MATHIE 26

Athemánhɔn énɛn Jezwi wɛ́n si

(Ɔ́n wú Mák 14.1-2; Ɔ́n wú Lwik 22.1-2; Ɔ́n wú Jan 11.45-53)

1Lóka Jezwi tɔ bhwe khúnbrɛn lókɔn phu, ló ńkránman mɛ́n yíchwɛmán sa:

2– Ɔ́n yɛn salé ákha ncíbhí mɔn tɛɛ, wo ebhá lí Phákhe fɛ́thi: wo bhá hɔ́n Lephan Mi sé wo, ló wo bhá chɛ́ nkɛ há áyábhletre phɔ.

3Ló nphahamán-óthemánhɔn le Jwifunɛ́n féchwe hromɛn mrɔ́khómán ɔ́nmɔn bhurɛhɛ́n nphaháwo bhrɔ́khó Kayífu hwan. 4Wo khúnbrɛn wo hamɛ́n si tre salé wo bhá khɔ́ mɛ́nan mɛn hɔ́n Jezwi lo wɛ́n. 5Ló wo étɔ sa:

– Lo bha lé gɛ hɔ́n nkɛ fɛ́thi hromɛn, kasé lo tɛ́ yábhɛ nɛn, ábha jrɛn ápasá di.

Bhie bɛn hɔn nɔ́ndu saha Jezwi hɛ́nthé

(Ɔ́n wú Mák 14.3-9; Ɔ́n wú Jan 12.1-8)

6Jezwi lo Betani khúbhɛ́, ló ńnɛ Simɔn khokhóbhé-phɔ́wo hwan. 7Lóka ńchre tábrɛ mɛ́n, lótɛ bhie bɛn asranman ńnɔ́ndu jɛ khrákhrá kran bɛn átigbɛli, ló ńhɔn saha nkɛ hɛ́nthé. 8Lóka yíchwɛmán wu lóyí yábhɛ lókɔn, ńthɛ́nyan ka wo hromɛn, ló wo étɔ sa:

– Bíyí wrɛ́ lɔ yábhɛ li lókɔn ɛ? 9Ńnɔ́ndu jɛ khrákhrá lókɔn ɔn, ógɛ hɔ́n phɛ́lí, ló obhó lójɛtɛn pɔ́ gbremán!

10Lónian mɛn khɛ́n Jezwi yɛn nkɔn bhwe yábhɛ nkɔn étɔ ɔn, ló ńkránman nkɔn sa:

– Bí hɛ́nthé khɛ́n hɔ́n élri bhie lókɔn gbre yábhɛ nɛn ɛ? Áyí khɛ́n ńtɛ mɛn, áyɔn kábrɛ. 11Khankhan mímí, gbremán bha hɔ́n thethé ákakhúnbrɛn; khɛ́n mɛn-ɛ mɛn man nɛ́n má hɔ́n thethé ákakhúnbrɛn a. 12Ńnɔ́ndu lókɔn khɛ́n ńhɔn ha mɛn phɔ ɔn, átɛsalé mɛn ka khɛ́n wo bhá bhó mɛn ɔn, lóyí nɔn ńtɛ mɛn kábrɛ o. 13Mímí mɛɛ́n kranmán hɔ́n: áthéji krɛn, ási khúnbrɛn tɛɛ khɛ́n wo bhá tɔ Ábhwe Bhwábhwá lókɔn phɔ bhwe ɔn, bhie lókɔn, mɛ́n yí ńtɛ, lólɔ wo bhá tɔ lóphɔ bhwe, ló mɛ́n bhwe bha di lephan khúnbrɛn mwanhɛ́n.

Judasi énɛn ahɔ́n Jezwi sé nphahamán-óthemánhɔn

(Ɔ́n wú Mák 14.10-11; Ɔ́n wú Lwik 22.3-6)

14Jezwi yíchwɛmán hrómɛn lephan bɛn óche Judasi Sikariɔ́thi lo gɛ nphahamán-óthemánhɔn 15ló ńkránman nkɔn sa:

– Kasé mɛn hɔn Jezwi sé hɔ́n, ébí yábhɛ ɔ́n ma sé mɛn ɛ?

Lótɛ wo kan fránkhi áphɛn le áwɔ́, ló wo khwɛn se nkɛ. 16Adɔn lóka élo nɔn Judasi énɛn lósi ánman khɔ́ hɔ́n Jezwi sé nkɔn.

Jezwi le mɛ́n yíchwɛmán ɔ́nmɔn elí Phákhe nɛn

(Ɔ́n wú Mák 14.12-21; Ɔ́n wú Lwik 22.7-14,21-23; Ɔ́n wú Jan 13.21-30)

17Ácí athwasi khɛ́n wo elí fɛ́thi óle há mányan kpánhɔn hromɛn, yíchwɛmán bha ébhi Jezwi sa:

– Bánne nɔn ɛ́nɛn salé lo lo cɔ Phákhe nɛn tɛ́tré ɛ?

18Ló Jezwi kranman nkɔn sa:

– Tɛmɛ ɔ́n nó ákhúbhɛ́ hrómɛn, ló ɔ́n kranmán lephan lókɔn lée: “Lo Yíliéwo nkɛé: Mɛn cí si; ló hɛ hwan nɔn mɛn le mɛn yíchwɛmán ɔ́nmɔn lo ebhá lí Phákhe nɛn.”

19Jezwi bhwe atɔ, yíchwɛmán tɛ lóyí, ló wo hɛn Phákhe nɛn.

20Lóka ácí gu, lótɛ Jezwi le mɛ́n yíchwɛmán áwɔ́-mɔn khwa tábrɛ mɛ́n. 21Lóka wo elí nɛn, Jezwi kranman mɛ́n yíchwɛmán sa:

– Mímí mɛɛ́n kranmán hɔ́n: hɔ́n hrómɛn lephan bɛn bha phɛ́ mɛn lí.

22Lótɛ yíchwɛmán phɔ gbɔn, ló wo ébhi nkɛ brɛ brɛ mɛn sa:

– Hwánthe, wú mɛn?

23Ló Jezwi tɔ sa:

– Lephan khɛ́n agɛ mɛn ɔ́nmɔn bho kpánhɔn esɔ́ nɛn mɛn ɔn, mɛ́n lephan nɔn anmán phɛ́ mɛn ní. 24Lephan Mi bha khú sa lósi Yankan hrɔ́ khɔ tɔ lóbhwe a; khɛ́n muswe gɛ lephan ahɔn Lephan Mi phɛli! Lókhɛ́n lephan lókɔn, kasé wo le ho-e ɔn, ló-ɛ nɔn ayɔn brɛn ló wo ho-e o!

25Judasi khɛ́n ali lephan ehɔ́n Jezwi phɛ́lí, bho bhwetɔ́ ló ántɔ sa:

– Yíliéwo, wú mɛn?

Ló Jezwi krɛnmɛn sa:

– Lótɛ nɔn ɛtɔ o.

Ńnɛn Créncré

(Ɔ́n wú Mák 14.22-26; Ɔ́n wú Lwik 22.15-20; 1Khor 11.23-25)

26Lóka wo elí nɛn, Jezwi bho kpánhɔn. Lóka ńna Yankan nansi, ńmúri, ńmo se mɛ́n yíchwɛmán ló ńkránman nkɔn sa:

– Tɛmɛ ɔ́n mó, ló ɔ́n tha, lónɔn ali mɛn nánmí.

27Lómánji, ńhɔn áyábhɔ́ khɛ́n divɛn bha lóhrómɛn. Lóka ńna Yankan nansi, ńhɔn se mɛ́n yíchwɛmán ló ńkránman nkɔn sa:

– Tɛmɛ hɔ́n khúnbrɛn ɔ́n hɔ́n, ló ɔ́n nán, 28lónɔn ali mɛn nká, ńká khɛ́n ali akprɔbha nká wo si Yankan hromɛn, khɛ́n akhwalé se néphan búdúbúdú, wo neyɔ́phɔ́ hɛ́nthé. 29Khɛ́n mɛɛ́n kranmán hɔ́n: achan ncɛ́n élo, mɛn man nɛ́n cu nán divɛn lókɔn npɔhɔ́n kábrɛ kábrɛ ábha di lóka mɛn le hɔ́n ɔ́nmɔn óbha cú nán divɛn pɔ́pɔ́ mɛn Nthe Bhringbi khúbhɛ́.

30Lómánji wo kho fɛ́thi nánmɛ, ló wo saji lo Olive-nyá bhóbhó tho.

Jezwi nkɛé, Piɛ bha samɛ́n lée nkɛ le yɛn

(Ɔ́n wú Mák 14.27-31; Ɔ́n wú Lwik 22.31-34; Ɔ́n wú Jan 13.36-38)

31Ló Jezwi kranman mɛ́n yíchwɛmán sa:

– Ncɛ́n mréci brɛ, hɔ́n khúnbrɛn ɔ́n ma yɔ́ mɛn ká wá féne. Lósi akhɔ tɛ ɔn, Yankan hrɔ́ hrómɛn, wo tɔ ábhwe lókɔn tre salé: “Mɛn man wɛ́n gbankhran-bówo, ló ńgbankhran khúnbrɛn bha chranmánlé.” 32Ló Jezwi cu tɔ sa, lóka man chán khúnɔn mɛn fe ɔn, man nó Galile no bo hɔ́n.

33Lótɛ Piɛ bho bhwetɔ́ ló ńkránman Jezwi sa:

– Kasé krɛnnɛ́n khúnbrɛn eyɔ́ hɛ ká wá féne lɔ, mɛn-ɛ mɛn man nɛ́n yɔ́ hɛ ká bhrɔ́ɔ́.

34Ló Jezwi krɛnmɛn sa:

– Mímí mɛɛ́n kranmán hɛ: ncɛ́n mréci brɛ, kɔsɔ bha lé thɔ́n lɔ khɛ́n ɛ́bha samɛ́n ńdɔn bhwaliá lée ɛle yɛn mɛn.

35Ló Piɛ kranman nkɛ sa:

– Kasé énɛn salé mɛn gɛ hɛ ɔ́nmɔn khú lɔ, mɛn man nɛ́n samɛ́n, khɛ́n mán tɔlé mɛn nɛn yɛn hɛ.

Ló yíchwɛmán khúnbrɛn tɔ lóbhwe lókɔn brɛ.

Jezwi éla Yankan Jɛsemane

(Ɔ́n wú Mák 14.32-42; Ɔ́n wú Lwik 22.39-46)

36Ló Jezwi le mɛ́n yíchwɛmán ɔ́nmɔn lo ási óche Jɛsemane, lóne ńkránman nkɔn sa:

– Tɛmɛ ɔ́n chré krɛn, khɛ́n mɛn-ɛ, mɛn nó hɛ́nmɛn no na Yankan.

37Ńdo Piɛ le Zebede miɔn mɔn ha phɔ ɔ́nmɔn no. Áphɔgbɔ́n le ábhwephé khóo kɛ phɔ. 38Lótɛ ńkránman nkɔn sa:

– Ákhú bhwephé si mɛn thɛ́n hrómɛn; tɛmɛ ɔ́n chré krɛn, ló ɔ́n gɛ mɛn ɔ́nmɔn kɔ́ ná.

39Ńcu no hɛ́nmɛn kpɛ́bɛn, ńhɔn hɛ́nmɛn dɔlé ánna Yankan, ló ántɔ sa:

– Mɛn Nthe kasé ɛpɔ o, tɛmɛ ɛhɔ́n áyíkhúphɔ yábhɔ́ lókɔn yɛn mɛn tho. Léli salé mɛn yí mɛn pɔ nɔn ɛ́bha tɛ́, lókhɛ́n tɛmɛ olí hɛ ékɛ ɛpɔ.

40Lómánji, ńcu saji man gɛ mɛ́n yíchwɛmán bhwaliá lókɔn, khɛ́n ńna kwa wo, ló ńkránman Piɛ sa:

– Wu a, ɔ́n ne khɔnman phɔ gɛ mɛn ɔ́nmɔn kɔ́ ná wáchɛn brɛ nwɛ́ lɔ? 41Tɛmɛ ɔ́n kámɛlé, ochɛ́sé ɔ́n ne hálé ásúwú hrómɛn. Átɛsalé lephan nánnánmi-ɛ dɛn ya, lókhɛ́n mɛ́n nánmí nɔn enán.

42Ńdɔn mɔn hrómɛn, ńyɔ mɛ́n yíchwɛmán khwa no hɛ́nmɛn kpɛ́bɛn npɔ ánna Yankan, ló ántɔ sa:

– Mɛn Nthe, kasé ɛbha le gɛ hɔ́n áyábhɔ́ lókɔn yɛn, lókhɛ́n énɛn salé sáán mɛn nán ɔn, ló tɛmɛ ɛtɛ́ hɛ thɛ́n yí apɔ!

43Ńcu saji man gɛ mɛ́n yíchwɛmán, khɛ́n ńná khwa wo; átɛsalé wo lé gɛ kámɛlé. 44Ńdɔn bhwaliá hrómɛn, Jezwi yɔ wo khwalé lo éla Yankan, ló ńcu ántɔ lóbhwe brɛ. 45Ńsáji man gɛ mɛ́n yíchwɛmán ló ánkranmán nkɔn sa:

– Ntɔ́nyán hɔ́n eláná, ló hɔ́n éfikhwá? Ɔ́n wu a, ácí si, ló thénthé wo ebhá hɔ́n Lephan Mi há nemán mɔ́n mɛn. 46Ɔ́n chánfe tho olo! Ɔ́n wu a, lephan khɛ́n ebhá hɔ́n mɛn phɛ́lí bha krɛn!

Lóka wo hɔn Jezwi

(Ɔ́n wú Mák 14.43-50; Ɔ́n wú Lwik 22.47-53; Ɔ́n wú Jan 18.3-12)

47Jezwi bhwe tɛɛ aya étɔ ntɔ́nyán, mɛ́n mɛ́n le ka ka lɔ khɛ́n nɛn Judasi, ali yíchwɛmán áwɔ́-mɔn hrómɛn lephan bɛn. Ápasá bhróbhrobhé gɛ ɔ́nmɔn bha, wo sranman khókhríyan le ńyá ɔ́nmɔn. Wo lókɔn, Jwifunɛ́n nphahamán-óthemánhɔn le mrɔ́khómán ɔ́nmɔn nɔn achɛ wo bha. 48Judasi ali lephan ehɔ́n Jezwi phɛ́lí kránman nkɔn tre sa: “Lephan khɛ́n mán dɔn mɛ́n, mɛ́n nɔn ńni lephan hɔ́n énɛn. Tɛmɛ ɔ́n hɔ́n-ɛn.” 49Lóyámɛ́n, Judasi tigbali Jezwi ló ńkránman nkɛ sa:

– Yíliéwo mɛn mɔ́ hɛ yí!

Ló ńdɔn nkɛ mɛ́n. 50Ló Jezwi krɛnmɛn sa:

– Mɛn jɔ, hɛ yí khɛ́n ɛbha ɛtɛ́, tɛmɛ ɛtɛ́ gbraa.

Ló néphan krɛnnɛ́n tigbali Jezwi, wo khwa nkɛ tho, ló wo hɔn-ɛn. 51Ló néphan khɛ́n abha Jezwi phɔ, wo hromɛn lephan bɛn ti mɛ́n khókhríyan san, ló ńjan nphaháwo bhrɔ́khó hwan nɛnkhwɛ́nwo njɛ. 52Khɛ́n Jezwi kranman nkɛ sa:

– Bho hɛ khókhríyan tre lósi gbraa, átɛsalé néphan khúnbrɛn khɛ́n abho khókhríyan, wo lɔ khókhríyan nɔn wo bhá bhó wɛ́n wo. 53Wú ɛle yɛn salé kasé mɛn chɛ mɛn Nthe lée anman dɔnmán mɛn mɔ́n, lóyámɛ́n tɛɛ ánman chɛ́ Yankan-mranchɛ́mán thamán gbe áwɔ́-mɔn bhá? 54Ló kasé átɛ nɛn, ábhwe Yankan hrɔ́ tɔtre ɔn, kalósi lóyí bha khɔ́ tɛ́ simɛ́n e? Khankhan mímí, ábhwe Yankan hrɔ́ tɔtre ɔn, énɛn salé lóyí okhɔ́ nɛn tɛ́.

55Ló Jezwi kranman ápasá lée:

– Khɔ́ mɛn nɛn ni khokhroháwo a, ńthé kalósi akhɔ tɛ khɛ́n ɔ́n ma mɛn hɔ́n, lókhɛ́n ɔ́n sránman khókhríyan le ńyá ɔ́nmɔn e? Ácí khúnbrɛn mɛn chre hɔ́n thethé nie yí Yankan-khúthé, lókhɛ́n ɔ́n ne hɔn mɛn. 56Khɛ́n áyí khúnbrɛn lókɔn atɛ, lónɔn ábhwe khɛ́n bhwetɔ́trémán tɔ abha Yankan hrɔ́ hrómɛn, ábha simɛ́n.

Lótɛ yíchwɛmán khúnbrɛn yɔ nkɛ kalé wa féne.

Wo hɔn Jezwi lo Kwabhɔ́mán khónkhó hɛ́nmɛn

(Ɔ́n wú Mák 14.53-65; Ɔ́n wú Lwik 22.54-55,63-71; Ɔ́n wú Jan 18.13-14,19-24)

57Ló néphan khɛ́n ahɔn Jezwi, wo hɔn nkɛ lo nphaháwo bhrɔ́khó Kayífu yé, lóka lókɔn bidíyɛ́nmán le mrɔ́khómán ɔ́nmɔn bhurɛhɛ́n kwa lóne. 58Piɛ hrɔman gɛ Jezwi thá bha mánji-áan, kábrɛ kábrɛ ńmán di nphaháwo bhrɔ́khó hwan ngbophro. Ńka bháthó, ló ńgɛ sibómán ɔ́nmɔn khwa ánwɛsɛ́ lóyí si ábha khɔ́ tɛ́.

59Nphahamán-óthemánhɔn le Kwabhɔ́mán khónkhó khúnbrɛn ɔ́nmɔn énɛn salé néphan olí ndalefɛ bɛn, kasé áli kpakprá bhwe lɔ, khɛ́n ábha chɛ́ wo khɔ́ lóphɔ bhɔ́ Jezwi kwa, khɛ́n wo wɛ́n nkɛ ɔn, 60wo le gɛ lóndalefɛ lókɔn bhrɔ́ɔ́. Lótɛ khɛ́n néphan búdúbúdú bha tɔ bhwe kpakprá mɛn khwalé lo. Lómánji néphan mɔn bha, 61ló wo étɔ sa:

– Lephan lókɔn nkɛé: “Mɛ́n gɛ ca Yankan-nkhú khwálé, ló mɛn mó ńcíbhí bhwaliá tɛɛ thán phú.”

62Nphaháwo bhrɔ́khó chánfe ló ńkránman Jezwi sa:

– Ábhwe khúnbrɛn lókɔn néphan étɔ há hɛ tho ɔn, wú álepɛ hɛ ékɛ bɛn ɛ́gɛ tɔ?

63Lókhɛ́n Jezwi le tɔ bhwe brɛ ka, ló nphaháwo bhrɔ́khó krɛnmɛn sa:

Yankan abha mɛpɔ́ hɛ́n hrómɛn, mɛɛ́n nɛn salé ɛbhɔlí phɔ tɔ sé mɛn yé: kasé mímí nbrɛn ɛli Mesi, ali Yankan Mi?

64Ló Jezwi kranman nkɛ sa:

– Lóbhwe tɛɛ nɔn ɛtɔ o. Lókhɛ́n mɛɛ́n kranmán hɔ́n salé: thénthé ɔ́n ma wú Lephan Mi bha chré Yankan sɛ́npɛ́wo liémɔn si; ló ánman chán átho mɔngú mɔngú hromɛn má.

65Lótɛ nphaháwo bhrɔ́khó ti mɛ́n ntráliɛ́ thwɛ ló ántɔ sa:

– Ánnɔ Yankan hɛ́n! Lo le cu nɛn ndalefɛlíwo nankhɛ bɛn npɔhɔ́n! Hɔ́n nbrɛn lɔ ɔ́n ye ábhwe ántɔ nɔ Yankan hɛ́n.

66Ńthé ébí hɛ́nphe nɔn hɔ́n ebhú ábhwe lókɔn phɔ ɛ?

Ló wo tɔ sa:

– Ńni pɔn, ló áyɔn salé owɛn.

67Wo éphu mísɛ́-ndu há nkɛ hɛ́nmɛn, ló wo édwan nkɛ nyokho. Néphan fe ébhra nkɛ ngbaphrá 68ló wo étɔ sa:

– Hɛ khɔ́ ɛli Mesi, ɛbhú hɛ́nphe, ló lephan khɛ́n abhe hɛ yí ɛlú mɛ́n hɛ́n obhá!

Piɛ ésamɛ́n Jezwi phɔ

(Ɔ́n wú Mák 14.66-72; Ɔ́n wú Lwik 22.56-62; Ɔ́n wú Jan 18.15-18,25-27)

69Lóka lókɔn, Piɛ chre ngbophro. Nphaháwo bhrɔ́khó hwan nɛnkhwɛ́nya bɛn tigbɛli, ló ánkranmán nkɛ sa:

– Wú hɛ lɔ ɛle bha Galile sɛ Jezwi lókɔn phɔ?

70Lókhɛ́n néphan khúnbrɛn hɛ́nmɛn, ńsamɛ́n, ló ántɔ sa:

– Mɛn nɛ́n yɛ́n hɛ bhwe yábhɛ brɛ ɛ́nɛn ɛtɔ a.

71Ló ńsa hɛ́nmɛn tre annó ngbophro khúmɛ́n phɔ. Lótɛ nɛnkhwɛ́nya nankhɛ bɛn wui, ló ánkranmán néphan akhwa lóne sa:

– Lephan lókɔn ɔn, mɛ́n lɔ ńphrɛ ma Nazarɛ́thi Jezwi sɛ lókɔn phɔ.

72Lótɛ Piɛ cu samɛ́n, ló ántɔ sa:

– Mɛɛ́n mɔlí phɔ tɔ salé, mɛn nɛn yɛn lephan lókɔn bhrɔ́ɔ́.

73Ámɔn kpɛ́bɛn, lótɛ néphan khɛ́n akhwa lóne tigbali nkɛ ló wo ékranmán nkɛ sa:

– Hɛ lókɔn ɔn, lo ebhú salé ɛli wo hromɛn lephan bɛn: lósi akhɔ tɛ ɔn, hɛ si ɛkhɔ ɛ́tɔ bhwe nɔn echɛ́ lo yɛ́n hɛ si yábhɛ ɛchan.

74Lótɛ Piɛ étɔ sa:

– Kasé mɛn nítan, tɛmɛ Yankan otɛ́ yí dri mɛn phɔ! Mɛɛ́n mɔlí phɔ ntɔ salé mɛn nɛn yɛn lephan lókɔn!

Lóka lókɔn cɛ́ɛ́ kɔsɔ bɛn thɔn. 75Ló ábhwe khɛ́n Jezwi phrɛ tɔ, ádi Piɛ mwanhɛ́n, lónɔn ali salé: “Kɔsɔ bha lé thɔ́n, lókhɛ́n ɛ́bhá samɛ́n ndɔn bhwaliá lée ɛle yɛn mɛn.” Lótɛ ńthándi, ló ńsɔ hɛ́ndu khrákhrá tɛn anthɔ́n.

Markert nå:

MATHIE 26: ENT96

Marker

Del

Kopier