लुका 3
3
चिभुअ्लि पिका युहन्नाको पारचार
(मत्ति ३:१-१२; मर्कुस १:१-८; युहन्ना १:१९-२८)
1रोमि माहाराजा तिबेरिअस सिजरको राज पाका तेना बाअ्सार जेङका हिघाहि। इङको पहरता पन्तियस पिलातस यहुदिया माउजाको रोमि बारा हाकिम हिघाखे। रोमि माहाराजाको बसता हेरोद गालिल माउजाता राज पाघाखे। वाको ओने फिलिप इतुरिया रो त्रोखोनितिस माउजाता राज पाघाखे। कालाउ अबिलेने माउजाता लुसानियास दोअ्का द्याङ राज पाघाखे। 2इङको पहरको मुल धामिगेलाइ हन्नास रो कैयाफा हिघाखे। इदोङ घरि उदादाङका थामेता जकरियाको चान युहन्नाता परमेस्वरको कथन लोहि। 3कालाउ युहन्ना यर्दन झोराको चारपाहाङको माउजाता हानितेङ द्याङगेलाइहेङ एसापा पारचार पालि तेङहि, “नेलाइ ताताइको कुकरम मानितेङ परमेस्वरपाहा घुरिसु रो चिभुअ्लि र्हुसु। कालाउ परमेस्वर नेलाइको पाका कुकरम माफ पाप्यावा।” 4एसापा यसैया आगाधुइकाको धरम किताबता युहन्नाको बारेता लेखेका इदोइ काथागेलाइ पुरा जेङलि लोहि:
हिङसु, उदादाङका थामेता एमि बारा गाला ओल्हेपातेङ एसा दोअ्दोङखे,
“प्रभु लोका दामा त्यार पासु, वाको तेगिल्का दामागेलाइ सोझापासु!
5गोताङ जोला जोलि पुराइलिगोयाङ, आरदाङ रो रागेलाइ सारिपालि गोयाङ,
घुराइका दामा सोझापालि गोयाङ रो मासुकाका दामा सुकाका बान्हाइलि गोयाङ
6कालाउ झाराङ द्याङगेलाइ परमेस्वरको पिगिल्का मुक्ति तिनावा।”#यसैया ४०:३-५
7हेन्जाङ द्याङगेलाइ युहन्नाकोता चिभुअ्लि र्हुलि लोहि। कालाउ युहन्ना एम्बालाइहेङ दोअ्हि, “ओइ बिसहिका पुय्हाँको चानगेलाइ! ‘परमेस्वर न्याय पालाउ केलाइ खाअ्लि निनाङ’ दोअ्तेङ नेलाइहेङ हासु धिरपाहि?#मत्ति १२:३४; २३:३३ 8नेलाइ जातिङको ताताइको कुकरम मानितेङ परमेस्वरपाहा घुरिसुन्हा पानु इङको भाइपाङ पासु। कालाउ ‘केलाइ आब्राहामको सान्तान’ दोअ्तेङसाङ नेलाइ खाअ्लि द्वाङका दोअ्तेङ फोमपासुखेना। का नेलाइहेङ दोअ्ताङका, परमेस्वर आब्राहामको सान्तानहेङ इदोइ उन्ठुइसो बुङ जेङपालि द्वावा।#युहन्ना ८:३३ 9सिङता दुफे धालन्हाहोइ। रेम्फा मासेका गोताङ सिङहेङ उन्धिपातेङ मेता थालावा।”#मत्ति ७:१९
10द्याङगेलाइ युहन्नाहेङ हिअ्हि, “एन्सा पानु केलाइ हाइपालि गोयाङ कुनु?” 11वा एम्बालाइहेङ दोअ्हि, “न्हेलोङ लोखोन हिकालाइ लोखोन मान्थुकालाइहेङ प्याको। एन्साङ पातेङ चाका हिकालाइ मान्थुकालाइहेङ प्याको।” 12पोत ल्होपाकालाइ बुङ चिभुअ्लि र्हुलि लोतेङ युहन्नाहेङ हिअ्हि, “मास्टर, केलाइ हाइपालि गोयाङ कुनु?”#लुका ७:२९ 13युहन्ना एम्बालाइहेङ दोअ्हि, “सारकारको तोकिका खान्तेङ हेङसा पोत माल्होपासु।” 14सिपालाइ बुङ हिअ्हि, “केलाइबुङ हाइपालि गोयाङ?” युहन्ना एम्बालाइहेङ दोअ्हि, “करकाप पातेङ, माजेङका फतुर लागाइतेङ हासुदोफा बुङ टाका मार्हुसु। भुरुङ ताइकोङ तानाखाता चित बुझिपासु।”
15द्याङगेलाइ मुक्तिपिका ख्रिस्टको दामाखाङतेङ हिघाखे। कालाउ एम्बालाइ ताइको मनमनताङ युहन्ना दोङ ख्रिस्ट हिघाहि बेअ्? दोअ्तेङ ठहर पादोङघाखे। 16एन्साजेङलाउ युहन्ना झाराङहेङ दोअ्हि, “का ते नेलाइहेङ चिहोइ चिभुअ्लि पिखा। कालाउ का खान्तेङ बारा सरबङहिका एमि लोदोङखे। का ते वाको जुता होअ्पिलि सोबाइका मान्थुघा। वा नेलाइहेङ पुनित हाङसा रो मेहोइ चिभुअ्लि प्यावा 17एला वा आनाज याअ्लि खुर्ता रा चुमहोइ। आनाज याअ्तेङ भाकारता ताअ्तावा, कुलाउ पितानागेलाइ हेअ्लाउ मासिका मेता दुकावा।”
18इसिका बो बुङ हेन्जाङ आर्तिगेलाइ पिकाताङ युहन्ना द्याङगेलाइहेङ रेम्काबानाल हिम्पाहि। 19राजा हेरोद ताइको ओनेको बेअ् हेरोदियासहेङ ताअ्काता युहन्ना वासेहेङ हाकाराइहि। कालाउ वाको बो हेन्जाङ कुकरमगेलाइ बुङ तिम्पिहि।#मत्ति १४:३-४; मर्कुस ६:१७-१८ 20एन्सा जेङलाउ हेरोद युहन्नाहेङ थुनाता थुनिहि रो एसापा वा बो बुङ बारा मारेम्का कामगेलाइ पाहि।
इसुबुङ चिभुअ्लि र्हुहि
(मत्ति ३:१३-१७; मर्कुस १:९-११; युहन्ना १:३२-३४)
21एनि झाराङ द्याङगेलाइ चिभुअ्लि र्हुतेङहिलाउ इसु बुङ इङकोङदिना चिभुअ्लि र्हुहि। वा पुकार पाकाताङ पालाउ सादेल हेन्हाहि। 22इङकोङ पहर पुनित हाङसा कुर्जा भाइपा जेङतेङ वाकोर्हुता खुअ्हि। कालाउ सादेलसो इसिका गाला लोहि, “ना काङको दायाका चान हिना, नाङकोदोफा का हेन्जाङ लेङचाका हिघा।”#सिरजाइ २२:२; ले २:७; यसैया ४२:१; मत्ति ३:१७; मर्कुस १:११; लुका ९:३५
इसुको पुर्खागेलाइ
(मत्ति १:१-१७)
23इसु ताइको सेवाको काम थाले लाउ वाको बोइसा एकुरिते बाअ्सार झोको जेङका हिघाहि। द्याङगेलाइ योसेफहेङ दोङ इसुको आबा दोअ्तेङ दोअ्घाहि। योसेफको आबा एलि हिघाखे, 24एलिको आबा मत्तात, मत्तातको आबा लेबि, लेबिको आबा मल्कि, मल्किको आबा यान्ना, यान्नाको आबा योसेफ, 25एसाङ पातेङ योसेफको आबा मत्ताथियास, मत्ताथियासको आबा आमोस, आमोसको आबा नहुम, नहुमको आबा इसलि, इसलिको आबा नग्गै, 26नग्गैको आबा माथ, माथको आबा मत्ताथियास, मत्ताथियासको आबा सेमैन, सेमैनको आबा योसेख कालाउ योसेखको आबा योदा हिघाखे। 27योदाको आबा योआनन, योआननको आबा रेसा, रेसाको आबा यरुबाबेल, यरुबाबेलको आबा सालतिएल, सालतिएलको आबा नेरि, 28नेरिको आबा मल्कि, मल्किको आबा अद्दि, अद्दिको आबा कोसाम, कोसामको आबा एलमादम, एलमादमको आबा एर, 29एरको आबा यहोसु, यहोसुको आबा एलिएजर, एलिएजरको आबा योरिम, योरिमको आबा मत्तात, मत्तातको आबा लेबि, 30लेबिको आबा सिमियोन, सिमियोनको आबा यहुदा, यहुदाको आबा योसेफ, योसेफको आबा योनान, योनानको आबा एल्याकिम हिघाखे।
31एल्याकिमको आबा मलेआ, मलेआको आबा मिन्ना, मिन्नाको आबा मत्ताथा, मत्ताथाको आबा नातान, नातानको आबा दाउद, 32दाउदको आबा यिसै, यिसैको आबा ओबेद, ओबेदको आबा बोअज, बोअजको आबा सल्मोन, सल्मोनको आबा नहोसन, 33नहोसनको आबा अम्मिनादाब, अम्मिनादाबको आबा आराम, आरामको आबा हेस्रोन, हेस्रोनको आबा फारेस, फारेसको आबा यहुदा हिघाखे। 34यहुदाको आबा याकुब, याकुबको आबा इसहाक, इसहाकको आबा आब्राहाम, आब्राहामको आबा तेरह, तेरहको आबा नाहोर, 35नाहोरको आबा सरुग, सरुगको आबा रउ, रउको आबा पेलेग, पेलेगको आबा एबेर, एबेरको आबा सेलह, 36सेलहको आबा केनान, केनानको आबा अर्पछद, अर्पछदको आबा सेम, सेमको आबा नोआ, नोआको आबा लेमेख, 37लेमेखको आबा मतुसेलह, मतुसेलहको आबा हनोक, हनोकको आबा येरेद, येरेदको आबा महलालेल, महलालेलको आबा केनान, 38केनानको आबा एनोस, एनोसको आबा सेत, सेतको आबा आदम हिघाखे। कालाउ आदमको आबा परमेस्वर हिघाखे।
Currently Selected:
लुका 3: DHIM
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
