Marcos 4
4
Aju techal ti'j ju xjal xi' awal
Mateo 13.1-9; Lucas 8.4-8
1Ok ten juntl maj Jesús q'olte xnaq'tzb'il kye xjal ttzi laguna, ex nim xjal pon kychmon kyib' ti'j; kyja'tzun jax Jesús tuj jun barc at ttzi a', kub'tzun qe', atzun kykyaqil xjal q'uql qe twitz tx'otx' ttzi laguna. 2Ex nimku xnaq'tzb'il xi tma'n Jesús kye tuj techal; atzunju xnaq'tzb'il lu xi tma'n kye:
3—Kyb'intze nyole. At jun xjal xi' awal triw. 4Tej t-xi tchitun xjal iyaj, at ch'in kub' tz'aq tuj b'e; e ultzun qe chyu'j ex jaw kywa'n. 5Ch'intl iyaj kub' tz'aq kyxol ab'j jatum mya nim tpimil tx'otx'; jurat tzaj poq'l iyaj porke mya nim tpimil tx'otx'. 6Ex tej tmeq't q'ij o tz'e'y ex b'i'x tzqij tu'n tlaj mya nim tlok'. 7Ch'intl iyaj kub' tz'aq t-xol ch'i'x k'ul; ch'iytzun ch'i'x k'ul, b'i'x xk'ost triw tu'n, ex minti' ok twitz. 8Ex ch'intl iyaj kub' tz'aq tuj tb'anil tx'otx'; tzaj poq'l, ex o ch'iy ex ok twitz; ex ti'j junjun tqan at ok 30 twitz, ex at ok 60 twitz, ex at ok jun syent twitz, chi Jesús kye.
9Xi tma'ntl Jesús kye:
—Alkye at t-ẍkyin, b'inx ju yol lu.
Aju tnab'l ju techal
Mateo 13.10-17; Lucas 8.9-10
10Tejtzun kyaj b'aj xjal, atzun qeju e kyaj ten tuk'il Jesús kyuk'ix qe kab'laj t-xnaq'tzb'en xi kyqanin te Jesús alkye tnab'l ju techal. 11Xitzun tma'n Jesús kye:
—Te kyeye ma tzaj q'o'n tu'n tel kynik'e ti'j ju yol ti'j tkawb'il Dios aju ewantoq nej; atzun kye txqantl xjal, tkyaqil tu'n t-xi q'met kye tuj techal, 12tu'n mi'n tkyil aju in kyke'yin, ex tu'n mi'n tel kynik' ti'j aju in kyb'i'n, tu'ntzun mi'n kyajtz meltz'aj tuk'il Dios ex tu'n mi'n tkub' najset kyil, chi Jesús kye.
In tchik'b'a'n Jesús ju techal ti'j ju xjal xi' awal
Mateo 13.18-23; Lucas 8.11-15
13Ex xi tma'ntl Jesús kye:
—¿Maj minti' nne'l kynik'e ti'j ju techal lu? ¿Tza'ntzun tten k'elel kynik'e kyi'j txqantl techal? 14Aju iyaj in ku'x tawa'n xjal, atzunju tyol Dios. 15Aju b'e jatum kub' tz'aq iyaj, atzun in yolin kyi'j xjal in ku'x awet tyol Dios tuj kyanmi: nej in xi kyb'i'n, ex nnu'l naj Satanás ex nne'l ti'n tyol Dios aju otoq ku'x awet tuj kyanmi. 16Qe ab'j jatum kub' tz'aq iyaj, atzun in yolin kyi'j xjal ok kyb'inte tyol Dios jurat naj in xi kyoksla'n in che tzalaj ti'j, 17ex minti' in xi' tlok' Tyol Dios kyuj, noq te kab'e q'ij in che ten; ok ttzaj yajb'il kyi'j ex ok kyel ik'un kyu'n xjal tu'n tlaj tyol Dios, jurat naj in che kub' tz'aq. 18Aju tx'otx' at ch'i'x k'ul tuj jatum kub' tz'aq ju iyaj, atzun in yolin kyi'j xjal in xi kyb'i'n tyol Dios, 19ex o'kx in che b'isun ti'j tza'n tten tu'n kyanq'in twitz tx'otx', in che sb'unjtz tu'nju kyaj tu'n kyok q'inun, ex nimku in pon kyk'u'j ti'j. Tkyaqil jlu tok kyk'u'j ti'j; tu'ntzunju nne'l tipun tyol Dios tuj kyanmi, ex minti' in witzan. 20Atzunju tb'anil tx'otx' jatum kub' tz'aq ju iyaj, atzun in yolin kyi'j xjal in xi kyb'i'n tyol Dios ex in xi kyoksla'n, ex nno'k twitz iyaj kyuj; ti'j junjun tqan at nno'k 30 twitz, ex at nno'k 60 twitz, ex at nno'k jun syent twitz.
Aju techal ti'j kandil
Lucas 8.16-18
21Ax ikx xi tma'n Jesús kye:
—¿Baqa in tzaj kyi'n xjal jun kandil tu'n tokx kyq'o'n tjaq' almi ex qa tjaq' watb'il? ¿Myapetzun tib'aj jun tkub'il tu'n tkub' q'ot tu'n tq'onte spik'un? 22Ex tkyaqilju at tuj ewaj ktzajel yek'un, ex tkyaqilju ewan k'elel tuj q'ancha'l. 23Alkye at t-ẍkyin, b'inx ju yol lu.
24Ax ikx xi tma'n kye:
—Kyq'o'nke kwent ti'j ju in kyb'i'ne, ex ax ju malb'il k'ajb'el tu'n Dios kyeye jatum in xi kymalo'ne te juntl, ex ktzajel tq'o'n Dios ch'intl tib'aj kyeye. 25Ex alkye jun xjal at ch'in te, ktzajel q'o'n txqantl te; ex alkye jun xjal minti' te, aju ch'in at te, k'elel q'i'n.
Aju techal ti'j ju iyaj in ch'iy
26Ax ikx xi tma'n Jesús:
—Aju tkawb'il Dios ik tten ik tza'n jun xjal in ku'x tawa'n iyaj tuj tx'otx'; 27in xi'tzun xjal tal qonik'an ex in jaw we' q'ijl, atzunju iyaj in poq'l ex in ch'iy, ex te xjal minti' b'i'n tu'n tza'n tten in poq'l iyaj. 28Ex ax tx'otx' in tzaj q'onte twitz; tnejel in ch'iy tqan, te tib'ajxi in yek'un twi', ex te tib'ajxi nno'k twitz ti'j twi'. 29Oktzun tq'anax twitz, in che'x t-sama'n xjal tu'n tjaw chmet twitz, tu'nju otoq pon q'ij tu'n tjaw.
Aju techal ti'j twitz mostaza
Mateo 13.31-32; Lucas 13.18-19
30Ax ikx o tma Jesús:
—¿Chi tok kyu'ne ti'j tkawb'il Dios? ¿Tza'n tten? Ex ¿alkye jun techal ktzajel qi'n ti'j? 31Ik tten tkawb'il Dios ik tza'n twitz mostaza ok in ku'x awet tuj tx'otx', mas tal ch'inxix twitz txqantl iyaj at twitz tx'otx'; 32ex ok in ku'x awet, in tzajtzun ch'iy, ex ma' nno'ka kywitz txqantl itzaj, ex ma' in che ok qe tq'ab', kyja'tzun in che okx ten qe chyu'j t-xol tq'ab' tjaq' t-xlekumal.
Alkye tajb'en qe techal in tma'n Jesús
Mateo 13.34-35
33Tej tyolin Jesús kyuk'il xjal, nimku techal xi tma'n kye, ik tza'n qe techal lu, alkyeju tu'n tel kynik' ti'j. 34Puro tuj techal o yolin Jesús kyuk'il xjal, ex xi tchik'b'a'n tkyaqil kye t-xnaq'tzb'en tej kyten kyjunalx.
We' jun nintz kyq'iq' tu'n Jesús
Mateo 8.23-27; Lucas 8.22-25
35Ax q'ij tej tok qax, xi tma'n Jesús kye t-xnaq'tzb'en:
—Qo ik'x jlajxi laguna.
36E kyajtzun ten kykyaqil xjal kyu'n xnaq'tzb'en, xi'tzun q'i'n Jesús kyu'n t-xnaq'tzb'en tujx barc jatum q'uql; ex at txqantl barc e je'x lpe' ti'j. 37Ex tzaj jun kyq'iq' nimxix, ex jaw pulin a' tu'n kyq'iq', okx tuj barc, kyja'tzun ch'ixtoq t-xi mulq'aj barc tuj a'. 38Atzunte Jesús otoq tzik' tan ttxa'n tje' barc, tx'ayl tib'aj jun xq'anwi'; jawtzun kyk'asun, ex xi kyma'n te:
—Xnaq'tzal, ¿minti'pe taja qi'je, qo najele?
39Jawtzun we' Jesús, xi tmayo'n kyq'iq' ex xi tma'n te a':
—Mi'n q'ajta. Numekuya.
We'tzun kyq'iq', b'i'xtzun take' tkyaqil. 40Xitzun tma'n kye t-xnaq'tzb'en:
—¿Tiqu'n in che xob'e? ¿Tza'n tten minti' kyokslab'le? Chi Jesús.
41Tzajtzun nim kyxob'il, ex kyma kyxolx:
—¿Alkyetzunju xjal lu? Porke tuk'ix kyq'iq' ex a' in xi kyniman tyol, che chi xnaq'tzb'en.
Markert nå:
Marcos 4: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
