တမၢၼ်ႇၸဝ်ႈ 15

1ၵူၼ်းၵမ်ႈၽွင်ႈ လုၵ်ႉသေၵႃႈတီႈမိူင်းယူႉတႃႉ လူင်းမႃးၵႃႈတီႈဝဵင်းဢၼ်ႇတီႉဢူၵ်ႉ သေယဝ်ႉ သင်ႇသွၼ်သုင်းမႃႉပၼ်တီႈပီႈၼွင်ႉၸိူဝ်းၼၼ်ႉလႄႈဝႃႈ၊ ပေႃးသူဢမ်ႇၶၢမ်ႇတၢင်းဢၼ်ထိူဝ်ႁိမ်းၸိုင် သူဢမ်ႇႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈ၊ ဝႃႈၼင်ႇၼႆဢေႃႈ။- 2မိူဝ်ႈဢၼ်ပေႃးလူႉဢိၵ်ႇတင်းပႃႇၼပႃႉ တိူင်ႇပၢင်ႇထဵင်ၵၼ်တင်းၶဝ်ၼၼ်ႉၼမ်ၼႃႇယူႇၼၼ်ႉၸိုင် ပီႈၼွင်ႉၸိူဝ်းၼၼ်ႉၸီႇယၢင်ႇႁႂ်ႈပေႃးလူႉတင်းပႃႇၼပႃႉ ဢိၵ်ႇတင်းတပႄးၸဝ်ႈတၢင်ႇၵေႃႉၵမ်ႈၽွင်ႈ ၵႂႃႇၸူးဝဵင်းယေႇရူႉသလႅမ်ႇ ၵႃႈတီႈဢၼ် တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆမီးၼၼ်ႉ ၵွပ်ႈပိူဝ်ႈလွင်ႈပျၢတ်ႈသၼႃႇၼၼ်ႉဢေႃႈ။

3ၸိူဝ်းၸဝ်ႈၼၼ်ႉ ဢဝ်ၶဝ်ၵႂႃႇသူင်ႇၵႃႈတၢင်းသေယဝ်ႉ ၶဝ်လႄႇၵႂႃႇၵႃႈၼႂ်း မိူင်းၽီႉၼိတ်ႉ တင်းမိူင်းသမႃႇရီႉသေလႄႈမွၵ်ႇလၢတ်ႈလွင်ႈတၢင်းဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၶၢႆႉပုတ်ႈမႃးၼၼ်ႉလႄႈ ႁႂ်ႈပီႈၼွင်ႉတင်းသဵင်ႈတင်းလူင်သိူဝ်းပျေႃႇဢေႃႈ။- 4မိူဝ်ႈဢၼ် ၶဝ်ႁွတ်ႈထိုင်ၵႃႈတီႈ ဝဵင်းယေႇရူႉသလႅမ်ႇၼၼ်ႉၸိုင် ၶဝ်လႆႈၶၢမ်ႇၵျေးၸူးတၢင်းဢၼ် ႁပ်ႉတုင်းဢဝ်ၵႃႈတီႈၸႃႉၸဵမ်တမၢၼ်ႇၸဝ်ႈလႄႈ ၵူၼ်းဢုပ်ႉၸိူဝ်းၸဝ်ႈဢိၵ်ႇတင်း ၵူၼ်းၶဝ်ႈၸိူဝ်းၸဝ်ႈတင်းလၢႆၼၼ်ႉလႄႈမွၵ်ႇလၢတ်ႈလွင်ႈတၢင်းၵႃႈဢၼ်ၽြႃးပဵၼ်ၸဝ်ႈ ဢဝ်ၶဝ်ႁဵတ်းၸိူဝ်းၼၼ်ႉဢေႃႈ။- 5ၶဝ်ၸိူဝ်းဢၼ်ပဵၼ်ၼႂ်းၵိူင်းၽႃႇရီႉသႄးလႄႈ ယုမ်ႇမၢတ်ႈၼၼ်ႉၵမ်ႈၽွင်ႈလုၵ်ႉလႄႈဝႃႈ တၵ်းလႆႈပၼ်တၢင်းဢၼ်ထိူဝ်ႁိမ်းၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေလႄႈ သင်ႇသွၼ်ပၼ်ႁႂ်ႈၶဝ်ၵမ်ၵျၢင်ႉတြႃးမူဝ်းသေႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

6မိူဝ်ႈၼၼ်ႉ တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆၼၼ်ႉ ၸူႉၵၼ်တုမ်ၵၼ်ႁႂ်ႈလႆႈၶႆႈၸႂ်ဝူၼ်ႉၸႂ် လူၺ်ႈလွင်ႈတီႈႁဵင်းၼၼ်ႉဢေႃႈ။- 7မိူဝ်ႈဢၼ်လႆႈမီးတၢင်းဢၼ်တိူင်ႇပၢင်ႇလၢတ်ႈၸႃၵၼ်ၼမ်ၼႃႇၼၼ်ႉၸိုင်၊ပေႇတရူႉလုၵ်ႉသေလႄႈလၢတ်ႈဝႃႈ၊ ပီႈၼွင်ႉၶဝ်ဢိူၺ်း၊ သူႁူႉလွင်ႈဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၵႃႈၼႂ်းႁဝ်းၼႆႉ ၸဵမ်မိူဝ်ႈဢွၼ်တၢင်းႁိုင်ၼႃႇၼၼ်ႉ ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းလႆႈငိၼ်းတြႃးသတၢင်းသိူဝ်းပျေႃႇၸဝ်ႈ ၵႃႈတီႈသူပ်းၵဝ်ၼႆႉလႄႈယုမ်ႇမၢတ်ႈၼၼ်ႉယူႇဢေႃႈ။- 8ၽြႃးပဵၼ်ၸဝ်ႈဢၼ်ႁူႉၸႅင်ႈႁူဝ်ၸႂ်ၼၼ်ႉ ပၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈတီႈၶဝ်ၸိူဝ်ႉၼင်ႇဢၼ်ပၼ်တီႈႁဝ်းၼႆႉၼၼ်ႉယူႇသေလႄႈ ၶၢမ်ႇသၢၵ်ႈသေႇၽၢႆႇၶဝ်ဢေႃႈ။- 9မၼ်းၸဝ်ႈႁႂ်ႈႁူဝ်ၸႂ်ၶဝ်ၼၼ်ႉမူတ်းသႂ် ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈလႄႈ ဢမ်ႇႁႂ်ႈပႅၵ်ႇႁႂ်ႈပိူင်ႈၵၼ်တင်းႁဝ်း။

10ပေႃးပဵၼ်ၸိူဝ်ႉၼင်ႇၼၼ်ၸိုင် ႁဵတ်းသင်လႄႈ ၸၢမ်းတူၺ်းၽြႃးပဵၼ်ၸဝ်ႈ ႁႂ်ႈလႆႈဢဝ်ၵၢၼ်းဢၼ်ပူႇပေႃႈႁဝ်းဢိၵ်ႇတင်းႁဝ်းဢမ်ႇႁၢပ်ႇလႆႈၼၼ်ႉ တၢင်ႇသႂ်ႇၵႃႈၼိူဝ်ၶေႃးတပႄးၸဝ်ႈတင်းလၢႆၼင်ႇႁိုဝ်။- 11ၵူၺ်းၵႃႈႁဝ်းၸိုင်ယုမ်ႇလွင်ႈဢၼ်ႁဝ်းတၵ်းႁွတ်ႈထိုင် တၢင်းဢၼ်ၵႄႇၶျွတ်ႈဢဝ် ၵွပ်ႈပိူဝ်ႈၵျေးၸူးၸဝ်ႈယေႇသူႉၶရိၸ်ႈၵူၺ်း မိူၼ်ၸိူဝ်ႉၼင်ႇၶဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။

12မိူဝ်ႈၼၼ်ႉၵူၼ်းဢၼ်ၸူႉဢၼ်တုမ်တင်းသဵင်ႈတင်းလူင်ၼၼ်ႉ ယူႇတဵတ်ႇတဵတ်ႇသေလႄႈ ထွမ်ႇပေႃးလူႉ တင်းပႃႇၼပႃႉ ၶႆႈပၼ်လၢတ်ႈပၼ် လွင်ႈၼီႉမိၵ်ႈလၢၵ်ႈၶၼႃႇလႂ်၊ လွင်ႈတၢင်းဢၼ်လီဢၢမ်းလႂ်၊ ၵႃႈဢၼ်ၽြႃးပဵၼ်ၸဝ်ႈ ဢဝ်ၶဝ်ႁဵတ်းၵႃႈတီႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉယူႇဢေႃႈ။

13ဝၢႆးသေၶဝ်လၢတ်ႈယဝ်ႉၼၼ်ႉ၊ယႃႇၵုပ်ႈလၢတ်ႈလႄႈဝႃႈ၊ ပီႈၼွင်ႉၶဝ်ဢိူၺ်း၊ ထွမ်ႇၵႂၢမ်းၵဝ်သေၵမ်းတႃႉ။- 14သီႉမုၼ်ႇႁေႃးလၢတ်ႈလွင်ႈတၢင်းဢၼ်ၽြႃးပဵၼ်ၸဝ်ႈ မႃးလူမႃးတူၺ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ မိူဝ်ႈဢွၼ်တၢင်းၼၼ်ႉ ႁႂ်ႈလႆႈၼုၵ်ႈဢဝ်ၵမ်ႈၽွင်ႈသေၵႃႈၼႂ်းၶဝ် ပုၼ်ႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉဝႆႉယဝ်ႉ။- 15ၵႂၢမ်းပရေႃးၽႅတ်ႈတင်းလၢႆၵေႃႈ မႅၼ်ႈၵၼ်တင်းလွင်ႈတၢင်းၼၼ်ႉဢေႃႈ။- 16ဢၼ်တႅမ်ႈမႃးၼႂ်းၵျၢမ်းလိၵ်ႈၼၼ်ႉလႄႈဝႃႈၸမ်ႉ ၼင်ႇႁိုဝ်ၵူၼ်းဢၼ်ၵိုတ်းၵျၢၼ်ႇဝႆႉ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ၶၢမ်ႇတၢင်းဢၼ်ဢဝ်ၼႃႇမႃႉၸိုဝ်ႈသဵင်ၵဝ် ႁွင်ႉႁဵၵ်ႈၵႃႈမီးတင်းသဵင်ႈတင်းလူင်ၼၼ်ႉ တၵ်းႁႃၽြႃးပဵၼ်ၸဝ်ႈၸိုင်၊ လိုၼ်းၼႆႉၸင်ႇၵဝ်တၵ်းၶိုၼ်းမႃးဢေႃႈ။- 17ၵဝ်တၵ်းၶိုၼ်းမႄးၵုမ်းမႄးႁဵတ်းသုမ်ႉထဵင်တႃႇဝိတ်ႈဢၼ်လူမ်ႉလႄႈမီးယူႇၼၼ်ႉဢေႃႈ။ တီႈဢၼ်ၵိူၼ်ႇပင်းလူႉလႅဝ်တင်းလၢႆၵေႃႈ ၵဝ်တၵ်းၶိုၼ်းမႄးၵုမ်းမႄးႁဵတ်းလႄႈ ႁႂ်ႈသုမ်ႉထဵင်ၼၼ်ႉၶိုၼ်းတင်ႈၶိုၼ်းပူၵ်းဢေႃႈ ဝႃႈၼႆ ၽြႃးပဵၼ်ၸဝ်ႈဢၼ်ၸီႇယၢင်ႇလွင်ႈတၢင်းၸိူဝ်းၼႆႉၼၼ်ႉ မီးပျႃႇတိၵ်ႈဝႆႉဢေႃႈ။- 18ၽြႃးပဵၼ်ၸဝ်ႈၼၼ်ႉ ႁူႉလွင်ႈတၢင်းဢၼ်မၼ်းၸဝ်ႈၸီႇယၢင်ႇ ၵႃႈမီးတင်းသဵင်ႈတင်းလူင်ၼၼ်ႉယူႇ ၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉယူႇဢေႃႈ။

19ပိူဝ်ႈၼႆလႄႈ ၵဝ်မီးသၽေႃးဢၼ်ႁဝ်းယင်းဢမ်ႇယႃႉဢမ်ႇယူၵ်ႉ ၶဝ်ၸိူဝ်းဢၼ်ၶၢႆႉပုတ်ႈသေၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ မႃးၵႃႈတီႈၽြႃးပဵၼ်ၸဝ်ႈၼၼ်ႉလႄႈ၊- 20လီတႅမ်ႈလိၵ်ႈပၼ်ၵႂႃႇၵႃႈတီႈၶဝ်ၼၼ်ႉ ႁႂ်ႈၶဝ်ဝႄႈပႅတ်ႈၶိူင်ႈပိူင်ဢၼ်ၵူဝ်ႈၵိူၵ်ႇဢၼ်ၸၢပ်ႈသႅင်ႇၵၼ်တင်းရုၵ်ႈထူႉတင်းမေႇထုင်ႇဢၼ်ဢမ်ႇတြႃး၊ တင်းၶိူင်ႈပိူင်ဢၼ်ငႅၼ်းၶေႃးဢဝ်တၢႆတင်းလိူတ်ႈၸိူဝ်းၼၼ်ႉဢေႃႈ။- 21လွင်ႈမၼ်းၸမ်ႉ ပိူဝ်ႈဢၼ်ၶဝ်ၽတ်းၵျၢမ်းလိၵ်ႈမူဝ်းသေႇ ၵႃႈၼႂ်းၸရွပ်ႈႁေႃးတြႃးတင်းလၢႆ ၼႂ်းဝၼ်းၵမ်သိၼ်ၵူႈဝၼ်းလႄႈ၊ ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉမူဝ်းသေႇမီးၶဝ်ၸိူဝ်းဢၼ်ႁေႃးလၢတ်ႈတြႃးမၼ်းယူႇ ၵႃႈၼႂ်းဝဵင်းၵူႈဝဵင်းယဝ်ႉ၊ ဝႃႈၼင်ႇၼႆဢေႃႈ။

22မိူဝ်ႈၼၼ်ႉ တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈ တင်းၵူၼ်းၶဝ်ႈၸိူဝ်းၸဝ်ႈၸိူဝ်းၼၼ်ႉ မီးသၽေႃးႁႂ်ႈလႆႈလိူၵ်ႈၵဵပ်းဢဝ် ၵူၼ်းၵႃႈၼႂ်းၶဝ်ဢၼ်ဝႃႈယူႉတႃႉ ဢၼ်လႆႈၸိုဝ်ႈမႂ်ႇ ပႃႇသပႃႉ တင်းသီႇလႃႉ ၵူၼ်းဢၼ်ၸိုဝ်ႈဢွၵ်ႇသဵင်ဢွၵ်ႇ ၼႂ်းပီႈၼွင်ႉၸိူဝ်းၼၼ်ႉလႄႈ ပွႆႇၸႂ်ႉၵႂႃႇလူၺ်ႈၵၼ်တင်းပေႃးလူႉ တင်းပႃႇၼပႃႉ ၵႃႈတီႈဝဵင်းဢၼ်ႇတီႉဢူၵ်ႉၼၼ်ႉဢေႃႈ။- 23ၼႂ်းလိၵ်ႈဢၼ်တႅမ်ႈပၼ်ၵႂႃႇၵႃႈၼႂ်းမိုဝ်းၶဝ်ၼၼ်ႉဝႃႈၸမ်ႉ တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈ တင်းပီႈၼွင်ႉၸိူဝ်းၼႆႉ မီးတင်းမႅတ်ႈတႃႇပၼ်ငိၼ်းၵႂႃႇၵႃႈတီႈပီႈၼွင်ႉၸိူဝ်းဢၼ်ယူႇၵႃႈတီႈ ၸႃႉၸဵမ်ၼႂ်းဝဵင်းဢၼ်ႇတီႉဢူၵ်ႉ မိူင်းသူႉရီႉ တင်းမိူင်းၵီႉလီႉၵီႉလႄႈ ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။- 24ပိူဝ်ႈဢၼ်ႁဝ်းလႆႈႁူႉလႆႈငိၼ်းလွင်ႈဢၼ် ၵူၼ်းၵမ်ႈၽွင်ႈဢၼ်ယင်းဢမ်ႇမီးဢၶႂၢင်ႉတီႈႁဝ်းလႄႈ ဢွၵ်ႇသေၵႃႈၼႂ်းႁဝ်းၵႂႃႇၸိူဝ်းၼၼ်ႉ ဢဝ်တင်းၵႂၢမ်းဢၼ်ဝႃႈတၵ်းလႆႈၶၢမ်ႇတၢင်းဢၼ်ထိူဝ်ႁိမ်းလႄႈ ၵမ်ၵျၢင်ႉပိင်းၺၢပ်ႈတြႃး၊ ဝႃႈၼင်ႇၼႆလႄႈ ယႃႉယူၵ်ႉႁူဝ်ၸႂ်သူ ႁႂ်ႈသူယၢပ်ႇၸႂ်ယုင်ႈၸႂ်ယူႇၼၼ်ႉလႄႈ၊- 25ႁဝ်းသၽေႃးမိူၼ်ၵၼ် ၸီႇယၢင်ႇႁႂ်ႈလႆႈလိူၵ်ႈၵဵပ်းဢဝ်ၵူၼ်းလႄႈ ပွႆႇၸႂ်ႉၵႂႃႇလူၺ်ႈၵၼ်တင်းပေႃးလူႉ တင်းပႃႇၼပႃႉ ဢၼ်ႁဝ်းႁၵ်ႉၼႃႇ၊- 26ဢၼ်ပဵၼ်ၵူၼ်းဢၼ်ႁတ်းၸုၼ်ႉဢသၢၵ်ႈတူဝ်ၸဝ်ႈၵဝ်ႇ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈႁဝ်းယေႇသူႉၶရိၸ်ႈၸိူဝ်းၼၼ်ႉ ၵႂႃႇၸူးၵႃႈတီႈသူဢေႃႈ။

27ပိူဝ်ႈၼႆလႄႈ ႁဝ်းပွႆႇၸႂ်ႉယူႉတႃႉ တင်းသီႇလႃႉ ဢၼ်တၵ်းဢဝ်တင်းသူပ်းလၢတ်ႈပၼ် လွင်ႈတၢင်းၸိူဝ်းၼႆႉ ၵႃႈတီႈသူၼၼ်ႉၵႂႃႇဢေႃႈ။- 28လိူဝ်သေလွင်ႈတၢင်းဢၼ်ထုၵ်ႇလီႁဵတ်းတင်းလၢႆၼၼ်ႉ ဝီႉၺိၺ်ႇဢၼ်မူတ်းၸၢင်ႇၸဝ်ႈဢိၵ်ႇတင်းႁဝ်းဢမ်ႇမီးဢလူဝ်ႇ ႁႂ်ႈလႆႈဢဝ်တင်းၶူဝ်းဢၼ်ၼၵ်းၼႃႇ တၢင်ႇတီႈတၢင်ႇဢၼ်တၢင်ႇသႂ်ႇၵႃႈၼိူဝ်သူ။- 29လွင်ႈတၢင်းဢၼ်ထုၵ်ႇလီႁဵတ်းၸမ်ႉ တၵ်းလႆႈဝႄႈပႅတ်ႈယိတ်ႈဢၼ်ပုၵ်ႈၸေႃႇၵႃႈတီႈၽၢႆႇၼႃႈရုၵ်ႈထူႉ ဢိၵ်ႇတင်းလိူတ်ႈ၊ တင်းၶိူင်ႈပိူင်ဢၼ်ငႅၼ်းၶေႃးဢဝ်တၢႆ တင်းမေႇထုင်ႇဢၼ်ဢမ်ႇတြႃးတင်းလၢႆဢေႃႈ။ ပေႃးဝႄႈပႅတ်ႈလွင်ႈတၢင်းၸိူဝ်းၼႆႉၸိုင် သူႁဵတ်းဢၼ်လီယဝ်ႉ။ ႁႂ်ႈယူႇလီၵိၼ်ဝၢၼ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။

30ပိူဝ်ႈၼႆလႄႈ ၶဝ်ၼၼ်ႉလႆႈဢၶႂၢင်ႉဢၼ်လႆႈၵႂႃႇၼၼ်ႉယဝ်ႉ၊ ၸင်ႇၵႂႃႇၵႃႈတီႈဝဵင်းဢၼ်ႇတီႉဢူၵ်ႉလႄႈ ႁႂ်ႈၵူၼ်းတင်းလၢႆၸူႉၵၼ်တုမ်ၵၼ်သေယဝ်ႉ၊ ဢၢပ်ႈပၼ်လိၵ်ႈၼၼ်ႉဢေႃႈ။- 31မိူဝ်ႈဢၼ်ၶဝ်ၽတ်းလိၵ်ႈၼၼ်ႉၸိုင် ၶဝ်သိူဝ်းပျေႃႇၵွပ်ႈပိူဝ်ႈတၢင်းဢၼ်သၢၵ်ႈသႃႇၼၼ်ႉဢေႃႈ။- 32ယူႉတႃႉ တင်းသီႇလႃႉၼၼ်ႉ ပိူဝ်ႈဢၼ်ပဵၼ်ပရေႃးၽႅတ်ႈလႄႈ ဢဝ်တင်းၵႂၢမ်းၼမ်ၼႃႇသင်ႇသွၼ်သုင်းမႃႉပၼ် တီႈပီႈၼွင်ႉၸိူဝ်းၼၼ်ႉ ႁႂ်ႈၶဝ်မၼ်ႈၶိူင်ႇဢေႃႈ။

33ၶဝ်ၼၼ်ႉယူႇႁၢမ်ႉႁိုင်တၢၼ်ႇတၢၼ်ႇသေယဝ်ႉ ပီႈၼွင်ႉၸိူဝ်းၼၼ်ႉပွႆႇၶဝ်ၶိုၼ်းမိူဝ်းၵႂႃႇၵႃႈတီႈတမၢၼ်ႇၸဝ်ႈတင်းလၢႆၼိမ်ၼိမ်လီလီဢေႃႈ။- 34ၼႂ်းဝႃႈၼၼ်သေၵေႃႈ သီႇလႃႉၼၼ်ႉ ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇသေလႄႈ ၵိုတ်းသဝ်းယူႇဢေႃႈ။- 35ပေႃးလူႉတင်းပႃႇၼပႃႉၵေႃႈယူႇၵႃႈၼႂ်းဝဵင်းဢၼ်ႇတီႉဢူၵ်ႉၼၼ်ႉသေလႄႈ ဢိၵ်ႇတင်းပိူၼ်ႈတၢင်ႇၵေႃႉၼမ်ၼႃႇ ဢွၼ်ၵၼ်သင်ႇသွၼ်သုင်းမႃႉပၼ်လႄႈ ႁေႃးလၢတ်ႈၼုၵ်ႈၵပၢတ်ႈတြႃးသတၢင်းသိူဝ်းပျေႃႇၸဝ်ႈၽြႃးဢေႃႈ။

36ၶိင်ႇၵႃႇလႃႉႁိုင်တၢၼ်ႇတၢၼ်ႇယဝ်ႉပေႃးလူႉလၢတ်ႈတီႈပႃႇၼပႃႉလႄႈဝႃႈ ၼင်ႇႁိုဝ်တၵ်းလႆႈလူလႆႈတူၺ်း လွင်ႈဢၼ်ပီႈၼွင်ႉဢၼ်မီးၵႃႈၼႂ်းဝဵင်း ၸႃႉဢၼ်ႁဝ်းယၢမ်ႈႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၽြႃးၸိူဝ်းၼၼ်ႉ မီးယူႇၸိူဝ်ႉၼင်ႇႁိုဝ်ၼၼ်ႉၸိုင်၊ ၶိုၼ်းမိူဝ်းတႃႉႁဝ်း၊ ဝႃႈၼင်ႇၼႆဢေႃႈ။- 37ပႃႇၼပႃႉဢၢင်ႈတၵ်းႁွင်ႉဢဝ် ယူဝ်းႁၢၼ်ႇဢၼ်မီးၸိုဝ်ႈမီးသဵင် မႃႇၵူႉၼၼ်ႉဢေႃႈ။- 38ၵူၺ်းၵႃႈပေႃးလူႉမီးသၽေႃး ဢၼ်ဝႃႈဢမ်ႇထုၵ်ႇလီႁွင်ႉဢဝ်ၵေႃႉဢၼ်ၽၢတ်ႇၵၼ်တင်းၶဝ်သေၵႃႈၼႂ်းမိူင်းပမ်ႇၽူႉလီႉလႄႈ ဢမ်ႇၸွမ်းဢမ်ႇၵႂႃႇၵႃႈတီႈၵၢၼ်တၢင်းႁဵတ်းၸဝ်ႈၼၼ်ႉ၊ ဝႃႈၼင်ႇၼႆဢေႃႈ။- 39ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၶဝ်ၵေႃႉၼိုင်ႈလႄႈၵေႃႉၼိုင်ႈဢမ်ႇထုၵ်ႇဢမ်ႇပေႃးၵၼ်တေႃႇထိုင်ႁွတ်ႈထၼ်ႈပေႃးၽၢတ်ႇၽႄၵၼ်ၵႂႃႇၵေႃႉတီႈၵေႃႉတၢင်းလႄႈ ပႃႇၼပႃႉ ၼၼ်ႉႁွင်ႉဢဝ်မႃႇၵူႉ ယဝ်ႉၸင်ႇၶီႇႁိူဝ်းသၢင်းၽေႃးၵႂႃႇ ၵႃႈတီႈၵုၼ်ၵူႉပရူႉဢေႃႈ။- 40ပေႃးလူႉၼၼ်ႉ လႆႈၶၢမ်ႇတၢင်းဢၼ်ပီႈၼွင်ႉတင်းလၢႆ ဢဝ်မၼ်းဢၢပ်ႈပၼ်တီႈၵျေးၸူးၽြႃးပဵၼ်ၸဝ်ႈလႄႈ လိူၵ်ႈၵဵပ်းဢဝ်သီႇလႃႉ ယဝ်ႉၸင်ႇဢွၵ်ႇၵႂႃႇသေၵႃႈတီႈၼၼ်ႈလႄႈ၊- 41လႄႇလဵပ်ႈၵႂႃႇၵႃႈၼႂ်းမိူင်းသူႉရီႉ တင်းမိူင်းၵီႉလီႉၵီႉလႄႈ ႁႂ်ႈၸိူဝ်းၸဝ်ႈတင်းလၢႆမၼ်ႈၶိူင်ႇယူႇဢေႃႈ။

Populære bibelvers fra
တမၢၼ်ႇၸဝ်ႈ 15

Videoer om တမၢၼ်ႇၸဝ်ႈ 15

Apostlenes gjerninger kap. 13–20

Overblikk: Apostlenes gjerninger 13-28

Bibel:

Shan

Bibelutgave: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS