ᐅᐸᓓᑭᔅ ᒫᕐᒃ 7
7
ᐅᑭᔅᑭᒪᓄᐊᒫᑫᐎᓂᐙᐤ ᐋᓂᔅᑫ ᐅᑖᐎᒫᐗᒃ
(ᒫᑎᐤ 15:1–9)
1ᐁᑯ ᐱᐁᒋ ᒪᐗᓴᑯᓈᑎᑯᑦ ᐸᕋᓯᔭ ᓀᔥᑕ ᐋᑎᑦ ᐅᒪᓯᓇᐃᑫᐗ, ᒋᕉᓴᓚᒥᒃ ᑳ ᐯᒋ ᐅᑐᑌᓕᒋ᙮ 2ᐃᔅᐱ ᒫᑲ ᐎᐋᐸᒥᒫᒋᒃ ᐋᑎᑦ ᐅ ᑭᔅᑭᓄᐊᒪᐙᑲᓇ ᐁ ᒧᐙᓕᒋ ᐊᓚᑰᓈᐗ ᐁᑳ ᐁ ᐹᔦᑭᒋᒉᓕᒋ ᐁᐗᑯ ᐁᑳ ᐁ ᑳᓯᒋᒉᓕᒋ, ᑮ ᐗᔭᔥ ᐃᑗᐗᒃ᙮
3ᐌᓴ ᐸᕋᓯᔭᒃ, ᓀᔥᑕ ᒥᓯᐌ ᒎᐗᒃ, ᑮᔥᐱᓐ ᐁᑳ ᑳᓯᒋᒉᒋᒃ ᒥᒉᑡᐤ, ᓇᒪᐎᓚ ᒥᒋᓱᐗᒃ, ᐁ ᐱᔑᒋᑕᒸᒋᒃ ᐅ ᑭᔅᑭᓄᐊᒫᑫᐎᓂᓕᐤ ᑳ ᓂᑳᓀᓕᑖᑯᓯᓕᒋ᙮ 4ᐃᔅᐱ ᒫᑲ ᑌᑯᔑᑾᐎ ᐃᑕ ᐁ ᐊᑖᒥᑐᓈᓂᐗᒃ ᐅᒋ, ᑮᔥᐱᓐ ᐁᑳ ᑭᒋᔅᑖᐸᐗᓗᒋᒃ, ᓇᒪᐎᓚ ᒥᒋᓱᐗᒃ᙮ ᓀᔥᑕ ᒥᒉᑦ ᑯᑕᑭᔭ ᑫᒀᓇ ᐃᑕᑾᓋ ᑳ ᑮ ᐅᑎᓇᑭᒃ ᑭᒋ ᐱᔑᒋᑕᑭᒃ, ᐁ ᑭᒋᔅᑖᐸᐗᑖᓂᐗᑭ ᒥᓂᒀᑲᓇ ᐅᑎ, ᓀᔥᑕ ᐅᓛᑲᓂᔕ, ᐅᓵᐙᐱᔉ ᐊᓱᐗᒋᑲᓇ, ᓀᔥᑕ ᒥᒋᓱᓈᑎᑾ᙮
5ᐁᑯ ᐹᕋᓯᔦᒃ ᓀᔥᑕ ᐅᒪᓯᓇᐃᑫᐗᒃ ᑫᑴᒋᒫᒋᒃ, ᑖᓀᑭ ᐌᒋ ᑭ ᑭᔅᑭᓄᐊᒪᐙᑲᓇᒃ ᐁᑳ ᐱᒧᑌᒋᒃ ᑳ ᐃᔑ ᑭᔅᑭᓄᐊᒫᑫᒋᒃ ᑳ ᓂᑳᓀᓕᑖᑯᓯᒋᒃ, ᒫᑲ ᐁ ᒧᐙᒋᒃ ᐊᓚᑯᓇᐗ ᐁᑳ ᐁ ᑳᓯᒋᒉᒋᒃ?
6ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᑖᔑᑆ ᐋᐃᓭᔭ ᐁ ᑭᔅᑭᐙᐃᑫᑦ ᑮ ᐃᑎᑖᒃ ᑳ ᐋᔭᒥᐁᑳᓱᔦᒃ, ᐁ ᐃᑕᓯᓇᐃᑳᑌᒃ, ᐅᑯ ᐃᓕᓕᐗᒃ ᓂ ᑭᔅᑌᓕᒥᑾᒃ ᐅᑐᓂᐙᒃ ᐅᒋ, ᒫᑲ ᐅᑌᐃᐗᐤ ᓂ ᓚᐙᐸᒥᑯᐙᓐ᙮ 7ᒫᑲ ᐸᑾᓐᑕᐤ ᓂ ᓇᐗᑮᔅᑖᑾᒃ, ᐁ ᑭᔅᑭᓄᐊᒫᑫᒋᒃ ᐃᓕᓕᐗᒃ ᐅ ᑲᑫᔅᑴᐎᓂᐗᐗ ᒦᔅᑯᒡ ᒀᔭᔉ ᑭᔅᑭᓄᐊᒫᑫᐎᓐ᙮
8ᐌᓴ, ᐁ ᐃᑲᑌᔅᑖᐌᒃ ᐅ ᑲᑫᔅᑴᐎᓐ ᑭᒋᒪᓂᑐ, ᑭ ᐱᔑᒋᑖᒸᓇᐗᐤ ᐃᓕᓕᐗᒃ ᐅ ᑭᔅᑭᓄᐊᒫᑫᐎᓂᐗᐤ, ᐁ ᑭᒋᔅᑖᐸᐗᑖᓂᐗᑭ ᐅᓚᑲᓇ ᐅᑎ ᓀᔥᑕ ᒥᓂᒀᑲᓇ: ᒥᒉᑦ ᑯᑕᑭᔭ ᐅᒪ ᑐᐎ ᑫᒀᓇ ᓀᔥᑕ ᑭ ᑐᑌᓇᐗᐤ᙮
9ᑮ ᐃᑌᐤ ᒫᑲ, ᒥᑐᓂ ᑭᑦ ᐋᑕᐌᓕᑕᒸᓇᐗᐤ ᐅ ᑲᑫᔅᑴᐎᓐ ᑭᒋᒪᓂᑐ, ᑭᒋ ᑮ ᑲᓇᐌᓕᑕᒣᒃ ᑎᐱᓚᐌ ᑮ ᑭᔅᑭᓄᐊᒫᑫᐎᓂᐗᐤ᙮ 10ᐌᓴ ᒧᓯᔅ ᑮ ᐃᑗᐤ, ᑭᔅᑌᓕᒻ ᑯᑖᐎ ᓀᔥᑕ ᑭᑳᐎ; ᓀᔥᑕ ᒫᑲ, ᐊᐌᓇ ᒣᒐᑭᒫᑴ ᐅᑖᐎᔭ ᓀᔥᑕᐱᑯ ᐅᑳᐎᔭ, ᐁᑯᔑ ᑲᑕ ᓂᐸᐊᐤ᙮ 11ᒫᑲ ᑭᓚᐗᐤ ᑭᑦ ᐃᑣᓇᐗᐤ, ᑮᔥᐱᓐ ᐊᐌᓇ ᑫ ᐃᑖᑴ ᐅᑖᐎᔭ ᓀᔥᑕᐱᑯ ᐅᑳᐎᔭ, ᑯᕐᐹᓐ, ᐁᐗᑾᓂᒪ ᐁ ᐃᑗᒪᑲᒃ, ᒥᓕᐌᐎᓐ, ᐊᓂᒪ ᑫ ᐃᔑ ᑭᔅᑖᐸᒋᐃᑳᐎᔭᓐ ᓂᓚ ᐅᒋ; ᓇᒪᐎᓚ ᑲᑕ ᐋᓉᓕᑖᑯᓯᐤ᙮ 12ᓇᒪᐎᓚ ᒫᑲ ᑭᑦ ᐃᓕᓇᐙᐗᐤ ᐙᔦᔥ ᑭᒋ ᑐᑕᒪᐙᑦ ᐅᑖᐎᔭ ᓀᔥᑕᐱᑯ ᐅᑳᐎᔭ; 13ᐁ ᐃᔑᑖᐌᒃ ᑭᒋᒪᓂᑐ ᐅᑦ ᐋᔭᒥᐎᓐ ᐁᑳ ᐙᔦᔥ ᑭᒋ ᐃᑖᐸᑕᓂᓕᒃ ᑭ ᑭᔅᑭᓄᐊᒫᑫᐎᓂᐗᐤ ᐅᒋ, ᑳ ᑮ ᒥᓕᐌᔦᒃ: ᓀᔥᑕ ᒥᒉᑦ ᑯᑕᑭᔭ ᐅᒪ ᑐᐎ ᑫᒀᓇ ᑭ ᑐᑌᓈᐗᐤ᙮
ᐊᓂᐃ ᑫᒀᓇ ᑳ ᐎᓕᐱᐃᑯᑦ ᐊᐌᓇ
(ᒫᑎᐤ 15:10–20)
14ᐃᔅᐱ ᒫᑲ ᑳ ᑮ ᓇᑐᒫᑦ ᒥᓯᐌ ᐃᓕᓕᐗ, ᑮ ᐃᑌᐤ, ᓇᑐᑕᐎᒃ ᒥᓯᐌ ᐁ ᐃᑕᔑᔦᒃ ᓂᓯᑐᑕᒧᒃ ᒫᑲ: 15ᓇᒪᐎᓚ ᐃᑕᑾᓐ ᑫᒀᓐ ᐗᔅᑮᒡ ᐃᓕᓕᐤ, ᐁ ᐱᑐᑫᒪᑲᓂᓕᒃ ᐎᔭᐎᒃ ᑫ ᑮ ᐎᓕᐱᐃᑯᑦ: ᒫᑲ ᐊᓂᐃ ᑫᒀᓇ ᑳ ᐯᒋ ᐗᓚᐎᔅᑳᑯᑦ ᐁᐗᑾᓂᐃ ᑳ ᐎᓕᐱᐃᑯᑦ ᐃᓕᓕᐤ᙮ 16ᑮᔥᐱᓐ ᐊᐌᓇ ᐌᑖᐗᑳᑴ ᑭᒋ ᐯᑕᒃ, ᐁᑯᔑ ᑭᑕ ᐯᑕᒻ᙮
17ᐃᔅᐱ ᒫᑲ ᑳ ᐱᑐᑫᑦ ᐙᔅᑳᔨᑲᓂᒃ ᐁ ᑮ ᓇᑲᑖᑦ ᐃᓕᓕᐗ, ᑮ ᑲᑴᒋᒥᑯ ᐅ ᑭᔅᑭᓇᐊᒪᐙᑲᓇ ᐅᒣᓕᐤ ᓇᔅᐱᑐᐌᐎ ᐗᑕᓗᑳᓂᓕᐤ᙮ 18ᐃᑌᐤ ᒫᑲ, ᑭᓚᐗᐤ ᓈ ᓀᔥᑕ ᓇᒪ ᐅᒪ ᐃᔥᐱᔥ ᑭᑦ ᐅᓂᓯᑐᑕᒧᐎᓂᓇᐗᐤ? ᓇᒪ ᓈ ᑭ ᓂᓯᑐᑌᓇᐗᐤ ᐱᑯ ᑫᒀᓐ ᐗᔅᑮᒡ ᐅᒋ ᐁ ᐱᑐᑫᔥᑳᑯᑦ ᐃᓕᓕᐤ, ᓇᒪᐎᓚ ᑲᑕ ᑮ ᐎᓕᐱᐃᑯ: 19ᐌᓴ ᓇᒪᐎᓚ ᐱᑐᑫᒪᑲᓂᓕᐤ ᐅᑌᐃᒃ, ᒫᑲ ᐗᑖᒃ, ᒥᓇ ᒫᑲ ᐗᓚᐎᐸᓕᐤ, ᐁ ᐹᔦᑭᑖᒪᑲᒃ ᒥᓯᐌ ᒥᒋᒻ?
20ᑮ ᐃᑗᐤ ᒫᑲ, ᐊᓂᒪ ᑳ ᐗᓚᐎᔅᑳᑯᑦ ᐃᓕᓕᐤ ᐁᐗᑺᓕᐤ ᑳ ᐎᓕᐱᐃᑯᑦ ᐃᓕᓕᐤ᙮ 21ᐌᓴ ᐱᒋ ᐅᒋ, ᐃᓕᓕᐗᒃ ᐅᑌᐃᐙᒃ, ᐅᒋᐸᓕᐗ ᒪᒋ ᒥᑐᓀᓕᒋᑫᐎᓇ, ᒫᒪᐎᐃᑐᐎᓇ, ᐯᔑᑾᑎᓯᐎᓇ, ᓂᐹᔭᐌᐎᓇ, 22ᑭᒧᑎᐎᓇ, ᒧᔅᑌᓇᒫᑫᐎᓐ, ᒪᒑᑎᓯᐎᓐ, ᑲᑳᔦᓕᓯᐎᓐ, ᐱᔑᒀᒋᐃᑖᑎᓯᐎᓐ, ᒪᒋᒥᔅᑭᔑᒃ, ᐹᔅᑕᒧᐎᓐ, ᑭᔅᑌᓕᒧᐎᓐ, ᑲᑫᐹᑎᓯᐎᓐ: 23ᒥᓯᐌ ᐅᐅ ᒪᒋ ᑫᒀᓇ ᐱᒋ ᐅᒋᐸᓕᐗ, ᓀᔥᑕ ᐎᓕᐱᐃᑯ ᐃᓕᓕᐤ᙮
ᐃᔅᑫᐤ ᐊᔅᐯᓕᒧᑐᑕᐌᐤ ᒋᓴᓴ
(ᒫᑎᐤ 15:21–28)
24ᐊᓐᑕ ᒫᑲ ᑮ ᐅᒋ ᐸᓯᑯ, ᓀᔥᑕ ᑮ ᐃᑐᑌᐤ ᑖᐃᕐ ᓀᔥᑕ ᓵᐃᑕᓐ ᐊᔅᑮᒃ, ᑮ ᐱᑐᑫᐤ ᒫᑲ ᐙᔅᑳᔨᑲᓂᒃ, ᓇᒪᐎᓚ ᑮ ᓇᑕᐌᓕᑕᒻ ᒫᑲ ᐊᐌᓕᐗ ᑭᒋ ᑭᔅᑫᓕᑕᒥᓕᒋ: ᒫᑲ ᓇᒪᐎᓚ ᑮ ᑳᓱ᙮ 25ᐌᓴ ᐯᔭᒃ ᐃᐧᔅᑫᐤ, ᐅᑖᓂᓴ ᐁ ᐋᔭᐙᓕᒋ ᐎᓕᐱ ᐊᒑᑾ, ᑮ ᐯᑕᒻ, ᑮ ᐯᒋ ᐃᑐᑌᐤ ᒫᑲ, ᓀᔥᑕ ᑮ ᐸᑭᔑᓐ ᐅᓯᑎᓕᒃ: 26ᐊᓇ ᐃᔅᑴᐤ ᑮ ᒉᓐᑖᐃᓕᐎᐤ ᐁ ᓵᐃᕈᐸᓂᔑᔮᓂᐎᑦ ᐃᑕ ᐁ ᐅᒌᑦ ᐅᒋ; ᑮ ᓇᑐᑕᒪᐌᐤ ᒫᑲ ᑭᒋ ᐗᓚᐎᐌᐱᓈᓕᒋ ᒪᒋ ᐊᒑᑾ ᐅᑖᓇᓴ ᐎᔮᐎᓕᒃ ᐅᒋ᙮ 27ᒫᑲ ᒋᓴᔅ ᑮ ᐃᑌᐤ, ᐁᑯᔑ ᐊᐙᔑᔕᒃ ᓃᔥᑕᒻ ᑲᑕ ᑮᔥᐳᐗᒃ: ᐌᓴ ᓇᒪᐎᓚ ᒥᓨᔑᓐ ᑭᒋ ᐅᑎᓂᒥᒋ ᐊᐙᔑᔕᒃ ᐅᑦ ᐊᓚᑯᓇᒥᐙᐗ, ᐊᑎᒶᒃ ᓀᔥᑕ ᑭᒋ ᐌᐱᓇᒫᒋᒃ᙮
28ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᐁᐁ, ᑌᐯᓕᒋᑫᔭᓐ: ᐁᓕᐌᒃ ᒫᑲ ᐊᑎᒶᒃ ᔑᐹ ᒥᒋᓱᓈᑎᑯᒃ ᒥᒋᐌᐗᒃ ᐊᐙᔑᔓ ᐅ ᐱᐗᒋᑲᓂᓕᐗ᙮
29ᑮ ᐃᑌᐤ ᒫᑲ, ᐅᒪ ᐃᑗᐎᓐ ᐅᒋ ᑭᐌ; ᒪᒋ ᐊᒑᒃ ᑮ ᐗᓚᐎᔅᑲᐌᐤ ᑭᑖᓂᓴ᙮
30ᐃᔅᐱ ᒫᑲ ᐌᑎᑕᒃ ᐎᑭ, ᑮ ᒥᔅᑲᐙᑕᐤ ᒪᒋ ᐊᒑᑾ ᐁ ᑮ ᐗᓚᐎᓕᒋ, ᓀᔥᑕ ᐅᑖᓂᓴ ᐁ ᐱᒥᔑᓂᓕᒋ ᓇᐯᐎᓂᒃ᙮
ᒋᓴᔅ ᒥᓇᐙᒋᐁᐤ ᐅᑭᐱᑌᐗ
31ᒥᓇ ᒫᑲ, ᐁ ᐊᒋ ᑭᑐᑌᑦ ᑖᐃᕐ ᓀᔥᑕ ᓵᐃᑕᓐ ᐊᔅᑮᒃ, ᑮ ᐯᒋ ᐃᑐᑌᐤ ᑳᓕᓕ ᑭᒋᑲᒦᒃ, ᐁ ᔖᐳᑕᐌᔥᑲᒃ ᑎᑳᐳᓕᔅ ᐊᔅᑭᓕᐤ᙮ 32ᑮ ᐯᑐᐌᐌᒃ ᒫᑲ ᐯᔭᒃ ᐁ ᑲᑫᐱᑌᓕᒋ ᓀᔥᑕ ᐁᑳ ᐁ ᓂᑕᐌᓕᒋ; ᑮ ᓇᑐᑕᒪᐌᐗᒃ ᒫᑲ ᑭᒋ ᓵᒥᓈᓕᒋ᙮ 33ᐅᐱᒣ ᒫᑲ ᑮ ᐃᑐᑕᐁᐤ ᒥᔮᒪᐎᒥᒉᑎᓕᒋ ᐃᓕᓕᐗ ᐅᒋ, ᑮ ᐳᒋᑖᐙᑲᔦᓀᐤ ᒫᑲ, ᓀᔥᑕ ᐁ ᓯᑯᑦ, ᑮ ᓵᒥᓇᒬᐤ ᐅᑌᓕᓕᓕᐤ;
34ᓀᔥᑕ ᑭᒋᑭᔑᑯᒃ ᐁ ᐃᑖᐱᑦ, ᑮ ᓇᐊᑖᒧ, ᐃᑌᐤ ᒫᑲ, ᐁᐸᑕ, ᐁᐗᑾᓂᒪ, ᐹᔅᑭᑌᐸᓕ᙮ 35ᑣᔦᒃ ᒫᑲ ᐅᑖᐗᑳᔭ ᑮ ᐹᔅᑭᑌᐸᓕᓕᐗ, ᐅᑌᓕᓕᐋᐱ ᒫᑲ ᑮ ᐋᐱᑯᐸᓕᓕᐤ, ᑮ ᐹᔦᑎ ᐋᔭᒥᐤ ᒫᑲ᙮ 36ᑮ ᐃᑕᔓᒣᐤ ᒫᑲ ᐁᑳ ᑭᒋ ᐎᑕᒪᐙᓕᒋ ᐊᐌᓕᐗ: ᒫᑲ ᐊᐙᓯᑌ ᐁ ᐃᑕᔓᒫᑦ, ᐊᐙᓯᑌ ᓈᔅᐱᒡ ᒥᔅᑕᐃ ᑮ ᐙᐎᑕᒶᒃ, 37ᓈᔅᐱᒡ ᐋᓕᐙᒃ ᒫᑲ ᑮ ᒫᒪᔅᑳᑕᒥᓕᐗ, ᐁ ᐃᑗᓕᒋ, ᒥᓯᐌ ᑫᒀᓇ ᑮ ᒥᓗ ᑐᑕᒻ: ᑐᑕᐌᐤ ᐅᑲᑫᐱᑌᐗ ᑭᒋ ᐯᑕᒥᓕᒋ, ᓀᔥᑕ ᐁᑳ ᑳ ᓂᑕᐌᓕᒋ ᑭᒋ ᐋᔭᒥᓕᒋ᙮
Currently Selected:
ᐅᐸᓓᑭᔅ ᒫᕐᒃ 7: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.