MATHIE 27
27
Wo hɔn Jezwi lo se Piláthi
(Ɔ́n wú Mák 15.1; Ɔ́n wú Lwik 23.1-2; Ɔ́n wú Jan 18.28-32)
1Ńjuju fítaan, nphahamán-óthemánhɔn le Jwifunɛ́n mrɔ́khómán khúnbrɛn ɔ́nmɔn bhúrɛhɛ́n, ló wo ésri Jezwi wɛ́n phɔ bhwe. 2Lóka wo gɛ nkɛ mɛ́ phu, ló wo hɔn nkɛ lo se Piláthi ali Rɔ́mɛn khúbhɛ́nɛ́n guvɛnɛ.
Judasi khú phɔ bhwe
(Ɔ́n wú Júm 1.18-19)
3Judasi khɛ́n aphɛ Jezwi li, lóka ńwu salé wo bhɔ nkɛ pɔn, lótɛ ńsa mɛ́n, ló fránkhi áphɛ́n le áwɔ́ khɛ́n ńdo, ńcu khwɛn man se nphahamán-óthemánhɔn le ńmrɔ́khómán, 4ló ńkránman nkɔn sa:
– Mɛn tɛ ne, átɛsalé mɛn hɔn lephan ale tɛ yíɛkɛ man se ákhú!
Lókhɛ́n wo kranman nkɛ lée:
– Wú lo bhwe bha lóhrómɛn? Hɛ míbrɛ nɔn ali hɛ bhwe o!
5Judasi khwɛn jɛtɛn fɔkhwalé Yankan-khúthé, ńmo si no, ló ńhɔn ábhɛ́ di mɛ́n bhwa wɛn mɛ́n bɛn nbrɛn.
6Nphahamán-óthemánhɔn khwɛn jɛtɛn ló wo étɔ sa:
– Lo bidí le se mɔ́nsi salé lo khwɛ́n jɛtɛn yábhɛ lókɔn há Yankan-khúthé jɛtɛn láka hromɛn, lósi akhɔ tɛ ɔn, áli ńká jɛtɛn.
7Lóka wo sri lóbhwe khɛ́n wo mɛ́n si, wo khwɛn lójɛtɛn lo phɛ npan-thánwo bithe, sa ási lókɔn olí matho si wo bhá bhó nthékhunɛ́n. 8Lóhɛ́nthé achan lócí lókɔn abha di ncɛ́n, óche lóbithe lókɔn “ńká bithe”. 9Ló bhwetɔ́tréwo Jeremi bhwe lókɔn atɔ, ásimɛ́n sa: “Wo khwɛn fránkhi áphɛn le áwɔ́ lókɔn (jɛtɛn khɛ́n Izraɛ khúbhɛ́nɛ́n khúnbrɛn mɛ́n si salé wo bhá sɔ́n nkɛ) 10ló wo khwɛn phɛ npan-thánwo bithe, sa lósi Hwánthe khɔ tɔ lóbhwe se mɛn a.”
Piláthi ébhi Jezwi bhwe
(Ɔ́n wú Mák 15.2-5; Ɔ́n wú Lwik 23.3-5; Ɔ́n wú Jan 18.33-38)
11Wo hɔn Jezwi lo guvɛnɛ hɛ́nmɛn ló ánmi nkɛ sa:
– Wú hɛ nɔn ɛli Jwifunɛ́n bhringbi?
Ló Jezwi tɔ sa:
– Lótɛ nɔn ɛtɔ o.
12Lókhɛ́n lómánji ka nphahamán-óthemánhɔn le mrɔ́khómán ephɛ́ bhwe há nkɛ tho, lóne ńnɛn tɔ bhwe brɛ nkalé.
13Ló Piláthi kranman nkɛ sa:
– Ábhwe khúnbrɛn lókɔn khɛ́n wo ephɛ́ há hɛ tho ɔn, wú ɛle yé? 14Lókhɛ́n Jezwi le ka bhwetɔ́ khúnbrɛn lókɔn mɛ́n, áchɛ lóbhwe etán guvɛnɛ hɛ́nmɛn kábrɛ.
Wo bhɔ Jezwi pɔn sa wo bhá wɛ́n nkɛ
(Ɔ́n wú Mák 15.6-15; Ɔ́n wú Lwik 23.13-25; Ɔ́n wú Jan 18.39—19.16)
15Ló ákakhúnbrɛn, kasé wo ebhá lí Phákhe ɔn, guvɛnɛ dimán khúthékáwo bɛn, ló ápasá lephan khɛ́n énɛn nɔn ándiman. 16Lóka yábhɛ lókɔn ɔn, khúthékáwo khóo bɛn bháne óche Jezwi Barabási. 17Ápasá bhurɛhɛ́n ya, ló Piláthi ébhi wo sa:
– Lókhúthékáwo bɛn nɔn hɔ́n énɛn salé mɛn diman sé hɔ́n ɛ: Wú Jezwi óche Barabási lée nka Jezwi óche Mesi?
18Khɛ́n Piláthi yɛn salé Jezwi nkɔn hɔn bha se ɔn, ńmɛsa mɛn nɔn nkɔn khɔ hɔn nkɛ.
19Lóka Piláthi bha ákwabhɔ́ gɔn ntɔ́nyán, lónɔn mɛ́n bhia chɛ lephan bɛn bha ékranmán nkɛ salé: “Ɛle hɔ́n hɛ nbrɛn ká Jezwi lókɔn ale tɛ yíɛkɛ bhwetɔ́ hrómɛn bhrɔ́ɔ́, átɛsalé ncɛ́n mréci, ńnájú mɛn, mɛ́n hɛ́nthé áyí dri mɛn phɔ kpɛ́ɛ́n.”
20Ló nphahamán-óthemánhɔn le mrɔ́khómán ɔ́nmɔn ékhɔnmán ápasá phɔ salé nkɔn chɛ́ odimán Barabási, khɛ́n Jezwi-ɛ nɔn wo wɛ́n. 21Guvɛnɛ cu bho bhwetɔ́, ló ánmi ápasá lée:
– Néphan mɔn lókɔn hromɛn ɔn, lólephan bɛn nɔn hɔ́n énɛn salé mɛn diman sé hɔ́n ɛ?
– Ló wo nkɛé! Lo énɛn salé ɛdimán Barabási.
22– Ló Piláthi ébhi nkɔn sa, ńthé ébí nɔn hɔ́n énɛn salé mɛn tɛ́ Jezwi lókɔn óche Mesi ɛ?
Ló wo khúnbrɛn wo nkɛé:
– Tɛmɛ ɛchɛ nkɛ há áyábhletre phɔ!
23– Ló Piláthi cu bhi wo sa, ébí nbrɛn nɔn ńtɛ yan ɛ?
Khɛ́n wo elúkhwɛ́ wo sɛ́npɛ́ khúnbrɛn mɛn sa:
– Tɛmɛ ɛchɛ́ nkɛ há áyábhletre phɔ!
24Lóka Piláthi wu salé álepɛ ábhwe brɛ eyɔ́n se, khɛ́n ńkhwɛ́lu pán nɔn ethúbhɔ ɔn, lótɛ ńkhɔ ndu cho mɔ́n ápasá hɛ́nmɛn ló ńtɔ sa:
– Lephan lókɔn, mɛn nɛn ma mɛ́n khú bhwetɔ́ hrómɛn! Lée hɔ́n míbrɛ nɔn ali hɔ́n bhwe!
25Ló ápasá khúnbrɛn étɔ sa:
– Kasé ńkhu, tɛmɛ mɛ́n nká osa hɛ́n lo le lo miɔn ɔ́nmɔn tho!
26Piláthi diman Barabási se wo, ńchɛ wo bhra Jezwi mɛ́, ló ńhɔn nkɛ se wo lo chɛ ha yábhletre phɔ.
Ngbumán éha Jezwi lia
(Ɔ́n wú Mák 15.16-20; Ɔ́n wú Jan 19.2-3)
27 Piláthi ngbumán hɔn Jezwi lo guvɛnɛ bháthó, ló wo ngbumán khúnbrɛn wo jekhali nkɛ. 28Wo bwan mɛ́n ntráliɛ́ yɛn, ló wo hɔn khókhóthu nannan bɛn sɔ nkɛ. 29Lómánji, wo gbɛ ńthó kpró bɛn bhu nkɛ hɛ́n, ló wo bho ńgochro bɛn ka mɛ́n liémɔn ngbɛthé. Wo jran bhɔlé nkɛ hɛ́nmɛn, wo éha nkɛ lia, ló wo étɔ sa:
– Jwifunɛ́n bhringbi, lo ebhɔ́ hɛ yí!
30Wo éphu mísɛ́-ndu há nkɛ phɔ, ló wo bho ńgochro wo ébhra mɛ́n hɛ́nphe. 31Lóka wo ha nkɛ lia phu, wo hɔn khókhóthu yɛn, wo cu khwɛn mɛ́n ntráliɛ́ sɔ-ɛ, ló wo hɔn nkɛ ɔ́nmɔn lo wo echɛ́ há áyábhletre phɔ.
Wo chɛ Jezwi ha yábhletre phɔ
(Ɔ́n wú Mák 15.21-32; Ɔ́n wú Lwik 23.26-43; Ɔ́n wú Jan 19.17-27)
32Lóka wo chan khúbhɛ́ hrómɛn thandi wo élo, wo ywɛnli Sirɛnɛn khúbhɛ́ sɛ bɛn óche Simɔn, ngbumán si nkɛ ha, ló ńhɔn Jezwi yábhletre. 33Wo di ási óche Gɔgota, lóthé nɔn ali “Hɛ́nphe nchwe si”. 34Lóne nɔn wo hɔn áyí nɔ́nkpó bɛn khrɛ divɛn, ló wo hɔn se Jezwi lée annán; khɛ́n lóka ńdɔn mɛ́n, lópán ńnɛn cu nan npɔhɔ́n.
35Wo chɛ Jezwi ha áyábhletre phɔ, wo lwa mɛ́n ntráliɛ́, ló wo ti ngbamán, ochɛ́sé bhwetɔ́tréwo bhwe atɔ osímɛ́n sa: wo lwa mɛn ntráliɛ́, ló mɛn khókhóthu ɔn, wo ti ngbamán. 36Ló wo chethé lóne wo ébo nkɛ. 37Ló mɛ́n hɛ́nphe tho, wo lrɛ yíbɛn tre, ló áyí lókɔn wo lrɛ ɔn, élie lóyí achɛ khɛ́n wo bhɔ nkɛ pɔn: “Lephan lókɔn, mɛ́n nɔn ńni Jezwi ali Jwifunɛ́n bhringbi.” 38Wo chɛ khokhrohamán mɔn lɔ ha áyábhletre phɔ, bɛn ya Jezwi liémɔn si, lójɔ ya nkɛ mránkhu si.
39Néphan khɛ́n akhɔ lóne ehɛ́n éjiká hɛ́nphe, wo etá nkɛ, 40ló wo étɔ sa:
– Nkɛé hɛ nɔn ɛ́tɔlé ɛ́bha ca Yankan-nkhú khwálé, ló ɛ́bha bhó ńcíbhí bhwaliá tɛɛ thán, kasé ɛli Yankan Mi, do hɛ nbrɛn ka, chan áyábhletre phɔ diathé a!
41Lósi yábhɛ brɛ, nphahamán-óthemánhɔn, bidíyɛ́nmán le mrɔ́khómán ɔ́nmɔn lɔ khɔ éha nkɛ lia é, ló wo étɔ sa:
42– Ńdo néphan nánkhɛ nkalé, wú ánnɛn gɛ do mɛ́n bɛn nbrɛn-ɛ ká! Nkɛé mɛ́n ńni Izraɛ khúbhɛ́nɛ́n bhringbi? Ńthé tɛmɛ anchán áyábhletre phɔ diathé, ló lo bhui mímí. 43Ńmo mɛ́n mwasrui tre Yankan tho ló ńtɔ sa: “Mɛn ni Yankan Mi.” Áyɔn! ńthé óbha wú kasé Yankan bha do-e ká!
44Ló khokhrohamán mɔn khɛ́n ochɛ ha yábhletre phɔ, wo lɔ lósi tɛɛ wo khɔ wo etá nkɛ é.
Jezwi khu
(Ɔ́n wú Mák 15.33-41; Ɔ́n wú Lwik 23.44-49; Ɔ́n wú Jan 19.28-30)
45Lóka ácí ya bháca, dubhlékhu do ákhúbhɛ́ hrómɛn si khúnbrɛn kábrɛ kábrɛ ádi ńjuka wáchɛn bhwaliá. 46Lóka ácí li ńjuka wáchɛn bhwaliá, Jezwi lukhwɛ́ khrákhrá bɛn sa:
– Eli, Eli lama sabatani? (lóthé nɔn ali sa: “Mɛn Yankan, mɛn Yankan bítɛ khɛ́n ɛyɔ mɛn ka ɛ?”)
47Néphan fe khɛ́n abha lóne ye nkɛ tɔ́, ló wo elúkhwɛ́ tɔ sa:
– Ɔ́ndi njɛlé a, ánche Eli!
48Lóyámɛ́n, wo hromɛn lephan bɛn wa lo bho mra sɔ divɛnkɔn hromɛn, ńmo gɛha áyá mɛ́n, ló ńhɔn tiatre Jezwi lé sa nkɛ nán. 49Lókhɛ́n dɔnbɛn étɔlé:
– Ɔ́n khwaphɔlé se owú, kasé Eli bha do-e ká!
50Lótɛ Jezwi cu lukhwɛ́ khrákhrá bɛn npɔ, lópán ńkhu.
51Lóka yábhɛ brɛ, ádɛgɔn khɛ́n wo bu tre Yankan-khúthé chantho nran ádi thé. Áyíta éjika, ló ńmóbhó énran, 52álínɔn phwan, ló Yankan-gbemán búdúbúdú khɛ́n akhu ɔn, wo cu saji bha bha mɛpɔ́. 53Wo chan álínɔn hromɛn thandi, ló lóka Jezwi chan khúnɔn mɛn fe, wo lo Jeruzalɛ́mɛn ali ákhúbhɛ́ créncré, ló néphan búdúbúdú wú wo lóne.
54Rɔ́mɛn khúbhɛ́nɛ́n ngbumán-óthe bhrɔ́khó le ngbumán khɛ́n ébo Jezwi, lóka wo wu áyíta éjika le áyí khúnbrɛn lókɔn etɛ́, ákhwíthá ka wo hromɛn, ló wo étɔ sa: “Mímí nbrɛn, lephan lókɔn ńni Yankan Mi!” 55Ńmie búdúbúdú ya lóne, khɛ́n wo ya thwethwemɛn-áan wo ewú lóyí. Wo mie lókɔn, wo chan Galile-áan gɛ Jezwi thá, ló wo khwɛn nkɛ hɛ́nmɛn nɛn. 56Wo mie lókɔn ɔn, wo nɔn wo li Mari achan Madala khúbhɛ́, Mari ali Jakhi le Jozɛfu ɔ́nmɔn wo man le Zebede miɔn wo man.
Wo hɔn Jezwi ka álínɔn hromɛn
(Ɔ́n wú Mák 15.42-47; Ɔ́n wú Lwik 23.50-56; Ɔ́n wú Jan 19.38-42)
57Lóka ácí gu, lephan bɛn ali bhringbi óche Jozɛfu achan Arimate khúbhɛ́ bha. Sɛ lókɔn, mɛ́n lɔ ńni Jezwi yíchwɛmán hrómɛn lephan bɛn. 58Ńno Piláthi yé ansá mɔ́nsi ló anhɔ́n Jezwi nánmí, ló Piláthi se lóphɔ mɔ́nsi. 59Lóka ńhɔn Jezwi nánmí, ńmo kandanman pɔ́pɔ́ bɛn ju 60ló ńhɔn nkɛ no mo mɛ́n nbrɛn línɔn khɛ́n ńchɛ wo bɔn kalé abha ńmú hrómɛn. Ńhɔn ábhú khóo bɛn mrwɛn lómɛ́n, ló ńno. 61Mari achan Madala khúbhɛ́ le Mari lójɔ ɔ́nmɔn ya lóne, ló wo chre álínɔn hɛ́nmɛn.
Ngbumán ébo álínɔn
62Lóka ácí ci, ácí khɛ́n ogɛ áli ácí ócɔ saba tɛ́, nphahamán-óthemánhɔn le Fariziɛnnɛ́n ɔ́nmɔn, wo khúnbrɛn wo lo Piláthi yé 63wo ékranman nkɛ sa:
– Hwánthe, édi lo mwanhɛ́n salé kpakpráwo lókɔn, mɛ́n ka ńma mɛpɔ́ ɔn, mɛ́n nkɛé: “Ńcíbhí bhwaliá tɛɛ, mɛ́n man chán khúnɔn mɛn fe.” 64Lóhɛ́nthé tɛmɛ ɛsé mɔ́nsi ló lo wúsi khɔ́ bo álínɔn kábrɛ kábrɛ odi ńcíbhí bhwaliá, ochɛ́sé mɛ́n yíchwɛmán olé bha hɔ́n mɛ́n nánmí sído, khɛ́n lómánji wo kranmán aféchwe lée: “Ńchan khúnɔn mɛn fe.” Átɛsalé ńkpakprá lókɔn wo bhá lí, ló-ɛ bha khɔnman brɛn ásithwá ékɛ.
65Ló Piláthi kranman nkɔn sa:
– Hɔ́n lɔ ɔ́n pɛ ngbumán ábha gɛ bosi. Tɛmɛ ɔ́n no, ló hɔ́n si tɛɛ ɔ́n ma khɔ́ bo si khɛ́n ábha yɔ́n, tɛmɛ ɔ́n tɛ́.
66Ló wo lo. Lóka wo phu álínɔn mɛ́n si mwámwá, ló wo khwɛn ngbumán jekhali ya ébosi.
Markert nå:
MATHIE 27: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
