लुका 4
4
दियाबलस इसुहेङ जाचेका
(मत्ति ४:१-११; मर्कुस १:१२-१३)
1इसु पुनित हाङसासो पोङघान्हातेङ यर्दन झोरासो घुरिहि। पुनित हाङसा वासेहेङ उदादाङका थामेभारि चुमपुहि। 2इन्ता दियाबलस इसुहेङ न्हेकुरि दिनाथिकापा जाच पातेङ कुकरमता फासेपालि भोहि। इङको न्हेकुरि दिना थिकापा इसु हाइ दोङ चानाङ मान्थुघाहि। एन्सा जेङलाउ वा हेन्जाङ म्हितुतेङ हिघाहि। 3इङको पहर दोङ दियाबलस इसुहेङ दोअ्हि, “पाक्का दोङ ना परमेस्वरको चान हिनु ते इदोइ उन्ठुइहेङ तोले जेङ दोअ् कालाउ उदोङघरि तोले जेनावा।” 4इसु वासेहेङ दोअ्हि, “परमेस्वरको कथनता इसिका लेखेका हि, द्याङ चाकाआनेमानेसो खिनिङ माबान्चिखे।”#नियम ८:३
5इङकोन्हुअ्सो दियाबलस इसुहेङ झाउका आरदाङता चुमपुतेङ एघुरिताङ सुमिङको गोताङ सारभिगेलाइ तिम्पातेङ वासेहेङ दोअ्हि, 6“का नासेहेङ इदोइ गोताङ सारभिको राजा रो इदोइ गोताङ टाका काउरिको मालिक बान्हाइलि द्वाङका। हाइदोनु इदोइ गोताङ थोक काङकोङ खुर्ता हि रो काङको मन चाकालाइहेङ पिलि द्वाङका। 7कासेहेङ सेउपा रो इदोइ गोताङ थोक नाङकोङ ज्यावा।” 8इसु वासेहेङ दोअ्हि, “परमेस्वरको कथनता इसिका लेखेका हि, ना ताइको परमेस्वरहेङ खिनिङ माने रो वाको खिनिङ सेवा पा।”#नियम ६:१३
9दियाबलस इसुहेङ यरुसलेमता चुमपुहि, कालाउ थानको तुपाता थुकापातेङ दोअ्हि, “जातिङको ना परमेस्वरको चान हिनु ते ना इतासो लेता धासे। 10हाइदोनु धरम किताबता एसापा लेखेका हि:
नासेहेङ सामार्हाइलि परमेस्वर ताइको सादेलचरगेलाइहेङ दिङगिलावा।
11नाङको खोकोइ बुङ उन्ठुइता माबोखेन्हाको दोअ्तेङ एम्बालाइ नासेहेङ खुर खुरताङ खोअ्तावा।”#ले ९१:११-१२
12इसु दोअ्हि, “धरम किताबता इसिका बुङ लेखेका हि, ना ताइको परमेस्वरहेङ जाच मापा।”#नियम ६:१६ 13दियाबलस इसुहेङ नानाउलि जाच पातेङ कुकरमता फासेपालि भोतेङ आरोङ दावा मानिङपाधाउ लाअ्तेङ हानिहि।
इसु सेवाको काम पालि तेङका
(मत्ति ४:१२-१७; मर्कुस १:१४-१५)
14इसु पुनित हाङसाको सरबङता गालिलता घुरिहि। वाको बारेता चारबितिङ चारचाराइलि तेङहि। 15वा कचहरिसाअ्ता बिद्या पिलि तेङलाउ, झाराङ वासेहेङ बाखिनघाखे।
नासरतको द्याङगेलाइ इसुहेङ खान्धुरि मापाहि
(मत्ति १३:५३-५८; मर्कुस ६:१-६)
16इसु नासरत पुरता लोहि। जेता वा हुर्किका हिघाहि। दिनाङ भाइपाङ वा पुनित माइसाका दिना कचहरिसाअ्ता हानिहि रो धरम किताब पर्हेलि जाअ्हि। 17वासेहेङ यसैया आगाधुइकाको लेखेका किताब पर्हेलि पिहि। कालाउ किताब हेतेङ वा इसिका लेखेका ओल्हेपातेङ पर्हेहि:
18प्रभु परमेस्वर ताइको हाङसा काङकोर्हुता हुपिका हि,
गरिबगेलाइहेङ रेम्काबानाल हिम्पालि वा कासेहेङ अभिसेक पातेङ दिङगिल्का हि।
कैदिगेलाइहेङ लाअ्पालि, कान्हागेलाइहेङ तिङका बान्हाइलि,
आन्याएता परिकालाइहेङ ल्होपालि
19रो ताइको द्याङगेलाइहेङ मुक्ति पिका पहर लोहोइ दोअ्तेङ पारचार पालि
प्रभु परमेस्वर कासेहेङ दोङ साल्का हि।#यसैया ६१:१
20इङकोन्हुअ्सो इसु किताब थुमतेङ एमि सेबकहेङ पिहि रो कालाउ वा योम्हि। इन्ता कचहरिसाअ्ता हिका झाराङ भारभुसाइतेङ वासेहेङ दोङ खाङतेङ हिघाहि। 21कालाउ इसु एम्बालाइहेङ दोअ्हि, “धरम किताबको इदोइ काथा नानि नेलाइ हिङकाहिङकाताङ पुरा जेङकाहि।”
22झाराङ द्याङगेलाइ इसुको परसङसा पाहि। वाको निगाहासो पोङघाका काथा हिङतेङ एम्बालाइ भारभुसाइतेङ दोअ्हि, “हाइ या योसेफको चान माको?” 23कालाउ इसु दोअ्हि, “एला पाक्का बुङ नेलाइ कासेहेङ ‘ओइ बोइद्या! ना ताइमिहेङ एल्पा’ कालाउ ‘कफर्नहुमता पाकाभाइपाङ ताइको देराता बुङ भारभुसाइका काम पा’ दोअ्स्वाना।”
24काथा दोपातेङ वा दोअ्हि, “जातिङको का नेलाइहेङ दोअ्ताङका, हिदोइ बुङ आगाधुइकाहेङ ताइको देरा पुरको द्याङगेलाइ खान्धुर मापावा।#युहन्ना ४:४४ 25भेनेङ एलोङ काथा बुङ का नेलाइहेङ दोअ्ताङका, एलिया आगाधुइकाको पालाता सुम बाअ्सार तु माहिन्हा थिकापा वाइ मालोतेङ बारा आनिकाल जेङका हिघाहि। इङको पहर इस्राएलता हेन्जाङ बिधुइगेलाइ हिघाखे।#१ राजा १७:१ 26सिदोन माउजाता हिका सारपत देराको बिधुइकोता खिनिङ परमेस्वर एलियाहेङ दिङगिल्हि।#१ राजा १७:८-१६ 27एन्साङ एलिसा आगाधुइका हिलाउ इस्राएलता हेन्जाङ रोग्याखोअ्कालाइ हिघाखे। कालाउ एम्बालाइता सिरिया सारभिको नामान दोअ्का द्याङखिनिङ एल्हि आरोङ हासुबुङ माएल्हि।”#२ राजा ५:१-१४
28इदोइ काथा हिङतेङ यहुदिगेलाइको जोम्का साअ्को झाराङ द्याङगेलाइ चेरताम्पाहि। 29कालाउ एम्बालाइ जुरु जारापा ल्होतेङ इसुहेङ तान्हितेङ पुरसो बाहार ओल्हेपागिल्हि। एम्बालाइको इदोइ पुर झाउका थामेता हिघाहि। एम्बालाइ वासेहेङ झाउका आरदाङसो थाल्लि खाङहि। 30कालाउ वा द्याङगेलाइको चेपेरेचेअ्कासो ओल्हेतेङ ताइको दामा लाअ्हि।
मासान खोअ्का द्याङ एल्का
(मर्कुस १:२१-२८)
31इङकोन्हुअ्सो इसु गालिल माउजाको कफर्नहुम दोअ्का पुरता लोहि। माइसाका दिनाता वा द्याङगेलाइहेङ धिरपाघाहि। 32वाको बिद्या हिङतेङ एम्बालाइ भारभुसाइहि हाइदोनु वा एम्बालाइहेङ खाबरासो धिरपाघाहि।#मत्ति ७:२८-२९
33कचहरिसाअ्ता एमि मासान खोअ्का द्याङ हिघाहि। इङको द्याङ र्हिकाइतेङ दोअ्हि, 34“ओइ नासरतको इसु, ना केलाइहेङ हाइ पालि भोखेना? हाइ ना केलाइहेङ नास पालि लोका हिना? ना परमेस्वरसो दिङगिल्का पुनित जन हिना दोअ्तेङ का नाल्खा।” 35इदोइ हिङतेङ इसु इङको मासानहेङ हाकाराइतेङ दोअ्हि, “सिकापाहि रो इदोइ द्याङसो ओल्हितेङ हाने!” इङको द्याङहेङ झाराङको आगाता लोम्पातेङ मासान ओल्हेतेङ हानेहि। कालाउ वासेहेङ हाइदोङ चोट पटक मालागिहि।
36कालाउ झाराङ द्याङगेलाइ भारभुसाइतेङ काथा पालि तेङहि, “इदोइ द्याङको धुइकाता हिसिका खाबरा हिघाखे। वा दोअ्तेङसाङ मासानगेलाइ बुङ ओल्हेतेङ खाअ्तेङ हानेखे।” 37कालाउ कफर्नहुम पुरको चारबितिङ इसुको नावाइ चारचाराइ न्हाहि।
इसु हेन्जाङ द्याङगेलाइहेङ एल्पाका
(मत्ति ८:१४-१७; मर्कुस १:२९-३४)
38कचहरिसाअ्सो ओल्हेतेङ इसु सिमोनको साअ्ता हानिहि। इङको पहर सिमोनको जुबे मेसालोतेङ ल्होलि दोअ्का मान्थु घाखे। साअ्को द्याङगेलाइ “वासेहेङ एल्पापि” दोअ्तेङ इसुहेङ बिनइ पाहि। 39इसु वाको भेर्पाङ हानितेङ मेसाहेङ हाकाराइहि रो ओदोङघरि मेसा एल्हि। कालाउ वा ल्होतेङ ओबालाइको सेवा पालि तेङहि।
40बेला दुबिलि तोम्लाउ द्याङगेलाइ हेन्जा खालको बेथा हिका रो रोगाइकालाइहेङ इसुकोता चुमाहि। वा एम्बालाइर्हुता खुर ताअ्तेङ झाराङहेङ एल्पाहि। 41हेन्जाङ द्याङगेलाइसो मासानगेलाइ र्हिकाइतेङ एसा दोअ्तेङ ओल्हेहि, “ना परमेस्वरको चान हिना।” कालाउ इसु इङको मासानगेलाइहेङ सिकापा हिसु दोअ्तेङ नुइ धुइलि दोङ मापिहि। हाइदोनु वा मुक्ति पिका ख्रिस्ट हि दोअ्तेङ एम्बालाइ नाल्घाखे।
इसुको काम
(मर्कुस १:३५-३९)
42र्हिमा झेङतेङसाङ इसु चाकामान्दाका थामेभारि हानिहि। कालाउ द्याङगेलाइ वासेहेङ भोतेङ हानिहि। वासेहेङ निङतेङसाङ एम्बालाइ, “केलाइहेङ लाअ्तेङ मान्हे” दोअ्तेङ रोकेलि बल पाहि। 43इसु एम्बालाइहेङ दोअ्हि, “का सादेलको सारभिको रेम्काबानाल बो थामेता बुङ हिम्पालिगोयाङ दोअ्तेङ परमेस्वर कासेहेङ इदोइ काम पालि दिङगिल्का हि।” 44कालाउ एसापा वा गोताङ यहुदिया माउजाको कचहरिसाअ्गेलाइता हानेतेङ धिरपाहि।
Currently Selected:
लुका 4: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
