Marcos 3
3
B'anix jun xjal tzqijtoq tq'ab'
Mateo 12.9-14; Lucas 6.6-11
1Okx juntl maj Jesús tuj ja te k'ulb'il ex otoq pon jun xjal tzqij jun tq'ab'. 2In che q'on xjal kwent ti'j Jesús qa tu'n tb'ant ju xjal tu'n tuj q'ij te ojlab'l, tu'ntzun tkub' tz'aq Jesús tuj jun til kyu'n. 3Xitzun tma'n Jesús teju xjal tzqij tq'ab':
—We'ktza ex we'kuya kyxol xjal.
4Xitzun tqanin Jesús kye txqantl xjal:
—¿Q'o'npelo tu'n ley tu'n qb'inchante jun b'a'n tuj q'ij te ojlab'l ex qa tu'n qb'inchante jun mya b'a'n? ¿Q'o'npelo tu'n tklet jun xjal ex qa tu'n tnaj? Chi Jesús kye.
Atzun kye minti' e q'ajt. 5Xi tke'yin Jesús kywitz kykyaqil ti'jele, tzaj tq'oj, ex tzaj nim tb'is tu'n tlaj kyuw kyanmi. Xi tma'n Jesús te xjal tzqij tq'ab':
—Nuqpi'mil tq'ab'a.
Atzunte xjal el tnuqpi'n tq'ab', ex kyaj b'anix tq'ab'. 6Tejtzun kyetz qe fariseo, e yolin ti'j kyuk'il qe tpartid Herodes, b'ant ti'j kyu'n tza'n tten tu'n tkub' Jesús kyu'n.
Nim xjal e pon ttzi laguna
7Atzunte Jesús el tpa'n tib', xi' ttzi laguna kyuk'ix qe t-xnaq'tzb'en, ex nim xjal e ok lpe' ti'j e tzaj tuj tx'otx' Galilea. 8Ax ikx e tzaj tuj tx'otx' Judea, ex tuj tnam Jerusalén, ex tuj tx'otx' Idumea, ex e tzaj jlajxi nima Jordán, ex e tzaj kyuj qe lugar ti'jele tnam Tiro ex tnam Sidón, porke o kyb'i nimku tb'inchb'en Jesús in b'ant tu'n, kyja'tzun e pon nim xjal tuk'il. 9Xitzun tma'n Jesús kye t-xnaq'tzb'en tu'n tb'ant tten jun barc tu'n tlaj nimku xjal, tu'ntzun mi'n tok b'etz'an Jesús kyu'n xjal. 10Ex nimku xjal otoq che b'anix tu'n, kyja'tzun e pon tilj xjal ti'j Jesús, aqeju at kyyab'il, tu'n tok kymako'n ti'j Jesús.
11Atzun qe ju'ẍ, tej tilwaj Jesús kyu'n e kub' ẍmeje' twitz, in che sch'in wen:
—Aya Tk'wa'l Dios, che chi.
12Ex kyuw xi tma'n Jesús kye ju'ẍ tu'n mi'n t-xi kyma'n alkyete Jesús.
E jaw t-sk'o'n Jesús kab'laj t-xnaq'tzb'en
Mateo 10.1-4; Lucas 6.12-16
13Tb'ajlenxi jlu jax Jesús twi witz, ex e tzaj ttxko'n alkye qeju at tgan kyi'j; e pontzun tuk'il. 14Ex jaw t-sk'o'n Jesús kab'laj t-xnaq'tzb'en tu'n kyten tuk'il, ex tu'n kyxi t-sama'n pakb'al; 15ex xi tq'o'n kyoklen tu'n kyb'anix qe yab' kyu'n, ex tu'n kyetz qe ju'ẍ tuj kyanmi xjal kyu'n. 16Aqeju e jaw t-sk'o'n atzun qe jlu: Simón, aju Pedro tkab'in tb'i ok tq'o'n Jesús; 17tuk'ix Jacobo aju tky'ajal Zebedeo, tuk'ix Juan aju titz'in Jacobo, aqe jlu Boanerges tkab'in kyb'i ok tq'o'n Jesús, atzun in tma'n, ik kymod ik tza'n q'ankyoq; 18tuk'ix Andrés, tuk'ix Felipe, tuk'ix Bartolomé, tuk'ix Mateo, tuk'ix Tomás, tuk'ix Jacobo aju tky'ajal Alfeo, tuk'ix Tadeo, tuk'ix Simón aju toktoq te tajlal kyxol jun partid xjal cananista kyb'i, 19ex tuk'ix Judas Iscariote, aju xi q'onte Jesús tuj kyq'ab' xjal.
In tzaj tq'o'n ju'ẍ tipumal Jesús, che chi fariseo
Mateo 12.22-32; Lucas 11.14-23; 12.10
20Ultzun Jesús tuj ja jatum in posadiyin kyuk'ix qe t-xnaq'tzb'en. Ok kychmon kyib' juntl maj qe xjal, kyja'tzun minti' tumel tu'n twa'n Jesús kyuk'ix t-xnaq'tzb'en. 21Tejtzun kyb'inte qe terman Jesús, e ul q'il te porke in kyma'n qa otoq tz'ok te tzkaj.
22Ax ikx kye xnaq'tzal ti'j ley otoq che tzaj tuj Jerusalén in kyma'n:
—Ate xjal lu at Belsebú tuj tanmi, ex tu'n Belsebú aju nejenel kye ju'ẍ in tzaj q'o'n tipumal xjal lu tu'n kyetz qe ju'ẍ tuj kyanmi xjal tu'n, che chi.
23E tzajtzun ttxko'n Jesús, ex xi tma'n jun techal kye. Chi kyja':
—¿Tza'n tten tu'n tetz tlajon tib' Satanás tu'nx tib'? 24Qa at jun kawb'il at pab'l tib' tuj ex in che q'ojin xjal kyxolx, aju kawb'il lu mya kukx ktel. 25Ax ikx jun ja xjal qa in che q'ojin kyxolx, aju ja xjal lu mlay che ten junx. 26Ax ikx te Satanás qa ma tz'ok ten q'ojlel ti'jx, ex qa tpa'n tib' tkawb'il, mlay b'ant kukx tu'n tten, knajeltzun tipumal.
27Mlay tz'okx jun xjal tuj tja juntl xjal at tipun ex mlay tz'etz telq'a'n aju at tuj tja, o'kx qa ma kub' tk'alo'n ju xjal nej, tu'njlu jakulo tz'etz telq'a'n tkyaqilju at tuj tja.
28Ax tok kxel nma'ne kyeye, jaku najset tkyaqil kyil xjal tuk'ix tkyaqilju mya b'a'n in kyma'n, 29ex alkye jun xjal ma yolin mya b'a'n ti'j Xewb'aj Xjan, mlay kub' najset til te jumajx, kb'el t-sentens te jumajx tu'n tlaj til, chi Jesús kye xnaq'tzal ti'j ley.
30Xi tma'n Jesús jlu kye porke in kyma'ntoq qa at ju'ẍ tuj tanmi.
Pon ttxu' Jesús tuk'il, kyuk'ix qe titz'in
Mateo 12.46-50; Lucas 8.19-21
31Tb'ajlenxi jlu pon ttxu' Jesús kyuk'ix qe titz'in, ax e kyaj ten ttxa'n pe'n, ex okx txokb'aj Jesús kyu'n. 32Atzun qe xjal q'uql qe'toq ti'jele Jesús xi kyma'n te:
—Lu ttxu'ya ex qe titz'ina ate' ttxa'n pe'n, in che jyon ti'ja.
33Xitzun tma'n Jesús kye:
—¿Alkyetzun ntxu'ye, ex alkyetzun qe witz'ine?
34Xitzun tke'yin kywitz qeju q'uql qe'toq ti'jele.
—Atzun ntxu'ye qe jlu ex atzun qe witz'ine. 35Ex alkyeju in tb'incha'n tajb'il Dios, atzun witz'ine, ex atzun wanb'e, ex atzun ntxu'ye, chi Jesús kye.
Markert nå:
Marcos 3: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
