Jénésis 45
45
Josêf o/sét Bwǎn-Bané Emen kyi-kim ne Byiko Emen
1Josêf o/mû o*fí to o-man n ekám byiko emen* ké bushú-bǎmgbán emen* ne o-sét kámbé kâng o/fu, babyí ké nfût emen. Onet okíri o/mû o*fí to ányi* ké nkéré o/sét bwǎn-bané emen kyi-kim ne byiko emen*. 2O/tii kakânkakân tete banet ḿbé Éjip ba-jwo, ba-dim ba-da-sét otu. 3Josêf o-sét bwǎn-bané emen o/fu, me n-chi i Josêf. Bonchí ejí o/tôong okpó? Nké ńdyí bwǎn-bané emen ba/jwo ńkyín, bushî bu/róng kámbé ḿbú ba*da ǎ eman efaa ojá*. 4Ne Josêf o-sét kámbé kâng o/fu, kamgbe, tín n̂ ba-fárâng mě. Ba-tín ba-fárâng ǎ, ne o-sét kámbé o/fu, me n-chi i Josêf mú wǎn-boné enen mú ba/shee ǎ ké Éjip. 5Kántîk, *da n̂g ekédê ofong* ba-bîn nang byiko enen* ké nǎ, ben ba/shee mě nyín* Osówo oyén nké o/twóm mě m-bwóp běn kashú m-ba-nyii akpen nyí banet. 6Esong ee/nwa ké aje afee nké nke. Aje aa/waa atánge nyí banet baa*ba/chi ba-kpang* ba-fuu nang chwǒm*. 7Osówo o/twóm mě m-bwóp běn kashú m-ba-nyii běn ké bukwóp ḿbún ḿbú boo*nwa esét* eringe nyí ben ne bwǎn enen baa*ba/chi ba-kpú*. 8Ké bubwô ámbu kâng, *chí ben nké ba/twóm mě nyín* Osówo nké o/twóm mě. Oo/chi mě n-firi onet-dyishí mú o/nye otu abwô ké esim. Oshê omúmú mu ké abwô ejí. Me nké mu otu mú Éjip emúmú.
9Bwa n̂g esim kántîk ochéé óchee ba-kâm bonchí ejí ba-da-sét ǎ ba/fu, něen nké Josêf mú wǎn eyên o/fu, Osówo oo/chi mě n-firi otu mú Éjip emúmú. Bâ a-kâm mě, *dabên nkéré*. 10Nyǐ o-man n ekyú ké kyikim-esí ńkyí Góshen, ńkyí o/chi o-fárâng mě, nyǐ ne bwǎn emen ne bwǎn ḿbé bwǎn emen ne ebû emen ne bampong emen ne kángkáng byěm byikíri ḿbyí mu ne mbyí. 11Â o/kyú ké Góshen, m-man n ǎ enen. Esong e-chî ng enwa ké aje atánge, ne n*fí n-ryuu ng n/fu, nyǐ ne kyikû-banet emen ne byitú emen byikpú esong*.
12Josêf o-raa o-ca kashú o/fu, kántîk, ben ashí kángkáng, cibicibi ne wo, ǎ Běnjámin, ba-man n enyît ba/fu, me Josêf ké ntûntû. 13Sét n̂g bonchí ejí eringe nyí me mu ne kiǐtí-busa kwán ké Éjip, ba-sét ǎ to kyi-kim ne kángkáng byěm ḿbyí ben baa/ri. Â ba/sét ǎ éné kâng, kpî n̂g ǎ ochéé óchee ba-bâ ne nyǐ nyín.
14Josêf o-rwâm Běnjámin mú ba/fím boné obónge o-kpet etii. Běnjámin to o-kpet etii ńdyí mu o-só ng ǎ. 15O-waa ne batíí ké achi o-rwâm bwǎn-bané emen ké onet ké onet, o-fé kámbé ocím. Ńdyí o/rwâm kámbé kpók, bwǎn-bané emen ba-kpet epem ne nyǐ.
16Ńdyí kyisédéng kyi/ribi ké kyibám-butu ba/fu, bwǎn-bané-Josêf baa/bê, kyi/nyîn otu ne banet-ashí-bǎmkpóngé emen. 17Otu o-sét Josêf o/fu, sét bwǎn-bané eyên ba-tû boonyam-atû ebe byiryíng ba-bwa esim ké esí nyí Kínan. 18Baca ba-da-kpî bonchí ebe ne byikû-banet ebe ba-bwa esim nyín. Me n/chi n-kye kámbé esí nyí e/nwa e-shwôm ké Éjip, ne ba-já ng byiryíng chwóó ḿbyí badaryí. 19Sét kámbé ba-kúng to bamútu ḿbé bampong badatut, nyín ké Éjip, ḿbé badatû banyi ebe ne bwǎn ebe ḿbé ba*da/kán ne* ba-kpî to bonchí ebe ba-bâ ne nyǐ. 20Ba*dachi ba-kérê kyi-kim ne byěm ebe ḿbyí ba/chi ba-dim ba-mîng ké esim* kángkáng byěm ḿbyí byinong ké Éjip byi/chi byi-já kámbé.
21Bwǎn-Jekôp ba-chi eringe nyí ba/sét kámbé. Josêf o-kye kámbé bamútu ámbe wǎ eringe nyí otu o/kye busa ne byiryíng ḿbyí badaryí ké bukwóp. 22O/kye to kámbé dyizu-byídí ḿbyí byifyîfî dyibónge dyibónge, nké o/kye Běnjámin égot-akpuga ebónge ne bajam batánge nyí ba/chi ké syílyíba ne azu-byídí atánge. 23O-twóm bonchí boonyam-atû diǐkpú ḿbú bu/tû byěm ḿbyí byinong byinong ḿbyí byi/fím Éjip ne boonyam-atû bukíri to diǐkpú ḿbú bu/tû byiryíng ḿbyí bonchí ebe odaryí ké bukwóp. 24O-twóm bwǎn-bané emen ba-dim, ne ńdyí ba-kú ba-dim m, o/sét kámbé o/fu, *da n̂g echi ba-shwôn ne barî ké bukwóp*.
25Mbé ba-dim dyijê ba-kâm Jekôp mú bonchí ebe ké Kínan, 26ba-da-sét ǎ ba/fu, Josêf o/tôong okpó. Nyǐ nké o/firi otu mú Éjip emúmú. Jekôp o-sáng ké byiko, o*da/bángê ńkyí ba/sét ǎ*.
27Nké ké nkéré mú baa/sét ǎ kángkáng byěm ḿbyí Josêf o/sét kámbé, o-ri bamútu ḿbé Josêf o/twóm o/fu, bayip ǎ o-dim Éjip, busa ba-nung ǎ. 28O-raa o/fu, Josêf mú wǎn ejí o/tôong okpó? Ńkyín kǎnchí nké ndabí. M-man n-ca n-da-ri ǎ ne n-kûkpú.
Markert nå:
Jénésis 45: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
