लुका 6
6
इसु पुनित माइसाका दिनाको प्रभु
(मत्ति १२:१-८; मर्कुस २:२३-२८)
1इसु रो चात्यागेलाइ पुनित माइसाका दिना गहम बारि पाहासो हाने घाहि। वाको चात्यागेलाइ गहमको सिसा पेतेङ खुरता मोकोताइतेङ चालि तेङहि।#नियम २३:२४-२५ 2इदोइ तिङतेङ फरिसिगेलाइ चात्यागेलाइहेङ दोअ्हि, “पुनित माइसाका दिना नियम#६:२ नियम इदोइ नियम परमेस्वर मोसासो यहुदिगेलाइहेङ पिका हिघाहि।ता पालिमाएलाङ दोअ्का काम बुङ नेलाइ हाइपालि पासुखेना?” 3इसु एम्बालाइहेङ दोअ्हि, “दाउद राजा, वाको सानाइतिगेलाइ म्हितुपा हिलाउ वा हाइपाहि? हाइ नेलाइ धरम किताबता पर्हेका मान्थुसुन्हा? 4वा ते परमेस्वरको थानता दुल्तेङ परमेस्वरहेङ चार्हाइका तोले चाहि। केलाइको नियमता धामिगेलाइ बिना आरोङ हासु बुङ इङको तोले चालि माएल्घाहि। कालाउ राजा दाउद ताइमि खिनिङ माचासिङ बो द्याङगेलाइहेङ बुङ चालि पिहि।”#लेबि २४:९; १ समुएल २१:३-६ 5कालाउ इसु काथा दोपातेङ दोअ्हि, “का द्याङको चान ते पुनित माइसाका दिनाको बुङ प्रभु हिघा।”
इसु खुर सेङका द्याङहेङ एल्पाका
(मत्ति १२:९-१४; मर्कुस ३:१-६)
6आरोङ भेनेङ एलोङ पुनित माइसाका दिना इसु कचहरिसाअ्ता हानेतेङ बिद्या पिहि। इन्ता दाम्पाहा खुर सेङका द्याङ बुङ हिघाहि। 7धरम मास्टरगेलाइ रो फरिसिगेलाइ इसुहेङ फतुर लागाइलि भाअ्सिङ दामाखाङतेङ हिघाखे। एन्सा जेङलाउ एम्बालाइ इसु इङको द्याङको खुर पुनित माइसाका दिनाता एल्पा प्याङ बे दोअ्तेङ खाङदोङ घाखे। 8एम्बालाइको मनको काथा गेतेङ इसु खुर सेङका द्याङहेङ दोअ्हि, “ना ल्होतेङ इसो लोउ!” कालाउ इङको द्याङ ल्होतेङ इसुको आगाभारि हानिहि। 9कालाउ इसु एम्बालाइहेङ दोअ्हि, “एला दोअ्सु, केलाइको नियम पुनित माइसाका दिनाता हाइपालि रेम्का जेनाङ दोअ्खे? रेम्का पालि ना मारेम्का पालि? सिन्हुपालि दोअ्खे ना नासापालि?” 10कालाउ वा एम्बालाइ झाराङहेङ खाङतेङ इङको द्याङहेङ दोअ्हि, “नाङको खुर सोझापा!” वा एन्साङ पाहि रो वाको खुर उदोङघरि एल्हि।
11इदोइ तिङतेङ फरिसिगेलाइ चेर ताम्पातेङ इसुहेङ हाइपालि गोयाङ दोअ्तेङ ताताइमिता मतो पालि तेङहि।
इसु तेन्हे साल्तेङ दिङगिल्कालाइहेङ साल्का
(मत्ति १०:१-४; मर्कुस ३:१३-१९)
12एनि इसु आरदाङता हानेतेङ झेङपाङ परमेस्वरदोफा पुकार पाहि। 13र्हिमा जेङलाउ वा चात्यागेलाइहेङ काइहि रो एम्बालाइता तेन्हेमिहेङ साल्हि। कालाउ एम्बालाइहेङ साल्तेङ दिङगिल्का मिङ पिहि। 14एसापा तेन्हेमि साल्तेङ दिङगिल्कालाइ एबालाइ दोङ: सिमोन, जाइहेङ इसु पत्रुस मिङ बुङ ताअ्पिहि। सिमोनको ओने अन्द्रियास। याकुब, युहन्ना, फिलिप, बारथोलोमाइ, 15मत्ति, थोमा, अल्फयसको चान याकुब, मुलुकभक्त दोअ्का सिमोन। 16याकुबको चान यहुदा कालाउ यहुदा इस्करियोत जाइ न्हुअ्सो इसुहेङ धोका पितेङ रिम्पाहि।
इसु हेन्जाङ द्याङगेलाइहेङ एल्पाका
(मत्ति ४:२३-२५)
17इसु मुल चात्यागेलाइ दोसाङ आर्दाङसो खुअ्लाउ ओबालाइ एलोङ चाउरता थुकालिलोहि। इन्ता वाको हेन्जा चात्यागेलाइ रो बो द्याङगेलाइ जोम्तेङ हिघाहि। इन्ता यहुदिया माउजाको गोताङ थामेसो, यरुसलेम पुरसो कालाउ जाहादिको काम्बेता हिका टुरोस रो सिदोन पुरसो हेन्जाङ द्याङगेलाइ बुङ जोम्तेङ हिघाहि। 18एम्बालाइ इसुको बिद्या हिङलि रो रोगगेलाइसो एल्लि लोका हिघाखे। इन्ता मासान खोअ्तेङ तु: निन्चाका द्याङगेलाइ बुङ एल्हि। 19झाराङ द्याङगेलाइ वासेहेङ साइलि भोदोङघाहि। हाइदोनु वाकोसो ओल्हेका सरबङसो झाराङ एल्घाहि।
इसुको पिका आर्ति
(मत्ति ५:१-१२)
20इङकोन्हुअ्सो इसु ताइको चात्यागेलाइहेङ खाङतेङ दोअ्हि,
“जाइ हाइदोङ मान्थुकालाइ, नेलाइ हेथे आसिसित हिसुन्हा!
हाइदोनु सादेलको सारभि नेलाइकोङ।
21जाइ म्हितुकालाइ, नेलाइ हेथे आसिसित हिसुन्हा!
हाइदोनु नेलाइ घाइस्वाना।
जाइ खार्कालाइ, नेलाइ हेथे आसिसित हिसुन्हा!
हाइदोनु नेलाइ लेन्चास्वाना।”
22“का द्याङको चानर्हुता खान्धुर पानाङसिङ द्याङगेलाइ नेलाइहेङ हेला पानु, समाजसो ओल्हेपानु, फतुर लागाइनु रो लेदेरपानु ते नेलाइहेङ परमेस्वर आसिस प्यावा।#१ पत्रुस ४:१४ 23इङको पहर खुसिसो न्हातेङ लेन्चासु। हाइदोनु नेलाइको भाअ्सिङ सादेलता बारा इनाम ताअ्काहि। लाम्फाको आगाधुइकाहेङ बुङ नेलाइहेङ सान्ताइकाको पितापुर्खागेलाइ एन्साङ पातेङ सान्ताइ घाखे।”#२ इतिहास ३६:१६; साल्तेङ दिङगिल्का ७:५२
24“कालाउ धिकार, एला हिकालाइ!
हाइदोनु नेलाइ सुखको ज्यान निङसुहोइना।
25धिकार, एला घाइकालाइ!
हाइदोनु नेलाइ म्हितुपाङ हिस्वावा।
धिकार, एला लेका न्हाकालाइहेङ, हाइदोनु नेलाइ तु: निन्चास्वाना रो खारतेङ नाइतेङ पास्वाना।”
26“धिकार, एला द्याङको परसङसा निङकालाइ
हाइदोनु इसिका परसङसा ते द्याङगेलाइको पितापुर्खागेलाइ ढाटाइका आगाधुइकालाइहेङ बुङ पाका हिघाखे।”
सत्रुगेलाइहेङ बुङ माया पासु
(मत्ति ५:३८-४८; ७:१२)
27“कालाउ काङको बिद्या हिङका नेलाइहेङ का दोअ्ताङका, दुस्मनगेलाइहेङ माया पासु कालाउ ताइमिहेङ हेला पाकालाइहेङ रेम्फा पासु। 28नेलाइहेङ साराप पिकालाइहेङ सहसाम्पा पिसु। नेलाइहेङ हासुबुङ मारेम्का पानु वाको भालाइ ज्याको दोअ्तेङ पुकार पासु। 29हासुबुङ नासेहेङ एलोङ गाल्भुङता चाउरेनु भेनङ गाल्भुङ बुङ धोपि। नाङको कोट चुमपुलि भोकालाइहेङ लोखोन बुङ पिगिल। 30र्हेकालाइहेङ पि रो नाङको सामान चुमपुकालाइदोफा माघुरिपा। 31कालाउ नेलाइहेङ द्याङगेलाइ हिसिका बेभार पालि भोखे, नेलाइ बुङ एम्बालाइहेङ एन्साङ पासु।#मत्ति ७:१२
32“नेलाइहेङ माया पाकालाइहेङ खिनिङ माया पासुन्हा पानु, नेलाइ हाइ निङसुन्हा? हाइदोनु कुकरमिगेलाइ बुङ ताइमिहेङ माया पाकालाइहेङ एन्साङ पाखे। 33आरोङ भालाइ पाकालाइहेङ खिनिङ भालाइ पासुन्हा पानु, नेलाइ हाइ निङस्वाना? कुकरमिगेलाइ बुङ ते एन्साङ पाखे।
34“कालाउ तिरिलि दोअ्कालाइहेङ खिनिङ रिन पिसुन्हा पानु नेलाइहेङ हाइ लाभ जेङहि? तिरिलि दोअ्कालाइहेङ ते कुकरमिगेलाइ बुङ रिन प्यावा।
35“एन्सा माको, दुस्मनगेलाइहेङ माया पासु, झाराङहेङ भालाइ पासु रो रिन र्हेकालाइहेङ र्हुका आस मापासिङ रिन पिसु। एन्सा पासुन्हा पानु नेलाइ बारा इनाम निङस्वाना। कालाउ नेलाइ बाराका परमेस्वरको चान जेङस्वाना। हाइदोनु परमेस्वर ते बाइगुनि रो स्वार्थिहेङ बुङ दायाखे। 36परमेस्वर आबा जेसापा दायाका हि, नेलाइ बुङ एन्साङ दायाका जेङसु।”
बोमिहेङ फतुर मालागाइसु
(मत्ति ७:१-५)
37“बोमिहेङ निया मापासु रो नेलाइको बुङ निया मापान्हावा। बोमिको गल्ति माभोसु, परमेस्वर बुङ नेलाइको गल्ति माभोकावा। बोमिहेङ माफ पिसु कालाउ परमेस्वर बुङ नेलाइहेङ माफ प्यावा। 38बोमिहेङ पिसु कालाउ परमेस्वर बुङ नेलाइहेङ प्यावा। वा ते खान्दाइतेङ पोङघा पातेङ आरोङ हेन्जाङ प्यावा। नेलाइ जेदोङ नापहोइ बोमिहेङ पिस्वाना, इङकोङ झोको नेलाइ बुङ निङस्वाना।”
39इसु एम्बालाइहेङ तुलना पितेङ एसा दोअ्हि, “हाइ कान्हा कान्हाहेङ थोङगिल्लि द्वावा? थोङगिल्हि पानु इङको न्हेमिङ खाराता मावालातावा?#मत्ति १५:१४ 40हिदोइ बुङ चात्या ताइको मास्टरखान्तेङ बारा माज्यावा। कालाउ धिरलिदोकान्हुअ्सो खिनिङ वा मास्टरभाइपा ज्यावा।#मत्ति १०:२४-२५; युहन्ना १३:१६; १५:२०
41“बोमिको मिँको धुला तिङकालाइ ताइको मिँको धेङग्रा हाइपालि मातिङसुखेना? 42ताइको मिँको धेङग्रा मातिङकालाइ ताइको दादा ओनेहेङ हेसापा दोअ्लि दोस्वाना, ‘खोइ खोइ, नाङको मिँको धुला ओल्हेपाप्याङका।’ ओइ चिम्काटागेलाइ! लाम्फा ताइको मिँको धेङग्रा ओल्हेपा कालाउ खिनिङ बोमिको मिँको धुला ओल्हेपालि तिङस्वाना।”
सिङ रो फलपाको
(मत्ति ७:१६-२०; १२:३३-३५)
43“रेम्का सिङता मारेम्का फलपाको मासेखे, ना ते मारेम्का सिङता रेम्का फलपाको सेलि द्वावा। 44हिदोइ बुङ सिङ वाको फलपाको सोङ नाल्खे। हेअ्लाउ बुङ चुइको झालास्सो लिचि मापेखे। एन्साङ पातेङ चुइको सिङसो आङगुर मापेकावा।#मत्ति १२:३३ 45रेम्का द्याङ ताइको मनता हिका रेम्का भाकारसो रेम्काङ थोक ओल्हेपाखे। आसाति द्याङ ताइको मनता हिका मारेम्का भाकारसो मारेम्का थोक दोङ ओल्हेपाखे। हाइदोनु जेदोङ मनता हि, इङकोङ काथा द्याङगेलाइ दोअ्तावा।”#मत्ति १२:३४
न्हे खालको जग
(मत्ति ७:२४-२७)
46“काङको दोअ्का काथा मासाअ्सुन्हा पानु हाइपालि नेलाइ कासेहेङ प्रभु, दोअ्सुखेना? 47काङकोता लोतेङ काङको काथा हिङतेङ इङकोमाफिक पाका द्याङ हिसिका हिखे का नेलाइहेङ दोअ्ताङका 48वा एलोङ साअ् धाम्का द्याङ भाइपा जेङखे, जाइ वाङखारापा तोतेङ ताइको साअ्को जग उन्ठुइर्हुता बान्हाइहि। बारा वाइ लोतेङ बाने उलाउलापा लोलाउ बुङ इङको साअ् बोल्यापा धाम्नाङसिङ बाने वासेहेङ आलि मादोहि। 49कालाउ काङको काथा हिङतेङ मामानेकालाइ जग मालागाइसिङ साअ् धाम्का द्याङभाइपाङ जेनावा। बाने उलाउलापा लोलाउ वाको साअ् उन्धितेङ र्हाअ्न्हाहि।”
Currently Selected:
लुका 6: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
