San Mateo 21

Jesús uteꞌe lheꞌe yiesi Jerusalén

(Mr. 11:1-11; Lc. 19:28-40; Jn. 12:12-19)

1Atti chi deoba isín Jesús lenie ca benni rudheti ca tisa ruleꞌe lheꞌe yiesi Jerusalén, bisínttebaque atta re lheꞌesi te láni Betfagé, lo lhilhi atta daa ca ya olivuha. Laniala nna udhelha Jesús chupa ca biꞌini rudheti ca tisa ruleꞌe, 2lee nna re ca biꞌiniha:

—Gualtsia lheꞌesi re ttu ladu-na. Na sattiꞌale ttu burru nná nalhana lenna ttu burru cuiti. Gualudhán na, atti gualetá tte lencana nii. 3Gansi nuxa bixa innána, lebiꞌi nna gualgás na: “Benni bananie ri-naba reasanie ca unní, lenla nna güetteruꞌunttebe cana.” 4Unní uca qui guaxxína nu chi rá benni uca profeta gue Tata Do Iyyabaaha atti rábi:

5Gualgás ca benni gue yiesi lá Sión:

“Gualugüiarga, ni Benni innabia gueleha chi dee atta seꞌele-na.

Lee nna bittu runie anque benni ra xxeni leni,

cuꞌe ttu burru cuiti xiꞌini ttu burru ruja yuaba doe dee.”#21:5 Zacarías 9:9

6Ca benni rudheti ca tisa ruleꞌe Jesús, bedobacabi tisa güiacabi qui benbacabi nu rá Benniha uncabi. 7Lacabi nna bechebacabi burru nnáha lenna xiꞌinniha, atti uluꞌuttebacabi ca lari rucucabiha cuꞌe ca nua. Benniha nna udottebe cuꞌe burru cuitiha. 8Attulade ixe tsitsia benni seꞌe nía. Ttulhecana nna ca lari nucucanaba ritsilacana lo neda atta dia Benniha, adícana nna lo ca yaga daa níaba ritsacana qui ritsilacana lo nedaha. 9Ca nu denalha lhe ca nu dia neruha lhe ribesiꞌacana rácana:

—¡Xxeni ra lelu lu ancalu benni datía David! ¡Carbárulu lu ancalu Benni udhelha Tata Do Iyyabaaha! ¡Xxeni ra le Benni do iyyabaaha!

10Atti utaꞌa Jesús lheꞌe yiesi Jerusalén, iyába ca benni bisatsacana, rinnaba tisa loescani rácana:

—¿Nú benni unní?

11Ca benni denoha nna rácana:

—Jesús Benni anque profeta gue Tata Do Iyyabaahaba Ben-na, Benni beaca lasie lheꞌesi Nazaret nu re lo yu gue Galilea.

Jesús bería lee ca nu yuꞌu güettoꞌo lheꞌeliꞌa gue yotuha

(Mr. 11:15-19; Lc. 19:45-48; Jn. 2:13-22)

12Atti utaꞌa Jesús lheꞌeliꞌa gue yotu gue Tata Do Iyyabaaha nna udulottebe bería lee ca nu yuꞌu güettoꞌo nía, ca nu roꞌoha lhe. Berixxi lottebe ca mexa gue ca nu rotsía belhiha lhe atta sia ca nu rutoꞌo becha lhe. 13Nianna re cana:

—Lo ca sitsi atta dia ca tisa gue Tata Do Iyyabaaha rinne ben-na re: “Yoꞌo quia-ni ancana yoꞌo atta inne len ca benni neti”, ttiaca lebiꞌi nna attiba belea anca lisi ubana la chi beonle yotu-ni.#21:13 Isaías 56:7

14Roꞌo yotuha nna ubigatteba ca nu xua locani lhe ca nu xi lhe lo Jesús. Benniha nna beonttebe cana. 15Ttiaca ca nu lo gue ca bixxudiha lhe ca nu ruleꞌe nu rá lo ca ley bocaꞌana Moisés lhe bisaꞌattebaquinna atti biláquinna ca milagru ben Benniha lhe atti bienquinna ribesiꞌa ca unto yuꞌu roꞌo yotuha rácana: “¡Xxeni ra le Benni datía David!” 16Nianna rácana Jesús:

—¿Si gua rieninlu nu rá ca unto-na?

Lee nna becabittebe re:

—Gua rienbati neti. ¿Si bittuba chi belabale lo ca sitsi gue Tata Do Iyyabaaha atta rá?:

Lu nna benlu qui iría roꞌo ca unto-na lhe roꞌo ca unto sna rasnaba lhe

ca tisa cuequi xencana lu.#21:16 Salmo 8:2

17Laniala nna bodhaꞌane cana nía, atti beríattebe lheꞌe yiesi Jerusalén die lheꞌe yiesi lá Betania. Níaba beaꞌane la ela.

Bibisba ya iguha

(Mr. 11:12-14, 20-26)

18Betteyú dila nna atti bequi Jesús deyye lheꞌe yiesi Jerusalén, lee nna bisía bitunie. 19Atti bilánie ttu ya igu roꞌo nedaha nna ubigattebe atta du nua, ttiaca niba ttu igu bittu guatiꞌe lo nua, sunruba lhaga gue nua sia. Laniala nna re ya iguha:

—¡Tsa bitturu cuia nu xixxi guelu!

Snaba lania nna ubisi yagaha. 20Ca biꞌini rudheti ca tisa ruleꞌe nna atti biláquinbi nu ucaha nna bebanbaquinbi, nianna unnaba tisacabi Benniha, rácabi:

—¿Biaca ttulharba ubisi ya igu-na?

21Jesús becabie re:

—Neti nna gualíbatia rpea le, gansi lebiꞌi ria tsitsi lele Tata Do Iyyabaaha, bittu rudú chupan lele, lania nna läga sunru aca guele unle loesi nu bedhaca ya igu-ni, sinuqui guacaguaba guele gále iꞌiya do-na: “Ubietta atta dolha nna güiatte bixudi lheꞌe indattoo-na.” Lania nna acaba nu chi ráleha. 22Iyába nu innábale atti innele len Tata Do Iyyabaaha, guadíbale nua ladiba ria tsitsi lele Ben-na.

Rinnaba tisacana Jesús ga guaxxíe elha rinnabia guee

(Mr. 11:27-33; Lc. 20:1-8)

23Atti chi besina Jesús lheꞌeliꞌa gue yotuha nna laca due nía ruleꞌenie ca benni, ubigatteba ca nu lo gue ca bixxudiha lencana ca nu teru elha rieni guecani gue ca benni Israel, rácane:

—¿Bi elha rinnabia rapalu qui runlu aná? ¿Nú betena elha rinnabia lenlu qui unlu nu runlu-na?

24Jesús becabie re:

—Anáguaba neti lhe innába tisaguaba le ttu bixa, gansi güecabile quia nna anáguaba neti ecabiguaba guele quixxiꞌatia le nuxa betena elha rinnabia quia qui runia nu runia-ni. 25¿Nú udhelhana Juan qui ugadibi benni inda? ¿Si Tata Do Iyyabaaha, aca? ¿Si ca benni seꞌe yies lo yu-ni aca?

Lacana nna uyuꞌuttebacana unne len loescani, nianna rácana:

—Gansi ecabiri innári: “Tata Do Iyyabaahaba udhelhe biꞌiniha”, lania nna innáttebunna: “¿Biacala bittu güia lele gue nu rá biꞌiniha ganna?” 26Bittuguaba aca innári dequi ca benni seꞌe yies lo yu-niba udhelhacana biꞌiniha, cumu riꞌi nna rasbinri lo ca benni qui lä eyequi nocanri, de iyábacana rácana Juan ucabi ttu profeta gue Tata Do Iyyabaaha.

27Laniala nna becabicana gue Jesús rácane:

—Bittu yutu.

Benniha nna becabie re cana:

—Anáguaba neti, bittuguaba quixxiꞌaya nuxa betena elha rinnabia quia qui unia nu runia-ni.

Jesús rixxiꞌe ttu ejemplu gue chupa ca uncuiti

28Ráguaba Jesús ca nu lo gue ca bixxudiha lencana ca nu teru elha rieni gueni gue ca benni Israel:

—¿Bi raquinle gue nu upea le-ni? Udo ttu unbiyuu seꞌe chupa xiꞌin biyuubi. Labi nna ubigabi lo nu xeniha, nianna rábi na: “Xiꞌinto, güia guacheni sina nasá lo yu quia atta daa ca ya besuliha.” 29Unnuha nna becabina rána: “Bittu raca lasia tsiaya.” Ttiaca dequila nna bexiyyinna nianna güiabana. 30Lenla nna ubigabi lo nu güexxaha. Labi nna aníaguaba rábi nua. Unnuha nna becabina rána: “O, tata, güeyyaba neti.” Ttiaca unnuha nna läga güiana.

31Laniala nna rá Jesús:

—Delo irupa ca nua, ¿nú ca nua raquinle bencana nu raca le tata guecaniha?

Ca bixxudiha nna becabicana rácana:

—Nu xeniha.

Jesús re cana:

—Neti nna gualíbatia rpea le, ca güequixa-na lhe ca nuila requi manni-na lhe sattirla dhielhacana acacana benni rinnabia Tata Do Iyyabaaha atti lebiꞌi. 32Cumu bitaba Juan biꞌini rugadi indaha, beteleꞌenbi le neda tsee, lebiꞌi nna läga güia lele gue biꞌiniha, ttiaca ca güequixa-na lhe ca nuila requi manni-na lhe güiaba lecani gue biꞌiniha. Lebiꞌi nna masquiba begüiale iyá nu benbi tsa läga bodú xiyyanle gue nu runle qui tsia lele guebi.

Ejemplu gue ca unbiyuu lä duta lecani ureni sina lo ttu yu

(Mr. 12:1-12; Lc. 20:9-19)

33’Gualudo nagale gue attu ejemplu upea le-ni: Udo ttu unbiyuu udabi ca ya besuli lo yu guebiha, atti benttebabi nua currali. Nianna ulequittebabi ttu yieru atta idhícana ca besuliha, benguabi ttu nu yadha anca attiba yoꞌo qui tsopi nu gapa lo yuha iqui nua qui gapana ca ya besuliha. Biꞌini beaca guebi lo yuha nna betettebabi lo yuha leni ca nu cuencana nua umpanía. Labi nna biríattebabi diabi idittu lheꞌe attu yiesi subi. 34Atti chi bisía sá exuu besuli betee lo yuha nna udhelhatteba benni beaca guebi lo yuha ca benni riben sina guebiha tsiacana sayúcana ca nu reni umpanía lo yuha qui utecana nu ralha biꞌiniha dhibi. 35Ttiaca ca nu reni umpanía lo yuha nna bedaxxulacana ca benni udhelha biꞌiniha: ttu nua begüeecana, attu nua nna betticana, attu nua nna besiacan na iyya. 36Biꞌini beaca guebi lo yuha nna bededhelhattebabi adí ca benni riben sina guebiha, gueba nna ixerucana atti primeroha. Ca nu ribeni umpanía lo yuha nna aníaguaba bodidhacacana ca unnuha.

37’Beda lania nna udhelhabi cuinaba xiꞌinbiaha, cumu belaba lebi uquinbi: “Xiꞌinia-ni liba gapa ca nua respeto.” 38Ttiaca atti bilen ca nu riben umpanía lo yuha xiꞌin biꞌiniha nna rátteba loescani: “Unní ancana nu eyaꞌanna lo yu-ni, udaxxuri na uttiri na qui eyaꞌan lenri lo yu-ni.” 39Nianna bedaxxuttebacana uncuitiha uleacan na roꞌo yu atta te besuliha atti bettittebacan na.

40’Nnanna nna gansi chi besía Benni beaca guebi lo yuha nna ¿bi rquinle udhacabi ca nu reni umpanía lo yuha?

41Lacana nna becabicana rácana:

—Biꞌiniha nna tsa läga satúa lebi ca nu lä du ta lecaniha, ettelhuxababi ca unnuha. Lo yuha nna dhibi nua utebi umpanía len ca benni subi. Ca unnuha nna gutebacana nu ralha biꞌiniha dhibi gansi chi bisía exuu nu xixxi utee ca yagaha.

42Jesús re cana:

—¿Si niba ttu libe bittu chi belabale lo ca sitsi gue Tata Do Iyyabaaha atta rá?:

Iyya nu uluꞌu niꞌa ca benni rucoa ca yoꞌo-na

unnuha la beacana iyya nu ribe riden tsitsina yoꞌo.

Benni bananie ri-naba benie raca aní.

Unní ancana ttu nu runna eban leri.#21:42 Salmo 118:22

43De unnuha nna rpea le, lärga acale benni rinnabia Tata Do Iyyabaaha, ca benni uncana nu tsuꞌu le Ben-na liba acacana ca nu innabia Ben-na. 44Larcala nuxaba iyinnana iqui iyya-ni nna tsaba iyuyana. Gansi iyya-ni iyinnana iqui nuxa nna tsaba eyonna nua biste.

45Atti bienin ca nu lo gue ca bixxudiha lencana ca fariseo ejemplu rixxiꞌa Jesús, guadútteba lecani labacana nua rutáni Benniha re anía. 46Lacana nna uxacattebacana udaxxucane, ttiaca rasbaquinna lo ca benni, cumu iyába ca benni seꞌe nía racaquinna anca Benniha ttu profeta gue Tata Do Iyyabaaha.

Markert nå:

San Mateo 21: zaq

Marker

Del

Kopier