓚ ᑭᒋᒪᓂᑐ ᐅᑦ ᐋᔮᓇ ᑭ ᒫᒥᑐᓀᓕᑕᒸᓐ, ᒫᑲ ᐊᓂᐃ ᐃᓕᓕᐗᒃ ᑳ ᐅᑦ ᐋᔮᓂᒋᒃ᙮
34ᐃᔅᐱ ᒫᑲ ᑳ ᑮ ᓇᑐᒫᑦ ᐃᓕᓕᐗ, ᐊᓯᒋ ᐅ ᑭᔅᑭᓄᐊᒪᐙᑲᓇ ᓀᔥᑕ, ᑮ ᐃᑌᐤ, ᐊᐌᓇ ᐙ ᓄᔅᐱᓇᔑᑴ, ᐁᑯᔑ ᑲᑕ ᐋᓉᑖᑎᓱ, ᑲᑕ ᐅᑎᓇᒻ ᓀᔥᑕ ᐅᑦ ᐋᔑᑌᐋᑎᓇᒻ, ᓂ ᑳ ᓄᔅᐱᓇᑎᒃ ᒫᑲ᙮ 35ᐌᓴ ᐊᐌᓇ ᐙ ᐱᒫᒋᑖᑴ ᐅ ᐱᒫᑎᓯᐎᓐ ᑲᑕ ᐗᓂᑕᐤ; ᒫᑲ ᐊᐌᓇ ᑫ ᐗᓂᑖᑴ ᐅ ᐱᒫᑎᓯᐎᓐ ᓂᓚ ᐅᒋ, ᓀᔥᑕ ᒥᓗᐋᒋᒧᐎᓂᓕᐤ, ᐁᐗᒀᓇ ᑫ ᐱᒫᒋᑖᑦ᙮ 36ᐌᓴ ᑫᒀᓕᐤ ᑫ ᐅᑎᓵᑦ ᐃᓕᓕᐤ, ᐋᑕ ᒥᓯᐌ ᐊᔅᑭᓕᐤ ᑫ ᑲᔥᑭᑖᑴ, ᑮᔥᐱᓐ ᑫ ᐗᓂᐋᑴ ᐅᑦ ᐊᒑᑾ? 37ᓀᔥᑕᐱᑯ ᑫᒀᓕᐤ ᑫ ᒥᓕᐌᑦ ᐃᓕᓕᐤ, ᒦᔅᑯᒡ ᐅᑦ ᐊᒑᑾ? 38ᐁᐗᑯ ᐅᒋ ᐊᐌᓇ ᑫ ᓇᓀᐯᐎᓯᑴ ᓂᓚ ᐅᒋ ᓀᔥᑕ ᓂᑦ ᐋᔭᒥᐎᓇ ᐅᒋ, ᐊᓄᒡ ᒣᒀᒡ ᐁ ᐱᔑᒀᑎᓱᐎ ᓀᔥᑕ ᒪᒋᑡᐎ ᐱᒫᑎᓯᓈᓂᐗᒃ, ᐁᐗᑾᓂᐃ ᓀᔥᑕ ᐃᓕᓕᐎᑯᓯᓵᓐ ᑫ ᐅᒋ ᓇᓀᐯᐎᓰᑦ, ᐃᔅᐱ ᐯᒋ ᐃᑐᑌᑌ ᐅ ᑭᔅᑌᓕᑖᑯᓯᐎᓂᓕᒃ ᐅᑖᐎᔭ, ᐊᓯᒋ ᐸᓓᑭ ᐁᓐᒐᓚᒃ᙮
Currently Selected:
ᐅᐸᓓᑭᔅ ᒫᕐᒃ 8: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.