Jénésis 43
43
Bwǎn-Boné-Josêf ba/bwa Esim Éjip ne Běnjámin
1Esong nyí e/róng ké Kínan e/mû ee/yógê e-shwôm, 2ne banet ḿbé Jekôp baa/ryí kángkáng byiryíng ḿbyí ba/ré ké Éjip. Jekôp o/sét bwǎn emen o/fu, bwa n̂g esim ba-chîdaré onyin-byiryíng ba-ba-kye bě.
3Júda o-sét ǎ o/fu, onyinchéng ámu o/kuri bě ekó kanong kanong o/fu, baa*ba/chi ba-bángê bě byi-ri ǎ* â byi*da/ce ne wǎn-boné eten*. 4Â a-twóm m wǎn-boné eten o-ca ne be, byi-câ byi-da-ré ǒ byiryíng. 5Â a*da/bángê* bii*ce* ké nǎ, onyinchéng ámu o/sét bě o/fu, baa*ba/chi ba-bángê bě byi-ri ǎ* â byi*da/ce ne wǎn-boné eten*.
6Jekôp o-raa o/fu, ebóng ba/kye mě afaníkong nyí ba/sét onyinchéng ámu ba/fu, ben bamu ne wǎn-boné okíri.
7Mbé ba-faa ǎ ba/fu, onyinchéng ámu o/mû mu o-jang ng bě ebí kyi-kim ne kyikû eten, o/fu, bonchí enen o/tôong okpó? Ben bamu ne wǎn-boné okíri? Byi/mû byi-man ba-faa bǎmbím ḿbé o/mû mu o-bí ng bě. Be byi/mû byi*da/nyît byi/fu, o/chi o-sét bě o/fu, byibâ ne wǎn-boné eten*.
8Júda o-sét bonchí o/fu, twóm mě ne mú wǎsíng ne byi/chi byi-dim babap, eringe nyí bii*ba/chi byi-kpú esong*. 9Me m-man n ekye kyitông ńkyí ejí me oyén, ne a-man mě eníbî ké dyishí emen. Â n*da/fyi ne nyǐ kerededet* ébîn ewaa ne me. 10Â byi/mû byi*da/jang erí* něen bii/ce byi-bwa esim kampén nang kafee.
11Bonchí ebe o-sét kámbé o/fu, â éné nké kyi/chi kyi-kyú, kúng n̂g byěm ḿbyí byinong byinong, ḿbyí ké esí nyí eten ba-fé ké biimbam enen, ba-ca ne mbyí wǎ eyáré ba-da-kye onet-dyishí-oshê ámu. Kúng n̂g onyin-burwan ne onyin-bakút-bukwan ne esang-kasu ne byirim-byichí ḿbyí badakó pyitákyo ne ámon. 12Kúng n̂g to akpuga a-jê a-shwôm nyí kashú, ké nǎ, ba-man ba-bwa esim ne akpuga nyí ba/fé běn ké biimbam. Katô ba/mû ba/ráp orábáng. 13Kúng n̂g wǎn-boné enen ba-fyi ochéé óchee. 14Kyi/bát Osówo mú o/rêe o-shwôm ochi onyinchéng ámu o-ri běn bafip, o-bwa esim ne Běnjámin ne wǎn-boné enen mú áku o-kye běn. Ké byiko ejí, â ba/fu, n*da/chîri bwǎn ejí* nn*ri to kámbé*.
15Ne bwǎn emen ba-kúng kâng eyáré ányi ne akpuga nyí a/jê a-shwôm nyí kashú ba-dim Éjip ne Běnjámin. Ńdyí ba/ribi áku, ba/ce ké kyikit-Josêf. 16Ńdyí Josêf o/ri Běnjámin ne mbé ké kyikû, o/sét ḿgbán emen mú mu o-tún n ǎ kyise o/fu, yip banet ḿbén a-ca ne mbé ké kyise ejí. Ba/chi ba-ryí byiryíng-esû ne me. Ju kyitú a-rám kánkyí. 17Ḿgbán ámu o-chi eringe nyí ba/sét ǎ, o-kúng kámbé o-dim ne mbé ké kyise-Josêf.
18Ńdyí mbe ba-bâ ne mbé ké kyise, bushî bu/kám kámbé, ba-kpet ekabe ba/fu, mbe ba-bâ ne be nyín ké bubwô-akpuga nyí ba/bwa ne nyǐ esim ba-fé bě ké biimbam. Ba/chi ba-kye bě bunwa ḿbú bii*kpá byiko* ba-koo boonyam-atû eten, ba-chi bě byi-firi básóng emen. 19Ne ba-ribi ké ocím-dyifyi, ba/sét kâng mú ḿgbán ámu ba/fu, 20bonchí, be byi/mû bii/bê nyín kpá byi-ba-ré byiryíng. 21Ńdyí buchú bu/jí bě ké bukwóp byi-rí, nang yeě nang yeě o/bâa kiimbam o-ri akpuga emen nyí o/mû o/ré byiryíng kerededet ké kafâ. Bii/bê ne nyǐ byi/fu, byi-bâ ng ǒ ekye. 22Bii/bê to ne akpuga akíri nyí byi/chi byi-ré byiryíng byikíri. Be byi*fí byi-nyît ng onet mú o/bwa ne akpuga eten o-fé bě ké biimbam*.
23Ḿgbán ámu o-sét kámbé o/fu, *da n̂g ekérê*. *Da n̂g echi ba-shî*. Kyi-man ekyú kyi/fu, Osówo enen ne mú bonchí enen nké o/fé běn akpuga ányi ké biimbam enen. Me n/koo akpuga enen nyí ba/ré byiryíng. Ne o-da-kpî kâng Syímyon o-ba-kye kámbé.
24Ḿgbán ámu o-kúng bwǎn-boné-Josêf o-ca ne mbé ké kyise. O-kye kámbé omu ba-soo byiká, o-kye boonyam-atû ebe byiryíng. 25Mbé ba-kpá byiko ne eyáré ebe nyí badakye Josêf ké nkéré oo/bê ne esû, ké nǎ, ba/mû ba/sét kámbé ba/fu, ba/chi ba-ryí byiryíng ne nyǐ. 26Ké nkéré mú Josêf o/ribi ké kyise, ba/kúng eyáré ányi ba-kâm ǎ, ba-tíngê kyísí ba-fé ǎ. 27Nyǐ o-bí kámbé kyi-kim ne byiko ebe, ne o-raa kâng ne mbé o/fu, ben ba/sét mě kyi-kim ne bonchí enen mú oo/kâa. Nyǐ mu nǎ. O/tôong okpó ké enyam-byiko emen?
28Mbé ba-faa ǎ ba/fu, bonchí eten mú ḿgbán eyên o/tôong okpó, ne mu kanong. Ne ba-tím arông kyísí ba-tíngê kyísí ba-fé ǎ.
29Ńdyí Josêf o/ri Běnjámin mú wǎn-boné emen, o/bí kámbé o/fu, nryî esim-wǎn-boné enen mú ba/sét mě kyi-kim ne nyǐ něen? Osówo ojware ǒ, ǎ wǎn ejí. 30Ne Josêf o-dim ochéé óchee, ké nǎ, bukyû bu/mû mbu bu-chi i ǎ etii kyi-kim ne wǎn-boné emen. O/mû o-kú o-bâ etii ne o-dim o-da-nung ké nfût emen o-kpet esuri batíí. 31Ké nkéré mú oo/soo bushú emen, o-byí o-kâm kámbé, o-kám byiko emen, o-kó o/fu, babâ ne byiryíng. 32Josêf o/mû mu o-ryí i byiryíng ké ókpákpúrúk mú emen cát ne mú bwǎn-bané emen. Banet ḿbé Éjip ḿbé ba/mû ányi ba/kyú to ké ókpákpúrúk mú ebe cát, ké nǎ, kyi-chi i kámbé wǎ chwǒm byiko edángê â ba/ryí byiryíng kyikit kyibónge ne banet-Hyíburu. 33Bwǎn-bané emen ba/kyú ba-bírî Josêf kashú ké bunye ké bunye, kyi-fím ké mú okínkán tete kyi-ribi ké mú wǎsíng. Ké nkéré mú ba/ri eringe nyí ba/kyú éné, ba/bírî achi ba-tún barî, byiko byi-kaa kámbé. 34Ba/mû mbe ba-kpere ng byiryíng ké ókpákpúrúk mú Josêf ne ba-kye kámbé, ne Běnjámin o/ryí kampén katánge o-shwôm eringe nyí bwǎn-bané ba/ryí. Ne ba-ryí byiryíng ba-jwáp bato ne Josêf tete ba-kpet ebwóm.
Markert nå:
Jénésis 43: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
