တမၢၼ်ႇၸဝ်ႈ 13

1ၼႂ်းၸိူဝ်းၸဝ်ႈဢၼ်မီးယူႇ ၵႃႈတီႈဝဵင်းဢၼ်ႇတီႉဢူၵ်ႉၼၼ်ႉ မီးၶဝ်ၸိူဝ်းဢၼ် ႁဵတ်းပရေႃးၽႅတ်ႈလႂ်၊ တင်းၶဝ်ၸိူဝ်းဢၼ်ႁဵတ်းသြႃႇလႂ် ဢၼ်ဝႃႈပႃႇၼပႃႉ ဢိၵ်ႇတင်းသူႉမွင်ႇ ဢၼ်လႆႈႁွင်ႉၼီႉၵႃႇ တင်းလူႉၵီႉ ၵူၼ်းမိူင်းၵူႉရေႇၼေႇ တင်းမႃႇၼႅၼ်ႇ ဢၼ်မိူဝ်ႈလဵၵ်ႉလႆႈပဵၼ်ၵေႃႉသေႈၵၼ်တင်း ၸဝ်ႈၽႃႉႁေႇရူတ်ႈၼၼ်ႉ တင်းသေႃးလူႉဢေႃႈ။- 2ၼႂ်းမိူဝ်ႈဢၼ် ၶဝ်ႁဵတ်းဝၢတ်ႈၽြႃးလႄႈၵမ်တၢင်းၵိၼ်ယူႇၼၼ်ႉၸိုင်၊ ဝီႉၺိၺ်ႇဢၼ်မူတ်းၸၢင်ႇၸဝ်ႈ မီးဢမိင်ႉလႄႈဝႃႈ၊ လိူၵ်ႈၵဵပ်းဢဝ်ပႃႇၼပႃႉ တင်းသေႃးလူႉလႄႈ ၽႄဝႆႉႁႂ်ႈၶဝ်လႆႈႁဵတ်းလွင်ႈတၢင်းဢၼ်ၵဝ်ၶၢၼ်းဝႆႉၼၼ်ႉတႃႉ ဝႃႈၼႆ၊ ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊- 3ၶဝ်ၵမ်တၢင်းၵိၼ်လႄႈ ႁဵတ်းဝၢတ်ႈပထၼႃႇသေယဝ်ႉ ဢဝ်မိုဝ်းတၢင်ႇၵႃႈၼိူဝ်ႁူဝ်ၶဝ်ၼၼ်ႉလႄႈ ပွႆႇၸႂ်ႉၶဝ်ၵႂႃႇဢေႃႈ။

4ၼင်ႇၼၼ်ႉလႄႈ ဝီႉၺိၺ်ႇဢၼ်မူတ်းၸၢင်ႇၸဝ်ႈ ပွႆႇၸႂ်ႉၶဝ်ၵႂႃႇသေယဝ်ႉ၊ ၶဝ်ၼၼ်ႉၸင်ႇလူင်းၵႂႃႇ ၵႃႈတီႈဝဵင်းသေလူႉၵီႉလႄႈ သမ်ႉလုၵ်ႉသေၵႃႈတီႈဝဵင်းၼၼ်ႉ ၶီႇႁိူဝ်းသၢင်းၽေႃးၵႂႃႇၸူး ၵုၼ်ၵူႉပရူႉ ပုၼ်ႉဢေႃႈ။- 5မိူဝ်ႈဢၼ်ႁွတ်ႈထိုင်ၵႃႈတီႈ ဝဵင်းသႃႇလမီႉၼၼ်ႉၸိုင် ၶဝ်ႁေႃးလၢတ်ႈၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ၵႃႈၼႂ်းၸရွပ်ႈႁေႃးတြႃးၵူၼ်းယူႉတႃႉတင်းလၢႆဢေႃႈ၊ ယူဝ်းႁၢၼ်ႇၵေႃႈပဵၼ်ၵေႃႉဢၼ်ၸွႆႈဢၼ်ထႅမ်ၶဝ်ၼၼ်ႉယူႇဢေႃႈ။

6မိူဝ်ႈဢၼ်ၶဝ်လႄႇၼႂ်းၵုၼ်ၼၼ်ႉၵူႈတီႈၵူႈလႅၼ်လႄႈ ႁွတ်ႈထိုင်ၵႃႈတီႈဝဵင်းၽႃႇပူႉၼၼ်ႉၸိုင် ၶဝ်ထူပ်းႁၼ်ၸဝ်ႈၽီမေႃမိၵ်ႉသႃႇပရေႃးၽႅတ်ႈ ဢၼ်ပဵၼ်ၵူၼ်းယူႉတႃႉလႄႈ လႆႈၸိုဝ်ႈပႃႇယေႇသူႉၼၼ်ႉၵေႃႉၼိုင်ႈဢေႃႈ။- 7ၵေႃႉၼၼ်ႉမီးယူႇၵႃႈတီႈၶုၼ်သေႇရၵီႉပေႃးလူႉ ဢၼ်မီးပိင်ႇၺႃႇသတီႉၼၼ်ႉဢေႃႈ။ ၶုၼ်ၼၼ်ႉ ႁွင်ႉပၢင်းဢဝ်ပႃႇၼပႃႉ တင်းသေႃးလူႉၼၼ်ႉလႄႈ မီးၸႂ်ဢၼ်ၶႂ်ႈထွမ်ႇၶႂ်ႈငိၼ်း ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈဢေႃႈ။- 8ဢေးလူႉမႃႉ ဢၼ်ဢၼၢၵ်ႈၸိုဝ်ႈသဵင်မၼ်းဝႃႈ ၸဝ်ႈၽီမေႃ၊ ဝႃႈၼင်ႇၼႆၼၼ်ႉ ၶႂ်ႈႁႂ်ႈၶုၼ်ၼၼ်ႉဝႄႈပႅတ်ႈတၢင်းဢၼ်ယုမ်ႇမၢတ်ႈလႄႈ ႁႄႉၶႅၼ်ၶဝ်ၼၼ်ႉဢေႃႈ။

9မိူဝ်ႈၼၼ်ႉသေႃးလူႉ ဢၼ်လႆႈၸိုဝ်ႈပေႃးလူႉၼၼ်ႉ တဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈသေယဝ်ႉ ယႅၵ်ႉတူၺ်းၸဝ်ႈၽီမေႃၼၼ်ႉၸေးၸေးသေလႄႈ၊- 10လၢတ်ႈဝႃႈ၊ ၵူၼ်းဢၼ်တဵမ်ဝႆႉတင်းတၢင်းဢၼ်ၸၢင်ႈပႅတ်ႉၸၢင်ႈလႅၼ် ဢိၵ်ႇတင်းတၢင်းဢၼ်ႁဵတ်းႁုၵ်းႁဵတ်းႁၢႆႉ ၵူႈၸိူဝ်ႉၵူႈပိူင်၊ လုၵ်ႈမႃႇၼၢတ်ႈ၊ ရၢၼ်ႇသူႇတြႃးတၢင်းဢၼ်သိုဝ်ႈတေႃႇၼႆႉဢိူၺ်း၊ မႂ်းၼႆႉယင်းဢမ်ႇယႃႉသဵၼ်ႈတၢင်းထႃႇဝရႃႉၽြႃး ဢၼ်သိုဝ်ႈတင်းလၢႆၼၼ်ႉလႄႈ ဢမ်ႇယူႇလႆႈႁိုဝ်။- 11တေႃႈလဵဝ်ၼႆႉ မိုဝ်းထႃႇဝရႃႉၽြႃးႁွတ်ႈမႃးၵႃႈၼိူဝ်မႂ်းလႄႈ တႃမႂ်းတၵ်းမွတ်ႇထၼ်ႈပေႃးဢမ်ႇႁၼ်ၵၢင်ဝၼ်း ၶိင်ႇၵႃႇလႃႉႁိုင်တၢၼ်ႇတၢၼ်ႇဢေႃႈ၊ ဝႃႈၼင်ႇၼႆသေယဝ်ႉ၊ ၵမ်းဢွၼ်ႇၼိုင်ႈတႃမၼ်းၵုမ်ႈမႃး ပဵၼ်ဢၼ်လပ်းသိင်ႇၽိတ်းၽိတ်းလႄႈ ပၼ်ႇၵႂႃႇပၼ်ႇၶိုၼ်းႁႃၵေႃႉဢၼ်တၵ်းၸုင်ဢဝ်မိုဝ်းမၼ်းယူႇဢေႃႈ။

12ၶုၼ်ၼၼ်ႉႁၼ်လွင်ႈတၢင်းၸိူဝ်းၼၼ်ႉသေယဝ်ႉ ႁွတ်ႈထိုင်တၢင်းဢၼ်ယုမ်ႇမၢတ်ႈလႄႈ ၵႂင်ၸႂ်ယုင်ႈၸႂ်ဢၢမ်းတေႇသၼႃႇၸဝ်ႈၽြႃးယူႇဢေႃႈ။

13 ပေႃးလူႉ တင်းၶဝ်ၸိူဝ်းဢၼ် ပႃးလူၺ်ႈၵၼ်တင်းမၼ်းၼၼ်ႉ ၶီႇႁိူဝ်းသၢင်းၽေႃးဢွၵ်ႇသေ ၵႃႈတီႈဝဵင်းၽႃႇပူႉလႄႈ ၵႂႃႇႁွတ်ႈထိုင်ၵႃႈတီႈဝဵင်းပေႇရၵေႇ မိူင်းပမ်ႇၽူႉလီႉသေယဝ်ႉ၊ယူဝ်းႁၢၼ်ႇၸင်ႇၽၢတ်ႇၵၼ်တင်းၶဝ်လႄႈ ၶိုၼ်းမိူဝ်းၵႂႃႇၵႃႈတီႈဝဵင်းယေႇရူႉသလႅမ်ႇ သေဢေႃႈ။- 14ၶဝ်သမ်ႉဢွၵ်ႇသေၵႃႈတီႈဝဵင်းပေႇရၵေႇလႄႈ ၵႂႃႇႁွတ်ႈထိုင်ၵႃႈတီႈဝဵင်းဢၼ်ႇတီႉဢူၵ်ႉ မိူင်းပီႉသီႉတီႉ သေယဝ်ႉ၊ ၼႂ်းဝၼ်းၵမ်သိၼ် ၶဝ်ၶဝ်ႈၵႃႈၼႂ်းၸရွပ်ႈႁေႃးတြႃးလႄႈ ၼင်ႈယူႇဢေႃႈ။- 15ဝၢႆးသေၽတ်းၵျၢမ်းလိၵ်ႈပိင်းၺၢပ်ႈတီႉ တင်းၵျၢမ်းလိၵ်ႈဢၼႃႇၵၢတ်ႈတီႉယဝ်ႉၼၼ်ႉ ၵႄႇၸရွပ်ႈႁေႃးတြႃးၸိူဝ်းၼၼ်ႉ ပွႆႇၸႂ်ႉၵူၼ်းမႃးတီႈၶဝ်လႄႈလၢတ်ႈဝႃႈ ပေႃးသူမီးၵႂၢမ်းဢၼ်လီႁေႃးလၢတ်ႈတီႈၵူၼ်းတင်းလၢႆၸိုင် ႁေႃးလၢတ်ႈသေၵမ်းတႃႉ၊ ဝႃႈၼင်ႇၼႆဢေႃႈ။

16မိူဝ်ႈၼၼ်ႉပေႃးလူႉၸင်ႇ လုၵ်ႉၼႄမိုဝ်းမၼ်းသေလႄႈ လၢတ်ႈဝႃႈ ၵူၼ်းဢီႉသရေႇလႃႉတင်းလၢႆ ဢိၵ်ႇတင်းၶဝ်ၸိူဝ်းဢၼ်ၵူဝ်ယမ်ၽြႃးပဵၼ်ၸဝ်ႈၶဝ်ဢိူၺ်း၊ ထွမ်ႇငိၼ်းသေၵမ်းတႃႉ။- 17ၽြႃးပဵၼ်ၸဝ်ႈၵူၼ်းမဵဝ်းဢီႉသရေႇလႃႉၼႆႉ လိူၵ်ႈၵဵပ်းဢဝ်ပူႇပေႃႈႁဝ်းၼၼ်ႉလႄႈ မိူဝ်ႈဢၼ်ၵူၼ်းမဵဝ်းၼႆႉ ယင်းတိုၵ်ႉပဵၼ်ၶႅၵ်ႇၵႃႈၼႂ်းမိူင်းဢေႇၵိပ်ႉတူႉယူႇၼၼ်ႉၸိုင် ယုၵ်ႉယွင်ႈၶဝ်လႄႈ ဢဝ်တင်းမိုဝ်းဢၼ်ပူၼ်ႉပိူၼ်ႈၼၼ်ႉၼုၵ်ႈဢဝ်ၶဝ် ဢွၵ်ႇသေၵႃႈၼႂ်းမိူင်းၼၼ်ႉဢေႃႈ။- 18သီႇသိပ်းပီႊၸမ်ၸမ်မၼ်းၸဝ်ႈလဵင်ႉလူၶဝ်ဝႆႉၵႃႈၼႂ်းထိူၼ်ႇဢေႃႈ။- 19မၼ်းၸဝ်ႈယႃႉပႅတ်ႈ ၵူၼ်းၸဵတ်းမဵဝ်းဢၼ်မီးၵႃႈၼႂ်းမိူင်းၶႃႇၼၢၼ်ႇၼၼ်ႉသေယဝ်ႉ၊ ဢဝ်မိူင်းၼၼ်ႉမႅင်ႇပၼ်ဢမူၺ်ႇတီႈၶဝ် သီႇပၢၵ်ႇပၢႆႁႃႈသိပ်းပီႊၸမ်ၸမ်ဢေႃႈ။- 20ဝၢႆးသေၼၼ်ႉယဝ်ႉ မၼ်းၸဝ်ႈပၼ်ၵူၼ်းဢၼ်ၸီႇယၢင်ႇတြႃးၸိူဝ်းၼၼ်ႉ တေႃႇထိုင်ႁွတ်ႈပၼ်ပရေႃးၽႅတ်ႈသမူၺ်ႇလႃႉၼၼ်ႉတီႈၶဝ်ဢေႃႈ။- 21လိုၼ်းၼၼ်ႉ မိူဝ်ႈဢၼ်ၶဝ်ယွၼ်း ၶုၼ်ႁေႃၶမ်းၼၼ်ႉၸိုင် ၽြႃးပဵၼ်ၸဝ်ႈပၼ်သေႃးလူႉ လုၵ်ႈၸၢႆးၵီႉသႃႉ ဢၼ်ပဵၼ်ၸိူဝ်ႉၶိူဝ်းပိၼ်ႇယႃႇမိၼ်ႇၼၼ်ႉတီႈၶဝ် သီႇသိပ်းပီႊတဵမ်တဵမ်ဢေႃႈ။- 22လိုၼ်းၼၼ်ႉ မၼ်းၸဝ်ႈဢီးၵေႃႉၼၼ်ႉပႅတ်ႈသေလႄႈ ယုၵ်ႉယွင်ႈတႃႇဝိတ်ႈ ဝႆႉ ႁႂ်ႈပဵၼ်ၶုၼ်ႁေႃၶမ်းဢေႃႈ။ တီႈၵေႃႉၼၼ်ႉ မၼ်းၸဝ်ႈၶၢမ်ႇသၢၵ်ႈသေႇလႄႈဝႃႈ ၵဝ်လႆႈထူပ်း လွင်ႈဢၼ်တႃႇဝိတ်ႈ လုၵ်ႈၸၢႆးယေႇသႄးၼၼ်ႉ၊ ပဵၼ်ဢၼ်မႅၼ်ႈၵၼ်တင်းၸႂ်ၵဝ်လႄႈ တၵ်းႁဵတ်းဢလူဝ်ႇၵဝ်တင်းသဵင်ႈတင်းလူင်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

23ၵႃႈၼႂ်းၸိူဝ်ႉၶိူဝ်းၵေႃႉၼၼ်ႉ ၽြႃးပဵၼ်ၸဝ်ႈႁႂ်ႈယေႇသူႉ ၸဝ်ႈဢၼ်ၵႄႇၶျွတ်ႈဢဝ်ၼၼ်ႉ ပေႃႇမႃးတီႈၵူၼ်းဢီႉသရေႇလႃႉတင်းလၢႆ ၵႃႈၼင်ႇဢၼ်ၵတီႉမၼ်းၸဝ်ႈမီးဝႆႉၼၼ်ႉယဝ်ႉ။- 24ၸူဝ်ႈဢၼ်ၸဝ်ႈၼၼ်ႉဢမ်ႇပႆႇမႃးၼၼ်ႉၸိုင်၊ ယူဝ်းႁၢၼ်ႇလႆႈႁေႃးလၢတ်ႈတြႃးပပ်ႉတီႉၸမ်ႇ ဢၼ်ၸၢပ်ႈသႅင်ႇၵၼ်တင်း တၢင်းဢၼ်ၶုၵ်းၸႂ်လႆႈမႆႈၸႂ်ၼၼ်ႉ ၵႃႈတီႈၵူၼ်းဢီႉသရေႇလႃႉတင်းသဵင်ႈတင်းလူင်ဢေႃႈ။- 25ယူဝ်းႁၢၼ်ႇၼၼ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉ ႁဵတ်းလွင်ႈတၢင်းဢၼ် မၼ်းတၵ်းလႆႈႁဵတ်းၼၼ်ႉလႄႈယူႇၼၼ်ႉၸိုင် လၢတ်ႈလႄႈဝႃႈ သူထၢင်ႇၵဝ်ပဵၼ်ၽူႈလႂ်၊ ၵဝ်ပဵၼ်ၵေႃႉၼၼ်ႉဢမ်ႇၸႂ်ႈ၊ ၵေႃႉဢၼ်မႃးလိုၼ်းၵဝ်ၼၼ်ႉ ယင်းမီးယူႇလူးၵွၼ်ႇဢေႃႈ။ ၵဝ်ၼႆႉယင်းဢမ်ႇထိူၵ်ႈထွတ်ႇဢဝ်ၶႅပ်းတိၼ်ၵေႃႉၼၼ်ႉ၊ ဝႃႈၼင်ႇၼႆဢေႃႈ။

26ပီႈၼွင်ႉဢၼ်ပဵၼ်ၸိူဝ်ႉၶိူဝ်းဢႃႇပြႃႇႁၢမ်ႇ ဢိၵ်ႇတင်းၶဝ်ၸိူဝ်းဢၼ် ၵူဝ်ယမ်ၽြႃးပဵၼ်ၸဝ်ႈၵႃႈၼႂ်းသူၼႆႉၶဝ်ဢိူၺ်း၊ မၼ်းၸဝ်ႈပွႆႇပၼ်ၵႂၢမ်းတြႃးတၢင်းဢၼ်ၵႄႇၶျွတ်ႈဢဝ်ၼႆႉမႃးၵႃႈတီႈသူဢေႃႈ။- 27ၶဝ်ၸိူဝ်းဢၼ်ယူႇ ၵႃႈၼႂ်းဝဵင်းယေႇရူႉသလႅမ်ႇ ဢိၵ်ႇတင်း ၶုၼ်ၸိူဝ်းၼၼ်ႉ ပိူဝ်ႈဢၼ်ဢမ်ႇႁူႉၸဝ်ႈၼၼ်ႉ ဢိၵ်ႇတင်းၵႂၢမ်းပရေႃးၽႅတ်ႈတင်းလၢႆ ဢၼ်ၽတ်းၼႂ်းဝၼ်းၵမ်သိၼ်ၵူႈဝၼ်းတႃႇသေႇၼၼ်ႉလႄႈ ၸီႇယၢင်ႇၸဝ်ႈၼၼ်ႉ ႁႂ်ႈၵႂၢမ်းၸိူဝ်းၼၼ်ႉပျေႉၸုမ်ႇဢေႃႈ။- 28ပိၵ်ႉသမ်ႉ ၶဝ်ဢမ်ႇထူပ်းဢမူႉဢၼ်ထုၵ်ႇလီတၢႆ သေၸိူဝ်ႉသေပိူင်တီႈမၼ်းၸဝ်ႈၼၼ်ႉသေၵေႃႈ ၶဝ်လဝ်ႊယွၼ်းဢဝ်တီႈၶုၼ် ပီႉလတ်ႉ ႁႂ်ႈလႆႈဢဝ်တၢႆဢေႃႈ။- 29မိူဝ်ႈဢၼ်ၶဝ်ႁႂ်ႈလွင်ႈတၢင်းဢၼ်တႅမ်ႈဝႆႉၼႂ်းၵျၢမ်းလိၵ်ႈလွင်ႈၸဝ်ႈၼၼ်ႉ ၵႃႈမီးတင်းသဵင်ႈတင်းလူင်ပျေႉၸုမ်ႇယဝ်ႉၼၼ်ႉၸိုင်၊ ၶဝ်ဢဝ်တူဝ်တၢႆမၼ်းၸဝ်ႈၶျႃးလူင်းသေၵႃႈတီႈသဝ်မႆႉလႄႈ ဢဝ်ဝႆႉၵႃႈၼႂ်းၶုမ်သၢင်းၶႅင်းဢေႃႈ။- 30ၽြႃးပဵၼ်ၸဝ်ႈၵေႃႈ ႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းလႄႈ၊- 31ၸဝ်ႈၼၼ်ႉၼႄပျႃးတူဝ်ၸဝ်ႈၵဝ်ႇတီႈၶဝ်ၸိူဝ်းဢၼ် လုၵ်ႉသေၵႃႈတီႈမိူင်းၵႃႇလီႉလႄးၸွမ်းပႃႈလင်မၼ်းၸဝ်ႈမႃး ႁွတ်ႈထိုင်ဝဵင်းယေႇရူႉသလႅမ်ႇၼၼ်ႉ မိုဝ်ႉဝၼ်းၼမ်ၼႃႇဢေႃႈ။ ၶဝ်ၼၼ်ႉပဵၼ်ၵေႃႉဢၼ်ၶၢမ်ႇသၢၵ်ႈသေႇ လွင်ႈမၼ်းၸဝ်ႈတီႈၵူၼ်းတင်းလၢႆဢေႃႈ။- 32ႁဝ်းမွၵ်ႇလၢတ်ႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်းၵတီႉၸဝ်ႈ ဢၼ်မီးဝႆႉတီႈပူႇမွၼ်ႇႁဝ်းၼၼ်ႉ။- 33ဢၼ်ဝႃႈ လွင်ႈဢၼ်ၽြႃးပဵၼ်ၸဝ်ႈ ႁႂ်ႈၵတီႉၸဝ်ႈၼၼ်ႉ ပျေႉၸုမ်ႇၵႃႈတီႈႁဝ်း ဢၼ်ပဵၼ်လုၵ်ႈလၢင်းၶဝ် ၼႂ်းလွင်ႈဢၼ်မၼ်းၸဝ်ႈႁႂ်ႈယေႇသူႉလုၵ်ႉၶိုၼ်း ၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈသႃႇလၢမ်ႇ ၶၢၼ်းတူႉတီႉယႃႉလႄႈဝႃႈ၊ မႂ်းၼႆႉပဵၼ်လုၵ်ႈၸၢႆးၵဝ်ဢေႃႈ။ ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းၵိူတ်ႇလဵင်ႉပဵၼ်မႃးယဝ်ႉ၊ ဝႃႈၼင်ႇၼႆၼၼ်ႉ။- 34ဢိၵ်ႇတင်း လွင်ႈဢၼ်မၼ်းၸဝ်ႈႁႂ်ႈၸဝ်ႈၼၼ်ႉ လုၵ်ႉၵႃႈတၢင်းတၢႆၶိုၼ်းလိပ်းလႄႈ ပၼ်ဢၶႂၢင်ႉဢၼ်ၵမ်းလိုၼ်းဢမ်ႇလႆႈႁွတ်ႈထိုင်တၢင်းဢၼ်တူႇဢၼ်ၼဝ်ႈ ၵႃႈၼင်ႇဢၼ်ပျႃႇတိၵ်ႈၸဝ်ႈဝႃႈ၊ ၵဝ်တၵ်းဢဝ်ၵျေးၸူးၸဝ်ႈဢၼ်မူတ်းၸၢင်ႇလႄႈမၼ်ႈၶိူင်ႇ တီႈတႃႇဝိတ်ႈၼၼ်ႉပၼ်တီႈသူ၊ ဝႃႈၼင်ႇၼႆၼၼ်ႉၵႃႈတီႈသူဢေႃႈ။- 35ပိူဝ်ႈၼႆလႄႈ ၵျၢမ်းလိၵ်ႈသႃႇလၢမ်ႇတီႈၼိုင်ႈသမ်ႉမႃးထႅင်ႈလႄႈဝႃႈၸမ်ႉ တီႈၵူၼ်းဢၼ်မူတ်းၸၢင်ႇၸဝ်ႈႁဝ်းၼၼ်ႉၸိုင် ၸဝ်ႈႁဝ်းတၵ်းဢမ်ႇပၼ် ႁွတ်ႈထိုင်တၢင်းဢၼ်တူႇဢၼ်ၼဝ်ႈတီႈၶႃႈ၊ ဝႃႈၼင်ႇၼႆဢေႃႈ။- 36တႃႇဝိတ်ႈၼၼ်ႉပွင်ႁဵတ်းၸွမ်းဢလူဝ်ႇၽြႃးပဵၼ်ၸဝ်ႈ ၼႂ်းၶိင်ႇၵႃႇလႃႉတူဝ်ၸဝ်ႈၵဝ်ႇၼၼ်ႉယဝ်ႉ၊ ၸင်ႇၵိင်းၼွၼ်းလႄႈ ၶဝ်ႈၸူးၵႃႈၼႂ်းတီႈဢၼ်ပူႇပေႃႈတူဝ်ၸဝ်ႈၵဝ်ႇမီးၼၼ်ႉလႄႈႁွတ်ႈထိုင်တၢင်းဢၼ်တူႇဢၼ်ၼဝ်ႈဢေႃႈ။- 37ၵေႃႉဢၼ်ၽြႃးပဵၼ်ၸဝ်ႈ ႁႂ်ႈလုၵ်ႉၶိုၼ်းၸမ်ႉဢမ်ႇႁွတ်ႈထိုင်တၢင်းဢၼ်တူႇဢၼ်ၼဝ်ႈ။

38ပိူဝ်ႈၼႆလႄႈ ပီႈၼွင်ႉၶဝ်ဢိူၺ်း၊ ႁူႉႁၼ်လွင်ႈဢၼ်ႁေႃးတြႃးတၢင်းဢၼ်ပွႆႇလွတ်ႈဢပႅတ်ႈ ၵွပ်ႈပိူဝ်ႈၵျေးၸူးၸဝ်ႈၼၼ်ႉတီႈသူၼႆႉ၊- 39ဢိၵ်ႇတင်း လွင်ႈဢၼ်ၵေႃႉဢၼ်ယုမ်ႇမၢတ်ႈၸဝ်ႈၼၼ်ႉ ၵႃႈမီးတင်းသဵင်ႈတင်းလူင်လႆႈၵၢင်းလွတ်ႈတင်းလွင်ႈတၢင်းၵႃႈဢၼ် ၸွမ်းၼင်ႇတြႃးမူဝ်းသေႇ ဢမ်ႇၵၢင်းဢမ်ႇလွတ်ႈလႆႈၼၼ်ႉသေၵမ်းတႃႉ။

40ပိူဝ်ႈၼႆလႄႈ ၼင်ႇႁိုဝ်လွင်ႈတၢင်းဢၼ် ပႃးၵႃႈၼႂ်းၵျၢမ်းလိၵ်ႈဢၼႃႇၵၢတ်ႈတီႉၼၼ်ႉ တၵ်းဢမ်ႇႁွတ်ႈထိုင်ၵႃႈၼိူဝ်သူၸိုင် ႁဵတ်းသတီႉသေၵမ်းတႃႉ။- 41ဢၼ်မႃးၼႂ်းၵျၢမ်းလိၵ်ႈဢၼႃႇၵၢတ်ႈတီႉၼၼ်ႉလႄႈဝႃႈၸမ်ႉ ၵူၼ်းၸိူဝ်းဢၼ်ၸၢင်ႈႁဵတ်းဢမ်ႇၼပ်ႉဢမ်ႇၶၢၼ်းၶဝ်ဢိူၺ်း၊ လူတူၺ်းဢၢမ်းယွင်ႈသေလႄႈ ႁွတ်ႈထိုင်တၢင်းဢၼ်လၢႆလၢႆလွၵ်ႇလွၵ်ႇတႃႉ။ လွင်ႈမၼ်းၸမ်ႉ ၵဝ်ႁဵတ်းလွင်ႈတၢင်းပိူင်ၼိုင်ႈ ၼႂ်းၸူဝ်ႈပၢၼ်သူၼႆႉဢၼ်ဝႃႈ လွင်ႈတၢင်းဢၼ်ပိၵ်ႉသမ်ႉပိူၼ်ႈမွၵ်ႇလၢတ်ႈၼႄပျႃး တီႈသူသေၵေႃႈသူတၵ်းဢမ်ႇယုမ်ႇၼၼ်ႉဢေႃႈ မီးမႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

42ၵူၼ်းၸိူဝ်းၼၼ်ႉ ၼႂ်းမိူဝ်ႈဢၼ်ဢွၵ်ႇသေၵႃႈၼႂ်းၸရွပ်ႈႁေႃးတြႃးယူႇၼၼ်ႉၸိုင် တွင်းပၢၼ်ႇႁႂ်ႈႁေႃးလၢတ်ႈ လွင်ႈတၢင်းၸိူဝ်းၼႆႉတီႈၶဝ်ၼႂ်းဝၼ်းၵမ်သိၼ် ဢၼ်တၵ်းမႃးၼၼ်ႉဢေႃႈ။- 43မိူဝ်ႈဢၼ် ပွႆႇၵူၼ်းဢၼ်ၸူႉဢၼ်တုမ်ယဝ်ႉၼၼ်ႉၸိုင်၊ ၵူၼ်းယူႉတႃႉဢိၵ်ႇတင်း ၵူၼ်းဢၼ်ၶဝ်ႈၽႃႇသႃႇၵူဝ်းၵႂၢႆႇၽြႃးပဵၼ်ၸဝ်ႈၼမ်ၼႃႇ ၸွမ်းပေႃးလူႉတင်းပႃႇၼပႃႉယူႇလႄႈ တမၢၼ်ႇၸဝ်ႈၸိူဝ်းၼၼ်ႉ သင်ႇသွၼ်သုင်းမႃႉပၼ်ယူႇသေလႄႈ တိုၵ်းယူင်းၸူဝ်းဢဝ်ႁႂ်ႈၶဝ်မၼ်ႈၶိူင်ႇ ၼႂ်းၵျေးၸူးၽြႃးပဵၼ်ၸဝ်ႈဢေႃႈ။

44ဝၼ်းၵမ်သိၼ်လိုၼ်းၼၼ်ႉ ထၼ်ႈပေႃးႁၢမ်ႉတၵ်းသဵင်ႈတင်းဝဵင်း ဢွၼ်ၵၼ်မႃးၸူႉၵၼ်တုမ်ၵၼ် ႁႂ်ႈလႆႈထွမ်ႇလႆႈငိၼ်းၼုၵ်ႈၵပၢတ်ႈတြႃးၽြႃးပဵၼ်ၸဝ်ႈဢေႃႈ။- 45ၵူၼ်းယူႉတႃႉတင်းလၢႆ ႁၼ်ၶဝ်ၸူႉၵၼ်တုမ်ၵၼ်ၼၼ်ႉသေယဝ်ႉ တဵမ်ဝႆႉတင်းၸႂ်ဢၼ်သီႈၵေႉႁေႈတႃလႄႈ တွပ်ႇထဵင်ၵႂၢမ်းပေႃးလူႉ ၵူၺ်းဢမ်ႇၵႃး၊ လႃႇလင်သႄႉသွမ်းဢေႃႈ။

46မိူဝ်ႈၼၼ်ႉပေႃးလူႉတင်းပႃႇၼပႃႉ ႁေႃးလၢတ်ႈႁတ်းႁတ်းႁၢၼ်ႁၢၼ်လႄႈဝႃႈ၊ ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၼႆႉ လႆႈႁေႃးလၢတ်ႈတီႈသူဢွၼ်တၢင်းဢေႃႈ။ ၼႂ်းဝႃႈၼၼ်သေၵေႃႈ ပိူဝ်ႈဢၼ်သူၸုၼ်ႉပႅတ်ႈလႄႈၸီႇယၢင်ႇဝႃႈ တူဝ်ၸဝ်ႈၵဝ်ႇဢမ်ႇထိူၵ်ႈၶၢမ်ႇထႃႇဝရႃႉဢသၢၵ်ႈ၊ ဝႃႈၼင်ႇၼႆလႄႈ ႁဝ်းဝၢႆႇၼႃႈၸူးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။- 47လွင်ႈမၼ်းၸမ်ႉ ၽြႃးပဵၼ်ၸဝ်ႈသင်ႇလၢတ်ႈတီႈႁဝ်းၸိူဝ်ႉၼင်ႇၼႆဝႆႉလႄႈဝႃႈၸမ်ႉ၊ ၵဝ်ၶၢၼ်းမႂ်းဝႆႉပုၼ်ႈဢၼ်တၵ်းပဵၼ် ဢၼ်လႅင်း တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ႁႂ်ႈမႂ်းလႆႈပဵၼ်ပုၼ်ႈတၢင်းဢၼ်ၵႄႇၶျွတ်ႈဢဝ် တေႃႇထိုင်ႁွတ်ႈတီႈလႅၼ်သုတ်းလိၼ်မိူင်းပုၼ်ႉဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။

48မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ ငိၼ်းၵႂၢမ်းၼၼ်ႉၸိုင် ၶဝ်သိူဝ်းပျေႃႇလႄႈ ယွင်ႈယေႃးၼုၵ်ႈၵပၢတ်ႈတြႃးထႃႇဝရႃႉၽြႃးဢေႃႈ။ ၶဝ်ၸိူဝ်းဢၼ်မၼ်းၸဝ်ႈၶၢၼ်းဝႆႉ ႁႂ်ႈလႆႈထႃႇဝရႃႉဢသၢၵ်ႈၵႃႈမီးၼၼ်ႉ ႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။- 49ၼုၵ်ႈၵပၢတ်ႈထႃႇဝရႃႉၽြႃးၼၼ်ႉ ၸွတ်ႇတူဝ်ႈၵႂႃႇတင်းမိူင်းဢေႃႈ။

50မိူဝ်ႈၼၼ်ႉ ၵူၼ်းယူႉတႃႉၸိူဝ်းၼၼ်ႉ တိုၵ်းယူင်းမႄႈယိင်းဢၼ် ၵူဝ်းၵႂၢႆႇၽြႃးပဵၼ်ၸဝ်ႈလႄႈ မီးသရေႇဢိၵ်ႇတင်းၵူၼ်းဢၼ်ပဵၼ်ၵူၼ်းယႂ်ႇၵူၼ်းလူင် ၵႃႈၼႂ်းဝဵင်းၼၼ်ႉတင်းလၢႆၼၼ်ႉ ႁႂ်ႈမီးတၢင်းဢၼ်ၼိၵ်ႈၸၢၵ်ႈငႅၼ်းသႄးပေႃးလူႉတင်း ပႃႇၼပႃႉ သေယဝ်ႉ၊ ႁေႃႈၶဝ်ဢွၵ်ႇသေၵႃႈၼႂ်းလႅၼ်လိၼ်မိူင်းၼၼ်ႉဢေႃႈ။- 51တမၢၼ်ႇၸဝ်ႈၸိူဝ်းၼၼ်ႉ သၼ်ႇမုၼ်ႈလိၼ်ဢၼ်ၸပ်းတိၼ်တူဝ်ၸဝ်ႈၵဝ်ႇၼၼ်ႉ ပႅတ်ႈပၼ်တီႈၶဝ်ယဝ်ႉၸင်ႇ ၵႂႃႇၵႃႈတီႈဝဵင်းဢီႉၵေႃးၼီႉ သေဢေႃႈ။- 52တပႄးၸဝ်ႈတင်းလၢႆ တဵမ်ဝႆႉတင်းၸႂ်ဢၼ်သိူဝ်းသႂၢင်ႇ ဢိၵ်ႇတင်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။

Populære bibelvers fra
တမၢၼ်ႇၸဝ်ႈ 13

Videoer om တမၢၼ်ႇၸဝ်ႈ 13

Apostlenes gjerninger kap. 13–20

Overblikk: Apostlenes gjerninger 13-28

Bibel:

Shan

Bibelutgave: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS