Ézódos 1
1
Banet ḿbé Ézerel ba/bírî Básóng ké Éjip
1Bwǎn ḿbé Jekôp ne byikû-banet ebe ḿbé ba/dim ne Jekôp ké kyikû ba-jâ Éjip ba/mû 2Rúben ne Syímyon ne Lyíva ne Júda 3ne Ézaka ne Zébélon ne Běnjámin 4ne Dǎn ne Nafatályi ne Gât ne Ásha. 5Kángkáng banet ḿbé ba/fím ké kyikû ńkyí Jekôp oyén ba/mû bajam bachât esim diǐkpú. Josêf mú wǎn emen o/mû oo/bwóp kpáá kashú o-jâ Éjip. 6Ké nkéré mú kaa/rí, Josêf ne bwǎn-bané emen ne kángkáng kyikim-banet ebe ánkyi ba/kpú. 7Nké bwǎn ebe ḿbé kyikû-banet ńkyí Ézerel ba/mû ne bwǎn chwóó ḿbé ba/mû ba/firi ne busa ḿbú baa/sú Éjip emúmú.
8Ńdyí ka/chîrí, onet okíri kâng mú o/mû o*da/nyît kyi-kim ne Josêf* o-firi otu mú Éjip. 9Otu ámu o-raa ne banet emen o/fu, banet ḿbén ḿbé Ézerel baa/jang ejê ne ba/firi ne busa ḿbú bu/firi bě ne bushî. 10Â byití byi/róng, ba-man n ecibi ne banet-bushwôn eten ba-nwa ne be, ne ba-man n [echêe ba-mîng] oshê eten. Byi-man byi-kyé bukwóp ḿbú byidachi kámbé baa*jê to ba-ca kashú*. 11Ne banet ḿbé Éjip ba-tî banet ḿbé badakyú wǎ banet-ashí-básóng ba/fu, bakûkye banet ḿbé Ézerel bǎmkpóngé ḿbé badashwôm kámbé busa, eringe nyí baa*kyú to ne busa*. Banet ḿbé Ézerel ba/bi eshê nyí Pyítom ne Rámesis, nyí badatî byěm ḿbyí otu. 12Nké â ba/kye okyěng kámbé busông chwóó, ányi nké banet ḿbé Ézerel badajê ejěng ba-shwôm, ba-káng ng ba-câ oshê omúmú. Banet ḿbé Éjip ba-kpet eshî banet ḿbé Ézerel 13-14ne ba-chi akpen nyí banet ḿbé Ézerel a-firi bafip báfip ké bǎmkpóngé-búsóng ḿbé mbe ba-tírîng ng kámbé ba-chi i. Ba/chi kámbé ba-chi bǎmkpóngé ké byise ebe ḿbyí mbe ba-bi ng ne ké byifát ebe, ne ba*da/ri kámbé bafip*.
15Ne otu mú Éjip o-raa ne Shífara ne Pwâ ḿbé banyinyi ashí afee, ḿbé ba/mû ba-kám m banyinyi ḿbé banet-Hyíburus bufwon o/fu, 16â ba/kám onyinyi-Hyíburus bufwon nké o/fwon wǎn-onyinchéng, ju n̂g wǎn ámu, nké â wǎn-onyinyi, mîng n̂g ǎ. 17Nké ḿbé banyinyi ámbe ba/mû ba-shî ng Osówo, ba*da/chi ńkyí otu o/sét kámbé* ne ba*da/ju bwǎn-banyinchéng ámbe*. 18Ne otu ámu o-twóm ḿbé banyinyi ámbe ba-bâ, o-bí kámbé o/fu, ebóng bamu ba-chi i dyizong-chwǒm ńdyín. Ebóng bamu ba-mîng ng bwǎn-banyinchéng ebe ba-kpen n.
19Mbé ba-faa ǎ ba/fu, banyinyi ḿbé Hyíburus ba*fí wǎ ḿbé Éjip*. Bufwon boo*zût kámbé efwon* ne ba-bwóp ng kpá kashú ba-fwon ne be byi-ribi áku. 20-21Ké nǎ, ḿbé bankâm bufwon ámbe ba/mû ba-shî ng Osówo, Osówo o/mû o/cángê dyityém ne mbé ne o/kye kámbé bwǎn ḿbé ebe. Ne banet ḿbé Ézerel ba-waa ba-jê ng ba-câ kashú ne busa. 22Ké nkuli kyikû, otu ámu o-kye kángkáng banet emen busa o/fu, wǎn-onyinchéng-Hyíburus nang orá nké ba/fwon, kúng n̂g ǎ ba-twóp ké kace ńké Nâl. Mîng n̂g ḿbé bwǎn-banyinyi.
Markert nå:
Ézódos 1: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
