Jénésis 44
44
Mmîk mú o/tánê
1Josêf o/sét ḿgbán emen mú mu o-tún n ǎ kyise o/fu, fé byiryíng ké biimbam ḿbyí banyinchéng ámbe byi-sú eringe nyí nang yeě nang yeě odaman etû. Bwa ne akpuga ebe a-fé kámbé kyíbóng, ké kafâ-biimbam ebe. 2Yip mmîk ejí mú syílyíba a-fé ké kafâ-kiimbam ńkyí mú wǎsíng, cibicibi ne akpuga emen nyí o/ré byiryíng. Ḿgbán ámu o-chi eringe nyí ba/sét ǎ. 3Ké dyicófóróng pirípirí, bwǎn-bané-Josêf ámbe ba-dim dyijê ne boonyam-atû ebe. 4Ńdyí ba/mîng oshê, ba*da/cen ba-tíbî* Josêf o-sét ḿgbán emen ámu o/fu, ca babap ne banyinchéng ámbe ké kyikû. Â a/kâm kámbé, bí kámbé a/fu, ebóng me n/chi běn kanong, ben ba-chi mě kyibî. [5Ebóng ben ba/jii mmîk-syílyíba mú bonchí ejí.] Mǔ nké nyǐ mu o-jwáp ng bato ké mǔ, o-sô ng to epé ké mǔ. Ben baa/chi kiǐtí-kyibî.
6Ké nkéré mú ḿgbán ámu o/kâm kámbé, o/kúng ejá ányi o-sét kámbé. 7Mbé ba-faa ǎ ba/fu, bonchí, ebóng chwǒm ńkyí wo amu a-raa ng něen. Be byi/sem Osówo byi/fu, byi*da/chi dyizong-chwǒm ándyi*. 8Wo amu a-nyît ng a/fu, be byi/fím ké esí nyí Kínan byi-bwa esim ne akpuga nyí byi/ri ké kafâ-biimbam eten byi-ba-kye ǒ. Be byi-cen n nǎ ne byi-jii syílyíba nang gûl ké kyise ńkyí bonchí eyên. 9Bonchí, nang yeě ké burwám eten nké ba/ri ǎ ne mǔ, onet ámu okpú, burwám eten ḿbú kwán ba-firi básóng eyên.
10Nyǐ o-sét kámbé o/fu, m/bángê, nké onet mú byi/chi byi-ri ǎ ne mmîk nké o/chi o-firi ósóng ejí, ben burwám ḿbú áku ba-jâ. 11Ne ba-shû biimbam ebe ochéé óchee ba-tî kyísí, nang yeě nang yeě o-bâa ńkyí emen. 12Ḿgbán-Josêf ámu o-kpet epet biimbam ebe kanong kanong o-câ, kyi-fím ké mú okínkán tete kyi-ribi ké mú wǎsíng, ne o-ri mmîk ámu ké kiimbam ńkyí Běnjámin. 13Bwǎn-bané emen ba-ját byídí ebe ké bafip, ba-yip atû ba-tû boonyam-atû ebe, ba-bwa esim ké oshê.
14Ké nkéré mú Júda ne bwǎn-bané emen ba/ribi ké kyise ńkyí Josêf, Josêf o/mû o/tôong ányi. Mbé ba-tíngê kyísí ba-fé ǎ, 15ne Josêf o-bí kámbé o/fu, ebóng chwǒm ńkyí ben ba/chi éné. Ben ba*fí ba-nyît ng ba/fu, onet wǎ me m-man n enyît ńkyí ben ba/chi ké epé esô*?
16Júda o-faa ǎ o/fu, ányi byi-sét ng ebóng kántîk, ǎ bonchí. Byi-cen n nǎ ne byi-kán ké dyishí. Byi-cen n nǎ ne byi-paa byiko eten. Osówo oo/fîm kyibî eten o-tî kyíjí. Be ashí amúmú byi/firi básóng eyên kántîk, *chí nang onet mú ba/ri ǎ ne mmîk nké nke*.
17Josêf o-faa o/fu, aa*wááng* me mm*man n-chi éné*. Onet mú ba/ri ǎ ne mmîk nké nke nké odakyú ósóng ejí. Ben burwám ḿbú áku ba-man n ebwa esim, chwǒm kii*chi běn* ba-kâm bonchí enen.
Júda o/tîm Arông ké Dyishí-Běnjámin
18Júda o-dim o-kâm Josêf, o-sét ǎ o/fu, kamgbe, ǎ bonchí, mîng mě m-pem ne wo. *Dachi a-sa kafâ ne me*. Wo amu wǎ otu oyén. 19Bonchí, wo a/bí bě a/fu, ben bamu ne bonchí nang ne wǎn-boné mú onyinchéng okíri? 20Be byi-faa byi/fu, be byimu ne bonchí mú oo/kâa ne nche eten mú bonchí eten o/fwon ǎ ké bukâa. Wǎn-boné eten mú obónge, mú wǎsíng oo/kpú, ne nyǐ kǎnchí ké bwǎn ḿbé boné emen nké o/waa. O-jê ng bonchí emen kanong kanong. 21Wo a/sét bě, ǎ bonchí, a/fu, be byibâ ne nyǐ wo a-ri ǎ, 22ne be byi-sét ǒ byi/fu, mú wǎsíng oo*ba/chi o-man edim o-mîng bonchí*. Â o/dim, bonchí emen o/chi o-kpú. 23Ne wo a-sét bě kâng a/fu, baa*man to ebê ne be ké bushú eyên* tete byi-bâ ne nche eten wo a-ri ǎ.
24Ńdyí byi/bwa esim byi-kâm bonchí eten, byi/sét ǎ ńkyí wo a/fu. 25Ne o-sét bě o/fu, be byibwa esim byi-chîbaré onyin-byiryíng. 26Be byi-sét ǎ byi/fu, bii*ce*. Baa*ba/chi ba-bángê bě byi-ri onyinchéng ámu* tete nche eten o-ca ne be ké kyikû. Â nche eten o*da/ce ne be ké kyikû* bii*ce*. 27Bonchí eten o-sét bě o/fu, ben bamu ba-nyît ng ba/fu, Ríchel mú onyi ejí o/fwon mě bwǎn-banyinchéng bafee nké nke. 28Obónge oo/dim o-mîng mě. Kántîk, kyibî-enyam ee/ját ǎ boǒcê boǒcê kyi-pwó, ké nǎ, n*da ǎ echîri ne* kyi-fím ké nkéré mú o/dim*. 29Â ba/chîkúng mún něen ba-dim ne nyǐ chwǒm kyi-chi ǎ, bafip ḿbé ben ba/chi ba-fé mě, ba/chi ba-chi mě m-kpú, wǎ eringe nyí nn/kâa něen.
30-31Júda o-chîraa o-ca kashú o/fu, â n*da/bwa esim ne mú wǎsíng mún* bonchí o-ri ng o-bâ o/fu, mú wǎsíng o*da/fyi ne me* o/chi o-kpú. O/bwá dyikpen emen ké wǎn mún, ne oo/kâa o-shwôm mú bafip ḿbé byi/chi byi-fé ǎ ba/chi ba-chi ǎ o-kpú. 32Ké ntûntû, ǎ otu ejí, me n/ryí ǎ ocím n/fu, n-kyâ kyitông ejí ké dyishí-wǎn mún. Me n/sét ǎ n/fu, â n*da/bwa esim ne mú wǎsíng* ébîn ewaa ne me ké kángkáng dyikpen ejí. 33Kántîk, ǎ bonchí, me n/chi n-waa nyín n-firi ósóng eyên ké dyishí-wǎn mún. Mîng ǎ o-bwa esim ne bwǎn-bané emen. 34Me n-cen n nǎ ne m-bwa esim n-kâm bonchí ejí â mú wǎsíng o*fí ne me ké kyikû*. Me mm*ba/chi m-man ebwom n-ri dyizong-chwǒm ńdyín dyi-chi bonchí ejí*.
Markert nå:
Jénésis 44: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
