Málɩ́kɩ 7
7
Lagɔ a Jràmáá ka gbʋ́ lé a zi a tinyʋa a jràmáá kʋ́
(Matíe 15.1‑9)
1Falizɩ́ɛnyʋaá lé lɔ̀ a másɛnyʋa a zùò wlʋ́ Zelízalɛ́mʋ, lé á yi lé á ŋnɩlɔ̀ Zozíi gɔ̀ wlú. 2Á núnuù, ɩ́mɩ́ ŋwɔ́ɔ mà Zozíi a kʋjɩ̀nyʋ̀àà, àna nɩ́ wɔlɔ wlɩ lé á lie cémʋ́ Zúfʋnyʋa a gba nɩ́ yrá lé a nɩ a, ɩ́mɩ́ á nie. 3Bhè Falizɩ́ɛnyʋa lé Zúfʋnyʋa a lɔ̀fɩ́ɛ́ sɔ́ nɩ cí mànɩ́ a ká li a, á wɔlɔ fɩ́ɛ́ námasa wlɩ lé á lie, ɩ́mɩ́ ŋwʋ́ɛ́ a tinyʋa a gbaá kpá. 4A nɩ wlʋ́ sáà mágɩ̀tɩ kʋ́ a, á wɔlɔ fɩ́ɛ́ wlɩ lé á lie. Wɔlɩdrì ànɩ kɔ́kɔ́mnɩ́ kʋ sáà ʋ́ lé á nií. Á ka cémʋ́ á wɔlɔ a kɔ́pɩ, a bíi lé a nyidi sɔ́ a mnɩ́ a.
5Lé Falizɩ́ɛnyʋaá yà lɔ̀ a másɛnyʋaá sɔ́ yrá Zozíi mà: «Ɛ̀kʋ̀ʋ̀ lé nà kʋjɩ̀nyʋ̀àà nɩ́ ŋwʋ́ lɛ́ à tinyʋa a gbaá kpá a, lé a nɩ cí mànɩ́ á ká li a, á nɩ́ wɔlɔ wlɩ a?» 6Lé Zozíi srʋ á mà: «Ɩ̀ wlʋ́ɛ́ lɛ́ amɔ neé a, ɩ́mɩ́ nɩ́ a di a mnɩ́ kʋ! Lagɔ a nékʋ́cinyɔ Ezayíi a wɔlɩ mɛ́ wá lé ɔ́ cíé wá amɔ a zà mà Lagɔ anɩ́:
Lɔ́lɔ́kpaá lɩ̀à neé mʋ́ á bʋbɔlɔɔ́,
Mà á di wlʋ́ lɔɔ́ gwá.
7 Flɛ́flɛ̀sa á yie lɛ́ bʋbɔ̀ kà,
Mà a cɩ́a cɩ́a wɔlɩɛ́ nɩ́ gba ka.
Zɩkpa zɔ̀ a nyʋa a jràmáá ámá á cɩ́alɛ. # 7.6‑7 A zɛlɩɩ sáà Eza 29.13.
8Lé amɔ, a tinyʋa a jràmáá ámá a ŋwʋ́ɛ́ kpá, ɩ́zà Lagɔ̀jràmáá ámá a gbʋ́gbʋɛ.» 9Lé Zozíi srʋ á ɔ́ anɩ́: «A wɔlɩ́ mɛ́ɛ, a nie sáá fɩ́ɛ́ lé a pá Lagɔ̀jràmáá klá, lé a bháʋ́ a tinyʋa a jràmáá. 10Mà Moyízɩ anɩ́: Ŋwʋ́ ʋ́ ɩ̀ tʋ́ lé ɩ̀ nɛ́!#7.10 A zɛlɩɩ sáà Námɛɛ́ 20.12; Detro 5.16. Lé ɔ cíi sɔ́kʋ́ mà: Nyɔ nɩ bhʋ́sʋ ɔ tʋ́ ɩ́zà ɔ nɛ́ a, bhʋ́anɩ nyɔɔ́ a bhlɔ́ɔ́!#7.10 A zɛlɩɩ sáà Námɛɛ́ 21.17. 11Lé amɔ ànàà a nie mà: Nyɔ yi míi lé ɔ́ yi ɔ tʋ́ yà ɔ nɛ́ sɔ́ srʋ mà, ɩ́ yi la míi lé ɩ́ yi la amɔ kʋ́ yi, mà lɛ́ɛ́ na ká la amɔ nyɛ́ a, ɛ́ ŋwɔ́ɔ yɩ́ klɔbanɩ ɩ́ gba ŋwɔ́ɔ mà, yɛ́ɛ glɔ̀gbá jɩ̀ ŋwʋ́, Lagɔ na ká yɩ́ mɛ́ nyɛ́. 12A nie lé bhʋ́anɩ nyɔɔ́ nɩ́ nyɛ́ yɩ́ ɔ tʋ́ yà ɔ nɛ́ sɔ́ lɛ́. 13A bhá a tinyʋa a jràmáá lé a sa ʋ́ Lagɔ̀jràmáá. A ka sɔ́kʋ́ nyumo gbɩ kɔ́kɔ́mnɩ́ lé a nií.»
Wɔlíɛ́ ɩ̀ bhusule nyɔ a
(Matíe 15.10‑20)
14Zozíi wle sɔ́kʋ́ jrèè lé ɔ srʋ á mà: «A lɔ̀fɩ́ɛ́, a pʋ nyúkwlí lé cémʋ́ ná ká cí a a kɩ́ɩ́ nú. 15Lɛ́ɛ́ nyɔ li lɛ́, lé ɛ̀ mʋ lɛ́ ɔ mnɩ́ a, ɛ́mɛ́ nɩ́ tɔ́ɔ́ sɩsɩ́ Lagɔ a drɩ̀, mà ɩ̀ wlʋ́ɛ́ nyɔ a neé a, ɩ́mɩ́ tɔ́ɔ́ sɩsɩ́ Lagɔ á drɩ̀. [16Naa, ɔ̀ nɩ ka nyúkwlí lé ɔ̀ ká nú a, ɔ nú!#7.16 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]»
17Zozíi wlʋ́ jrèè gɔ̀ lé ɔ mʋ gbó a, ɔ́ kʋjɩ̀nyʋ̀àà yrá wɔlɩ́ɛ́ ɔ́ cí la a, ɩ́ gba. 18Bhʋ́ ɔ́ srʋ á mà: «Ɔ́ɔ́! A sɛ́fʋ sáà, a bhobhoé nɩ́ ʋ́ ŋnɩɩ? A nɩ́ saá yì mà lɛ́ɛ́ nyɔ li lɛ́, lé ɛ̀ mnɛ lɛ́ ɔ mnɩ́ a, ɛ nɩ́ tɔ́ɔ́ sɩsɩ́ɩ? 19A yɩbhlɩ saá mà lɛ́ɛ́ nyɔ li lɛ́ a, mnɩ́ mʋ́ ɛ́ bhliloó, lé ɔ́ plalɛɛ klá kʋ́ mà ɛ̀ nɩ́ duo a mnɩ́ ŋwɔ́ɔ.» Ɩ́mɩ́ ka ŋnɩ́ lé ɔ́ srʋ á mà nyɔ yi míi lé ɔ́ yi lelilɩɛ́ fɩ́ɛ́ li. 20Ɔ́ cí, ɔ́ anɩ́: «Ɩ̀ wlʋ́ɛ́ nyɔ a duo a mnɩ́ a, ɩ́mɩ́ tɔ́ɔ́ sɩsɩ́. 21Duo a mnɩ́ nyumo bhobhoé wlʋ́ɛ́, ɛ́mɛ́ nie lé nyɔ ka lɛ dɩba. Ɛ́mɛ́ nie lé ɔ́ ghlíe, lé ɔ́ bhlá sáà ɔ lía. 22Ɛ́mɛ́ nie lé ŋwnɔ́ yrá yuwle lé yuwle yrá ŋwná, ɩ́mɩ́ nie lɛ́ sáà lé nyɔ mɛ́ lɛ́ kʋ́ lé ɔ́ nyù lɛ́ sáà mnɩ́. Ɩ́mɩ́ ŋwɔ́ɔ lɛ́ nyʋaá a nyɩ́glɩ̀lɛ̀ lé kàpàkápá. Ɩ́mɩ́ ŋwɔ́ɔ lɛ́ sáà nyɔ ɔ liyʋ a lɛ́ ɛ̀ sɔɔ́ duo mnɩ́ a. Ɩ́mɩ́ ŋwɔ́ɔ lɛ́ nyumosa a mɔ̀ɔsasʋ́, lé ɩ̀ ŋwɔ́ɔ lɛ́ blìpapʋ́ lé nɩnalɛ̀ɛ̀. 23Sɩ́tɛ̀ a nyumo wɔlɩɛ́ fɩ́ɛ́, nyɔ a duo a mnɩ́ ɩ́ wlʋ́ɛ́, ɩ́mɩ́ tɔ́ɔ́ sɩsɩ́ Lagɔ a drɩ̀.»
Lówùdùŋwnɔ ka Zozíi a fádùò
(Matíe 15.21‑28)
24Zozíi wlʋ́ ʋ́ a, ɔ́ mʋ Tílɩbhlɩ kʋ́ lé ɔ́ pla dáamúó kʋ́, ɔ nɩ́ yrá lé nyʋa yɩbhlɩlɔɔ́ dá, mà ɔ nɩ́ ka míi lé ɔ ká zúzùò. 25Ŋwnɔ́ a múó kʋ la ʋ́ lé ɔ́ ka la ŋnɩ́keyʋ. Mà nyumozùzu kʋ ɔ la jɩ̀. Ŋwnɔ́ɔ́ nú kɔ́ɔ̀kʋ́ Zozíi a wɔlɩ́ a, ɔ́ yi lé ɔ́ sra ɔ́ drɩ̀ koti sá. 26Ɔ́ ŋwɔ́ɔ Silofenísɩ a yrʋ́kwla mà ɛ̀ nɩ́ Zúfʋyrʋkwla ŋwɔ́ɔ. Ɔ́ yi Zozíi gɔ̀ a, ɔ́ srɔɔ wlú lé ɔ́ srʋ ɔ́ mà, ɔ ŋnɩ́keyʋɔ́ a jɩ̀ a nyumozùzùò, ɔ jɩ́ɩlʋʋ́. 27Mà Zozíi srʋ ɔ́ mà: «Cíe fɩ́ɛ́ yúóó sá lé a ká li a ká lʋ, mà nà bhá yúó a lelilɩɛ́ lé kɩ̀ɩ vʋ̀ʋ pá.» 28Ŋwnɔ́ɔ́ anɩ́: «Aan mà, Kanyɔɔ̀, yúó nɩ kʋ liìda a, ɩ́ lelilɩɛ́ ɩ̀ bhlie lɛ́ tébhle zɔ̀ a, vʋ̀ʋ lií à!» 29Ɩ́mɩ́ ŋwɔ́ɔ Zozíi mà: «Yà yɩ́ saá cí a, plɩ́ lé mʋ gbó mà nyumozùzùò ya nà ŋnɩ́keyʋɔ́ jɩ̀ wlʋ́!» 30Ŋwnɔ́ɔ́ yrɩ́bhà lé ɔ́ mʋ gbó a, ɔ́ nɩ náa dʋdʋɛ a, ɔ ŋnɩ́keyʋɔ́ pʋ́ bɔ̀gɩ jɩ̀. Nyumozùzùò yɔɔ́ jɩ̀ wlʋ́.
Zozíi yalɩma mùmùdɛ̀lɩ́
(Matíe 15.29‑31)
31Zozíi wlʋ́ Tílɩbhlɩɛ́ a mnɩ́ a, ɔ́ flʋ Sidɔ́ɔ yà Dí Kʋ́gbá a bhlɩɛ́ a mnɩ́ sɔ́ lé ɔ́ yrɩ́bha Galilée a nyíé gɔ̀. 32Lé á lɔɔ́ nyɔ gɔ̀. Nyɔɔ́ nɩ́ nú lé ɔ cícíwɔlɩɛ́ nɩ́ kplɔɔ̀. Lé á bhibhie Zozíi mà ɔ gbɛlɔɔ́ glɔ̀gbá jɩ̀ lé ɔ bhibhie ɔ wlú bhè ɔ ká yalɩmà. 33Lé ɔ yà nyɔɔ́ sɔ́ wlʋ́ʋ jrèè gwá, lé ɔ́ ŋwʋ́ nyɔ a nyúkwlí ɔ wlie ɔ́ ŋwna wlie dàdɩ yɩ́ lé ɔ́ gbɔ́ nyɔ a mɩɔɔ́. 34Ɔ́ dʋdʋ̀ lagɔɔ́ lé ɔ́ dru nyobhuo, ɔ́ srʋ nyɔɔ́ mà: «Efata!» Ɩ́ gba ŋwɔ́ɔ mà: «Kalɔ klʋ́!» 35Dáamúóó nyɔɔ́ yalɩmà, ɔ nyúkwlíé wlée lé ɔ́ mɩɔɔ́ flíi. 36Lé Zozíi nyɛ́ nyʋaá tába, ɔ́ srʋ á námasa mà á nɩ mʋ a, a ná sa nyɔ dí. Mà Zozíi yi lɛ́ saá nyʋa srʋ, mà a nɩ mʋ a, á sa lɛ nyʋa dí. 37Wɔlíɛ́ fɩ́ɛ́ Zozíi nɩ lɛ́ sɩ́tɛ̀ a, ɩ́ mna nyʋa neé, lé á nie mà: «Wɔlíɛ́ fɩ́ɛ́ ɔ́ nɩ a, ɩ́ náa kpanyɩ! Ɔ́ nɩ lé nyʋaá à nɩ́ nú la a, á núé, lé à nɩ́ míi la cícíé a, á cíé!»
Markert nå:
Málɩ́kɩ 7: NEY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
