San Mateo 20
20
Jesús rixxiꞌe ttu ejemplu gue ca benni uren sina lo yu atta yada ya besuli
1’Atti rinnabia Tata Do Iyyabaaha ca benni, raxxína leni nu beni ttu unbiyuu yadinna ya besuli lo yu gueniha. Unbiyuuha nna dilatteba biríana diana güetila ca benni qui cuencana sina lo yu atta yadinna ca ya besuliha. 2Lana nna begüeena tisa quixana ca nu cuen sinaha nu raxa ttu benni gue ttu sá sina. Nianna udhelhattebana ca unnuha lo yu atta cuencana sina. 3Attiba tu retin jaa dila nna bederíana attu libe, lana nna bilenna adí ca unbiyuu guanattibaquinna siacana lheꞌeliꞌa gue atta raca iꞌiyaha. 4Nianna rán ca nua: “Lebiꞌi lhe gualtsiaguaba gualcuen sina lo yu quiaha. Neti nna guaguixaba le nu ralhale dhíle.” Lacana nna diattebacana. 5Aníaguaba bedeoni unbiyuu beaca gueni lo yuha attiba tu retin tsiꞌinu (12), attiba tu retin tsunnaha lhe. 6Atti chi deoba ugüena retin gayuha nna bedería dacabana attu libe. Nianna bilenna adí ca unbiyuu guanattibaquinna siacana nía. Lana nna unnaba tisan ca nua, rán cana: “¿Biaca cuentaba siale nii betú sába, lä ribenle sina?” 7Ca unnuha nna becabicana rácana: “Cumu läganu bennana sina guetu.” Unbiyuuha nna rán ca nua: “Anáguaba lebiꞌi, gualtsiaguaba gualsachen sina lo yu quiaha, neti nna guaguixaba le nu ralhale dhíle.”
8’Atti chi ulha sá nna unbiyuu beaca gueni lo yuha nna rána nu banani sina gueniha: “Beaxi ca benni ren sina-na, begüeecana lhiaxacani ralhacana dhicana. Lu nna udulo utixa ca benni bisía bitona, anála nna dialu len ca benni bisía dilatte baniha.” 9Laniala nna ubiga ca benni utaꞌa sina attiba tu retin gayuha. Ca unnuha nna cua ttu ttubacana uxí lhiaxacani gue nu anca gue ttu sá. 10Larcala nna atti chi ubiga ca nu utaꞌa sina dilatteha nna ucaquinna ga xenrula anca lhiaxacani dhicana, ttiaca iyábacana uxícana lhiaxa gue nu anca gue ttu sá sina. 11Atti chi uxícana belhiha nna udulottebacana unne papabacana belisacana unbiyuu beaca gueni lo yuha, rácan na: 12“Ca unní nna chiba dioraha bisíacana, a sunruba ttu ura urencana. Lu nna ttuba anca lhiaxa betelu guetu, riꞌitu nna betu sába urentu sina, chi bechíatu uyuꞌutu lheꞌe ubisa-na lhe.” 13Ttiaca unbiyuu beaca gueni lo yuha nna becabina gue ttu ca nua, rána: “Xa benni raca betsi loesia, neti nna lägabi runia ni ttu nu lä anca tsee len lu. ¿Si läba chiba bodhaꞌanri tisa quixa lu nu anca lhiaxa gue ttu sá sina? 14Larcala bedaxxu nu anca guelu nna beyyatte. Neti nna racaba lasia quixa ca nu utaꞌa sina bitona ttuba leni nu utixa lu-na. 15Cumu neti nna guacaba unia len belhi quia-na nu racaba lasia. ¿Si rapabalu malisi anca benni tsee, aca?”
16Nianna rá Jesús:
—Larcala nna ixe ca nu anca nnanna nu ra xxeni leni eyacacana nu bittu ra xxeni leni, ixeguaba ca nu bittu ancacana nu ra xxeni leni nnanna eyacacana nu ra xxeni leni. Cumu ixeba benni raxi Tata Do Iyyabaaha, ttiaca babarba benni rucue qui acacana guee.
Ni beyonna libe rixxiꞌa Jesús gattie
(Mr. 10:32-34; Lc. 18:31-34)
17Laca yuꞌu Jesús neda die lheꞌe yiesi Jerusalén, uxttebe suntteba ca biꞌini tsiꞌinu rudheti ca tisa ruleꞌe attu atta subi, nianna re ca biꞌiniha:
18—Gualuyurga, niba diari lheꞌe yiesi Jerusalén atta udaxxucana neti, Benni unbiyuu daa iyyabaaha, qui utecana neti las ná ca bixxudi anca nu lona leni ca nu ruleꞌe nu rá lo ca ley bocaꞌana Moisés. Ca unná nna oquinna iquicani gattia. 19Lacana nna utecana neti las ná ca benni dittu qui udhaca güecana neti, quincana neti lhe utácana neti lo ya crusi lhe. Ttiaca eyonna ubisa nna eyacatia.
Ttu nuila unnababi lo Jesús cuia ca xiꞌinbiyuubiha lhuitta Benniha iyyabaaha
(Mr. 10:35-45)
20Nan gue ca xiꞌini Zebedeo lenbi irpaba ca xiꞌinbiha, ubigacabi lo Jesús. Atti bedútteba xibibi lo Benniha qui innábabi uni Benniha ttu nu raca lebi. 21Jesús unnaba tise biꞌiniha re:
—¿Bi raca lelu innábalu?
Biꞌiniha nna becabibi rábi:
—Rinnaba lolu dhielhalu cuia irpa ca uncuiti quia-ni lhuittalu gansi chi rinnabialuha, ttuna dhon daca derechu guelu, a ttuna nna dhon deca rabesa guelu.
22Laniala nna becabi Jesús re:
—Lebiꞌi nna läga yule bixunna rinnabale. ¿Si guarudhaca lele guadále satele loesi nu satea? ¿Si guadále uchíale uyúle elha disa loesi elha disa uyúa?
Lacabi nna becabicabi rácabi:
—Guadábatu.
23Jesús becabie re ca biꞌiniha:
—Gualíba, lebiꞌi nna guadábale uyúle loesi elha disa uyúa, guadábale satele loesi nu satea lhe ttiaca läga neti ralha unia qui dho ttule daca derechu quia attule nna daca rabesa quia. Tata quia do iyyabaaha liba innee nupaxa chi gaꞌananie ralha cuia lhuitta.
24Atti bienini a tsii ca benni rudheti ca tisa ruleꞌe Jesús nu rinnaba ca biꞌiniha, bisaꞌattebaquinbi leni irpa betsiba ca biꞌiniha. 25Jesús uxttebe iyába ca biꞌiniha, nianna re:
—Lebiꞌi nna la gua yuxeabale dequi ca nu rinnabia gue ca yiesi dittu-na, ritee lo bedábacana rinnabiacana ca benni banquinna. Unnuhaguaba run ca nu lo ra xxeni lequinna lhe rite lo bedábacana nu runcana. 26Ttiaca lebiꞌi nna läga dica udhaca loesle aná. Cumu nu rdacana acana nu ra xxeni leni guele nna unnuha udá náni lole. 27Larcala nna nuxale rdacale acale nu lo, unnuha nna acana attiba ttu nu ttoꞌo lo sina lole. 28Attiba neti, Benni unbiyuu daa iyyabaaha, läga delha yies lo yu-ni qui udá ná ca benni loa, sinuqui delhaba qui udá náya lo ca benni, gattia utea elha nabani quia qui lhá ixeru ca benni qui bittu tsia nitticana lhe.
Jesús beonie chupa ca benni xua locani
(Mr. 10:46-52; Lc. 18:35-43)
29Atti bería Jesús lenie ca biꞌini rudheti ca tisa ruleꞌe lheꞌe yiesi Jericó, ixe tsitsiaba benni denocane. 30Chupa ca benni xua locani sia roꞌo nedaha nna atti bienquinna dia Jesús ritee nía, lacana nna uresiꞌattebacana rácana:
—¡Benni datía David, guatúachi lelu riꞌitu, xa Tata!
31Ca benni denalhaha nna rudhaca disacana ca nu xua locaniha qui eyaca sicana, ttiaca adíla idisa uresiꞌa ca nua rácana:
—¡Benni datía David, guatúachi lelu riꞌitu, xa Tata!
32Laniala nna uleda Jesús, nianna uxie cana re cana:
—¿Bi raca lele unia guele?
33Lacana nna becabicana rácana:
—Xa Tata, raca letu ilentu.
34Lania nna guatúatteba le Jesús ca unnuha, atti utanattebe iyya locani. Snaba lania nna biláquinna. Nianna diattebacana denocana Benniha.
Markert nå:
San Mateo 20: zaq
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
