लुका 5
5
इसु लाम्फाको चात्यागेलाइहेङ काइका
(मत्ति ४:१८-२२; मर्कुस १:१६-२०)
1एनि इसु गनेसरेत दोअ्का चावान्दिको काम्बेता जाअ्तेङ हिघाहि। हेङसाङ द्याङगेलाइ परमेस्वरको कथन हिङलि गुल्सुमुल्सुपा लोहि।#मत्ति १३:१-२; मर्कुस ३:९-१०; ४:१ 2इसु चावान्दिको काम्बेता न्हेलोङ नाउ तिङहि। जालेघाकालाइ नाउ लाअ्तेङ जाले झादोङघाहि। 3एलोङ नाउ सिमोनको हिघाहि। इसु इङकोङ नाउता धोलतेङ सिमोनहेङ नाउ काम्बेसो आसा ओसो चुमपुलि दोअ्हि। कालाउ योम्तेङ द्याङगेलाइहेङ धिरपालि तेङहि।
4धिरपालि दोअ्तेङ इसु सिमोनहेङ दोअ्हि, “नाउ हेन्जा चि हिका थामेता चुमपुतेङ जाले थाल!” 5इदोइ हिङतेङ सिमोन इसुहेङ दोअ्हि, “मास्टर, केलाइ ते न्हिसिङ थिकापाङ जाले थाल्लाउबुङ एलोङ बुङ हाया मादेहि। कालाउ ना दोअ्नाङसिङ का जाले थालाङका।”#युहन्ना २१:३ 6जाले थाल्लाउ हेथे हेन्जाङ हाया देतेङ एम्बालाइको जाले दोङ थेअ्लि तोम्हि।#युहन्ना २१:६ 7कालाउ एम्बालाइ भेनेङ नाउता हिका सानाइतिगेलाइहेङ साघाइलि भाअ्सिङ खुरको टिपनिहोइ काइहि। कालाउ एम्बालाइ लोतेङ हाया ओल्हेपालि तेङहि। हाया ओल्हेपाकाताङ पालाउ न्हेलोङ नाउताङ हाया पोङघातेङ नाउ दोङ दुबिलि तोम्हि।
8इदोइ तिङतेङ सिमोन पत्रुस इसुको खोकोइता सेउपातेङ दोअ्हि, “प्रभु, का कुकरमि हिघा, कासो दुरे योम!” 9हाइदोनु इदोइ झोको हेन्जा हाया देकाता सिमोन रो वाको सानाइतिगेलाइ बुङ भारभुसाइहि। 10सिमोनदोफा मिलितेङ काम पाका जब्दियाको चानगेलाइ याकुब रो युहन्ना बुङ भारभुसाइ हि। कालाउ इसु सिमोनहेङ दोअ्हि, “माथि! एलासो ना हाया माको, द्याङगेलाइहेङ काङकोता चुमाका ज्याना।” 11इदोइ दोअ्का हिङतेङ एम्बालाइ नाउ काम्बेता तान्हितेङ चुमाहि कालाउ गोताङ आनेमाने लाअ्तेङ इसुहेङ पिताइहि।
इसु रोग्याल्होकाहेङ एल्पाहि
(मत्ति ८:१-४; मर्कुस १:४०-४५)
12एखे इसु एलोङ पुरता हिघाहि। इङको पुरता रोग्याल्होका एमि द्याङ हिघाखे। इसुहेङ तिङतेङ इङको रोग्याल्होका द्याङ वाको खोकोइता सेउपातेङ एसापा बिनइ पाहि, “प्रभु, ना मन पान्हापानु कासेहेङ एल्पालि द्वाना।” 13इसु वाकोर्हुता खुर ताअ्तेङ दोअ्हि, “ना एल” दोअ्तेङ “का मन पाखा।” कालाउ इघुरिङताङ वाको रोग्याल्होका एल्हि। 14कालाउ इसु वासेहेङ हुकुम पितेङ दोअ्हि, “खाङ, इदोइ काथा हासुहेङ मादोअ्! कुलाउ धामिकोता हानेतेङ ताइको जाच पाका। मोसाको हुकुम भाइपा भोक पितेङ झाराङहेङ ना एल्का दासि पि।”#लेबि १४:१-३२
15इङको दिनासो इसुको नावाइ झन चारचाराइतेङ हानिहि। कालाउ हेन्जाङ द्याङगेलाइ वाको बिद्या हिङलि रो एल्लि लोहि। 16कालाउ वा निचालाका थामेगेलाइता हानेतेङ पुकार पाघाहि।
इसु गाइल्हिखोअ्काहेङ एल्पाहि
(मत्ति ९:१-८; मर्कुस २:१-१२)
17एनि इसु द्याङगेलाइहेङ धिरपादोङ घाहि। आधेमि फरिसिगेलाइ, धरम मास्टरगेलाइ वाको भेर्पा योम्तेङ हिघाखे। एम्बालाइचाहिँ गालिल, यहुदिया माउजासो गोताङ देराभारिसो कालाउ यरुसलेम पुरसो बुङ लोका हिघाखे। इसुदोफा रोगाइकालाइहेङ एल्पाका प्रभु परमेस्वरको सरबङ हिघाहि। 18द्याङगेलाइ एमि गाइल्हि खोअ्काहेङ सिदाउदोफाङ फुतेङ चुमाहि। एम्बालाइ वासेहेङ इसुको आगाता चुमपुलि बोल्पाहि। 19कालाउ द्याङगेलाइ चेअ्सुमेअ्सुनाङ वाकोता चुमालि दामादोङ मानिङहि। एसापातेङ एम्बालाइ इङको गाइल्हिखोअ्काहेङ साअ्को चाल्हाता चुमपुहि। चाल्हा र्हाअ्तेङ इन्तासो गाइल्हिखोअ्काहेङ वाको सिदाउसुदाङ आलोल्होपा इसुको भेर्पा खुअ्पाहि। 20द्याङगेलाइको खान्धुर तिङतेङ इसु इङको बिमारिहेङ दोअ्हि, “नाङको कुकरम माफ जेङहि।”
21इसुको दोअ्का इदोइ काथा हिङतेङ धरम मास्टर रो फरिसिगेलाइ ओबालाइसि ओबालाइता दोअ्लि तेङहि, “परमेस्वरहेङ बादनामि पाका या हासु? परमेस्वर खिनिङ कुकरम माफ पालि द्वावा।” 22एम्बालाइको मनको काथा गेतेङ इसु दोअ्हि, “नेलाइ हाइपालि इसिका ठहर पासुखेना? 23इङको गाइल्हिखोअ्का द्याङहेङ ‘नाङको कुकरम माफ जेङहि’ दोअ्लि ना ‘ल्होतेङ हाने’ दोअ्लि हिदोइ सुबिस्ता हि, ते दोअ्सु? 24कालाउ खाङ, इदोइ सुमिङता का द्याङको चानहेङ द्याङको कुकरम माफ पाका खाबरा हि दोअ्का काथाको दासि का नेलाइहेङ प्याङका।” कालाउ इसु इङको गाइल्हिखोअ्काहेङ दोअ्हि, “का नासेहेङ दोअ्खा, एला ल्हो कालाउ ताइको सिदाउ चुमतेङ सिता हाने।” 25इङको द्याङ उदोङघरि झाराङको आगाता ल्होहि कालाउ ताइको सिदाउ चुमतेङ परमेस्वरको परसङसा पाकाताङ सिता हानिहि। 26एम्बालाइ झाराङ भारभुसाइतेङ परमेस्वरको इसिका सरबङ तिङतेङ थिहि। एम्बालाइ परमेस्वरको परसङसा पातेङ दोअ्हि, “नानि केलाइ ते हिसिका भारभुसाइका काथा तिङन्हाहि!”
इसु लेबिहेङ काइका
(मत्ति ९:९-१३; मर्कुस २:१३-१७)
27इन्तासो हानेलाउ इसु लेबि मिङ हिका एमि लेबि द्याङहेङ लेबि थामेता योम्तेङ हिका तिङहि। इसु वासेहेङ दोअ्हि, “कासेहेङ पिताइ।” 28ओदोङघरि लेबि गोताङ सामान लाअ्तेङ वासेहेङ पिताइहि।
29इङकोन्हुअ्सो लेबि इसुहेङ ताइको साअ्ता चालिको भाअ्सिङ काइपुहि। इन्ता लेबि रो आरोङ हेन्जाङ द्याङगेलाइबुङ हिघाखे। 30फरिसि रो फरिसिको धरम मास्टरगेलाइ गनगन पातेङ इसुको चात्यागेलाइहेङ दोअ्हि, “नेलाइ हाइपालि तिरो ल्होपाकालाइ रो बो कुकरमि द्याङगेलाइ दोफा दोफाङ योम्तेङ चासुखेना?”#लुका १५:१-२ 31इसु एम्बालाइहेङ जावाफ पिहि, “बोइद्या ते मारोगाइकालाइहेङ माको, रोगाइकालाइहेङ खिनिङ गोइखे! 32एन्साङ पातेङ का धरम द्याङहेङ माको, धरमाति द्याङगेलाइको भाअ्सिङ ताताइको कुकरम मानितेङ परमेस्वरपाहा घुरिसु दोअ्तेङ काइलि लोका हिघा।”
म्हितुपा हिका बारेता हिअ्का
(मत्ति ९:१४-१७; मर्कुस २:१८-२२)
33हेथे द्याङगेलाइ इसुहेङ दोअ्हि, “युहन्नाको चात्यागेलाइ सादाइ भाइपाङ म्हितुपाङ हिखे रो पुकार पाखे। फरिसि द्याङगेलाइको चात्यागेलाइ बुङ एन्साङ पाखे। कालाउ नाङको चात्यागेलाइ चालिआम्लि खिनिङ पाखे।” 34इसु एम्बालाइहेङ दोअ्हि, “हाइ नेलाइ दारुवा हिपाधाउ बिहुको भात्यारता लोका काल्ह्यागेलाइहेङ म्हितुपाङ ताअ्लि दोस्वाना? 35कालाउ इन्सिका दिनागेलाइ बुङ ल्वावा, जेलाउ दारुवा नेलाइसो रिम्तेङ चुमप्वावा कालाउ खिनिङ म्हितुपाङ हिका पहर ल्वावा।”
36इसु एम्बालाइहेङ आरोङ भेनेङ तुलना बुङ पिहि, “हासुबुङ नावा धाबा थेअ्तेङ पुर्ना धाबाता मातालाइखे। कालाउ तालाइलाउ नावा धाबा बुङ बिगिर्खे। एन्साङ नावा चेन्थारा पुर्ना चेन्थारादोफा मामिलिखे।”
37“आरोङ हासु बुङ नोनो अङगुरको निघार पुर्ना धालेको जाबिता माताअ्तावा। एन्सा पातेङ ताअ्लाउ ते जाबि भोयावा रो गोताङ निघार बुङ होकावा। 38नोनो अङगुरको निघार नावा धालेको जाबिता खिनिङ ताअ्लि गोइखे। 39एन्साङ दोङ हासु बुङ पुर्हिका अङगुरको निघार आम्लि लाअ्तेङ नोनो अङगुरको निघार माआम्खे। हाइदोनु वा दोअ्खे, पुर्हिका निघार दोङ टाका हिखे।”
Currently Selected:
लुका 5: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
