Jénésis 50
50
1Josêf o/myii o-nye bonchí ké byiko o-kpet etii o-fâ ǎ ocím. 2Ne Josêf o-kye busa o/fu, bachi kyikwóm-enyam-byiko ńkyí bonchí eringe nyí kii*fwoo*. 3Ba/kúng bajam-ací bafee, eringe nyí badafwam ekúng, ne ba-chi byěm ámbyi. Banet ḿbé Éjip ba/chi ǎ bukyû ké bajam-ací bachât esim diǐkpú.
4Ké nkéré mú ací nyí bukyû echi a/man, Josêf o/sét banet-ashí-bǎmkpóngé ḿbé otu o/fu, kamgbe, ca n̂g ba-da-sét otu kyitwóm ńkyín ba/fu, 5ńdyí bonchí ejí o/mû mu o-kpú u, o/chi mě n-ryí ǎ ocím n/fu, me n-ryii ng ǎ ké dyikun ńdyí nyǐ oo/sím ké esí nyí Kínan. Kamgbe, omîng mě n-da-ryii bonchí ejí ne m-bwa esim.
6Otu o-faa o/fu, ca a-da-ryii bonchí eyên eringe nyí a/ryí ǎ ocím.
7Ne Josêf o-dim kâng bonchí emen edaryii. Kángkáng banet-ashí-bǎmkpóngé ḿbé otu ne biǐtí-banet ḿbé ké kyibám emen ne ḿbé ké Éjip ba/dim ne Josêf ké kyikû. 8Kyikû-banet emen ne bwǎn-bané emen ḿbé banyinchéng ne kyikû-banet ńkyí bonchí ńkyí áku kángkáng ba/dim ne Josêf ké kyikû. Bwǎn ebe ḿbé bwǎsíng ne byitú ebe nké ba/waa ké Góshen. 9Banet ḿbé ké bubyî-orá ne ḿbé ké bamútu ḿbé bubyî-orá budatut ba/ce to ne nyǐ ké kyikû. Banet ba/mû baa*nwa eri*.
10Ké nkéré mú ba/ribi ké kyikit ńkyí badakim esang-byichí ké Átat, ké kyicê ńkyí Jódan ńkyí esû edabyí, ba/tii kakânkakân ka-bwon chwóó, ne Josêf o-tii ǎ ké ací káchâtkányi. 11Ké nkéré banet ḿbé Kínan ba/ri ké banet ámbe mbe ba-tii ng ké Átat, ba/raa ba/fu, bukyû ḿbú banet-Éjip mbe ba-chi i bu/jê kanong kanong. Nkyí nké ba/fé kyikit ánkyi dyizîn, Ébel-Myiziryâm.
12Bwǎn-Jekôp ba/chi kâng eringe nyí o/sét kámbé. 13Ba/kúng kyikwóm emen ba-dim ne nkyí Kínan, ba-da-ryii ké bucim, ké Makapyíla, ké kyicê ńkyí Mámare ńkyí esû edabyí, ké kyifát ńkyí Ébarahâm o/ré ne Éforon mú o/fím Hyítat o-chi oryii. 14Ké nkéré mú Josêf oo/ryii bonchí, o/bwa esim Éjip ne bwǎn-bané emen ne kángkáng banet ḿbé ba/mû ba/ce bukyû ne nyǐ ké kyikû.
Josêf o/chîryí Bwǎn-Bané Emen Ocím
15Ńdyí bonchí oo/kpú, bwǎn-bané-Josêf ba/raa ne barî ba/fu, be byi-chi i nǎ, â byi/tôong byi-sa ng Josêf kafâ, o/fu, nyǐ o-só ng bě ewa ké kángkáng byibî ḿbyí byi/chi ǎ. 16Ne ba-twóm kyitwóm kyi-kâm Josêf ba/fu, ne bonchí eten o-kpú, 17nyǐ o/sét bě o/fu, be byitîm ǒ arông byi/fu, kamgbe, pwoo bě ké kyibî ńkyí be bwǎn-bané eyên ba/chi ǒ. Kántîk, be byi/tîm ǒ arông byi/fu, pwoo bě ké kyibî ńkyí be mú byimu bǎmgbán ḿbé Osówo mú bonchí eyên ba/chi. Josêf o/tii ńdyí o/koo kyitwóm ńkyín.
18Ne bwǎn-bané emen mbé bayén ba-bâ ba-ba-tíngê kyísí ké bushú emen, ba/fu, be byi/bwom nyín ké bushú eyên wǎ básóng eyên.
19Nké Josêf o/sét kámbé o/fu, *da n̂g eshî*. Me mm*man ekúng kyikit ńkyí Osówo*. 20Ben ba/nam mě kyibî, nké Osówo o/pín kánkyí kyi-bírî kanong, eringe nyí o/chi o-nyii banet chwóó ḿbé mbe bakpó kurún ké bubwô-chwǒm ńkyí kyi/chi. 21Chwǒm kyi*fí ńkyí badashî*. Me n/chi n-nen běn ne bwǎn enen. Ne o-chîryí kámbé kâng ocím ne ejá nyí enong enong nyí e/ta kámbé ké dyityém.
Josêf o/kpú
22Josêf o/kyú o-ca kashú ké Éjip ne kyikû-banet ńkyí bonchí emen. O/rí bajam-aje batánge esim diǐkpú ne o-kpú. 23O/kpen o-ri bwǎn ḿbé Éferem ne ḿbé bwǎn-Éferem ba/fwon. O/kpen to o-koo bwǎn ḿbé Mákyi mú wǎn-Manáse o/fé ké kyikû emen. 24O-sét bwǎn-bané emen o/fu, me n-kú m-bâ ekpú, nké Osówo o-man o-tún běn, o-kpî běn ba-byí ké esí ńnyín ba-jâ ké esí nyí o/ryí Ébarahâm ne Ázik ne Jekôp ocím mú oo*ba/chi o-bên*. 25Ne Josêf o-sét banet emen o/fu, baryí ǎ ocím ba/fu, ké nkéré mú Osówo o/chi o-kpî běn ba-jâ ké esí ányi, ben ba-kúng ng kyikwóm-enyam-byiko ejí ba-jâ ne nkyí. 26Ne josêf o-kpú ké Éjip ńdyí oo/rí bajam-aje batánge esim diǐkpú. Ba-chi kyikwóm-enyam-byiko emen ba-fé ké mkpukpu eringe nyí kii*fwoo*.
Markert nå:
Jénésis 50: BKY
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Published by the Bible Society of Nigeria @ 1985
