Marko̱ 10
10
Ku̱a̱cha kitsuya Jesuu̱ nga nikjietsunjín kju̱a̱ bixantsja
(Mt 19.1-12; Lk 16.18)
1Jesuu̱ itju nangi Kafarnau̱n, ku kijí ngande Judea̱ kju̱ ngande xi tsuba̱ nga bitju tsuꞌbi xánga Jordaa̱n. Ngingu ndiya, kjín xu̱ta̱ kutkundaire, xuku nga tsjai, Jesuu̱ tsaꞌángire̱ nga ikuya.
2Kjínxu xu̱ta̱ fariseo̱ jichutꞌa tiñare jmá kjitjián ku mejénre ꞌbanachajo, ku tsinengiyare̱:
—A ma ngu xta̱ tsikjie kju̱a̱bixantsja nga̱tꞌaꞌe chjunꞌen.
3Ku̱a̱cha kitsúre̱ Jesuu̱:
—Mí xi kitsújnu Moise nga ñaꞌánjnu.
4Ku ku̱a̱cha skiengi ngieje:
—Kitsjua kju̱a̱ Moise nga xta̱ xiꞌin tsindá ngu xu̱ju̱n jmá tsikjie kju̱a̱bixantsjaꞌe ku ꞌbatsjé chjunꞌen ngaya niꞌyaꞌe.
5Ku ku̱i̱cha kitsú Jesuu̱:
—Tsa kui xu̱ju̱n kju̱a̱kixi yeꞌejnu Moise, nga̱tꞌa jun tuxi tajájnu. 6Janda nga tsaꞌángire̱ Namiña Diuu̱ kitsindá xta̱ xiꞌin ku chjun nga ꞌbenduju xikjin. 7Kui kju̱a̱ nga xu̱ta̱ xiꞌin fichu ngu ni̱tjin nga beꞌe Naꞌen ku Namiꞌen nga bixantsja ku xín je ꞌbejñajun chjunꞌen. 8Xuku nga ngútse xu̱ta̱ ꞌbendu nga ngiajo. Ku ku̱i̱cha, xi je bixantsja kite̱ xuku xi jó jí xu̱ta̱ ma, ngútse xu̱ta̱ fuema ngisa. 9Tsa Namiña Diuu̱ xi je kitsingungu xu̱ta̱ xiꞌin kju̱ ngu chjun, ngují xu̱ta̱ nga̱sunde ma tsikjietsunjín.
10Ku nga je tꞌaji, nga je sinduni niꞌyaꞌe, ja xi kjibakuyáre̱ tsinengiyare̱ Jesuu̱ nga̱tꞌaꞌe nga nikjie kju̱a̱bixantsja. 11Ku ku̱i̱cha kitsúre̱: «Tsa ngu xu̱ta̱ xiꞌin ꞌbejña basen chjunꞌen ku kjaꞌi chjun ꞌbejñajun, ngu jee tjisakure, ku kjiꞌbanachaju chjunꞌen. 12Tsa ngu chjun ꞌbejña basen xꞌinꞌe̱n, ku kjaꞌi xiꞌin ꞌbejñajun, tuku kui jee tjisakure.»
Jesuu̱ tsichakunne niskindi
(Mt 19.13-15; Lk 18.15-17)
13Tjín xu̱ta̱ xi kijure Jesuu̱ kjindiꞌe, nga̱tꞌa mejénre nga kjíngajun ku nga tsichakunne. Ta̱nga ja xi kjibakuyáre̱ kitsitiju niskindi.
14Nga kube Jesuu̱ najmi xi inchatsiꞌin ja xi kjibakuyáre̱, kitsitiju ku ku̱i̱cha kitsúre̱:
«Titjuajnu ngande niskindi nga ndibakunna. Ngatu ꞌbechjajíjnu, nga̱tꞌa jmá batexuma Namiña Diuu̱ tse̱ꞌe xi ku̱i̱cha tsjé anima̱ꞌen xuku niskindi. 15Kju̱a̱xikjainni, xi sꞌejinjínre nga̱tꞌaꞌe Namiña Diuu̱ xukúcha sꞌejínre xi niskindi, sakujíre ngande jmá batexuma Namiña Diuu̱.»
16Jesuu̱ tsakꞌa ku kitsubekja niskindi, ku tsja yasunre̱ tku̱ nga kitsichakunne.
Xu̱ta̱ xi ꞌñu tjínre tón
(Mt 19.16-30; Lk 18.18-30)
17Nga je ndiya tsuꞌba Jesuu̱, ngu xu̱ta̱ jichú manga, ku tkuꞌe̱ isén ngakjáin kui ku tsinengiyare̱:
—Jí xi Jí kua Chji̱ne ndai, tixuyena, mí xi tsiꞌinꞌan tse̱ꞌe xi sakuna ku feji ni̱tjinꞌna.
18Ku̱i̱cha kitsú Jesuu̱:
—Mí xá ku̱i̱cha bixi nga ndaꞌan xu̱ta̱. Namiña Diuu̱ xi ꞌñu ndá ngisa. 19ꞌÑu ndá yiji kju̱a̱kixi: Majín nikꞌen, majín chꞌanache kju̱a̱bixantsjari, majín cheje niꞌin, majín kju̱a̱ndesu kútsa kju̱a̱xaba ꞌnijín kjaꞌi xu̱ta̱, majín cheje niꞌin, tiꞌin xki̱ najmi xi ꞌmíri ku chaseiri Nári ku Namiri.
20Ku̱a̱xu kitsúre̱ xta̱:
—Jí kua Chji̱ne, ngieje kui kju̱a̱kixi je kitsiꞌinꞌan janda nga niskindi kumaꞌan.
21Jesuu̱ kitsitjo nga tsaseꞌa ku ku̱i̱cha kitsúre̱:
—Ngingutsa najmi chajari niꞌin. Tꞌutji ku tateñe ngieje najmi xi tjínri, ku tikabiri tao̱nri ngieje xi ꞌñu ni̱ma̱ tjima. Ku̱a̱cha, ꞌñu tsé kju̱a̱ndá tsjuari Namiña Diuu̱ ngakꞌa ndiu̱jmi. Ku nga je kuma, ndibi ku ngatꞌuye xu̱ta̱ꞌna xi tsjengina.
22Nga kitꞌe kui en, ꞌñu ngi kumáre kui xta̱ ku tsjuají kisꞌere̱, nga̱tꞌa ꞌñu tjínre tón.
23Tsase ngatun Jesuu̱ ku ku̱i̱cha kitsúre̱ ja xi kjibakuyáre̱:
—¡Tjeꞌñu niꞌin nga ngu xu̱ta̱ xi tjínre tón tsijaꞌo̱o Namiña Diuu̱ ku nga kui batexumare̱!
24Ku̱a̱xu mare̱ ja xi kjibakuyáre̱ nga kitꞌe kui én, ta̱nga ku̱i̱cha te̱ kitsúnire Jesuu̱:
— Xu̱ta̱ xi ndá yaꞌana, ¡tjeꞌñu niꞌin bitjasꞌen jmá batexuma Namiña Diuu̱! 25Tusá niꞌin jín faꞌa ngaya xkun nindu ngu kameyo, tukꞌuajíre ngu xu̱ta̱ xi tjínre tón ku basꞌen ngaya jmá batexuma Namiña Diuu̱.
26Kua kumáre ja xi kjibakuyáre̱ Jesuu̱ nga kitꞌe kui én, ku basenijmi kjín:
—Ku kjatꞌei, ꞌyá xi mare̱ kui tjungi.
27Ku tsaseꞌaxu Jesuu̱ ku ku̱i̱cha kitsúre̱:
—ꞌÑu niꞌin mare̱ xi xu̱ta̱ nga̱sunde, ta̱nga xi tse̱ꞌe Namiña Diuu̱ bitjusún ngieje.
28Ku̱a̱cha kitsúre̱ Pe:
—Tikjaitsjen, jín tjima tjingiri ku kikꞌejña ngijejni̱ najmi xi tjinjni.
29Ku̱i̱cha skengire Jesuu̱:
—Kju̱a̱xikjain tsa tjin xi yeꞌé najmi xi tjínre ku án tsuꞌbatje̱ngina ku tjitsuya sun Enꞌen Namiña Diuu̱, sakure kju̱a̱ndá. Tsa ꞌyendu basen ndichja ku tsꞌe̱, kútsa Naꞌen ku Namiꞌen, kútsa kjindiꞌe, niꞌyaꞌe kútsa ngu nangi, 30sakure uchan ndiya niꞌya kui nga̱sunde, tsa xu̱ta̱ niꞌyaꞌe kútsa nangi, ku kjáinni nga on kjueyájnu nga̱tꞌaꞌe xu̱ta̱ xi chꞌore jun. Ku nga fesunjnu, kꞌi̱a̱ mijñajun tséjnu jmá kjitjián Namiña Diuu̱; 31ta̱nga kjínma xi kꞌa mare̱ yajo̱ꞌe, ku kite̱ ꞌñujín chjiꞌe kjatꞌei; ku kjínma kjatꞌei xi ꞌñujín chjiꞌe, kui xi ꞌñu kuchjeꞌe.
Jesuu̱ tsuya ngingu ndiya nga nikꞌen
(Mt 20.17-19; Lk 18.31-34)
32Já xi kjibakuyáre̱ chanjínxu makjínre̱, ku tsuꞌba tetjun Jesuu̱ nga inchafue Jerusalen. Ku nga̱tꞌaꞌe, ja xi ngisa xi tjimatjengíre ꞌñuxu incha tsakjun. Te̱ ꞌyetku subani Jesuu̱ ja xi te̱ jó kjibakuyáre̱, ku kitsuyáre̱ mí xi kumataꞌin:
33«Ku je tjijínjnu, kjatꞌei mangiña Jerusalen. Ku án, kjindiꞌe xu̱ta̱ nga̱sunde, ngaya tsja ja chanaꞌmi xi kꞌa xáꞌe kju̱ chjine xi kjiꞌñure kju̱a̱kixiꞌe ni̱ngu̱xi̱ nikasꞌenna. Tsijena ku sikꞌienna ku baꞌíre̱ án xu̱ta̱ na̱xi̱nanda xi chꞌore án, 34tse̱ꞌe xi kuijnukiena, ku ndate kjietjujun ngakjainꞌan ku tsikꞌienna; ta̱nga xi ma ján ni̱tjin faꞌakunꞌan.»
Ku̱a̱cha tsinengi kju̱a̱ndá Santia kju̱ Jua
(Mt 20.20-28)
35Já xi kjibakuyáre̱ Santia kju̱ Jua, kui kjindiꞌe xu̱ta̱ Sebedeo̱, jichutꞌa Tiñare Jesuu̱ ku ku̱i̱cha kitsúre̱:
—Jí kua Chji̱ne, mejenjni nga niꞌinjni ngu kju̱a̱ndá.
36Ku tsinengiyare̱ Jesuu̱:
—Mí xi mejenjnu.
37Kuaxúcha kitsú ngieje:
—Ngu kju̱a̱ndá, nga je tijni ngande jmá niꞌin manda, Titjuéjni ngande nga mijñatꞌari, ngu nga̱tjen nganda ku ngingu nga̱tjen ngaskun.
38Ku̱i̱cha skengi Jesuu̱:
—Jun yajíjnu najmi xi tjichjínengijnu. A baꞌejnu yajo̱jnu nga on kjueyájnu xukúcha kjueyána.
39Kuixucha kitsú ngieje:
—Jun, tjingujni.
Ku̱i̱cha kitsúre̱ Jesuu̱:
—Kju̱a̱xikjain nga ꞌñu on kjueyájnu, tekuácha án. 40Ta̱nga Namiña Diuu̱ xi kuitsu ꞌyá xi ꞌñu kuchjeꞌe jmá tsiꞌinꞌan manda. Majín xinꞌan mí xi kuma.
41Nga kisꞌejínre xi ngi te̱ ja xi kjibakuyáre̱ najmi xi incha minengi Santia kju̱ Jua, ku kitsitiju xikjin. 42Ku ꞌyetku ngieje Jesuu̱ ku ku̱i̱cha kitsúre̱:
—A yajíjnu jun xu̱ta̱ xi kꞌa ꞌbatsjé yajo̱ꞌe xuku xi tse̱ꞌe nga̱sunde ku kju̱a̱ꞌñu nga beꞌe enꞌen. 43Ta̱nga ngate júnni majín ku̱i̱cha ñaꞌánjnu. Tusáni, tsa tjin xi mejénre kꞌa ꞌbatsjé yajo̱ꞌe, tjinere nga basenñajunre xi ngisa. 44Tsa tjin xi mejénre ꞌbejña tetjun, tjinere baseñajun ngiejere xi ngisa. 45Án, kjindiꞌe xu̱ta̱ nga̱sunde, ku̱i̱cha kunꞌan. Jiꞌijiꞌan kui nga̱sunde tsa án baseñajúnna, tusá án baseñajúnna xi ngisa. Jiꞌiꞌan nga tsitsjeꞌan ngieje jee xi tjínre xu̱ta̱ nga̱sunde, ku tse̱ꞌe xi kuitjusún án tsjuáꞌan jínꞌna.
Jesuu̱ ku xu̱ta̱ tkꞌa xi ꞌmí Bartimeo̱
(Mt 20.29-34; Lk 18.35-43)
46Jesuu̱ ku ja xi kjibakuyáre̱ jaꞌa na̱xi̱nanda Jeriko̱, ku nga itju kui ngande kjín xu̱ta̱ kitjéngire̱. Tiña tsꞌua ndiya kjitjiante ngu xu̱ta̱ tkꞌa xi minengi chjee. Bartimeo̱ xu ꞌmí kjindiꞌe Timeo̱. 47Nga kitꞌe Bartimeo̱ nga kꞌi̱a̱ kju̱a̱ꞌá Jesuu̱ Nasare, ku skindaya:
—Jesuu̱, jí xi kjindiꞌe Diuu̱ji, ¡ngatuma ni̱ma̱ri án ku tisinjínna!
48Ku xu̱ta̱ kinitiju kjín xta̱ xi tkꞌa tuxi xu ngatꞌejña, ta̱nga kui tusama ꞌñu kjíndaya:
—Ndia̱ꞌna, nga jí xi kjindiꞌe Diuu̱ji, ¡ngatuma ni̱ma̱ri án ku tisinjínna!
49Ku kisasen Jesuu̱ ku ku̱i̱cha kitsú:
—Nukju̱a̱jnu.
Ku kinukju̱a̱re xta̱ xi tkꞌa nga kitsiꞌin ja ku ku̱i̱cha kiꞌmire:
—¡Ngatu tkinjín! Jabi, nga̱tꞌa Jesuu̱ tjichjari.
50Kitsikjaꞌa ñajñuꞌen xta̱ xi tkꞌa, ku ngu tsa kiski nga kisasen kixí ku jichutꞌare Jesuu̱. 51Ku̱a̱cha kitsúre̱ Jesuu̱:
—Mí xi mejénri nga án nga̱tꞌari
Ku̱a̱xu tsu xta̱ xi tkꞌa:
—Jí kua Chji̱ne, tindayei xkunꞌan tse̱ꞌe xi kuma kutsejénna ngingu ndiya.
52Ku̱i̱cha kitsúre̱ Jesuu̱:
—Je ma mꞌain; je kundaye nga̱tꞌaꞌe kisꞌejínri Namiña Diuu̱.
Tekui chu̱ba̱, kutsejenre̱ xta̱ xi tkꞌa, ku kitjéngire̱ Jesuu̱ xukúcha kjue ndiya.
Markert nå:
Marko̱ 10: MZI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
México © Sociedad Bíblica de México, A.C. AÑO
