Ézódos 2
2
Ba/fwon Músis
1Ké nkéré ámu, onyinchéng mú o/fím ké kyikû ńkyí Lyíva o/bé onyi mú o/fím ké kyikû emen 2o-fwon ǎ wǎn-onyinchéng. Ké nkéré mú mú onyinyi o/ri eringe wǎn emen mu o-nwa ng, o/rôo ǎ ké kafâ-kyise ké etukáku echât. 3Nké ńdyí o/ri o/fu, nyǐ oo*man ǎ to erôo* o/kúng kaakye o-mwane kánké byěm ḿbyí omu oo*ryuu ké nké*. O-yip wǎn emen ámu o-fé ké kaakye ánke, o-yip kánké o-da-tî ké kafâ-biǐbyâa ké bukô-kace. 4Wǎn-boné-wǎn ámu mú onyinyi o-dim o-da-rem ké bukô cát o/fu, nyǐ o-ri ng ńkyí kyi/chi kyi-chi wǎn ámu.
5Wǎn-otu mú onyinyi o/bê ké kace ánke o/fu, nyǐ o-bâ ng ekôo omu, bǎmgbán emen ba-dim ba-kpet ecen ké bukô-kace ba-bám m ǎ. Wǎn-otu ámu o-bírî achi o-ri kaakye ánke ké kafâ-biǐbyâa ne o-twóm ósóng emen obónge mú onyinyi o/fu, oda-kúng kaakye ánke o-bâ ne nké. 6Wǎn-otu ámu o-bâa kaakye ánke ne o-ri wǎn-onyinchéng ké kafâ ké mu o-tii ng, ne bafip ba-kám ǎ ne wǎn ámu. O-raa o/fu, wǎn mún o-man o-kyú mú onet-Hyíburus.
7Ne mú wǎn-onyinyi mú wǎn-boné-wǎn ámu o-bí wǎn-otu ámu o/fu, nca n-da-kyé ǒ onyinyi-Hyíburus mú o/chi o-nen ǒ wǎn mún?
8Wǎn-otu ámu o-faa ǎ o/fu, kamgbe, da-kyé mě nyǐ. Ne mú wǎn-onyinyi ámu o-dim o-da-kpî ochíchí-boné-wǎn ámu. 9Wǎn-otu ámu o-sét onyinyi ámu o/fu, kúng wǎn mún a-nen ǎ ké bubwô ejí, n/chi n-kû ǒ ekye akpuga. Ne o-kúng wǎn ámu o-nen ǎ. 10Ńdyí o/nen wǎn ámu o-kán, o/kúng ǎ o-da-kye wǎn-otu ámu, mú o/kúng ǎ o-tî wǎ wǎn emen. Wǎn-otu ámu o-raa ne byiko emen o/fu, me n/fîm ǎ ké kafâ-kace, ne n/chi n-fé ǎ dyizîn, Músis.
Músis o/chêe o-jâ Médyan
11Ńdyí Músis o/kán, o/dim o-wâa banet emen ḿbé Hyíburus edari, ne o-ri eringe nyí mbe ba-tírîng ng kámbé ba-chi i biǐsínsóng-bǎmkpóngé. O/ri to ké onet-Éjip o/ju onet-Hyíburus mú o/mû o/fím ne Músis. 12Músis o-kpúrî achi ké bukô o-ri o/fu, onet o*fí o-ri ng ǎ* ne o-kám onyinchéng-Éjip ámu o-ju, o-kúng ǎ o-ryii ké éshíshě. 13Ké orî-dyicí, o/chîbwa esim ne o-ri ké banyinchéng-Hyíburus ashí afee ba-kú ba-nwa ng ne barî. O-raa ne mú o/mû o/kyé kyiraa o/fu, ebóng amu a-mín n ónen-onet-Hyíburus.
14Onyinchéng ámu o-faa o/fu, yeě o/chi ǒ otu ne mpan bampan eten. A-kú a-bâ mě eju wǎ eringe nyí a/ju onet-Éjip kyísóng? Ne bushî bu-kám Músis ne o-raa ké dyityém emen o/fu, banet baa/nyît ńkyí me n/chi. 15-16Ńdyí otu o/jwo ńkyí kyi/chi, o/kan o/fu, nyǐ o-ju ng Músis, nké Músis o/chêe o-jâ ké esí nyí Médyan.
Dyicí dyibónge, ńdyí Músis o/kyú me ké bukô-dyibíng-omu, bwǎn-Jétoro mú o/mû nchi kyifen mú Médyan, ḿbé banyinyi ashí káchâtkányi ba/bê omu ebató mú badafé ebû nyí bonchí ebe ké byiféng e-jwáp. 17Nké bambâm ebû bakíri ba/ró bwǎn-Jétoro. Músis o-dim o-da-nyii kámbé, o-kye byitú ebe omu byi-jwáp. 18Ké nkéré mú bwǎn ámbe ba/fyi, bonchí ebe o/bí kámbé o/fu, ebóng ben ba/wá efyi něen kurún.
19Mbé ba-faa ǎ ba/fu, onet-Éjip obónge o/nyii bě ké abwô nyí bambâm ebû, o-kye to byitú eten omu byi-jwáp.
20Jétoro o-bí kámbé o/fu, onyinchéng ámu mu nyá. Ebóng ba/mîng ǎ ányi ba-dim. Ca n̂g ba-da-kó ǎ o-ba-ryí byiryíng ne be.
21Ne Músis o-bángê kâng o/fu, nyǐ o-kyú u ne mbé, ne Jétoro o-kye ǎ wǎn emen obónge mú onyinyi, mú odabángê Zipóra o-bé. 22Zipóra o-fwon ǎ wǎn-onyinchéng. Músis o-raa o/fu, me n-chi i ocinónet ké esí ńnyín, ne n-fâ ǎ dyizîn ńdyí badakó Géshom.
23Ńdyí aje a/chîshwôm, otu mú Éjip o/kpú, nké banet ḿbé Ézerel ba/mû ba/tôong ké afaníkong nyí búsóng ebe, ne ba-tii ba/fu, Osówo ochwáp kámbé. Bukyû ebe ámbu bu/kâm Osówo 24mú o/jwo busông ebe, ne o-zîim ocím emen mú o/mû o/ryí ne Ébarahâm ne Ázik ne Jekôp. 25O/ri búsóng ḿbú banet ḿbé Ézerel ba/mû ké mbú ne bafip ba-chi ǎ ne mbé.
Markert nå:
Ézódos 2: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
