Jénésis 47
47
1Ne Josêf o-kúng kâng bwǎn-boné emen ashí atánge o-dim ne mbé ké kyikit-otu. O-sét ǎ o/fu, bonchí ejí ne bwǎn-bané ejí baa/fím Kínan ba-bâ ne byitú ebe ne kángkáng byěm ḿbyí mbe ne mbyí. Mbe kántîk ké kyikim-esí ńkyí Góshen. 2Ne o-kúng kâng bwǎn-bané emen o-tông otu. 3Otu o-bí kámbé o/fu, ben bamu ba-chi i ebóng dyizong-ḿkpóngé.
Mbé ba-faa ǎ ba/fu, bonchí, be byi-chi i bambâm ebû wǎ eringe nyí banchí eten ḿbé kpákpá ba/mû. 4Be bii/bê ebakyú nyín, ké nǎ, ké esí nyí Kínan, esong e/jang ejê nyí biǐbyâa byi*fí to ḿbyí byitú eten byidaryí*. Kamgbe, kye bě busa ḿbú byidakyú ké kyikim-esí ńkyí Góshen. 5Otu ámu o-sét Josêf o/fu, kántîk mú bonchí eyên ne bwǎn-bané eyên baa/bê, 6esí nyí Éjip e/já kámbé. Bakyú ké kyikim-esí ńkyí Góshen ńkyí kyi/nwa esí kyi-shwôm. Ne â banet ḿbé badaman etún byitú kanong kanong mbe ké burwám ebe, tî kámbé ba-kûtún byitú ḿbyí ejí.
7Ne Josêf o-bâ ne Jekôp mú bonchí emen o-ba-tông otu. Jekôp o-jware otu ámu, 8ne otu o-bí ǎ o/fu, wo aa/rí nǎ.
9Jekôp o-faa ǎ o/fu, dyikpen ejí ńdyí mu n-yêe ng oyêe óyee dii/rí bajam-aje nyâchât esim diǐkpú. Aje ányi a*da/jê* ne a/mû mě ne busông, â n/kan ne nyí banchí ejí ḿbé kpákpá ba/yêe. 10Jekôp o-kye otu nkuli kyikû-ojware ne o-dim. 11Ne Josêf o-tî bonchí emen ne bwǎn-bané emen ké Éjip. O-kye kámbé kyikit ké esí nyí e/nwa e-shwôm, nyí e/fárâng ne oshê mú Rámesis, wǎ eringe nyí otu o/kye busa. 12Josêf o/kye bonchí emen ne bwǎn-boné emen ne kángkáng kyikû-banet ńkyí bonchí byiryíng, cibicibi ne ḿbé ba/mû ba/tôong boǒbwásíng kyísí kyísí.
Esong nyí e/nwa Banet
13Esong e/mû ee/yógê nyí byiryíng byi*fí to nang ké kyikit kyibónge* asa a-man banet ḿbé Éjip ne Kínan ké esong nyí nyi e-nwa ng kámbé. 14Ńdyí mbe ba-ré ng byiryíng, Josêf o/koo kángkáng akpuga o-da-fé ké kyibám-butu. 15Ńdyí banet ḿbé Éjip ne ḿbé Kínan baa/bên akpuga kángkáng ké byiryíng eré, banet ḿbé Éjip ba/bê ba-kâm Josêf ba-sét ǎ ba/fu, kye bě byiryíng. *Da bě emîng byi-kpú*. Chwáp bě, akpuga eten aa/man.
16Josêf o-faa kámbé o/fu, bâ n̂g ne byitú enen. N/chi n-koo kámbyí n-kye běn byiryíng, â akpuga enen aa/man. 17Ne ba-bâ ne byitú ebe ba-ba-kye Josêf, ne o-kye kámbé byiryíng o-koo ebû ne bubyî-orá ne bampong ne boonyam-atû ebe. Ké dyije ándyi, o/kye kámbé byiryíng o-koo kángkáng byitú ebe.
18Ké orî-dyije, ba-chîbê ba-kâm ǎ, ba-sét ǎ ba/fu, bonchí, byi-sét ng ǒ ntûntû, byi/fu, akpuga eten aa/man ne aa/koo byitú eten kángkáng. Chwǒm kyi*fí to ńkyí byida ǒ ekye* kyi-cibi ne byiko eten ne esí eten*. 19*Da bě emîng byi-kpú*. Chwáp bě. *Damîng byifát eten byi-waa dyikáá*. Ré bě ne esí eten, a-kye bě byiryíng. Be byi/chi byi-firi básóng ḿbé otu ne esí eten e/chi e-já ǎ. Kye bě byiryíng ḿbyí byidaryí ne esang-byichí nyí badakwón ké byifát eten.
20Josêf o-ré kángkáng esí nyí ké Éjip o-kye otu. Onet-Éjip nang orá o/shee esí emen ké busa, ké nǎ, esong e/mû e/jang e-jê e-shwôm, ne esí kángkáng e-firi nyí otu. 21Banet bamúmú ḿbé ké Éjip ba-firi básóng ḿbé Josêf. 22Esí ebónge nyí e/mû e/já banchi kyifen nké nke nké o*da/ré*. Mbé ba*da/shee esí ebe* ké nǎ, otu o/mû mu o-kpêe ng kámbé akpuga o/fu, bakyú ányi. 23Josêf o-sét banet ḿbé Éjip o/fu, kan n̂ achi ba-ri, nn/ré běn ne esí enen n-kye otu. Kúng n̂g esang-byichí ńnyín ba-da-kwón ké byifát enen. 24Â nkéré ba-kú ba-bóng ng kányí, ba-man ba-kyii kányí ké byikit byitánge, ba-kúng kyikit kyibónge ba-kye otu. Ba-man n ekúng nyí áku kángkáng ba-kwón, ba-ryí to ne kyikû-banet enen.
25Mbé ba-faa ba/fu, wo aa/nyii bě. Wo aa/cángê dyityém ne be, ǎ bonchí, ne be byi-kyú u básóng ḿbé otu. 26Ne Josêf o-fé kyije ké esí nyí Éjip o/fu, nang nkéré orá nké ba/bóng esang-byichí, bakyii kányí ké byikit byitánge, kyikit kyibónge kyijá otu. Kyije ńkyín kyi/tôong tete kurún. Esí nyí banchi kyifen nké nke e*da/firi nyí otu*.
Jekôp o/bí Nkuli Kyikû-Chwǒm
27Banet ḿbé Ézerel ba/kyú ké Éjip, ké kyikim-esí ńkyí Góshen ba-já esang, ba-fwon bwǎn chwóó. 28Jekôp o/rí aje onyiryiká ne afee ké Éjip tete o-firi bajam-aje káchâtkányi esim káchâtkányi. 29Ńdyí nkéré oo/fárâng mú odakpú, o-kó Josêf mú wǎn emen o-bâ, o-sét ǎ o/fu, fé bubwô eyên ké anam ejí, a-ryí mě ocím mú aa*bên* a/fu, wo aa*ba/chi a-ryii mě ké Éjip*. 30Mu n-ryuu ng n/fu, ryii mě ké kyikit ńkyí ba/ryii banchí ejí. Kúng mě ké Éjip a-da-ryii mě ké kyikit ńkyí ba/ryii kámbé.
Josêf o-faa o/fu, n-chi i eringe nyí a/sét.
31Jekôp o-sét ǎ o/fu, ryí ocím a-sem Osówo a/fu, wo a-chi i éné. Josêf o-ryí ǎ ocím, ne Jekôp o-kó Osówo asǎma ányi ké karíng emen.
Markert nå:
Jénésis 47: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
