MATHIE 25
25
Ńmiebhiɔ́ áwɔ́ phɔ yandran
1– Lóhɛ́nthé, Átho Bhringbi khúbhɛ́ bhwe bha khɔ́ sa ńmiebhiɔ́ áwɔ́, khɛ́n akhwɛn khanniɛn chan bháthó thándi élo ywɛnlí bhiepɔ nca. 2Wo hromɛn, mwannán li gbwɛyá, khɛ́n mwannán li bhweyɛ́nyá. 3Ló mwannán khɛ́n ali gbwɛyá, lóka wo khwɛn wo khanniɛn wo élo, wo le sranman nɔ́n gba phɔ, 4lókhɛ́n bhweyɛ́nyá ka akhwɛn wo khanniɛn ɔn, wo-ɛ, wo sranman nɔ́n gba phɔ ɔ́nmɔn lo. 5Khɛ́n bhiepɔ nca ebhá mɔ́n, áchɛ áyí brɛn wo mɔ́n ló ńná khwa wo.
6– Lóka ácí bhuri mɔn, átɔ́ bɛn édɛn sa: “Nɛn bhiepɔ nca! Ɔ́n thándi bha hɛ́n lo ywɛnli!” 7Ńmiebhiɔ́ áwɔ́ lókɔn chanfe tho écɔ wo khanniɛn tɛ́. 8Ló gbwɛyá ékranmán bhweyɛ́nyá lée: “Lo éla hɔ́n, ɔ́n se lo nɔ́n kpɛ, átɛsalé lo khanniɛn enɔ́n.” 9Khɛ́n bhweyɛ́nyá kranman gbwɛyá sa: “Lo le dɛn, lo nɔ́n bha lé gɛ di lo le hɔ́n ɔ́nmɔn. Tɛmɛ ɔ́n nó ájɛkhúthé lo phɛ́ hɔ́n ékɛ.” 10Lótɛ ńmiebhiɔ́ gbwɛyá lo ephɛ́ nɔ́n, lóka lókɔn nɔn bhiepɔ nca bha. Ló bhweyɛ́nyá khɛ́n ahamwanhɛ́n chre, wo gɛ nkɛ ɔ́nmɔn ka ákhúchre gɔn, ló wo tɔn si sánfɛ mɛn. 11Lómánji, ńmiebhiɔ́ mwannán lókɔn bha, ló wo elúkhwɛ́ tɔ sa: “Hwánthe, Hwánthe, phwan lo si!” 12Khɛ́n bhiepɔ nca tɔ sa: “Mímí mɛɛ́n kranmán hɔ́n: mɛn nɛn yɛn hɔ́n.”
13Ló Jezwi tɔ sa, ɔ́n mraya, átɛsalé ɔ́n ne yɛn lócí le lówáchɛn ɔ́nmɔn.
Nɛnkhwɛ́nmán bhwaliá phɔ yandran
(Ɔ́n wú Lwik 19.11-27)
14– Átho Bhringbi khúbhɛ́ tɛsa lephan bɛn khɛ́n eló hu: ńche mɛ́n nɛnkhwɛ́nmán ma, ló ńkhwɛn mɛn yí khúnbrɛn ńpɛ ha nkɔn mɔ́n mɛn. 15Nɛnkhwɛ́nwo athwasi, ńse nkɛ ncí fránkhi mwannán, ló adɔngba, ńse nkɛ ncí fránkhi mɔn, ló ńmo ncí fránkhi brɛ se bhwaliá hrómɛn lephan: átɛsalé lephan brɛ hɛ júmán si ɛ́bha gɛ lí di, lóyí nɔn ansé hɛ. Lómánji ńno hu. 16Nɛnkhwɛ́nwo khɛ́n ńse ncí fránkhi mwannán, khwɛn mɛ́n ékɛ li matra, ló ńcu gɛ ncí fránkhi mwannán mɔ́tho. 17Ló adɔngba khɛ́n ńse ncí fránkhi mɔn ɔn, mɛ́n lɔ ńtɛ lóyábhɛ brɛ. 18Khɛ́n lephan ńmo ncí fránkhi brɛ se ɔn, mɛ́n-ɛ ńno bɔn nɔn, ló ńmo mɛ́n hwánthe jɛtɛn hrɔman lóhrómɛn.
19Ámɔn khɛ́n nɛnkhwɛ́nmán lókɔn hwánthe chan áhu bha, ló ńche nkɔn salé nkɔn bha yɛn fɛ́n. 20Nɛnkhwɛ́nwo khɛ́n ńse ncí fránkhi mwannán tigbali mɛ́n hwánthe, ńkhwɛn ncí fránkhi mwannán nánkhɛ nie nkɛ, ló ńkránman nkɛ sa: “Hwánthe, ɛse mɛn ncí fránkhi mwannán, khɛ́n wu a, mɛn cu gɛ fránkhi mwannán mɔ́tho.” 21Ló mɛ́n hwánthe krɛnmɛn sa: “Áyɔn, ɛli nɛnkhwɛ́nwo bhwá alí mɛ́nbrɛ. Lónian mɛn khɛ́n ɛli mɛ́nbrɛ áyí ale hahɛ́n hrómɛn ɔn, thénthé, áyí ahahɛ́n nɔn mɛn mán khwɛ́n há hɛ mɔ́n mɛn. Bha gɛ mɛn ɔ́nmɔn olí phɔhá.” 22Nɛnkhwɛ́nwo khɛ́n ńse ncí fránkhi mɔn tígbali mɛ́n hwánthe ló ńkránman nkɛ sa: “Hwánthe, ɛse mɛn ncí fránkhi mɔn, khɛ́n wu a, mɛn cu gɛ ncí fránkhi mɔn mɔ́tho.” 23Ló mɛ́n hwánthe krɛnmɛn sa: “Áyɔn, ɛli nɛnkhwɛ́nwo bhwá alí mɛ́nbrɛ. Lónian mɛn khɛ́n ɛli mɛ́nbrɛ áyí ale hahɛ́n hrómɛn ɔn, thénthé áyí ahahɛ́n nɔn mɛn mán khwɛ́n há hɛ mɔ́n mɛn. Bha gɛ mɛn ɔ́nmɔn olí phɔhá.” 24Ńthé nɛnkhwɛ́nwo khɛ́n ńse ncí fránkhi brɛ tigbali mɛ́n Hwánthe ló ńkránman nkɛ sa: “Hwánthe, mɛn yɛn sa ɛli lephan bɛn akhɔnman: hɛ ɔn, ási ɛle ha yí lɔ ɛbhú yí, ló ási ɛle khwa nyámí lé lɔ, ɛbhú nyámí. 25Mɛn sókhú, lóhɛ́nthé nɔn mɛn bɔn nɔn, ló mɛn mo hɛ jɛtɛn ka lóhrómɛn tre hɛ lé. Wu a: nɛn hɛ yí.” 26Ló mɛ́n hwánthe krɛnmɛn sa: “Nɛnkhwɛ́nwo phromɛn, nánwo! Khɔ́ ɛyɛn salé ási mɛn nɛn ha yí, lóne lɔ mɛn mú yí, saji ási mɛn nɛn khwa nyámí lé, lóne lɔ mɛn mú nyámí? 27Áyɔn! Ló kasé áli nɛn ɔn, ɛbhó mɛn khwɛbhí lo tré ási otré khwɛbhí lé, lónɔn lóka mɛn ma ɔn, ápɛ yí ábha bhɔ́ mɛn jɛtɛn tho ló mɛn mán mó. 28Ɔ́n mó mɛ́n ncí fránkhi brɛ lókɔn yɛn mɛ́n mɔ́n mɛn, ló ɔ́n mó sé lephan apɛ ncí fránkhi mwannán. 29Átɛsalé lephan khɛ́n apɛ yí, mɛ́n wo bhá cu bhó yí kɛne, ló ánman pɛ yí thúbhɔ, khɛ́n lephan alepɛ yíɛkɛ ɔn, lómrií lókɔn khɛ́n ńpɛ, lólɔ wo bhá thándo yɛn. 30Ló nɛnkhwɛ́nwo nánwo lókɔn, ɔ́n hɔ́n-ɛn fɔ́nká ngbophro dubhlékhu hromɛn. Lóne nɔn ánman thɔ́n hɛ́ndu, ló ánman chrui nɔ́thá.”
Ákwabhɔ́ aphuji
31– Lóka Lephan Mi bha bhá khɛ́n ánman ní bhringbi mɛ́n le Yankan-mranchɛ́mán khúnbrɛn ɔ́nmɔn ɔn, lóka lókɔn nɔn ánman chré mɛ́n Yankan nguhá bhringbi yákhru tho. 32Áthéjinɛ́n khúnbrɛn bha bhurɛhɛ́n ya mɛ́n hɛ́nmɛn, ló ánman ca nkɔn ya jɛ́ njɛ, sa lósi gbankhran-bówo lɔ khɔ́ ca ńgbankhran le ńciɛ ɔ́nmɔn ya jɛ́ njɛ a. 33Ánman khwɛ́n ńgbankhran ya mɛ́n liémɔn si, ló ánman khwɛ́n ńciɛ ya mɛ́n mránkhu si. 34Lóka lókɔn nɔn bhringbi bha kranmán néphan abha mɛ́n liémɔn si salé: “Hɔ́n khɛ́n mɛn Nthe bhɔ hɔ́n ndu, tɛmɛ ɔ́n má, ló Yankan-Bhringbi khúbhɛ́ khɛ́n wo tɛtre hɔ́n lé lóka wo ka tɛ áthéji-áan, ɔ́n ma ká lóhrómɛn. 35Átɛsalé lóka áko ehɔ́n mɛn, ɔ́n se mɛn nɛn mɛn ni; lóka ńdukro ehɔ́n mɛn, ɔ́n se mɛn ndu mɛn nan; lóka mɛn ni thekhusɛ, ɔ́n do mɛn; 36lóka mɛn ya ndígban, ɔ́n se mɛn dɛgɔn mɛn khwa; lóka álɔ́ ehɔ́n mɛn, ɔ́n ma wu mɛn, lóka mɛn ma khúthéká gɔn, ɔ́n ma kpra mɛn.” 37Ló néphan apriman, wo bhá kranmán nkɛ sa: “Hwánthe, lóka bɛn nɔn lo wu áko ehɔ́n hɛ khɛ́n lo se hɛn nɛn ɛli ɛ, saji lóka bɛn nɔn lo wu ńdukro ehɔ́n hɛ khɛ́n lo se hɛ ndu ɛnan ɛ? 38Lóka bɛn nɔn lo wu ɛli thekhusɛ khɛ́n lo do hɛ, saji lóka bɛn nɔn lo wu ɛya ndígban khɛ́n lo se hɛ dɛgɔn ɛkhwa ɛ? 39Lóka bɛn nɔn álɔ́ ehɔ́n hɛ, khɛ́n lo bha wu hɛ, saji lóka bɛn nɔn ɛbha khúthéká gɔn, khɛ́n lo bha kpra hɛ?” 40Ló bhringbi bha kranmán nkɔn lée: “Mímí mɛɛ́n kranmán hɔ́n: lókakhúnbrɛn khɛ́n mɛn hɔnsɛ́nmánhɔn chɛ́-nchɛ́ hrómɛn, ɔ́n ma tɛ́ áyí yábhɛ lókɔn sé yípɔ bɛn ɔn, áyí lókɔn, átɛsalé mɛn nɔn ɔ́n mo tɛ mɛn.”
41Lómánji, bhringbi bha kranmán néphan abha mɛ́n mránkhu si salé: “Ɔ́n tílo mánji, hɔ́n lókɔn khɛ́n Yankan phiamɔ́n se hɔ́n! Tɛmɛ ɔ́n nó átɛn atre ále nɔ́n hrómɛn, átɛn lókɔn khɛ́n ali áyí wo tɛtre logbo le mɛ́n Yankan-mranchɛ́mán ɔ́nmɔn lé! 42Átɛsalé lóka áko ehɔ́n mɛn, ɔ́n ne se mɛn nɛn mɛn ni; lóka ńdukro ehɔ́n mɛn, ɔ́n ne se mɛn ndu mɛn nan; 43lóka mɛn ni thekhusɛ, ɔ́n ne dɛn do mɛn; lóka mɛn ya ndígban ɔ́n ne se mɛn ádɛgɔn mɛn khwa, lóka álɔ́ ehɔ́n mɛn, ɔ́n ne bha wu mɛn, saji lóka mɛn ma khúthéká gɔn, ɔ́n ne bha kpra mɛn.” 44Ló wo bhá kranmán nkɛ sa: “Hwánthe, lóka bɛn nɔn lo wu áko ehɔ́n hɛ, ńdukro ehɔ́n hɛ, ɛli thekhusɛ, ɛya ndígban, álɔ́ hɔ́n hɛ, saji ɛbha khúthéká gɔn, lókhɛ́n lo le dɔnman hɛ mɔ́n ɛ?” 45Ló bhringbi bha kranmán nkɔn sa: “Mímí mɛɛ́n kranmán hɔ́n: lókakhúnbrɛn khɛ́n ńmiɔ́ chɛ́-nchɛ́ hrómɛn, ɔ́n ma le tɛ́ áyí yábhɛ lókɔn sé yípɔ brɛ ɔn, áyí lókɔn, átɛsalé mɛn lɔ, ɔ́n ne tɛ se mɛn.” 46Ló wo lókɔn, wo bhá ló áyíkhúphɔ atre álephú hrómɛn, lókhɛ́n néphan apriman, wo-ɛ wo bhá ló ńmɛpɔ́bhá atre álephú hrómɛn.
Markert nå:
MATHIE 25: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
