Málɩ́kɩ 6
6
Zozíi ɔ bhílie nɩ́ ɔ́ mányɩ
(Matíe 13.53‑58; Lúkɩ 4.16‑30)
1Zozíi wlʋ́ bhʋ́anɩ dúó a mnɩ́ a, ɔ́ɔ yi ɔ bhlé a dúó a mnɩ́ lé ɔ́ kʋjɩ̀nyʋ̀àà jɩ́ sáà mɔ́ kʋ́. 2Zúfʋnyʋa a nyɔbhleyruó ŋnɩ lé ɔ́ mʋ́ zúfʋcɛcɩwlʋɔ́ a mnɩ́ a, ɔ́ bháa ʋ́ nyʋa a Lagɔ̀wɔ̀lɩ̀ɛ̀ a cɩ́alɛ kʋ́. Mà nyʋaá fɩ́ɛ́ à pʋ ɔ́ nyúkwlí a, neé mna a, á anɩ́: «Bhè dɛ́gbá ɔ́ bhá wɔlɩ́ɛ́ fɩ́ɛ́ lɩ̀à à? Ɔ̀ nyɛ́ ɔ́ bhʋ́anɩ fíkeé yà bhʋ́anɩ pɔ́waá sɔ́ lé ɔ́ nie bhʋ́anɩ lɛ̀wɔ̀lɩ̀ɛ̀ à? 3Malíi a yuwliyʋɔ́ ɔ́mɔ́ ɔ̀ nɩ́ dɛ́ kʋʋ? Ɔ́mɔ́ ɔ̀ nɩ́ nɩ lɛ́ kámʋlɛɛ́? Ɔ nɩ́ayúó nɩ́ Zákɩ, Zozée, Zúdʋ yà Simɔ́ɔ sɔ́ ŋwɔ́ɔ? Lé ɔ nɩ́ayúó ŋnɩkeyuo nɩ́ lɛ́ dɛ́ àmɔ̀ nyièdɩ kʋ ʋ?» Cémʋ́ á yìò a, á pá ɔ́ wɔlɩ́ɛ́ sɩsa kʋ́. 4Bhʋ́ Zozíi srʋ á mà: «Dááfɩ́ɛ́ Lagɔ a nékʋ́cinyɔ plɩ́ɩlɛ a, ɔ bhlé mʋ á bhʋ́alɔɔ́, ɔ lɔ́lɔ́kpa, lé ɔ gbó a nyʋa nɩ́ mányɩ ɔ́ wɔlɩ́.» 5Ɩ̀lɩa á lɔ̀fɩ́ɛ́ kà ŋnɩ́ a zà, Zozíi nɩ́ ka míi lé ɔ ká dɛ́ lɛ̀wɔ̀lɩ̀pɩʋ nɩ. Gupuonyʋa á zùò, ámá ɔ́ gbɛ glɔ̀gbɩ́ jɩ̀ lé ɔ́ bhibhie lé à yalɩmà. 6Mà ɔ bhílie a nyúkwlí tɛmɛɛ́ mnɔɔ́ neé.
Zozíi cíe ɔ́ kʋjɩ̀nyʋ̀àà a kʋ́gbá sɔ́
(Matíe 10.5‑15; Lúkɩ 9.1‑6)
Mà Zozíi bhlie dɩ́é fɩ́ɛ́ ɩ̀ mɛ́ ɔ bhlé a dúó gɔ̀ a, lé ɔ́ cɩ́alɛ mɔ̀ɔmɔ̀ nyʋa. 7Ɔ́ wle ɔ́ kʋjɩ̀nyʋ̀àà kʋ́gbá sɔ́ɔ́ lé ɔ́ cíe a sɔ́ sɔ́. Ɔ́ nyɛ́ á pɔ́wa mà a jɩ́ɩ nyumozìzi. 8Tányɩɛ́ mʋ́ á na ká mʋ a, ɔ́ srʋ á mà: «A nɩ mʋ a, a ná fa lɛ́, mʋ́namnɩzìzie a múó coco a nɩ fa, a ná fa lelilɩ, a ná fa bódu, a ná ŋwʋ́ sáà moníi a pɔ́kɩ̀tɩ a mnɩ́! 9A pla síi, lé a pla kótu a múó coco mʋ́, a ná fa yígàdà kòtu.» 10Ɔ́ anɩ́: «A nɩ mʋ a, dɛ́ɛ́ á na ká amɔ kʋplada bhá a, bhʋ́ a na ká kʋ àààn lé a ká dú a mnɩ́ wlʋ́. 11Ɩ́zà a nɩ ŋnɩ dá a, lé bhʋ́ a nyʋa nɩ nɩ́ amɔ kʋplada bhá a, lé a nɩ cí sáà mà a nɩ́ ka amɔ nyúkwlí pʋ a, a nɩ cí mànɩ́ a ká mʋ a, a gbɔ́dɔ̀ ʋ́ a kplií zɔ̀ dʋ̀dʋ! A nɩ nɩ saá, bhʋ́ á yi saá yɩbhlɩ mà á ya nyumosa nɩ.» 12Zozíi a kʋjɩ̀nyʋ̀àà wlʋ́ ʋ́ lé á mʋ Lagɔ̀wɔ̀lɩ̀ɛ̀ cí ka, á srʋɛ nyʋa mà a cɩ́cɩ á nɩnɩgbɩ. 13Á jɩ́ɩ nyumozìzi kɔ́kɔ́mnɩ́ lé á ŋwʋ́ sáà gupuonyʋa kɔ́kɔ́mnɩ́ kpʋ́ wlú lé á yalɩmà.
Lóo Elódʋ nú Zozíi a wɔlɩ́
(Matíe 14.1‑12; Lúkɩ 9.7‑9)
14Zozíi a ŋnɩ́ mnɛ la kpanyɩ, lóo Elódʋ nú ɔ wɔlɩ́. Nyʋa àna nie: «Zán Batísɩ galɔ̀, ɩ́zà ɔ́ nie lɛ̀wɔ̀lɩ kɔ́kɔ́mnɩ́.» 15Àna nie: «Lagɔ a nékʋ́cinyɔ Elíi kʋ̀ʋ̀.» Àna anɩ́: «Lagɔ a nékʋ́cinyɔ ànɔ kʋ̀ʋ.» 16Tányɩɛ́ mʋ́ lóo Elódʋ nú wɔlɩ́ɛ́ fɩ́ɛ́ á cíe a, bhʋ́ ɔ́ anɩ́: «Záan Batísɩɛ́ ɩ́ di lɛ́ wlú kʋ́ a, ɔ́mɔ́ ɔ̀ yrɩ́bhà lé ɔ̀ galɔ̀.»
Á bhlá Zán Batísɩ
17Cémʋ́ ɩ́ kʋ a, lóo Elódʋ, ɔ nɩ́ayʋ́ Filípʋ a ŋwnɔ́ɔ́ ɔ́ bhɔ́ɔ́ wá gɔ̀ a, ɩ́mɩ́ ka ŋnɩ́ lé á bhli Zán Batísɩ kʋ́ lé á ŋwʋ́ ɔ́ kpàklɩ́ lé á ŋwʋ́ ɔ́ jɩ̀ɩ. Ŋwnɔ́ɔ́ ɔ́mɔ́ ŋwɔ́ɔ wá Elodíádɩ. 18Záan srʋ lóo Elódʋ mà: «Cémʋ́ ɩ̀ nɩ a, ɩ nɩ́ náà.» 19Tányɩɛ́ mʋ́ ɔ ŋwnɔ́ Elodíádɩ nú wɔlɩ́ a, bháʋ́ jɩ̀ a ɔ́ gblɩ̀ yɩ́ la Záan mʋ́. Ɩ́ ka ŋnɩ́ a ɔ́ yrá yɩ́ la lé a bhlɔ́ɔ́, mà ɔ nɩ́ yɛ́ la bhʋ́anɩ cásɩɛ́. 20Cémʋ́ Záan ŋwɔ́ɔ nyɔɔ́ kɔ̀ɔ̀ nɩnɩgbɩ náa wá a, lé ɔ̀ kplɔ Lagɔ drɩ̀ a, Elódʋ gúloó, lé ɔ́ zízio la sáà kʋ́. Záan srʋ ɔ́ wá a, ɩ́ kʋ ɔ́ la duo kʋ́, mà ɩ́ kʋ sɩ́tɛ̀ bhè ɔ́ wà la kɔ́ɔ̀kɔ́ ɔ nyúkwlí pʋpʋ́ɛ́.
21Elódʋ a vavayruó kʋ́ a lúbhoé a tányɩɛ́, bhʋ́ a yruó kʋ́ Elodíádɩ yɛ́ cásɩ lé ɔ ká Záan bhlá. Bhʋ́ a yruó kʋ́ɔ́ Elódʋ wle ɔ́ gɔ̀mnànyʋ̀àà lé ɔ sʋ́ja kámanyʋaá lé Galilée bhlɩɛ́ a mnɩ́ a nyɩ́kpɔkádàà, ɔ yàsɔ́ ká kʋ́ li. 22Elodíádɩ a ŋnɩ́keyʋɔ́ pla jrè a mnɩ́ lé ɔ yɛ a, lʋ́ɔ́ ɔ́ yɛ a, ʋ́ ka lóo Elódʋ yà nyʋaá ɔ yàsɔ́ lie a lɔlɔ kʋ́. Bhʋ́ ɔ́ srʋ ŋnɩ́keyʋɔ́ mà: «Lɛ́ɛ́ ɩ̀ yrá á zɛlɛɛ́ ŋnɩ́, mà ɩ́ yi mɔ̀ mɛ́ nyɛ́!» 23Ɔ́ ká ɔ cɩ́cása ka a, ɔ́ anɩ́: «Ɩ́ sɔ́lɩ, lɛ́ɛ́ nà kà mɔ́ɔ mʋ́ yráa, ɩ́ yi mɔ̀ mɛ́ nyɛ́. Ɩ́ nɩ ŋwɔ́ɔ mà, ɩ mími ná léyibhlɩɛ́ mʋ́, ɩ díilɩɩ́ mʋ́ lé ká mɔ̀ nyɛ́ a, ɩ́ yií nɩ.» 24Ɔ́ cí saá a, ŋnɩ́keyʋɔ́ flʋ zɔ̀ lé ɔ́ yrá ɔ nɛ́ mà: «Máà, lɛ́gbá ɩ̀ yrá lé nɩ yráa lóoó mʋ́ à?» Ɔ nɛ́ anɩ́: «Ɔ nyɛ́ mɔ̀ Zán Batísɩ a wlú.»
25Lé ŋnɩ́keyʋɔ́ fa sóo, lé ɔ yi lóo drɩ̀ lé ɔ́ srʋ ɔ́, ɔ́ anɩ́: «Ɩ́ yrá lé nyɛ́ mɔ́ɔ Zán Batísɩ a wlú. A ŋwʋ́ ʋ́ kakamnɩ́lɛ́ bíipá a mnɩ́ lé a la mɔ́ɔ mʋ́!» 26Lóoó nú wɔlɩ́ɛ́ yʋ́ɔ́ cí a, ɩ́ wɔtɔmalɔɔ́ kpɩkpɩ gɔ̀. Mà cémʋ́ ɔ́ ya la nyʋaá fɩ́ɛ́ a klʋ́ jɩ̀ sɔ́lɩ a, ɔ nɩ́ ka yɩ́ míi lé ɔ ka cí mànɩ́ ɔ nɩ́ kɩɩ́ nɩ. 27Ɔ kʋ dáamúó lé ɔ́ cíe ɔ sʋ́jàà nyièdɩ a sʋ́jàyʋ mà ɔ mʋ lé ɔ dí Zán Batísɩ wlú kʋ́ lé ɔ lʋʋ́. Lé sʋ́jàyʋ̀ɔ̀ mʋ jɩ̀ŋwʋ̀wlʋ̀ɔ̀ a mnɩ́ lé ɔ́ dì Záan wlú kʋ́. 28Ɔ́ ŋwʋ́ ɔ wlúó bíipá a mnɩ́ lé ɔ́ lʋʋ́ lé nyʋ́ʋ́ ŋnɩ́keyʋɔ́, lé ŋnɩ́keyʋɔ́ nyɛ́ wlúó ɔ nɛ́. 29Mà tányɩɛ́ mʋ́ Zán Batísɩ a kʋjɩ̀nyʋ̀àà nú ɔ kwíɛ́ a wɔlɩ́ a, á yi lé á bháʋ́ ɔ́ gàzɛ̀ɛ̀ lé á zizìè.
Zozíi nyɛ́ nyʋa kɔ́kɔ́mnɩ́ lelilɩ
(Matíe 14.13‑21; Lúkɩ 9.10‑17; Záan 6.1‑14)
30Zozíi a cíecíenyʋaá mʋ la a, tányɩɛ́ mʋ́ á yrɩ́bha lé á yió gɔ̀ a, nɔnʋɔ́ á zrɩɩ lé cɩ́acʋ́ɔ́ fɩ́ɛ́ á cɩ́a a, á salɔɔ́ dí. 31Mà nyʋaá à dídilo bɩ́ a, á zumoleé ka ŋnɩ́ lé ɔ yà ɔ́ kʋjɩ̀nyʋ̀àà sɔ́ nɩ́ yɛ́ cásɩ lé a ká li. Bhʋ́ ɔ́ srʋ á mà: «A yi à wlʋ́ʋ dɛ́ gwá bhè à mʋ dɛɛ́ nyʋa nɩ́ kpanyɩ kʋ a, bhè a ka tòyipɛ nyɔɔ́bhleè!»
32Lé á pla gɔ́lʋ́ lé á mʋ dɛ́ɛ̀ bɩglɩ a. 33Mà á kʋ mʋʋ̀da lé nyʋaá yɛ́ a lé á ŋwʋ́ dɛ́ɛ́ a mnɛ a yɩ́gɔ̀. Ɩ́ ka ŋnɩ́ lé nyʋa wlʋ́ dí a mnɩ́ lé á fa sóo lé á plɩ́ɩlaá yɩ́kʋ́, ámá tɛ̀tɛ̀ ŋnɩ dɛɛ́ Zozíi yà ɔ́ kʋjɩ̀nyʋ̀àà sɔ́ mnɛ laa.
34Ɔ́ kwlíi kɔ́ɔ̀kʋ́ lé ɔ́ dʋdʋ̀ a, nyʋa yíe ʋ́. Ɔ́ yɛ́ a, á ŋazɩ kɔ́sɔlɔɔ́ duo a mnɩ́. Nɩ̀ yɛ́ a, nànɩ́ cémʋ́ bhlábhlɩ́ nɩ́ lɛ́ kʋjɩ̀nyɔ ka a. Lé ɔ́ bháa ʋ́ a wɔlɩ́ kɔ́kɔ́mnɩ́ a cɩ́alɛ kʋ́.
35Yrʋ́ ya la kpanyɩ mʋ, bhʋ́ Zozíi a kʋjɩ̀nyʋ̀àà yi lé á srʋ ɔ́ mà: «Másɛɛ̀, yrʋ́ ya mʋ lé dɛ́ wlʋ́ kpanyɩ dú gwá. 36Naa, nɩ lé nyʋaá ká dɛ́ gbanyɩkʋ́ a díé a mnɩ́ lé bìdíé kʋ́ sɔ́ mʋ bhè a ká a lelilɩ kla!» 37Zozíi anɩ́: «Amɔ mɔ̀glʋ̀, a nyɛ́ á lelilɩ a ká li!» Ɔ́ cí saá, bhʋ́ á yrɔ́ɔ́ mà: «dɛ́ gbá à yi bhʋ́anɩ moníi gàdùò bhá lé a yi bhʋ́anɩ flɔ́ɔ kla lé à yi a nyɛ́ lé á yi li a?» 38Lé ɔ́ srʋ á mà: «A mʋ lé a dʋdʋ̀, flɔ́ɔbhi zùò a ka la áa?» Á mʋ lé á dʋdʋ̀ flɔ́ɔ lé á yi, á anɩ́: «À kà flɔ́ɔbhi a gbɩ́ lé zrìyuolɩ a sɔ́.»
39Lé ɔ́ srʋ á mà, a nɩ wɔlɩ́ɛ́ fɩ́ɛ́ lé nyʋaá ká pitíé jɩ̀ bɔ́bɔ̀ kpɩ́ kpɩ́ kpɩ́. 40Lé á nɩ lé nyʋaá bɔ́bɔ̀ sá. Kpɩ́ kpɩ́ kpá nie nyʋa a gwlɩ̀ gbɩ́, àna nie nyʋa a gwlɩ̀ sɔ́ lé kʋ́gbá. 41Lé Zozíi bhá flɔ́ɔbhie gbɩ́ɛ́ lé zrìyuo sɔ́ɔ́ kʋ́ lé ɔ́ dʋdʋ̀ lagɔɔ́ lé ɔ́ pɩ́ɩ́ nyú. Ɔ́ díi flɔ́ɔ mʋ́ lé ɔ́ nyɛ́ ɔ́ kʋjɩ̀nyʋ̀àà lé ɔ́ srʋ á mà a bhábhalʋʋ́ nyʋaá. Ɔ́ bhá sáà zrìyuo sɔ́ɔ́ lé ɔ́ bhábha nyʋa a lɔ̀fɩ́ɛ́. 42Nyʋaá a lɔ̀fɩ́ɛ́ li lé ɔ́ lʋ lé lelilɩ ji kʋ́. 43Flɔ́ɔ ʋ̀ ji kʋ́ lé á fa a, ʋ nie pápɩ́ a kʋ́gbá sɔ́ ʋ yà zrìè sɔ́. 44Nyʋaá à li lelilɩɛ́ a, á bhlii nyʋaá a dí sɔ́ lé gwlɩ̀ kʋ́gbá.
Zozíi námnɩ jié klʋ́
(Matíe 14.22‑33; Záan 6.15‑21)
45Á bhɩa kɔ́ɔ̀kʋ́ lilíé zɔ̀ a, Zozíi srʋ ɔ́ kʋjɩ̀nyʋ̀àà mà á bhá gɔ́lʋ́ lé a plɩ́ bhlà jié a pɩ́ʋ́ ànɔ, Besayidáa a pɩ́ʋ́ a mnɩ́, bhè ɔ ká nyʋaá srʋ á ká a kʋda mʋ. 46Ɔ́ nɩ lé nyʋaá fɩ́ɛ́ mʋ a, ɔ́ mʋ kíké wlú bhibhie ka. 47Mánʋma cúcú ya yɩ́ pla bhè ɔ́ kʋjɩ̀nyʋ̀àà a gɔ́lʋ́ɔ́ kʋ àyɩ jinyɩdɩ, bhè ɔ́ a múó ɔ́ tuo dʋ̀dʋ kʋ́. 48Mà ɔ́ yɛ́ a, lé ɔ́ yɩbhlɩ saá mà jié klʋ́, vʋ̀vɔ̀lʋ̀ɔ̀ nɩ́ nyɛ́ á cásɩ lé a ká lú a, zizìèdɩ̀tànyɩ̀ɛ̀, ɔ́ námnɩ jié klʋ́ lé ɔ́ nyaka á né kʋ́ dì sa. 49Mà á yɛ́ ɔ́ lé ɔ́ námnɩlɛ jié klʋ́ a, á dùòkʋ́ mà gagakʋ yie a, á sa yrè. 50Di wlʋ́ a mnɩ́, mà ɔ́ srʋ á mà: «Ŋanɩmɛ ná bhlá amɔ! A ŋwʋ́ mɔ̀ɔ di mà mɔ́ɔ kʋ̀!» 51Ɔ́ cí sɩ́tɛ̀ a, ɔ́ɔ pla gɔ́lʋ́ɔ́ a mnɩ́, vʋ̀vɔ̀lʋ̀ɔ̀ ʋ̀ yie la a, ʋ́ dúò, á lɔ̀fɩ́ɛ́ neé mnaá. 52Lé a nyúkwlí tɛmɛ a zà, a nɩ́ sáà flɔ́ɔ a zumòlè a lɛ̀ a mnɩ́ nú.
Zozíi yalɩma gupuonyʋa kɔ́kɔ́mnɩ́
(Matíe 14.34‑36)
53Mà tányɩɛ́ mʋ́ Zozíi ya ɔ́ kʋjɩ̀nyʋ̀àà sɔ́ dí lé á ŋnɩ Zenezalétɩ lé á pɛ́ a, 54á wlʋ́ kɔ́ɔ̀kʋ́ gɔ́lʋ́ a mnɩ́ a, nyʋa yɩbhlɩ Zozíi. 55Ɩ́ ka ŋnɩ́ a, á mʋ bhlɩ́ɛ́ a dááfɩ́ɛ́ a mnɩ́ lé á la mɔ̀ɔ a gupuonyʋa. Á gbɩdɩ̀ a gbàpɩ́ jɩ̀ lé á laa dɛ́ Zozíi kʋ a. 56Dááfɩ́ɛ́ ɔ́ mʋ a, ɛ́ yi dú kádʋ ŋwɔ́ɔ ò, ɛ̀ yi dutòyilɛ ŋwɔ́ɔ ò, ɛ̀ yi bìdé kʋ́ ŋwɔ́ɔ ò, nyʋa la gupuonyʋa, lé á ŋwʋ́ á crɩ́kpa a mnɩ́. Á bhibhio mà ɔ̀ nɩ lé ɔ́ bàna a nimnuó a pʋpʋ́ɔ́, a kʋ́ ʋ́ gbɔ́. Lé gupuonyʋa fɩ́ɛ́ à gbʋ́ʋ́ a, á yalɩma.
Markert nå:
Málɩ́kɩ 6: NEY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
