Marko̱ 11
11
Ku̱i̱cha tsasꞌen Jesuu̱ na̱xi̱nanda ꞌñu Jerusalen
(Mt 21.1-11; Lk 19.28-40; Jua 12.12-19)
1Jesuu̱ ku ja xi kjibakuyáre̱ jichutje̱ngi jma nga tjin ya Olibo̱, tiñare jmá ꞌmí Betfage ku Betania̱, kju̱ na̱xi̱nanda ꞌñu xi ꞌmí Jerusalen. 2Kꞌi̱a̱ kua kitsúre̱ Jesuu̱ jó ja xi kjibakuyáre̱:
«Tangijnu kui nangi xi tsejenña skanda jan. Ku nga je fichujnu, kꞌi̱a̱ kjitaꞌñu ngu chu chꞌa xi kjia ngují xi ꞌbejñasunre. Chjundujnu ku ndibajujnu. 3Tsa tjin xi minengiyajnu ꞌmí xá nga tjichjundujnu kui chu chꞌa, ku̱i̱cha tixújnu: “Ndia̱ña kjimachjénre ku xati tsikꞌuꞌbénijnu.”»
4Kijí ngiajo kui ja xi kjibakuyáre̱ Jesuu̱ kꞌi̱a̱ jma nga kitsúre̱. Ku kꞌi̱a̱ kisakure ngu burru xi tjitaꞌñu ngaya ndiya, ku kiskiendu.
5Tjín xu̱ta̱ xi sindu kui ngande xi tsinengiyare̱: «Mí xá xi tjiñaꞌánjnu. Mí xá tjichjundujnu kui burru».
6Ku kui ja xi kjibakuyáre̱ Jesuu̱ ku̱i̱cha skengire xuku tsu én xi kinikaꞌa. Ku kitsiꞌire ngande nga kijí. 7Kui nga tianga xi tjimajun kui ja ꞌyendusunre burru ku kijure Jesuu̱, ku kisꞌejñasunre Jesuu̱ kui chu.
8Kjín xu̱ta̱ ꞌyendu ñajñuꞌen ngaya ndiya jma nga faꞌa Jesuu̱. Tjín xi inchabate tjiaꞌe ya xi tjínre xka̱, kꞌi̱a̱ tsꞌua ndiya, ku inchaꞌbendu ngaya ndiya jmá faꞌa Jesuu̱. 9Ku ngieje xu̱ta̱, xi yajatetjun ku xi yajatje̱ngi, ku̱i̱cha inchakjindia:
«¡ꞌNatsjengijni̱ Jesuu̱!
¡Nga̱tuchakun nejí nga ngajoꞌe Namiña Diuu̱, kjitsutjai!
10¡Ngatsichakunne Namiña Diuu̱ ngande jma nga sꞌei batexuma
xu̱ta̱ changaña Ndabi̱!
Ngu kju̱a̱ndá Namiña Diuu̱, ¡ꞌNatsjengijni̱, jí xi ꞌñu, jí xi kꞌa xá xi tjínri!»
11Nga jichú Jesuu̱ na̱xi̱nanda ꞌñu Jerusalen, tjeꞌñu ni̱ngu̱xi̱ kijí ku tsase kúcha kjima ngieje najmi kꞌi̱a̱ ngaya. Ta̱nga je ꞌñu ngixun, ku kijuni ja xi kjibakuyáre̱ nangi jmá ꞌmí Betania̱.
Jesuu̱ ku ya tuse̱
(Mt 21.18-19)
12Ni̱tjin xi ma nganchajun, Jesuu̱ kju̱ ja xi kjibakuyáre̱ Tꞌajñu itju jmá ꞌmí Betania̱. Ku nga tjima ndiya, kubajore Jesuu̱. 13Kjín ngisa nga kube ngu ya tuse̱ xi yajare̱ xka̱ ta̱nga, nga je tiña jichutꞌare, ngují tuse̱ kisakure. Tuxka̱tse tjínre ya, nga̱tꞌa kje nitjinꞌenjín nga bajare̱ tu. 14Ku ku̱i̱cha kitsúre̱ kui ya Jesuu̱: «¡Ngite ngingují xi ngakjíne tuxi bajari!» Ku tsitꞌe ja xi kjibakuyáre̱ nga ku̱i̱cha kitsú.
Jesuu̱ ku ja ndetsin xi tjin ngaya ni̱ngu̱xi̱
(Mt 21.12-17; Lk 19.45-48; Jua 2.13-22)
15Nga jichú Jerusalen, ngaya ni̱ngu̱xi̱ tsasꞌen Jesuu̱ ku itsjé kꞌi̱a̱ kua xu̱ta̱ xi inchaꞌbatse ku inchabateña najmi. Kitsikjaꞌatjajo yamexaꞌe̱ xu̱ta̱ xi inchabasenkajo tón xi kjaꞌi na̱xi̱nanda ku tao̱nꞌe̱n ni̱ngu̱xi̱ inchatsichjen, ku tekuácha kitsikjaꞌatjajo kaxaꞌe̱ xi inchabateña tuju. 16Ku kitsjuajire̱ kju̱a̱ Jesuu̱ xu̱ta̱ xi najmi tjimajun ngaya ni̱ngu̱xi̱. 17Ku kitsú nga ikuyáre xu̱ta̱: «ku̱i̱cha tsichja Namiña Diuu̱ ngaya Xu̱ju̱n enꞌen: “ku̱i̱cha mejénna nga kitsikꞌínꞌan niꞌyaꞌna ‘Niꞌya jmá minengi kju̱a̱ndá ngieje tku̱ya na̱xi̱nanda’.” Ta̱nga jun ngandeꞌe̱ cheje kinikꞌuyajnu.»
18Nga tsitꞌe ja chanaꞌmi kju̱ chjine xi be Kju̱a̱kixiꞌe Namiña Diuu̱, tsangitsjai kúcha ndá nga tsikꞌien Jesuu̱. Je tjenre tkunꞌen xu̱ta̱ ku tuxi senxu mare̱ nga tꞌere kju̱a̱kitakun xi kjibakuya.
19Nga tsején ni̱tje̱n Jesuu̱ ku ja xi kjibakuyáre̱ itju ngaya na̱xi̱nanda ꞌñu xi ꞌmí Jerusalen.
Ku̱i̱cha kumáre ya tuse̱ xi tsichjáju Jesuu̱
(Mt 21.20-22)
20Xi ma nganchajun tꞌajñu te̱ jaꞌáni Jesuu̱ kju̱ ja xi kjibakuyáre̱ jmá sian ya tuse̱, ku kube nga janda tjutsꞌin kixí.
21Kitsikjaitsjen Pe najmi xi kuma kꞌuangujña ku ku̱i̱cha kitsúre̱ Jesuu̱:
—Jí kua Chji̱ne, ¡Chasei kúcha kuma! Kixí ya xi kinukju̱a̱ꞌoi̱nri ngujña.
22Ku nga ngieje kui ja ku̱i̱cha kitsúre̱ Jesuu̱:
—Tisꞌejínjnu Namiña Diuu̱. 23-24Tsjuájnu én tsanga sꞌejínjnu kútsa tu jó tu janjín tjínre anima̱jnu nga̱tꞌaꞌe Namiña Diuu̱, ngieje kju̱a̱ndá xi chji̱nengitꞌajnu ngieje nga tsikitjusúnjnu. Tsa jun xi bixujnu kui na̱xi̱ ꞌñu: “Tisubaꞌí ku ngaya ndachakun tikjaꞌayei yajori”, ku̱a̱cha kuma. Tisꞌejínjnu nga̱tꞌaꞌe najmi xi chji̱nengijnu ku ngieje nga ku̱i̱cha kuma.
25-26»Nga chji̱nengijnu kju̱a̱ndá, tichatꞌájnu ngieje najmi xi ndáji tjin xi kitsꞌiju̱njnu ngu xu̱ta̱. Ku̱a̱cha kuma nga tsichatꞌájnu Namijnu xi kjitjián ndiu̱jmi ngieje jee xi tjínjnu.
Xá xi tjínre Jesuu̱
(Mt 21.23-27; Lk 20.1-8)
27Jaskan nga te̱ kijíni na̱xi̱nanda ꞌñu xi ꞌmí Jerusalen. Ku nga kjitsuꞌba Jesuu̱ ngaya ni̱ngu̱xi̱, kꞌi̱a̱ jichutꞌare chanaꞌmi xi inchatetjun, xi chjine Kju̱a̱kixi nga̱tꞌaꞌe Namiña Diuu̱ kju̱ xu̱ta̱ xi inchatetjunre̱ ku ngateya na̱xi̱nanda, 28ku tsinengiyare̱:
—ꞌYá kitsjuari kui xá nga ngieje kui najmi tjiniꞌin.
29-30Ku̱i̱cha kitsúre̱ Jesuu̱:
—tekuácha tjin najmi xi mejénna minengiyajnu: ꞌyá xi kitsjuáre̱ xá Jua xi Batenda nga xu̱ta̱ kjibatenda. A Namiña Diuu̱ a xu̱ kjaꞌi xu̱ta̱. Tsanga chjungijnu tekuácha xiyájnu ꞌyá xi kitsjuana ngaꞌñu nga̱tꞌaꞌe ngieje najmi xi tetsiꞌinꞌan ku je kuyajnu.
31Sꞌe̱i̱ isennijmi kui ja, ku ku̱i̱cha inchatsure̱ xikjin: «Tsanga bixuña nga Namiña Diuu̱ kitsjuáre̱ ngaꞌñu nga̱tꞌaꞌe xá xi tjitsiꞌin Jua, kuinengiyaña Jesuu̱ mí kju̱a̱ nga kinisꞌejinjínña. 32Ta̱nga te̱ majín bixuña nga xu̱ta̱ nga̱sunde kitsjuáre̱ kui ngaꞌñu.»
Mejínre̱ nga ku̱i̱cha kitsú nga̱tꞌa inchatsakjunre̱ xu̱ta̱; nga̱tꞌa ngieje nga ku̱i̱cha inchatsú nga Enꞌen Namiña Diuu̱ jí kitsuyasun Jua xi Batenda. 33Kui nga kuitsecha kiskengire Jesuu̱:
—Yajíjni.
Ku ku̱i̱cha kitsúre̱ Jesuu̱:
—Já tekuácha xiyajijnu án ꞌyá xi kitsjuana ngaꞌñu nga tetsiꞌinꞌan ngieje kui xá.
Markert nå:
Marko̱ 11: MZI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
México © Sociedad Bíblica de México, A.C. AÑO
