တမၢၼ်ႇၸဝ်ႈ 14
14
တြႃးသိူဝ်းပျေႃႇၶဝ်ႈၼႂ်းဝဵင်းဢီႉၵေႃးၼီႉ
1မိူဝ်ႈဢၼ်ယင်းမီးယူႇ ၵႃႈၼႂ်းဝဵင်းဢီႉၵေႃးၼီႉၼၼ်ႉၸိုင် တမၢၼ်ႇၸဝ်ႈၸိူဝ်းၼၼ်ႉ ၶဝ်ႈၵႃႈၼႂ်းၸရွပ်ႈႁေႃးတြႃးၵူၼ်းယူႉတႃႉလႄႈ ႁေႃးလၢတ်ႈၼႃႇလူင်လၢင်ထၼ်ႈပေႃးၵူၼ်း ယူႉတႃႉ ဢိၵ်ႇတင်းၵူၼ်းႁေႇလသႃႉ ၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။- 2ၵူၼ်း ယူႉတႃႉ ဢၼ်ဢမ်ႇယုမ်ႇမၢတ်ႈၸိူဝ်းၼၼ်ႉ တိုၵ်းယူင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ ႁႂ်ႈမီးၸႂ်ဢၼ်သီႈၵေႉတီႈပီႈၼွင်ႉၸိူဝ်းၼၼ်ႉဢေႃႈ။- 3ပိူဝ်ႈၼႆၸင်ႇၶဝ်ယူႇႁိုင်ၼႃႇလႄႈ ႁေႃးလၢတ်ႈတြႃးၸဝ်ႈၽြႃးႁတ်းႁတ်းႁၢၼ်ႁၢၼ်ဢေႃႈ။ ၸဝ်ႈၽြႃးၵေႃႈၶၢမ်ႇသၢၵ်ႈသေႇၽၢႆႇၵျေးၸူးတြႃးမၼ်းၸဝ်ႈယူႇသေလႄႈ ပၼ်ဢၶႂၢင်ႉႁႂ်ႈတမၢၼ်ႇၸဝ်ႈၸိူဝ်းၼၼ်ႉ ၼႄပျႃးၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆဢေႃႈ။
4ၵူၼ်းဝဵင်းတင်းသဵင်ႈတင်းလူင်ၼၼ်ႉ ပိူင်ႈလွင်ႈပိူင်ႈႁွႆးၵၼ်လႄႈ ၵမ်ႈၽွင်ႈယူႇၽၢႆႇၵူၼ်း ယူႉတႃႉတင်းလၢႆ၊ ၵမ်ႈၽွင်ႈယူႇၽၢႆႇတမၢၼ်ႇၸဝ်ႈၸိူဝ်းၼၼ်ႉဢေႃႈ။- 5မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်း တင်းၵူၼ်း ယူႉတႃႉ ဢိၵ်ႇတင်း ၶုၼ်ဢရႃႇသီႉတင်းလၢႆၼၼ်ႉ တူင်ႉတိုၼ်ႇၵျၢမ်ႇႁႃႁႂ်ႈလႆႈၼိၵ်ႈၸၢၵ်ႈငႅၼ်းသႄးတမၢၼ်ႇၸဝ်ႈၸိူဝ်းၼၼ်ႉလႄႈ ဢဝ်မၢၵ်ႇႁိၼ်ထိမ်ႈၼၼ်ႉၸိုင်၊- 6တမၢၼ်ႇၸဝ်ႈၸိူဝ်းၼၼ်ႉ ႁူႉႁၼ်သေယဝ်ႉ ဢွၵ်ႇပၢႆႈၵႂႃႇၸူးၵႃႈတီႈၸႃႉၸဵမ်ဝဵင်းလုတ်ႉတရႃႉ တင်းဝဵင်းတေႇရပေႇ တင်းဝၢၼ်ႈၼွၵ်ႈၼႃးပၢင်ႇ ဢၼ်မီးၼႂ်းမိူင်းလူႉၵေႃးၼီႉသေလႄႈ၊- 7ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈ ၵႃႈတီႈၼၼ်ႈဢေႃႈ။
ၶၢဝ်ႇတြႃးသိူဝ်းပျေႃႇၶဝ်ႈၼႂ်းဝဵင်းလုတ်ႉတရႃႉတင်းဝဵင်းတေႇရပေႇ
8ၼႂ်းဝဵင်းလုတ်ႉတရႃႉၼၼ်ႉ ၵူၼ်းဢၼ်တိၼ်ဢမ်ႇလီမႃးၸဵမ်မိူဝ်ႈၼႂ်းတွင်ႉမႄႈလႄႈ ဢမ်ႇတွၼ်ႉပႆတၢင်းသေပွၵ်ႈၼၼ်ႉၵေႃႉၼိုင်ႈၼင်ႈယူႇလႄႈ၊- 9ငိၼ်းပေႃးလူႉႁေႃးလၢတ်ႈၼၼ်ႉဢေႃႈ။ ပေႃးလူႉၵေႃႈယႅၵ်ႉတူၺ်းၵေႃႉၼၼ်ႉၸေးၸေးၸွတ်ႇၸွတ်ႇသေလႄႈ ႁူႉႁၼ်လွင်ႈဢၼ်တၢင်းဢၼ်ယုမ်ႇမၢတ်ႈဢၼ်ႁႂ်ႈထၼ်ႈပေႃး တၢင်းၶႆႈတၢင်းပဵၼ်မၼ်းႁၢႆၼၼ်ႉ မီးၼႂ်းမၼ်းၼၼ်ႉသေယဝ်ႉ၊- 10ႁဵတ်းတင်းသဵင်ဢၼ်ယႂ်ႇလႄႈလၢတ်ႈဝႃႈ လုၵ်ႉၸုၵ်းသိုဝ်ႈသိုဝ်ႈတႃႉ၊ ဝႃႈၼင်ႇၼႆသေယဝ်ႉ၊ ၵေႃႉၼၼ်ႉၽုတ်းလုၵ်ႉပႆတၢင်းၵႂႃႇဢေႃႈ။
11မိူဝ်ႈဢၼ်ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ႁၼ်လွင်ႈဢၼ်ပေႃးလူႉႁဵတ်းၼၼ်ႉၸိုင်၊ ၶဝ်ဢဝ်တင်းၵႂၢမ်းၽႃႇသႃႇလူႉၵေႃးၼီႉ ႁွင်ႉသႅၼ်ႇလႄႈဝႃႈ၊ ၸဝ်ႈၽြႃးတင်းလၢႆ ႁဵတ်းၸိူဝ်ႉၼင်ႇပုင်ႇႁၢင်ႈၵူၼ်းသေလႄႈ လူင်းမႃးတီႈႁဝ်းလူင်လၢင်၊ ဝႃႈၼင်ႇၼႆဢေႃႈ။- 12ပႃႇၼပႃႉၸိုင် ၸူႉသႃႉ ဝႃႈၼႆလႄႈသင်၊ ပေႃးလူႉၵေႃႈ ပိူဝ်ႈဢၼ်ႁေႃးလၢတ်ႈၼႃႇလူင်လၢင်ၼၼ်ႉလႄႈ ႁိူဝ်ႇမီႉ ဝႃႈၼႆလႄႈသင်၊ ၶဝ်ႁွင်ႉႁဵၵ်ႈဢေႃႈ။- 13ယိတ်ႈပရေႃးႁဵၵ်ႈၸူႉသႃႉ ဢၼ်မီးၵႃႈတီႈၽၢႆႇၼႃႈဝဵင်းၼၼ်ႉ ဢဝ်ဝူဝ်းဢိၵ်ႇတင်းၶူဝ်ႈမွၵ်ႇၼမ်ၼႃႇ မႃးၵႃႈတီႈႁိမ်းၽၵ်းတူလႄႈ ႁူမ်ႈလူၺ်ႈၵၼ်တင်း ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉဢွၼ်ၵၼ် ငႃတၵ်းႁဵတ်းတၢင်းဢၼ်ပုၵ်ႈၸေႃႇဢေႃႈ။- 14မိူဝ်ႈဢၼ်တမၢၼ်ႇၸဝ်ႈပႃႇၼပႃႉ တင်းပေႃးလူႉ ငိၼ်းလွင်ႈမၼ်းၼၼ်ႉၸိုင် ၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇလႄႈ လႅၼ်ႈၶဝ်ႈၵႃႈၼႂ်းၽုင်ၵူၼ်းသေယဝ်ႉ၊ ႁွင်ႉသႅၼ်ႇဝႃႈ၊- 15ၵူၼ်းတင်းလၢႆၶဝ်ဢိူၺ်း၊ ႁဵတ်းသင်လႄႈႁဵတ်းၸိူဝ်ႉၼင်ႇၼႆၼင်ႇႁိုဝ်။ ႁဝ်းၼႆႉပဵၼ်ၵေႃႉဢၼ်မီးၸႃႇတီႉၵူၼ်းမိူၼ်ၸိူဝ်ႉၼင်ႇသူယူႇဢေႃႈ။ လွင်ႈၼင်ႇႁိုဝ် သူတၵ်းပႅတ်ႈဝႆႉၶိူင်ႈပိူင်ဢၼ်လၢႆလၢႆ ဢမ်ႇပွင်ႇလွင်ႈၼၼ်ႉသေလႄႈ ၶၢႆႉပုတ်ႈမႃးၸူးၵႃႈတီႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇလႄႈ ၽၢၼ်ႇသၢင်းႁဵတ်းပဵၼ်ၸႃႉၸဵမ်ၵၢင်ႁၢဝ်လိၼ်မိူင်း၊ သမ်ႇမုၵ်ႉတြႃႇ ၵႃႈဢၼ်မီးၵူႈတီႈၵူႈလႅၼ်ၼၼ်ႉၸိုင် ႁဝ်းၸင်ႇႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈဢေႃႈ။- 16ၶိင်ႇၵႃႇလႃႉဢၼ်ပူၼ်ႉၵႂႃႇယဝ်ႉၼၼ်ႉၸိုင် မၼ်းၸဝ်ႈပွႆႇၵူၼ်းၵူႈမဵဝ်းၵမ်ၵျၢင်ႉၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢေႃႈ။- 17ၼႂ်းဝႃႈၼၼ်သေၵေႃႈ ၼႂ်းလွင်ႈတၢင်းဢၼ် မၼ်းၸဝ်ႈႁဵတ်းၵျေးၸူးတီႈသူယူႇသေလႄႈ၊ ႁႂ်ႈၽူၼ်တူၵ်းၵႃႈၼိူဝ်ၽႃႉၵၢင်ႁၢဝ်မႃးလႄႈ ပၼ်ၶိင်ႇဢူႉတူႉဢၼ်မၢၵ်ႇမႃးၸဵမ်ႁူင်းၸဵမ်မၢၵ်ႇ ပုၼ်ႈလွင်ႈၼင်ႇႁိုဝ်တၵ်းႁႂ်ႈသူပျေႉၸုမ်ႇလိူင်ႇၸႂ်တင်းဢေႃႇၸႃႇတၢင်းၵိၼ်တၢင်းၶူပ်းလႄႈ သိူဝ်းပျေႃႇၼၼ်ႉ၊ မၼ်းၸဝ်ႈယင်းဢမ်ႇၶၢမ်ႇသၢၵ်ႈသေႇ လွင်ႈဢၼ်မၼ်းၸဝ်ႈမီးယူႇၼၼ်ႉလႄႈ ဢမ်ႇယူႇလႆႈ၊ ဝႃႈၼင်ႇၼႆဢေႃႈ။
18လွင်ႈၼင်ႇႁိုဝ် ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ တၵ်းဢမ်ႇလႆႈပုၵ်ႈၸေႃႇယိတ်ႈတီႈၶဝ်ၸိုင် ၶဝ်ႁွင်ႉသႅၼ်ႇၸိူဝ်ႉၼင်ႇၼၼ်သေလႄႈ ႁၢမ်ႈတၢပ်ႈႁႄႉၶႅၼ်ၶဝ်ယၢပ်ႇၼႃႇလူင်လၢင်ဢေႃႈ။
19မိူဝ်ႈၼၼ်ႉၵူၼ်း ယူႉတႃႉတင်းလၢႆလုၵ်ႉသေၵႃႈတီႈ ဝဵင်းဢၼ်ႇတီႉဢူၵ်ႉ တင်းဝဵင်းဢီႉၵေႃးၼီႉ မႃးလႄႈ တိူင်ႇပၢင်ႇၸူဝ်းဢဝ် ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉသေယဝ်ႉ၊ ဢဝ်မၢၵ်ႇႁိၼ်ထိမ်ႈပေႃးလူႉလႄႈ ထၢင်ႇမၼ်းတၢႆယဝ်ႉလႄႈ ၸၼ်ဢဝ်မၼ်းဢွၵ်ႇၵႂႃႇၵႃႈၼွၵ်ႈဝဵင်းသေဢေႃႈ။- 20ၼႂ်းမိူဝ်ႈဢၼ်တပႄးၸဝ်ႈတင်းလၢႆ ဝႅင်းႁွပ်ႈမၼ်းယူႇၼၼ်ႉၸိုင်၊ မၼ်းၸင်ႇလုၵ်ႉသေလႄႈၶိုၼ်းၶဝ်ႈၵႃႈၼႂ်းဝဵင်းဢေႃႈ။ ဝၼ်းမိူဝ်ႈၽုၵ်ႈ မၼ်းဢိၵ်ႇတင်းပႃႇၼပႃႉ ဢွၵ်ႇသေလႄႈ ၵႂႃႇၵႃႈတီႈဝဵင်းတေႇရပေႇဢေႃႈ။
ပွၵ်ႈမိူဝ်းၸူးဝဵင်းဢၼ်ႇတီႉဢူၵ်ႉ မိူင်းသူႉရီႉ
21ၶဝ်ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၵႃႈၼႂ်းဝဵင်းၼၼ်ႉလႄႈ ႁႂ်ႈၵူၼ်းၼမ်ၼႃႇပဵၼ်တပႄးၸဝ်ႈသေယဝ်ႉ၊ ၶိုၼ်းမိူဝ်းၵႂႃႇၵႃႈတီႈ ဝဵင်းလုတ်ႉတရႃႉ၊ ဝဵင်းဢီႉၵေႃးၼီႉ တင်းဝဵင်းဢၼ်ႇတီႉဢူၵ်ႉသေလႄႈ၊- 22ႁႂ်ႈႁူဝ်ၸႂ်တပႄးၸဝ်ႈတင်းလၢႆမၼ်ႈၶိူင်ႇလႄႈ လွင်ႈၼင်ႇႁိုဝ်ၶဝ်တၵ်းတႄႇယူႇၼႂ်းတၢင်းဢၼ်ယုမ်ႇမၢတ်ႈၸိုင် တိုၵ်းယူင်းလၢတ်ႈပၼ်လႄႈဝႃႈ ႁဝ်းတၵ်းလႆႈၶၢမ်ႇတုၵ်ႉၶႃႉၼမ်ၼႃႇသေလႄႈ ၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။
23ၶဝ်ၶၢၼ်းဝႆႉၶဝ်ၸိူဝ်းဢၼ် ဢုပ်ႉၸိူဝ်းၸဝ်ႈၼႂ်းၸိူဝ်းၸဝ်ႈၼၼ်ႉၵူႈၸိူဝ်းယဝ်ႉ ၸင်ႇၵမ်တၢင်းၵိၼ်သူးတွင်းႁဵတ်းပထၼႃႇသေလႄႈ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၽြႃးဢၼ်ၶဝ်ယုမ်ႇမၢတ်ႈၼၼ်ႉဢေႃႈ။- 24ၶဝ်ၼၼ်ႉလႄႇၵႂႃႇ ၵႃႈၼႂ်းမိူင်းပီႉသီႉတီႉ တင်းမိူင်းလႄႈ ႁွတ်ႈထိုင်ၵႃႈတီႈ မိူင်းပမ်ႇၽူႉလီႉသေယဝ်ႉ၊- 25ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈ ၼႂ်းဝဵင်းပေႇရၵေႇလႄႈ လူင်းၵႂႃႇၵႃႈတီႈဝဵင်းဢတ်ႉတလီႉဢေႃႈ။- 26ၶဝ်ၸင်ႇလုၵ်ႉသေၵႃႈတီႈဝဵင်းၼၼ်ႉ ၶီႇႁိူဝ်းသၢင်းၽေႃးႁွတ်ႈထိုင်ၵႃႈတီႈ ဝဵင်းဢၼ်ႇတီႉဢူၵ်ႉ ဢၼ်ပဵၼ်တီႈဢၼ်ၶဝ်လႆႈၶၢမ်ႇဢဝ်တၢင်းဢၼ်ဢၢပ်ႈပၼ်ၵႃႈတီႈၵျေးၸူးၽြႃးပဵၼ်ၸဝ်ႈ ပုၼ်ႈဢၼ်ၶဝ်တၵ်းႁဵတ်းလွင်ႈတၢင်းဢၼ် ၶဝ်လႆႈႁဵတ်းမႃးယဝ်ႉၼၼ်ႉဢေႃႈ။- 27ၶဝ်ႁွတ်ႈထိုင်သေယဝ်ႉ ႁႂ်ႈၵူၼ်းဢၼ်ၶဝ်ႈၸိူဝ်းၸဝ်ႈတင်းလၢႆၸူႉၵၼ်တုမ်ၵၼ်လႄႈမွၵ်ႇလၢတ်ႈပၼ် လွင်ႈတၢင်းၵႃႈဢၼ်ၽြႃးပဵၼ်ၸဝ်ႈ ဢဝ်ၶဝ်ႁဵတ်းၸိူဝ်းၼၼ်ႉ ဢိၵ်ႇတင်းလွင်ႈတၢင်းဢၼ် မၼ်းၸဝ်ႈၽုၺ်ႇပိုတ်ႇၽၵ်းတူတၢင်းဢၼ်ယုမ်ႇမၢတ်ႈ ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။- 28ၶဝ်ယူႇလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉႁိုင်ၼႃႇဢေႃႈ။
Markert nå:
တမၢၼ်ႇၸဝ်ႈ 14: CBMS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright © 2021 by OMF International, Shan Baptist Churches Fellowship
