SAN MATEO 10
10
Chunga ishcai yachacuccunata Jesús acllashcamanta
(Mr 3.13-19; Lc 6.12-16)
1Jesusca paipac chunga ishcai yachacuccunata c'ayashpaca, supaicunata llucchicllacunata, imapish ung:uicunata, nanaicunata alliyachicllacunatami ruhuarca.
2Jesusmanta huillachun acllashca chunga ishcaicunaca caicunami: Pedro nishca Simón, paipac huauqui Andrés, shinallatac Zebedeopac churicuna huauquindicpura Jacobopish, Juanpish carcami. 3Shinallatac Felipe, Bartolomé, Tomás, impuestota*f** japic Mateo, Alfeopac churi Jacobo, Tadeo nishca Lebeopish carcami. 4Simón Celote*f** nishcapish, shinallatac Judas Iscariotepish carcami. Paimi q'uipataca Jesustaca huañuchiccunaman japichirca.
Chunga ishcai yachacuccunata huillagrichun Jesús cachashcamanta
(Mr 6.7-13; Lc 9.1-6)
5Chai chunga ishcaicunatami Jesusca cashna nishpa cacharca:
—Mana israelcunapacmanca*f** ama ringuichicchu. Shinallatac Samaria llactapi tiyac pueblocunamanpish, ama yaicunguichicchu. 6Ashtahuancarin chingarishca ovejacuna shina cac, israelcunapacman*f** ringuichic. 7Cancuna rishpaca: ‘Jahua pacha Taita Diosca ñami mandagrin’ nishpa huillanguichic. 8Shinallatac lepra*f** ung:uihuan caccunatapish, ima ung:uihuan caccunatapish alliyachinguichic, huañushcacunatapish causachinguichic, supaicunatapish llucchishpa cachanguichic. Chashna ruhuaclla cangapacca, ñucamantami yanga japishcanguichic. Chaimantami cancunapish yanga ruhuana canguichic.
9Cancuna rishpaca, imata randingapacca curitapish, cullquitapish, cobretapish ama apanguichicchu. 10Shinallatac cucayu muchilatapish, yanandic churanatapish, ushutatapish, tauna caspitapish ama apanguichicchu. Maipipish imata ruhuacca, japinata charinmi.
11Cancuna mai pueblopi, mai llactapi yaicushpaca, maijanpish cushilla chasquic runata mashcashpa, chai huasipi maiman ringacaman chaipi canguichiclla. 12Chai huasipi chayashpaca: ‘Cai huasipica, Taita Dios sumac causaita cuchun’ nishpa yaicunguichic. 13Chai huasiyuc cancunata alli chasquicpica, cancuna nishcaca mana yangachu canga. Mana chasquicpica, cancuna nishcaca yangallami canga. 14Mai pueblopi cashpa, mai huasipi cashpa cancunata mana chasquishpa, cancuna huillashcata mana uyashun nicpica, chaimanta llucshishpa, cancunapac chaquipi c'atirishca allpatapish chaillapitac chaspishpa ringuichic. 15Sodoma pueblopi shinallatac Gomorra pueblopi causac millai gentecuna ima shinami llaqui tucurca, chaitapish yallimi chai pueblopi causaccunataca, Taita Dios taripana punzhapica llaquichishca canga. Chaica chashnatacmi canga.
“Cancunataca p'iñangacunami” nishcamanta
16Riquichic, ñucaca cancunataca ovejacunata atuccunapac chaupita cachac shinami cachani. Chaimanta cancunaca culebra shina yuyaisapacuna caichic, shinallatac paloma shina c'uyaillacuna caichic. 17Cancunataca, llactata mandaccunamanpish japichingacunami. Paicunaca tandanacuna huasicunaman apashpapish macangacunami. Chaimanta alli yuyaihuan puringuichic. 18Ñucata c'aticushcamantami, cancunataca llactata mandaccunapacmanpish, jatun mandaccunapacmanpish apangacuna. Shina cacpimi paicunamanpish, shuctac mana israelcunamanpish*f** ñucamanta huillanguichic. 19Chashna mandaccunaman japichicpica: ‘¿Imatatac nishun?’ nishpa, ama chai yuyailla canguichicchu. Cancuna rimai callaricpica, Taita Dios imata rimana yuyaita cucpica rimanguichicllami. 20Chaica, mana cancunapac yuyaimantachu rimanguichic, ashtahuanpish cancunapac Taita Dios cushca paipac Espiritumi, cancunamanca rimana yuyaita cunga.
21Huauquica quiquin huauquillatatac, taitaca quiquin huahuacunallatatac huañuchichunmi japichinga. Shinallatac huahuacunapish taita mamata p'iñashpami, huañuchichun japichingacuna. 22Cancuna ñucata c'aticushcamantaca, tucui gentecunami p'iñangacuna. Shina cacpipish tucuringacaman llaquicunata apaccunami quishpiringa. 23Maijan pueblopi cancunata llaquichicpica, caishuc puebloman ringuichic. Cancuna Israel*f** llactapi manarac tucuiman huillashpa puricpimi, Runa Tucungapac shamushca*f** ñucaca cutimusha. Chaica chashnatacmi canga.
24Maijan yachacucpish, yachachicta mana yalli ashtahuan yachanchu. Servicpish, amota yalli alli nishcaca mana canchu. 25Yachacuc ña yachachic shina tucushpaca, cushillami canman. Shinallatac shuc servicpish amo shina tucushpaca, cushillami canman. Huasipi taita shina pushac ñucatapish, ‘supaicunata mandac Beelzebumi*f** cangui’ nicushpaca, chai huasipi causac huahua shina cac cancunatacarin, ¡imatachari ningacuna!
Taita Diosta manchana cashcamanta
(Lc 12.2-7)
26Gentecuna llaquichigricushcata yachashpapish, mana manchanachu canguichic. Ima pacalla ruhuashcapish, mana pacalla saquiringachu. Imata pacalla ruhuashcapish, tucuimi ricuringa. 27Ñuca cancunaman amsapi nishcataca, achic punzhapimi huillanguichic. Shinallatac pacallapi huillashcataca, pata jahuaman huichicushpa caparishpami huillanguichic. 28Cuerpota huañuchiccunataca mana manchanachu canguichic. Cuerpota huañuchishpapish, cancunapac almataca mana huañuchi pudingacunachu. Ashtahuancarin almatapish, cuerpotapish ucu pachaman cachac Taita Diostami manchana canguichic.
29Ishcai zhutacunataca, ashalla valic shuc cullquipimi c'atuncuna. Shina cacpipish cancunapac Taita mana munacpica, shucllapish pambamanca mana urmanchu. 30Cancunapac umapi mashna accha tiyashcapish yupashcami can. 31Chashna cashcamanta gentecunataca mana manchanachu canguichic. Cancunacarin, achca zhutacunatapish yalli valicmari canguichic.
Jesusmanta huillanata mana pingana cashcamanta
(Lc 12.8-9)
32Maijanpish gentecunaman ñucata c'aticushcata huillacpica, ñucapish jahua pachapi cac ñuca Taitapac ñaupapica: ‘Paimi ñucata c'atic’ nishami. 33Maijanpish gentecunaman ‘mana c'aticchu cani’ nicpica, ñucapish jahua pachapi cac ñuca Taitapac ñaupapica: ‘Paica mana ñucata c'aticchu’ nishami.
“Ñucata c'aticpica p'iñangacunami” nishcamanta
(Lc 12.51-53; 14.26-27)
34Ñucataca ‘sumac causaita cungapacmi, cai pachamanca shamushca’ nishpaca, ama yuyanguichicchu. Ñucaca mana sumac causaita cungapacchu shamurcani, ashtahuanpish p'iñanacui tiyachunmi shamurcani. 35Churica taitata, huarmi huahuaca mamata, nueraca suedrata p'iñachunmi ñucaca shamurcani. 36Shina p'iñaccunaca huasi ucullamantatacmi canga.
37Maijanpish paipac taita mamata ñucata yalli c'uyacca, mana ñucapacchu canga. Shinallatac maijanpish paipac huahuacunata ñucata yalli c'uyacca, mana ñucapacchu canga. 38Maijanpish cruzpi chacatashca huañuna shina llaquita apana cashpapish ñucata mana c'atishpaca, mana ñucapacchu canga. 39Maijanpish quiquin causaita llaquicca chingaringami, ashtahuanpish ñucata c'aticushcamanta quiquin causaita mana llaquicca quishpiringami.
Imata japina cashcamanta
(Mr 9.41)
40Maijanpish cancunata chasquicca, ñucatami chasquin. Shinallatac ñucata chasquicca, ñucata cachac Taita Diostami chasquin. 41Taita Diosmanta huillac runa cacpi, chai huillacta chasquicca, Taita Diosmanta huillac runa chasquina cashcallatatacmi, chai chasquic runapish chasquinga. Cashcata ruhuac runa cacpi, chai cashcata ruhuacta chasquicca, cashcata ruhuac runa chasquina cashcallatatacmi, chai chasquic runapish chasquinga. 42Shinallatac ñucata c'atic cashcamanta, cai yangalla shinacunaman asha chiri yacullatapish cucmanca, Taita Diosca pai japina cashcata cungami. Chaica chashnatacmi canga— nirca.
Markert nå:
SAN MATEO 10: QXR96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Quichua Cañar Nuevo Testamento © United Bible Societies in Ecuador, 1996.
