Jénésis 46
46
Jekôp o/dim ne Kyikû Emen o-jâ Éjip
1Jekôp o/wuri kángkáng byěm ḿbyí o/mû ne mbyí o-dim Byíshíba o-da-chi byifen o-kye Osówo, Osówo mú Ázik mú bonchí emen. 2Osówo o-pem ne nyǐ ké burê ne buchú o-kó ǎ, Jekôp.
Jekôp o-bángê.
3Osówo o-sét ǎ o/fu, me n-chi i Osówo, Osówo mú bonchí eyên. *Dashî Éjip ece*. N/chi n-chi bwǎn eyên ba-firi kiǐtí-oshê ké oshê ámu. 4Me n/chi n-ca ne wo ké kyikû a-ribi Éjip, ne n/chi m-bwa esim ne bwǎn eyên ké esí ńnyín. Josêf o/chi o-kyú ne wo nkéré mú adakpú.
5Jekôp o/dim ké Byíshíba. Bwǎn emen ba-kúng ǎ ne bwǎn ebe ḿbé bwǎsíng ne banyi ebe ba-fé ké bamútu ḿbé otu mú Éjip o/twóm. 6Ba-kúng byitú ebe ne byěm ebe ḿbyí ba/mû ne mbyí ké Kínan ba-dim Éjip. Jekôp o/kúng kángkáng kyikû-banet emen o-dim ne mbé Éjip, 7bwǎn emen ne bwǎn ḿbé bwǎn emen ba/fwon.
8Banet ḿbé kyikû-banet ńkyí Jekôp ḿbé ba/dim Éjip ne nyǐ ké kyikû ba/mû wǎn-onyinchéng emen mú mbwôp kashú, Rúben 9ne bwǎn-banyinchéng emen, ne Hánok ne Pálu ne Hézoron ne Kámyi. 10O-kúng to Syímyon ne bwǎn-banyinchéng emen, Jémwel ne Jámin ne Óhat ne Jákin ne Zóha ne Shôl mú boné emen o/fím Kínan. 11O-kúng to Lyíva ne bwǎn-banyinchéng emen, Géshon ne Kóhat ne Merári. 12O-kúng to Júda ne bwǎn-banyinchéng emen, Shíla ne Pérez ne Zéra. Bwǎn-banyinchéng ḿbé Júda ḿbé babónge, Êe ne Ónan ba/mû ba/kpú ké Kínan. Bwǎn-banyinchéng ḿbé Pérez ba/mû Hézoron ne Hámul. 13O-kúng to Ézaka ne bwǎn-banyinchéng emen, Tóla ne Pwâ ne Jáshup ne Shímoron. 14O-kúng to Zébélon ne bwǎn-banyinchéng emen, Séret ne Élon ne Jálel. 15Bwǎn ḿbén nké Lyâ o/fwon ne Jekôp ké Mesopotémya, cibicibi ne Dyímina mú wǎn emen mú onyinyi. Bwǎn ḿbé Lyâ kángkáng ba/mû bujam esim diǐkpú ne bachât.
16O-kúng to Gât ne bwǎn-banyinchéng emen, Zéfon ne Hágyi ne Shúnyi ne Ézobon ne Erí ne Árot ne Arélyi. 17O-kúng to Ásha ne bwǎn-banyinchéng emen, Émana ne Eshíba ne Eshíbyi ne Beryâ ne Será mú wǎn-boné ebe mú onyinyi. Bwǎn-banyinchéng ḿbé Beryâ ba/mû Hébe ne Makyêl. 18Ḿbén ashí onyiryiká ne din ba/mû bwǎn ḿbé Jekôp o/fwon ne Zípa mú wǎn-ósóng-onyinyi mú Lában o/kye Lyâ mú wǎn emen mú onyinyi.
19Ríchel mú onyi-Jekôp o/fwon ǎ bwǎn-banyinchéng ashí afee, Josêf ne Běnjámin. 20Ké Éjip, Josêf o/fwon bwǎn-banyinchéng ashí afee, Manáse ne Éferem ne onyi emen Asénat mú wǎn-Potyiféra, mú o/mû nchi kyifen ké Helópólis. 21Bwǎn-banyinchéng ḿbé Běnjámin ba/mû Béla ne Béke ne Ashíbel ne Géra ne Náman ne Ehyí ne Róshi ne Múpim ne Húpim ne Árat. 22Ḿbén ashí diǐkpú ne anyii ba/mû bwǎn ḿbé Jekôp o/fwon ne Ríchel.
23O-kúng to Dǎn ne wǎn-onyinchéng emen, Húshim. 24O-kúng to Nafatályi ne bwǎn-banyinchéng emen, Jázêl ne Gúnyi ne Jéza ne Shílem. 25Ḿbén ashí káchâtkányi ba/mû bwǎn ḿbé Jekôp o/fwon ne Byíla mú wǎn-ósóng-onyinyi mú Lában o/kye Ríchel mú wǎn emen mú onyinyi.
26Bwǎn ḿbé Jekôp oyén ḿbé ba/dim Éjip ne nyǐ ké kyikû ba/mû bajam bachât esim nyâchât, banyi ḿbé bwǎn emen ba*fí ké kafâ*. 27Josêf o/mû o/fwon bwǎn bafee ké Éjip, ne â a/yip a-cibi, bwǎn ba-firi ng bajam bachât esim diǐkpú ḿbé kyikû-banet ńkyí Jekôp ḿbé ba/jé Éjip.
Jekôp ne Kyikû-Banet Emen ké Éjip.
28Jekôp o/twóm Júda o-bwóp ǎ kashú o/fu, oda-sét Josêf o-kâm kámbé ké Góshen. Ńdyí ba/ribi, 29Josêf o/nung ké mútu emen mú bubyî-orá budatut o-dim Góshen ne bonchí edakwárê. Ńdyí ba/kâm barî, Josêf o/kpárê bonchí abwô o-tii ka-bwon! 30Jekôp o-sét Josêf o/fu, mm/kpá byiko ḿbyí ndakpú kántîk mú nn/ri ǒ, n-nyît n/fu, wo a/tôong okpó.
31Ne Josêf o-sét bwǎn-bané emen ne kángkáng kyikû-banet ńkyí bonchí o/fu, m-man n-ca n-da-sét otu n/fu, bwǎn-bané ejí ne kángkáng kyikû-banet ńkyí bonchí ejí, ḿbé ba/mû ba-kyú u ké Kínan, baa/bê ba-kâm mě. 32N/chi n-sét ǎ n/fu, ben ba-chi i bambâm ebû mú bamu ba-bám m byitú, ne baa/bê ne byitú enen ne kángkáng byěm byikíri ḿbyí bamu ne mbyí. 33Â otu o/kó běn o-bí běn dyizong-ḿkpóngé ńdyí bamu ba-chi i, 34sét n̂g ǎ ba/fu, ben ké akpen enen kángkáng bamu ba-bám m byitú wǎ eringe nyí banchí enen ḿbé kpákpá ba/mû ba-bám m. Ké bukwóp ḿbún, o/chi o-bángê běn ba-kyú ké kyikim-esí ńkyí Góshen. Josêf o/sét ńkyín, ké nǎ, banet ḿbé Éjip ba-ciring ng bambâm ebû.
Markert nå:
Jénésis 46: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
