ᐅᐸᓓᑭᔅ ᒫᕐᒃ 9
9
1ᑮ ᐃᑌᐤ ᒫᑲ, ᑖᐺ ᑭᑦ ᐃᑎᓈᐗᐤ, ᐋᑎᑦ ᐅᑯ ᐅᑕ ᑳ ᓂᐹᐎᒋᒃ, ᓇᒪᐎᓚ ᑲᑕ ᑯᒋᔅᑕᒶᒃ ᓂᐱᐎᓂᓕᐤ, ᐹᑎᒫ ᑭ ᐙᐸᑕᒸᑣᐌ ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᐤ ᑭᒋ ᐅᑎᒋᐸᓕᓕᒃ ᑲᔥᑭᐅᐎᓂᒃ᙮
ᒋᓴᔅ ᑴᔅᑭᓈᑯᑕᐤ ᐅᑎᔑᓈᑯᓯᐎᓐ ᐊᓐᑕ ᐗᒋᒃ
(ᒫᑎᐤ 17:1–13; ᓘᒃ 9:28–36)
2ᑳ ᐳᓂᐸᓕᑭ ᒫᑲ ᓂᑯᑣᓱ ᑭᔑᑲᐗ, ᒋᓴᔅ ᐅᑎᓀᐤ ᐱᑕᕋ, ᓀᔥᑕ ᒉᒻᓴ, ᓀᔥᑕ ᒑᓇ, ᑮ ᐃᑐᑕᐁᐤ ᒫᑲ ᐁ ᐃᔅᐸᑎᓈᓕᒃ ᐗᒌᒃ ᐁᑯᑕ ᐁ ᐯᔭᑯᒋᒃ: ᑮ ᑴᔅᑭᓈᑯᓯᐤ ᒫᑲ ᐁ ᑲᓇᐙᐸᒥᑯᑦ᙮ 3ᐅ ᐎᓛᒋᑲᓇ ᒫᑲ ᑮ ᐙᓯᑌᓕᐗ, ᓈᔅᐱᒡ ᐁ ᐙᐹᓕᑭ ᑖᐱᔅᑯᒡ ᑰᓇ; ᐃᓕᑯᒃ ᐁᑳ ᐅᑭᒋᔅᑌᑲᐃᑫᐤ ᐅᑕ ᐊᔅᑮᒃ ᑭᒋ ᑮ ᐃᔅᐱᒋ ᐙᐱᑖᑦ᙮ 4ᑮ ᓄᑯᓰᔅᑖᑯᐗᒃ ᒫᑲ ᐃᓛᐃᒐᐗ ᓀᔥᑕ ᒧᓯᓴ; ᑮ ᐎᒋᐋᔭᒥᒣᐗᒃ ᒫᑲ ᒋᓴᓴ᙮ 5ᐱᑕᕐ ᒫᑲ ᐁ ᓇᔥᑴᐗᔑᐃᐌᑦ, ᑮ ᐃᑌᐤ ᒋᓴᓴ, ᐅᑭᒪᐤ, ᒥᓨᔑᓐ ᐅᑕ ᐁ ᐃᑖᔮᒃ: ᐁᑯᔑ ᓂ ᑳ ᐅᔑᑖᓈᓐ ᓂᔅᑐ ᒥᑭᐙᒪ; ᐯᔭᒃ ᑭᓚ ᑭᒋ ᐋᔮᔭᓐ, ᐯᔭᒃ ᓀᔥᑕ ᒧᓯᔅ, ᐯᔭᒃ ᓀᔥᑕ ᐃᓛᐃᒐ᙮ 6ᐌᓴ ᓇᒪᐎᓚ ᑮ ᑭᔅᑫᓕᑕᒻ ᑖᓂ ᑫ ᐃᑗᑦ; ᐌᓴ ᓈᔅᐱᒡ ᑮ ᓭᑭᓯᐗᒃ᙮
7ᑮ ᐃᑕᑾᓐ ᒫᑲ ᐗᔅᑯ ᑳ ᐊᑲᐙᔅᑌᐅᑯᒋᒃ: ᓀᔥᑕ ᐯᑖᑯᓯᐎᓐ ᐗᔅᑯᒃ ᑮ ᐅᒋᐸᓕᐤ, ᑳ ᐃᑗᒪᑲᒃ, ᐊᐗ ᐁᐗᑯ ᓂᑯᓯᔅ ᑳ ᓵᑭᐊᒃ; ᓇᑐᑖᐎᒃ᙮ 8ᓴᔅᒋᑯᒡ ᒫᑲ, ᐃᔅᐱ ᐙᔅᑲ ᑳ ᑮ ᐃᑖᐱᒋᒃ, ᓇᒪᐎᓚ ᐊᐌᓕᐗ ᑫᔮᐸᒡ ᑮ ᐙᐸᒣᐗᒃ, ᐱᑯ ᒋᓴᓴ ᐊᓯᒋ ᐎᓚᐗᐤ ᑫᒋᐙᒃ᙮
9ᒣᒀᒡ ᒫᑲ ᐁ ᓂᑖᒪᒋᐌᒋᒃ ᐗᒌᒃ ᐅᒋ, ᑮ ᐋᔨᒋᒣᐤ ᐁᑳᐎᓚ ᐊᐌᓕᐗ ᑭᒋ ᐎᑕᒪᐗᓕᒋ ᑫᑯ ᑫᒀᓇ ᑳ ᑮ ᐙᐸᑕᒥᓕᒋ ᐹᑎᒫ ᐃᓕᓕᐎᑯᓯᓵᓐ ᑮ ᐗᓂᔥᑳᑌ ᐅᓂᐱᐗ ᐅᒋ᙮
10ᑮ ᑲᓇᐌᓕᑕᒫᓱᐗᒃ ᒫᑲ ᐊᓂᐁᓕᐤ ᐃᑗᐎᓂᓕᐤ, ᐁ ᑲᑴᒋᒥᑐᒋᒃ ᑫᒀᓐ ᐁ ᐃᑗᒪᑲᒃ ᐗᓂᔥᑳᐎᓐ ᐅᓂᐱᐗᒃ ᐅᒋ᙮ 11ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ, ᑖᓀᑭ ᐌᒋ ᐃᑗᒋᒃ ᐅᒪᓯᓇᐃᑫᐗᒃ ᐃᓛᐃᒐ ᓃᔥᑕᒻ ᑭᒋ ᑕᑯᔑᒃ?
12ᑮ ᓇᔥᑴᐗᔑᐁᐤ ᒫᑲ, ᐁ ᐎᑕᒪᐙᑦ, ᐃᓛᐃᒐ ᑖᐺ ᓃᔥᑕᒻ ᑕᑯᔑᓐ, ᓀᔥᑕ ᒥᓗᑕᐤ ᒥᓯᐌ ᑫᒀᓇ; ᓀᔥᑕ ᐁ ᐃᑕᓯᓇᐃᑳᑌᓕᒃ ᐃᓕᓕᐎᑯᓯᓵᓐ ᐅᒋ, ᑭᒋ ᐙᐎᓴᑫᓕᑕᒃ ᒥᒉᑦ ᑫᒀᓇ, ᓀᔥᑕ ᑭᒋ ᐋᑕᐌᓕᒫᑲᓂᐎᑦ᙮ 13ᒫᑲ ᑭᑦ ᐃᑎᓇᐗᐤ, ᐋᔕᔾ ᑖᐺ ᐃᓛᐃᒐ ᑕᑯᔑᓐ, ᑮ ᑐᑕᐌᐗᒃ ᒫᑲ ᐱᑯ ᑳ ᐃᑌᓕᑕᑭᒃ, ᑳ ᐃᑕᓯᓇᐃᑳᑌᓕᒃ ᐎᓚ ᐅᒋ᙮
ᒋᓴᔅ ᒥᓇᐙᒋᐁᐤ ᓈᐯᔑᔕ ᒪᒋ ᐊᒑᑯ ᐁ ᐊᔭᐗᓕᒋ
(ᒫᑎᐤ 17:14–21; ᓘᒃ 9:37–43a)
14ᐃᔅᐱ ᒫᑲ ᐌᑎᑖᑦ ᐅ ᑭᔅᑭᓄᐊᒪᐙᑲᓇ, ᑮ ᐙᐸᒣᐤ ᐁ ᐎᒋᑳᐸᐎᔅᑖᑯᓕᒋ ᒥᔭᒪᐎᒥᒉᑎᓕᒋ ᐃᓕᓕᐗ, ᓀᔥᑕ ᐁ ᑲᑴᒋᒥᑯᓕᒋ ᐅᒪᓯᓇᐃᑫᐗ᙮ 15ᑣᔦᒃ ᒫᑲ ᒥᓯᐌ ᐃᓕᓕᐗᒃ, ᐃᔅᐱ ᐎᐋᐸᒫᒋᒃ, ᓈᔅᐱᒡ ᑮ ᒫᒪᔅᑳᑕᒶᒃ, ᓀᔥᑕ ᐁ ᒋᒋᓈᒋᒃ ᑮ ᐊᑖᒥᔅᑲᐌᐗᒃ᙮ 16ᑮ ᑲᑴᒋᒣᐤ ᒫᑲ ᐅᒪᓯᓇᐃᑫᐗ, ᑫᒀᓐ ᑫᑴᒋᒥᑐᔦᒃ?
17ᐯᔭᒃ ᒫᑲ ᐊᓂᑭ ᒥᔮᒪᐎᒥᒉᑎᒋᒃ ᐅᒋ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑫᔅᑭᓄᐊᒫᑫᔭᓐ, ᑭ ᑮ ᐯᑣᑎᓐ ᓂᑯᓯᔅ, ᑳ ᐋᔮᐙᑦ ᐁᑳ ᑳ ᓂᑕᐌᓕᒋ ᐊᒑᑾ: 18ᐱᑯ ᐃᑕ ᒫᑲ ᐌᑎᓂᑯᒋ, ᑖᑐᐱᑌᑯ; ᐱᔅᑌᐙᑖᒧ ᒫᑲ, ᓀᔥᑕ ᒫᑗᐋᐱᑌᔑᓐ, ᐊᑎ ᓈᔦᔖᐎᓯᐤ ᒫᑲ; ᓂ ᑮ ᐋᔭᒥᐋᐗᒃ ᒫᑲ ᑭ ᑭᔅᑭᓄᐊᒪᐙᑲᓇᒃ ᑭᒋ ᐗᓚᐎᐌᐱᓈᒋᒃ, ᓇᒪᐎᓚ ᒫᑲ ᑮ ᑲᔥᑭᑖᐗᒃ᙮
19ᑮ ᓇᔥᑴᐗᔑᐁᐤ ᒫᑲ, ᐁ ᐃᑖᑦ, ᐅ ᐁᑳ ᐌᑖᐺᑕᒧᐎᓂᔦᒃ ᑳ ᐋᓂᔅᑫᐱᒫᑎᓯᔦᒃ! ᑖᓀᓕᑯᒃ ᑫ ᐄᒉᐎᑕᑾᒃ? ᑖᓀᓕᑯᒃ ᑫ ᐯᐃᑖᑾᒃ? ᐯᑐᐎᓐ ᓂᓚ᙮ 20ᑮ ᐯᑐᐌᐗᒃ ᒫᑲ:
ᐃᔅᐱ ᒫᑲ ᐎᐋᐸᒥᑯᑦ ᑣᔦᒃ ᐊᒑᑾ ᑖᑐᐱᑎᑯᓕᐗ, ᓀᔥᑕ ᐊᔅᑮᒃ ᑮ ᐸᑭᔑᓂᓕᐗ, ᓀᔥᑕ ᑮ ᑴᑴᑎᐱᐸᓕᐗ ᐁ ᐲᔅᑌᑄᑖᒧᓕᒋ᙮ 21ᑮ ᑲᑴᒋᒥᒣᐤ ᒫᑲ ᐅᑖᐎᔭ, ᑖᓀᓕᑯᒃ ᐊᔅᐱᓐ ᐅᒣᓕᐤ ᑳ ᐅᑎᑎᑯᑦ?
ᑮ ᐃᑗᐤ ᒫᑲ, ᐁ ᐊᐙᔑᔑᐎᑦ ᐅᒋ᙮ 22ᒥᒉᑡᐤ ᒫᑲ ᑮ ᒪᒍᔅᑌᐌᐱᓂᑯ, ᓀᔥᑕ ᐸᑲᔅᑕᐌᐌᐱᓂᑯ᙮ ᑭᒋ ᓂᔑᐗᓃᒋᐃᑯᑦ: ᒫᑲ ᑮᔥᐱᓐ ᑫᒀᓐ ᑫ ᑮ ᑐᑕᒧᐗᓀ, ᑭᑎᒪᑫᓕᒥᓈᓐ, ᓀᔥᑕ ᐎᒋᐃᓈᓐ᙮
23ᒋᓴᔅ ᑮ ᐃᑌᐤ, ᑮᔥᐱᓐ ᑫ ᑮ ᑖᐺᑕᒧᐗᓀ, ᒥᓯᐌ ᑫᒀᓐ ᐌᒋᐸᓕᓕᐤ ᐊᓇ ᑳ ᑖᐺᑕᒃ᙮
24ᑣᔦᒃ ᒫᑲ ᐅᑖᐎᔭ ᐊᓇ ᐊᐙᔑᔥ ᑮ ᑌᐺᓕᐗ, ᓀᔥᑕ ᑮ ᐃᑗᓕᐗ ᐁ ᐅᒋᑲᐙᐱᓕᒋ, ᑌᐯᓕᒋᑫᔭᓐ, ᓂ ᑖᐺᑌᓐ; ᐎᒋᑕ ᓂᑦ ᐋᓉᑕᒧᐎᓐ᙮
25ᐃᔅᐱ ᒋᓴᔅ ᐎᐋᐸᑕᒃ ᐃᓕᓕᐗ ᐁ ᐯᒋ ᒫᒪᐎᐸᑖᓕᒋ, ᑮ ᑭᑐᑌᐤ ᐊᓂᐃ ᐎᓕᐱ ᐊᒑᑾ, ᐁ ᐃᑖᑦ, ᑭᓚ ᐁᑳ ᓀᑕᐌᔭᓐ ᓀᔥᑕ ᑫᑫᐱᑌᔭᓐ ᐊᒑᒃ, ᑭᑦ ᐃᑕᔔᐙᑎᑎᓐ ᑭᒋ ᐯᒋ ᐗᓚᐎᔅᑲᐗᑦ, ᐁᑳ ᒥᓇ ᓀᔥᑕ ᑭᒋ ᐱᑐᑫᔅᑲᐗᑦ᙮
26ᐊᒑᒃ ᒫᑲ ᑮ ᑌᐺᐤ, ᓀᔥᑕ ᑮ ᐎᓴᑭ ᑖᑐᐱᑌᐤ, ᐁᑯ ᐌᓚᐎᔅᑲᐙᑦ: ᑮ ᐃᔑᓈᑯᓯᓕᐗ ᒫᑲ ᑖᐱᔅᑯᒡ ᐊᐌᓇ ᐁ ᓂᐱᑦ; ᑳ ᐅᒋ ᐃᑗᒋᒃ ᒥᒉᑦ, ᓂᐱᐤ᙮ 27ᒫᑲ ᒋᓴᔅ ᑮ ᓴᑭᒋᒉᓀᐤ, ᓀᔥᑕ ᑮ ᐅᐱᓀᐤ, ᐁᑯ ᐌᓂᔥᑳᓕᒋ᙮
28ᐃᔅᐱ ᒫᑲ ᑳ ᐱᑐᑫᑦ ᐙᔅᑳᔨᑲᓂᒃ, ᑮᒧᒡ ᑮ ᑲᑴᒋᒥᑯ ᐅ ᑭᔅᑭᓄᐊᒪᐙᑲᓇ, ᑖᓀᑭ ᐌᒋ ᐁᑳ ᓂᓚᓈᓐ ᑳ ᑲᔥᑭᑖᔮᒃ ᑭᒋ ᐗᓚᐎᐌᐱᓇᑭᑦ?
29ᑮ ᐃᑌᐤ ᒫᑲ, ᐅᒪ ᑐᐎ ᓇᒪᐎᓚ ᑯᑕᒃ ᑫᒀᓐ ᑲᑕ ᐅᒋ ᐗᓚᐎᐸᓕᐤ, ᐱᑯ ᐋᔭᒥᐋᐎᓐ ᓀᔥᑕ ᓂᑲᓱᐎᓐ ᐅᒋ᙮
ᒋᓴᔅ ᒥᓇ ᐋᓕᒧᑕᒻ ᐅᓂᐱᐎᓐ
(ᒫᑎᐤ 17:22–23; ᓘᒃ 9:43b–45)
30ᐊᓐᑕ ᒫᑲ ᑮ ᐅᒋ ᑭᑐᑌᐗᒃ, ᓀᔥᑕ ᑮ ᔖᐳᑕᐌᔥᑲᒻ ᑳᓕᓕ; ᓇᒪ ᒫᑲ ᑮ ᓇᑕᐌᓕᑕᒻ ᐊᐌᓕᐗ ᑭᒋ ᑭᔅᑫᓕᑕᒥᓕᒋ᙮ 31ᐌᓴ ᑮ ᑭᔅᑭᓄᐊᒪᐌᐤ ᐅ ᑭᔅᑭᓄᐊᒪᐙᑲᓇ, ᓀᔥᑕ ᑮ ᐃᑌᐤ, ᐃᓕᓕᐎᑯᓯᓵᓐ ᐸᑭᑎᓇᐤ ᐅᒋᒋᓕᒃ ᐃᓕᓕᐗ, ᑲᑕ ᓂᐸᔨᑯ ᒫᑲ, ᐃᔅᐱ ᒫᑲ ᑮ ᓂᐸᐋᑲᓂᐎᑌ, ᑲᑕ ᐗᓂᔥᑲᐤ ᓂᔅᑐ ᑭᔑᑳᓕᑫ᙮
32ᒫᑲ ᓇᒪᐎᓚ ᑮ ᓂᓯᑐᑕᒶᒃ ᐊᓂᐁᓕᐤ ᐃᑗᐎᓂᓕᐤ, ᓀᔥᑕ ᑮ ᑯᔅᑖᒋᐗᒃ ᑭᒋ ᑲᑴᒋᒫᒋᒃ᙮
ᐊᐌᓇ ᒫᐗᒡ ᑭᔅᑎᓯᑦ
(ᒫᑎᐤ 18:1–5; ᓘᒃ 9:46–48)
33ᑮ ᐯᒋ ᐃᑐᑌᐤ ᒫᑲ ᑲᐸᕐᓀᔭᒥᒃ, ᓀᔥᑕ ᐱᒋ ᐙᔅᑳᔨᑲᓂᒃ ᐁ ᐃᑕᑦ, ᑮ ᑲᑴᒋᒣᐗᒃ, ᑫᒀᓐ ᐊᓂᒪ ᑳ ᐅᒋ ᐋᔑᑌᒥᑐᔦᒃ ᐁ ᐯᒋ ᐱᒧᑌᔦᒃ?
34ᒫᑲ ᓇᒪᐎᓚ ᐅᒋ ᑭᑐᐗᒃ; ᐌᓴ ᐁ ᐯᒋ ᐱᒧᑌᒋᒃ, ᑮ ᐅᒋ ᐋᔑᑌᒥᑐᐗᒃ ᐊᐌᓇ ᐁ ᐃᑕᓯᒋᒃ ᑫ ᒫᐗᒋ ᑭᔅᑌᓕᑖᑯᓯᑦ᙮ 35ᑮ ᓇᐊᐱᐤ ᒫᑲ, ᓀᔥᑕ ᐁ ᑮ ᓇᑐᒫᑦ ᐊᓂᐃ ᓂᔓᔖᑉ, ᐃᑌᐤ, ᑮᔥᐱᓐ ᐊᐌᓇ ᓀᑕᐌᓕᑕᒧᑴ ᑭᒋ ᓃᔥᑕᒻ ᐃᑌᓕᑖᑯᓯᑦ, ᐁᐗᒀᓇ ᒫᐗᒋ ᒫᒋᒡ ᑫ ᐃᑌᓕᑖᑯᓯᑦ, ᒥᓯᐌ ᓀᔥᑕ ᑲᑕ ᐊᑑᔅᑲᐌᐤ᙮ 36ᑮ ᐅᑎᓀᐤ ᒫᑲ ᐊᐙᔑᔕ, ᓀᔥᑕ ᑌᑖᐎᒡ ᐁ ᐃᑕᓯᓕᒋ ᑮ ᐊᓓᐤ: ᐃᔅᐱ ᒫᑲ ᑳ ᑮ ᐅᑎᓈᑦ ᐅᔅᐱᑐᓂᒃ, ᑮ ᐃᑌᐤ, 37ᐊᐌᓇ ᑫ ᐅᑎᓈᑴ ᐯᔭᒃ ᐅᐅ ᑐᐎ ᐊᐱᔅᑕᐙᔑᔕ ᓂᑦ ᐃᔑᓂᑳᓱᐎᓂᒃ ᓂᓚ ᓂᑦ ᐅᑎᓇᒃ: ᐊᐌᓇ ᒫᑲ ᑫ ᐅᑎᓂᑴ, ᓇᒪᐎᓚ ᓂᓚ ᓂᑦ ᐅᑎᓂᒃ, ᒫᑲ ᐊᓂᐃ ᑳ ᑮ ᐯᒋᑎᔕᐅᓕᒋ᙮
ᐊᐌᓇ ᐁᑳ ᑳ ᓇᔅᑯᔅᑖᑕᒃ ᑭᐐᒋᐃᑯᓇᐤ
(ᓘᒃ 9:49–50)
38ᒑᓐ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑫᔅᑭᓀᐊᒫᑫᔭᓐ, ᓂ ᑮ ᐙᐸᒫᓈᓐ ᐊᐌᓇ ᐁ ᐗᓚᐎᐌᐱᓈᑦ ᒪᒋ ᐅᒑᑾ ᑭᑦ ᐃᔑᓂᑳᓱᐎᓂᒃ, ᓇᒪᐎᓚ ᒫᑲ ᑭ ᓄᔅᐱᓇᑎᑯᓇᐤ; ᓂ ᑮ ᑭᑕᐊᒪᐙᓈᓐ ᒫᑲ, ᐁᑳ ᐁ ᓄᔅᐱᓈᑎᑕᒃ᙮
39ᒫᑲ ᒋᓴᔅ ᑮ ᐃᑗᐤ, ᐁᑳᐎᓚ ᑭᑕᐊᒫᒃ: ᐌᓴ ᓇᒪᐎᓚ ᐊᐌᓇ ᐃᑕᐤ ᑫ ᒫᒪᑖᐎ ᐃᔑᒋᑫᑦ ᓂᑦ ᐃᔑᓂᑳᓱᐎᓂᒃ, ᔐᔥᒀᑦ ᑫ ᑮ ᒪᒋ ᐋᓕᒧᒥᑦ᙮ 40ᐌᓴ ᐊᓇ ᐁᑳ ᑳ ᓇᔅᑯᔅᑖᑕᒃ, ᑭ ᐎᒋᐃᑯᓇᐤ᙮ 41ᐌᓴ ᐊᐌᓇ ᑫ ᒥᓇᐃᑖᑴ ᒥᓂᒀᑲᓂᒃ ᓂᐱᓕᐤ ᓂᑦ ᐃᔑᓂᑳᓱᐎᓂᒃ, ᙭ ᐁ ᑎᐯᓕᒥᑖᒃ ᐅᒋ, ᑖᐺ ᑭᑦ ᐃᑎᓇᐗᐤ, ᓇᒪᐎᓚ ᑲᑕ ᐗᓂᑕᐤ ᐅ ᑎᐸᐊᒫᑯᓯᐎᓐ᙮
ᑲᑴᒋᐃᐌᐎᓇ ᒪᒋᐃᑎᐎᓐ ᐃᔑ
(ᒫᑎᐤ 18:6–9; ᓘᒃ 17:1–2)
42ᐊᐌᓇ ᒫᑲ ᑫ ᐗᓂᑐᑕᐙᑴ ᐯᔭᒃ ᐅᐅ ᑳ ᐋᐱᔑᔑᓕᒋ ᑳ ᑖᐺᔦᓕᒥᓕᒋ, ᐊᐙᓯᑌ ᑲᑕ ᒥᓨᔑᓂᓕᐸᓐ ᐱᓂᐳᒋᑲᓐ ᐊᓯᓂᔭ ᑭᒋ ᐊᑯᓛᑲᓂᐎᓕᒋ ᐅᒀᔮᒃ, ᓀᔥᑕ ᑭᒋ ᐸᑲᔅᑕᐌᐙᑲᓂᐎᑦ ᑭᒋᑲᒦᒃ᙮ 43ᑮᔥᐱᓐ ᒫᑲ ᑭᒋᒋ ᓈᔦᑕᐌᓕᑕᒥᐃᑯᔭᓀ, ᒪᓂᔕ: ᐊᐙᓯᑌ ᒥᓨᔑᓐ ᑭᒋ ᐱᑐᑫᔭᓐ ᐱᒫᑎᓯᐎᓂᒃ ᐁ ᒫᔅᑭᓯᔭᓐ, ᐃᔥᐱᔥ ᐁ ᐋᔮᔭᓐ ᓂᔓ ᒥᒋᒋᔭ ᑭᒋ ᐃᑐᑌᔭᓐ ᒪᒋ ᐃᔥᑯᑌᒃ, ᐊᓂᒪ ᐃᔥᑯᑌᒃ ᐁᑳ ᐎᔅᑳᑦ ᑫ ᐋᔅᑕᐌᒃ; 44ᐃᑕ ᐅ ᒪᓂᒍᔑᒥᐙᐗ ᐁᑳ ᑫ ᓂᐱᓕᒋ, ᓀᔥᑕ ᐃᔥᑯᑌᐤ ᐁᑳ ᑫ ᐋᔅᑕᐌᒃ᙮ 45ᑮᔥᐱᓐ ᒫᑲ ᑭᓯᑦ ᓈᔦᑕᐌᓕᑕᒥᐃᑲᐎᔭᓀ, ᒪᓂᔕ: ᐊᐗᔑᑌ ᒥᓨᔑᓐ ᑭᒋ ᐱᑐᑫᔭᓐ ᐱᒫᑎᓯᐎᓂᒃ ᐁ ᒫᔅᑭᐸᓕᔭᓐ, ᐃᔥᐱᔥ ᐁ ᐋᔮᔭᓐ ᓂᔓ ᒥᓯᑕ ᑭᒋ ᐃᔑ ᐌᐱᓂᑳᐎᔭᓐ ᒪᒋ ᐃᔥᑯᑌᒃ, ᐊᓂᒪ ᐃᔥᑯᑌᒃ ᐁᑳ ᐎᔅᑳᑦ ᑫ ᐋᔅᑕᐌᒃ; 46ᐃᑕ ᐅ ᒪᓂᒍᔑᒥᐙᐗ ᐁᑳ ᑫ ᓂᐱᓕᒋ, ᓀᔥᑕ ᐃᔥᑯᑌᐤ ᐁᑳ ᑫ ᐋᔅᑕᐌᒃ᙮ 47ᑮᔥᐱᓐ ᒫᑲ ᑮᔅᑭᔑᒃ ᓈᔦᑕᐌᓕᑕᒥᐃᑯᔨᓀ, ᐗᓚᐎᐱᑕ: ᐊᐗᓯᑌ ᒥᓨᔑᓐ ᑭᒋ ᐱᑐᑫᐗᑦ ᑭᒋᒪᓂᑐ ᐅᑦ ᐅᑭᒫᐎᐎᓂᒃ ᐁ ᐯᔭᑾᒃ ᑮᔅᑭᔑᒃ, ᐃᔥᐱᔥ ᐁ ᐋᔮᔭᓐ ᓂᔓ ᒥᔅᑭᔑᑾ ᑭᒋ ᐃᔑ ᐌᐱᓂᑳᐎᔭᓐ ᒪᒋ ᐃᔥᑯᑌᒃ; 48ᐃᑕ ᐅ ᒪᓂᒍᔑᒥᐙᐗ ᐁᑳ ᑫ ᓂᐱᓕᒋ, ᓀᔥᑕ ᐃᔥᑯᑌᐤ ᐁᑳ ᑫ ᐋᔅᑕᐌᒃ᙮
49ᐌᓴ ᒥᓯᐌ ᑕᑐ ᐊᐌᓇ ᑲᑕ ᔑᐎᐊᐤ ᐃᔥᑯᑌᓕᐤ ᐅᒋ, ᓀᔥᑕ ᒥᓯᐌ ᑕᑐ ᓵᓵᑭᐎᓕᐌᐎᓐ ᑲᑕ ᔑᐎᑖᑲᓂᐗᓐ ᔑᐎᑖᑲᓐ ᐅᒋ᙮
50ᔑᐎᑖᑲᓐ ᒥᓨᔑᓐ: ᒫᑲ ᑮᔥᐱᓐ ᔑᐎᑖᑲᓐ ᐱᐃᓵᑭ, ᑫᒀᓐ ᑫ ᐅᒋ ᔑᐎᑖᑲᓇᐊᒣᒃ?
ᐋᔮᒃ ᔑᐎᑖᑲᓐ ᑭᒋ ᐱᒋᔅᑳᑯᔦᒃ, ᓀᔥᑕ ᒥᓗ ᐅᑐᑌᒥᒥᑐᒃ᙮
Currently Selected:
ᐅᐸᓓᑭᔅ ᒫᕐᒃ 9: MCNT91
Highlight
Share
ਕਾਪੀ।
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.