MATHIE 24

Jezwi étɔlé Yankan-nkhú bha ca khwá

(Ɔ́n wú Mák 13.1-2; Ɔ́n wú Lwik 21.5-6)

1Lóka Jezwi chan Yankan-khúthé thándi élo, mɛ́n yíchwɛmán tigbɛli, ló wo élie nkɛ Yankan-nkhú othan tre. 2Jezwi bho bhwetɔ́ ló ánkranmán nkɔn sa:

– Wú hɔ́n ewú ńkhú khúnbrɛn lókɔn atre? Lókhɛ́n mímí mɛɛ́n kranmán hɔ́n: krɛn, abha lé pɛ ábhú brɛ ábha tré ábhú lójɔ tho; lókhúnbrɛn bha ca khwálé phú.

Muswe le ágbrelí néphan bha gɛ

(Ɔ́n wú Mák 13.3-13; Ɔ́n wú Lwik 21.7-19)

3Lóka Jezwi che Olive-nyá bhóbhó tho, mɛ́n yíchwɛmán do nkɛ saya njɛ, ló wo ébhi nkɛ sa:

– Lóka yábhɛ khɛ́n lóyí lókɔn bha tɛ́, tɛmɛ ɛtɔ sé lo yé kpɛ? Ńthé bí nɔn ábha chɛ́ lo yɛ́n salé hɛ bhá ɛbhá bhá lócí gbali phɔ ɛ? Saji bí nɔn ábha chɛ́ lo yɛ́n salé lóka áthéji bha bhɔ́, lócí gbali phɔ ɛ?

4Ló Jezwi kranman nkɔn sa:

– Tɛmɛ ɔ́n hámwanhɛ́n, ló lephan brɛ olé khrɛ hɔ́n. 5Átɛsalé néphan búdúbúdú bha bhó mɛn hɛ́n hrómɛn bhá, ló wo bhá tɔ salé: “Mɛn nɔn mɛn ni Mesi!” Ló wo bhá khrɛ néphan búdúbúdú yábhɛ nɛn. 6Átha néphan bha kú, wo bhá tɔ lóbhwe sé hɔ́n yé, saji átha abha hɛ́nmɛn ebhá, lólɔ wo bhá tɔ lóbhwe sé hɔ́n yé, lókhɛ́n ńthɛ́n ole lí hɔ́n: áyɔn salé lóyí khúnbrɛn lókɔn otɛ́, lókhɛ́n léli salé áthéji ebhá bhɔ́. 7Aféchwe bɛn bha gɛ aféchwe lójɔ ɔ́nmɔn kútha, bhringbi khúbhɛ́ bɛn bha bhó ádi lo ywɛnlí bhringbi khúbhɛ́ lójɔ, áko bha di, ló áyíta bha jika ágotho dɔndɔn. 8Lóyí khúnbrɛn lókɔn bha tɛ́sa bhie ka ehó yí si ákhɔ́ dri phɔ a.

9Néphan bha khwɛ́n hɔ́n bha sé wo lri hɔ́n gbre, ló wo bhá wɛ́n hɔ́n, ló mɛn hɛ́nthé aféchwe khúnbrɛn bha sa hɔ́n mɛ. 10Lóka yábhɛ lókɔn, néphan búdúbúdú bha yɔ́ wo mímíbhú ká ló ábha liá, wo bhá ya wo thethé khrɛ wo bɛn nbrɛn, ló saji wo bhá ya wo thethé sa wo bɛn nbrɛn mɛ. 11Bhwetɔ́trémán kpakprámán búdúbúdú bha bhá, ló wo bhá khrɛ néphan búdúbúdú. 12Áyíléletɛ́ bha do si khúnbrɛn, ábha chɛ́sé néphan búdúbúdú pɔ́ apɛ ɔn, abha lé cu pɛ sɛ́npɛ́. 13Ló lephan khɛ́n ábha gɛlé ya ábha di lómɛ́n, lephan lókɔn, wo bhá swa nkɛ. 14Ló Ábhwe Bhwábhwá lókɔn khɛ́n ali Yankan Bhringbi khúbhɛ́ phɔ bhwe ɔn, wo bhá tɔ pí áthéji si khúnbrɛn, ló ábhwe lókɔn, lónɔn ábha lí aféchwe khúnbrɛn phɔ ndalefɛ. Lóka lókɔn nɔn áthéji bha bhɔ́.

Muswe yí khrákhrá phromɛn

(Ɔ́n wú Mák 13.14-23; Ɔ́n wú Lwik 21.20-24)

15– Ló ɔ́n ma wú lephan óche “Muswe yí khrákhrá phromɛn”, khɛ́n bhwetɔ́tréwo Daniɛ tɔ mɛ́n phɔ bhwe bha ya ási créncré. (Ló áyí lókɔn kasé lephan ɛkán, tɛmɛ ɛyé lóbhwe mwámwá!) 16Lóka lókɔn, néphan khɛ́n ábha bhá Jude gotho ɔn, tɛmɛ wo wá ló ńmóbhó tho; 17lephan khɛ́n ábha bhá nkhú tho, annɛ́n diathé má khúthé man khwɛ́n yí. 18Lephan khɛ́n abha bithe, annɛ́n sáji má bháthó man hɔ́n mɛ́n khókhóthu. 19Ló lwɛlwɛyá le ntánbroyá, ébí muswe bɛn li lókɔn khɛ́n ebhá bhú hɔ́n tho yábhɛ nɛn ɛ! 20Tɛmɛ ɔ́n na Yankan, ló ácí khɛ́n ɔ́n ma wá, lócí lókɔn olé sa tré ádúdu, saji olé sa tré saba cí bɛn! 21Átɛsalé lóka lókɔn, ágbrelí bha thúbhɔ brɛn ágbrelí khúnbrɛn, achan áthéji ka abhɔhɛ́n adi ncɛ́n, abha lé pɛ ágbrelí ábha khɔ́ ágbrelí yábhɛ lókɔn bhrɔ́ɔ́. 22Kasé Yankan le tɔlé mɛ́n jan ácí lókɔn kpɛ́bɛn khwálé, ka abha lé pɛ lephan brɛ ábha bhá mɛpɔ́. Lókhɛ́n néphan ńsan hɛ́nthé, ńjan ácí lókɔn kpɛ́bɛn khwa.

23Kasé lephan bɛn ékranmán hɔ́n lée: “Ɔ́n wu a! Mesi nɔn abha krɛn!” saji “Mesi nɔn abha kwan yéne,” ɔ́n ne bhui mímí. 24Átɛsalé Mesi kpakprámán le bhwetɔ́trémán kpakprámán ɔ́nmɔn bha bhá, wo bhá tɛ́ hɛ́nmɛntányí le áphɔgóyí khónkhó ɔ́nmɔn khrɛ néphan, áchɛ́se kasé ɔ́n ne hamwanhɛ́n, néphan bhwá nbrɛn khɛ́n Yankan san, wo lɔ nkɔn bha khrɛ wo. 25Hɔ́n eyé! Ábhwe lókɔn, mɛn mú salé mɛn phrɛ kranman hɔ́n.

26Ló kasé wo ékranmán hɔ́n lée: “Ɔ́n wu a, ńma ánánkhuthé!” ɔ́n ne ló lóne. Saji kasé wo ékranmán hɔ́n lée: “Ɔ́n wu a, mɛ́n nɔn ńhrɔ́man ma krɛn!” ɔ́n ne bhú mímí. 27Lósi yábhɛ khɛ́n ágbánkhran tɛn khɔ́ fí átho chán ácɛ́nmɛ si ádi bha hɛ́n lósi ásɔ́ha ɔn, lósi yábhɛ brɛ Lephan Mi lɔ bha khɔ́ bhá nɔn ali lókɔn. 28Lósi kɔnthewo ka ɔn, lóne nɔn khrokpé lɔ bhurɛhɛ́n.

Lephan Mi ka ábha bhá

(Ɔ́n wú Mák 13.24-27; Ɔ́n wú Lwik 21.25-28)

29– Lógbrelí cíhɔn lókɔn mánji, lóyámɛ́n tɛɛ ácɛ́nmɛ bha bhie, pɛ lɔ bha lé cu fí, pɛmwe bha chántho fɔ́khwálé, ló átho sɛ́npɛ́mán bha fa. 30Ló átho lóne, áyí khɛ́n ábha trɛ Lephan Mi tré bha thándi. Áthéjinɛ́n khúnbrɛn bha jɔ phɔ, wo bhá wú Lephan Mi átho mɔngú mɔngú hrómɛn, ló ánman khɔ́ ńsɛ́npɛ́ le ńguhá khóo ɔ́nmɔn hrómɛn má. 31Lóka mrakáta khóo bha dɛn, Lephan Mi bha chɛ́ mɛ́n Yankan-mranchɛ́mán ló áthéji ngrɛmɛ́n bhwelí: ló néphan khɛ́n ńsan abha áthé le átho ɔ́nmɔn khúnbrɛn bha bhurɛhɛ́n.

Áyílie wo bho thweli fígeyá

(Ɔ́n wú Mák 13.28-31; Ɔ́n wú Lwik 21.29-33)

32– Tɛmɛ oyé ábhwe khɛ́n okhɔ fígeyá phɔ tɔ: lóka fígeyá édia ncɛn pɔ́-npɔ́, khɛ́n élu nbi, tɛmɛ ɔ́n yɛ́n salé áka pɔ́pɔ́ gbali phɔ. 33Lóyábhɛ brɛ, lóka ɔ́n ma wú lóyí khúnbrɛn lókɔn etɛ́, tɛmɛ ɔ́n yɛ́n salé Lephan Mi bhácí gbali phɔ, ló ńya khúmɛ́n. 34Mímí mɛɛ́n kranmán hɔ́n: néphan aya ncɛ́n, wo khúnbrɛn wo bha lé khú phú lɔ khɛ́n lóyí bha tɛ́. 35Tɛmɛ ɔ́n yɛ́n salé átho le áthé ɔ́nmɔn bha hɛ́n, khɛ́n mɛn bhwetɔ́ bha lé hɛ́n bhrɔ́ɔ́.

Yankan míbrɛ nɔn ayɛn lóka áthéji bha bhɔ́

(Ɔ́n wú Mák 13.32-37; Ɔ́n wú Lwik 17.26-30,34-36)

36– Lókhɛ́n álepɛ lephan brɛ ayɛn lócí le lówáchɛn mɛ́n, Yankan-mranchɛ́mán bhwá nbrɛn khɛ́n abha átho lɔ le yɛn, saji Nmi bhwá nbrɛn lɔ le yɛn, kasé áleli Nthe míbrɛ. 37Noe cí tho, áyí atɛ ɔn, lóyí brɛ nɔn ábha tɛ́ lóka Lephan Mi bha bhá. 38Khankhan mímí, ácí khɛ́n agbali ácí ńdu si mrwɛn áthéji khúnbrɛn ɔn, lóka lókɔn, néphan elí nɛn, wo enán ndɛ, wo ephɛ́n mie, wo esé wo miɔnmie nsɛ ophɛ́n, kábrɛ kábrɛ ádi lóka Noe ka mɛ́n hran mɛn. 39Ló wo néphan lókɔn, wo le ka ábhwe ɛkɛ brɛ mɛ́n, kábrɛ kábrɛ ádi lóka ńdu si mrwɛn áthéji, ló ákhwɛn wo khúnbrɛn ɔ́nmɔn lo. Ló Lephan Mi ka ábha bhá, lóyí yábhɛ brɛ ebhá tɛ́ nɔn ali lókɔn. 40Lócí lókɔn, néphan mɔn khɛ́n ábha bhá bithe ɔn: wo bhá hɔ́n bɛn, ló wo bhá yɔ́ bɛn ká. 41Ńmie mɔn khɛ́n elɔ́ yí ábhú brɛ tho, wo bhá hɔ́n bɛn, ló wo bhá yɔ́ bɛn ká. 42Lóhɛ́nthé tɛmɛ ɔ́n bo, átɛsalé ɔ́n ne yɛn lócí hɔ́n Hwánthe bha bhá. 43Ábhwe lókɔn tɛmɛ ɔ́n yé mwámwá salé: ńmréci, kasé ábháthó-óthe yɛ́n lóka sídowo bha bhó bhá, ka ánman ká mɛlé, ló nkɛ bha lé wúsi khɔ́ ká mɛ́n khúthé bhrɔ́ɔ́. 44Lóhɛ́nthé nɔn hɔ́n lɔ, tɛmɛ ɔ́n mraya, lée Lephan Mi ka ábha bhá, ɔ́n ma lé há mwanhɛ́n.

Nɛnkhwɛ́nwo alí mɛ́nbrɛ, le nɛnkhwɛ́nwo ále lí mɛ́nbrɛ

(Ɔ́n wú Lwik 12.41-48)

45– Ló, ka mɛ́n nɛnkhwɛ́nwo alí mɛ́nbrɛ, khɛ́n ali bhweyɛ́nwo e? Nɛnkhwɛ́nwo lókɔn, mɛ́n nɔn ńni lephan mɛ́n hwánthe bha khwɛ́n mɛ́n jɔn nɛnkhwɛ́nmán há mɛ́n mɔ́n mɛn salé anbo nkɔn, ochɛ́sé lóka ádi ńnɛnlí ka, ansé nkɔn nɛn. 46Nɛnkhwɛ́nwo lókɔn, áphɔ khwɛlé, lóka mɛ́n hwánthe bha sáji bhá khɛ́n ánman wu nkɛ ya nkɛ júmán tho! 47Mímí mɛɛ́n kranmán hɔ́n: nɛnkhwɛ́nwo lókɔn, mɛ́n hwánthe bha khwɛ́n mɛ́n yí khúnbrɛn ńpɛ há nkɛ mɔ́n mɛn. 48Khɛ́n nɛnkhwɛ́nwo lókɔn, kasé ńni lephan phromɛn ɔn, ánman tɔ mɛ́n hrómɛn mɛn sa: “Mɛn hwánthe ebhá mɔ́n,” 49ánman dɛn ká mɛ́n jɔn phɔ, ánman chrwa nkɔn, ánman gɛ ńnɛnkhólímán ɔ́nmɔn ní nɛn, ló ánman gɛ ńdɛkruímán ɔ́nmɔn nán ndɛ. 50Ló nɛnkhwɛ́nwo lókɔn ɔn, anman nɛ́n hámwanhɛ́n ya khɛ́n mɛ́n hwánthe bha bhá, saji lówáchɛn khɛ́n nkɛ bhá bhó ká bháthó, lólɔ bha kɛ nta mɛn. 51Ánman tɛ́ yí khrákhrá dri nɛnkhwɛ́nwo lókɔn phɔ, ló áyí wo bhá bhó tɛ́ ńmɛ́n mɔ́nmɔnmán, lónɔn wo bhá bhó tɛ́ mɛ́n lɔ, ló ánman má ási ali hɛ́nduthɔ́n le ńnɔ́thá chrui ɔ́nmɔn si.

Markert nå:

MATHIE 24: ENT96

Marker

Del

Kopier