Jénésis 42
42
Bwǎn-Bané-Josêf ba/dim Byiryíng edaré ké Éjip
1Ké nkéré mú Jekôp o/jwo ba/fu, byiryíng mbyi ké Éjip, o/sét bwǎn emen o/fu, ebóng baa*kyé chwǒm ba-chi*. 2Me mu n-jwo ng ba/fu, byiryíng mbyi ké Éjip. Ca n̂g ba-da-ré eringe nyí bii*kpú esong*. 3Ne bwǎn-bané-Josêf ḿbé ba/fím bonchí obónge ne Josêf ashí diǐkpú ba-dim Éjip byiryíng edaré. 4Nké Jekôp o*da/twóm wǎn-boné-Josêf* Běnjámin* mú ba/fím bonchí ne boné obónge* ké nǎ, o/mû mu o-shî ng o/fu, chwǒm kyi/chi kyi-chi ǎ.
5Bwǎn-Jekôp ba/cen ne banet bakíri ba-ca byiryíng edaré, ké nǎ, esong e/mû e/róng ké esí nyí Kínan. 6Josêf, wǎ onet-dyishí mú Éjip, o/mû o-shee ng banet ḿbé ba/fím ké ejíí emúmú byiryíng. Ne bwǎn-bané-Josêf ba-bâ ba-ba-tíngê bashú kyísí ké ofê, ké bushú emen. 7Ńdyí Josêf o/ri bwǎn-bané emen, o/cêe kámbé, nké o/chi wǎ nyǐ o*fí o-nyît ng kámbé*. O-bí kámbé kakânkakân o/fu, ben ba/fím nyá.
Mbé ba-faa ba/fu, byi/fím Kínan byi-bâ byiryíng eré.
8Nang ké Josêf o/cêe bwǎn-bané emen, mbé ba*da ǎ ecêe*. 9O/zîim barê ḿbé o/mû o/ri kyi-kim ne mbé ne o-raa ne mbé o/fu, ben ba-chi i banet-boǒfêp-esí. Ben baa/bê oshê eten kyikû ekyé ba-ri kyikit ńkyí mu kyeekyee.
10Mbé ba-faa ǎ ba/fu, aa*wááng* ǎ bonchí* be byi/bê wǎ básóng eyên byiryíng ebaré. 11Be kángkáng byi-chi i bwǎn ḿbé onet obónge. Bonchí, bii*chi banet-boǒfêp-esí* byi-chi i banet ḿbé banong.
12Josêf o-faa kámbé o/fu, aa*wááng* ben baa/bê ebakyé ba-ri kyikit ńkyí oshê eten mu kyeekyee.
13Mbé ba-raa ba/fu, be byi/mû ashí diǐkpú ne afee ḿbé byi/fím bonchí obónge ké esí nyí Kínan. Wǎn-boné eten obónge oo/kpú, ne mú nryî esim mu áku kántîk ne bonchí eten.
14Josêf o-faa kámbé o/fu, nkyi wǎ eringe nyí me n/sét n/fu, ben ba-chi i banet-boǒfêp-esí. 15Něen nké byi/chi byi-kan běn byi-nyît. Me n/sem ké dyizîn-otu eten n/fu, ben baa*man ba-dim* tete ba-bâ ne nryî esim-wǎn-boné enen ámu. 16Onet enen obónge o-man o-bwa esim o-da-kpî ǎ. Ben burwám enen ḿbú áku ba-kyú u nyín ba-kû běn ebám tete byi-nyît â bamu ba-sét ng ntûntû. Â kyi*fí éné* nkyi ntûntû wǎ eringe nyí otu mu okpó, ben ba-chi i banet-boǒfêp-esí. 17Ne Josêf o-yip kámbé o-fé ké mgbokobá ké ací achât.
18Ké ací achât, Josêf o-sét kámbé o/fu, me n-chi i onet mú odashî Osówo, ne m-man běn ezú abwô ké bukwóp něen bubónge. 19Ne ba-tông ba/fu, ben ba-chi i banet ḿbé banong, onet obónge ké burwám enen o/chi o-waa ké kyibám-mgbokobá ńkyí ba/fé běn. Burwám enen ḿbú áku ba-man ebwa esim ba-da-kye kyikû-banet enen ḿbé esong nyi e-nwa ng kámbé byiryíng ḿbyí baa/ré. 20Ba-man ba-bâ ne nryî esim-wǎn-boné enen nyín n-ri ǎ. Ńkyín kyi/chi kyi-tông kyi/fu, ben bamu ba-sét ng ntûntû ne mm*ba/chi n-ju běn*.
Mbé ba-bángê ké ńkyí nyǐ o/sét, 21ne ba-kpet eraa ne barî ba/fu, byi-kú byi-ri ng busông kántîk ké chwǒm ńkyí byi/chi wǎn-boné eten. Be byi/ri kiǐtí-afaníkong ńkyí o/mû ké nkyí. Ké nkéré mú o/tîm bě arông o/fu, be byinyángê ǎ, byi*da ǎ ejwo*. Nkyí nké byimu ké afaníkong ńnyín kántîk.
22Rúben o-faa kámbé o/fu, ná n/tîm běn arông n/fu, *da n̂g ǎ echi chwǒm* ba*da mě ejwo*. Kántîk ba-kú ba-só ng bě ewa nyí bukyû emen. 23Josêf o/jwo ńkyí ba/raa, nké mbé ba*da/nyît* ké nǎ, Josêf o/mû mu o-sét ng onet, ne o-sét kámbé. 24Josêf o-dim o-mîng kámbé o-da-kpet etii. Ńdyí oo/kám byiko emen, o/bwa esim o-kâm kámbé, o-fîm Syímyon o-bwá ǎ erí o-twóp ányi ké bushú ebe.
Bwǎn-Boné-Josêf ba/bwa Esim Dyijê Kínan
25Josêf o/kye busa o/fu, bafé byiryíng byi-sú ké biimbam ḿbyí bwǎn-bané emen, ba-fé kámbé akpuga ebe ké kafâ, ba-kye kámbé byiryíng ḿbyí badaryí ké bukwóp. Ne ba-chi éné. 26Bwǎn-bané emen ámbe ba-yip byiryíng ḿbyí ba/ré éné ba-tû boonyam-atû ebe ḿbú ba/bê ne mbú, ba-dim. 27Ké kyikit ńkyí ba/rí, onet obónge ké burwám ebe o/firi kiimbam o/fu, nyǐ o-kyâ kaanyam-atû emen byiryíng, ne o-ri akpuga emen twóóm ké kafâ-kiimbam. 28Ne o-sét bwǎn-bané emen o/fu, ba/bwa ne akpuga ejí esim ba-kye mě. Di kányí ké kafâ-kiimbam ejí i. Byiko byi-kaa kámbé, ne ké bushî ámbu, ba-bí barî ba/fu, ebóng chwǒm ńkyí Osówo o/chi bě něen.
29Ńdyí ba/fyi ba-kâm Jekôp mú bonchí ké Kínan, ba/sét ǎ kángkáng ńkyí kyi/chi kámbé, ba/fu, 30onet-dyishí mú Éjip o/raa ne be kakânkakân o/fu, be byimu byi-kyé ng kyikû byi-nyît kyi-kim ne oshê emen. 31Be byi/sét ǎ byi/fu, be bii*chi banet-boǒfêp-esí* byi-chi i banet ḿbé banong. 32Be kángkáng byi/mû ashí diǐkpú ne afee mú byi/fím bonchí obónge. Obónge oo/kpú, ne mú nryî esim mu áku ne bonchí eten ké Kínan. 33Onyinchéng ámu o-faa bě o/fu, něen nké n/chi n-nyît n/fu, ben ba-chi i banet ḿbé banong. Onet obónge ké burwám enen o/chi o-waa ne me. Burwám enen ḿbú áku ba/chi ba-yip byiryíng enen ba-da-kye banet enen ḿbé esong nyi e-nwa ng kámbé. 34Bâ n̂g ne nryî esim-wǎn-boné enen ámu n-ri ǎ. Ne n-nyît n/fu, ben ba-chi i banet ḿbé banong, *chí ḿbé boǒfêp-esí*. N/chi m-bwa ne wǎn-boné enen n-kye běn, ne ben ba-man ewaa nyín ba-kûcen kasî.
35Ńdyí ba/bírî byiryíng ba-zû kyísí, nang yeě nang yeě o/ri akpuga emen nyí o/mû o/ré byiryíng, ne ńdyí ba/ri kányí, mbé ne bonchí ebe bushî bu-róng kámbé. 36Bonchí ebe o-bí kámbé o/fu, bamu ba-ryuu ng ba/fu, njen bwǎn ejí kángkáng? Josêf o*fí to* Syímyon o*fí to* ne kántîk ba-kú ba-chî ng eyip Běnjámin ba-dim ne nyǐ. Me nké mu n-ri ng afaníkong.
37Rúben o-sét bonchí emen o/fu, â n*da/bwa ne Běnjámin esim* n-kyâ ǒ bwǎn ejí ḿbé banyinchéng ashí afee a-ju. Fé mě nyǐ ké bubwô, ne n/chi m-bwa ne nyǐ esim.
38Nké Jekôp o/faa o/fu, wǎn ejí oo*man o-ca ne ben*. Wǎn-boné emen oo/kpú, ne nyǐ kǎnchí nké o/waa. Chwǒm kyi-man n ǎ echi ké bukwóp. Me nn/kâa, ne bafip ḿbé ba/chi ba-fé mě ba/chi ba-ju mě.
Markert nå:
Jénésis 42: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
